Dwagi Yai Gesi Po Jongo Asęani 7:37 - Godigo dwagi yai po buku

³⁷ Te olo bidibo si silibo side, te genuai side dao, wai. Te tebo side Jisas dolaluyu, bomo olama, i wai, “Bidi me deli ąį nogone ebaso da, te bidi ena pageba aselama, ąį tuagasao.

Dwagi Yai Gesi Po Jongo Asęani 7:37 Referans Kwoze

Aisaia 55:1

Genuai Bidigo te po wai, “Tega, dage te ąį nogonego sabo we bidi dabe, dage enaba aselama, dage wę tuagasao. Dage te mone meni yani hani dabe, dage enaba aselama, te dage nai sela tuagasao, te aselama te ąį wain me hasa bulmakaugo ame pę ąį sagasao, te monego me abeligobeo.

Dwagi Yai Gesi Po Jongo Asęani 4:14

Tialima, bidi me deli eno mabo ąį tuyu da, tigidali sogo te bidi ąį nogone ma egobeo. Te ąį eno mawainogo ebo ąįgo da, te tama tiaibao, te ąį da bidabo bomo mabo wę ulu pedalubo ąǫ te bidi tigi tomode tiwai yaibao. Tama te ąį tigidali sogo pedaliyu, te bidi mu bidada peyu, mu bidada paibao,” Jisasgo te po wai.

Dwagi Yai Gesi Po Jongo Asęani 6:35

Jisasgo augwalibolo te po wai, “Ena digi ena bidabo bomo mabo bret dao. Bidi agai homu enaba muyu, ena pageba asobaso da, te bidi aga nasi munu me egobeo. Tama bidigo aga homu tigidali enaba mu baso da, te bidi aga ąį nogone munu me egobeo,” Jisasgo te po wai.

Aisaia 12:3

Tǫ dedagede wę sia sabo menio. Agai te wę te nai dabebolo mabo dao. Tama augwali bugagia bidibo dao. Genuai Bidi te sia sisąbo wę tiwai dao. Tigidali sogo agai dage tau sabode dage bugagia dąų olama, bidimainu ebo dao. Tama tibaso, dage agaba wiegi yai homu dali pelama, tama Genuai Bidibolo dage tau somainu hanalugi paibao.

Kraisgo Geme Dualali Sę Pedelabo Po Jonbolo Ola Mani 22:17

Te Godigo Mobo Bidi dali, te Kibu Sipsip Waigo we dali sigo te po obao, “Nage asao.” Tama e po odali we bidi tigidali augwaligo me te po wao, “Nage asao.” Tama te wę nogone ebo bidi, aga asomainao. Wę tuainogo ebo bidi, aga aselama, te bidabo ula mabo wę tuagasao, te Godigo agabolo olo mu mawaibao.

Aisaia 44:3

Te ąį sǫą pabo tǫba eno te ąį gelaibao, tama te wa pai tǫde te ąį somainu ilaibao. Te eno mobo bidi te dagego wai dabeba gelaibao. Te eno dagego waigo ame nabo wai dabeba wiegi yai bugagia ilaibao.

Dwagi Yai Gesi Po Jongo Asęani 4:10

Jisasgo te webolo po wei ponoyu, te po wai, “Nago te God agai te we bidibolo olo mabo nai konegi sogo da, tama ena mena bidigo nagebolo ‘Aį ena mao, ena tueio’ obao konegi sogo da, te si nago konegi sogo da, teda nago ena hanalu olama, eno nagebolo te bidabo bomo elalubo ąį mao wagi da,” Jisasgo te po wai.

Kraisgo Geme Dualali Sę Pedelabo Po Jonbolo Ola Mani 21:6

Agai enabolo te po ma wali, “Te sę tigidali pedela silalio! Ena da, ena digi te hasia bidaluali bidi dao, ena te nosali mu sogo bidalueibao wali bidi mu dao, te ena tigidali nai page bidi, tama eno ebo sę tigidali ela silibo dao. Tama niwai bidi aga te ąį nogone ebaso da, teda eno te bidibo ula sabo ąį te wę ulude selama tama agabolo olo mawaibao.

Godigo Nogi Ugwaba Sabo Tęąbi Po Wabo Buku Dabe 42:2

God, nage te bidibo ula elalubo God da, tama eno nage wei homu mu ebao, te bidi aga dogoni wa pobaso, te wę tuainu ebo tiwai yaibao. God, mena sogo te ena nageba aselama, tama te moni lotu be tempelde nageba lotu wagowe?

Godigo Nogi Ugwaba Sabo Tęąbi Po Wabo Buku Dabe 63:1

O God, nage eno God dao. Eno nage gegebo sę bomo ebao. Te eno homu ogwa waigo te nage dali bidabo homu godolo mu ebao. Eno tigigo me, te nage dali bidabo homu godolo yali, te bidi te wę meni yai wa pai bulude te wę nogonego sabo tiwai gilama yai.

Godigo Nogi Ugwaba Sabo Tęąbi Po Wabo Buku Dabe 143:6

Eno nogo si ugwaba siyu, gedu haluasa po nageba weyu, tama eno homu noma ogwa waigo te nage wei mu elama, te bidigo dogoni wa selama, tama aga te wę nogone mu ebo tiwai ebao.

Kraisgo Geme Dualali Sę Pedelabo Po Jonbolo Ola Mani 22:1

Tama te ensel mobo bidigo pabo ąį me deli ena ola mawai, te bidibo ula mabo wę, tama te wę te dula ula mu gegemani ebo tiwai ula yai. Tama te ąį aga gomo, te God dali te Sipsip Wai augwali sigo tuni bidi duabo sai pagede te ąį gomo elalubao.

1 Korin 12:13

Tama da me te tiwai elalubao. Te da meba te Juda hani da, da meba te Juda hani bidi ąǫ isąwai bage dao, meba te masigi sisąbo olo sę ebo we bidi da, meba olo sę isiąwani we bidi dao. Tiali goli te Tedali Mobo Bidi delide naga da tigidali te baptais selama tama deli tigi poaį naga pedelali, tama Godigo te Tedali Mobo Bidi deli naga dabolo mawai dao.

Dwagi Yai Gesi Po Jongo Asęani 6:55

Magi basowe? Eno tigi te tubo nai mu dao, tama eno kaneme te mu tubo ąį dao,” Jisasgo te Juda bage dali wai.

Matyu 11:28

“Dage we bidi dabe sę dene genuai eyu sęgę yai nai tolobo tiwai we bidi dabe, dage tigidali enaba asao, te eno dage tau siyu, tama dagego toma tueibao.

Israel Hanigo Namba 29:35

“‘Tama te dei namba 8, tede dage sisinama, lotu wao. Tama te sogo dagego sę me elamu dao.

1 Korin 10:21

Dagego te dago Genuai Bidi Kraisgo kap wain wę tuyu, te dwai haubo noma bagede lotu wainogo eyu augwaligo kapde dali si wę tuyu ebo usu me egobeo. Te dagego dena Genuai Bidigo ni nami tebol saide nai tuyu, te dwai haubo noma dabego lotu bede tebol saide nai dali si tuyu ebo te usu me egobeo.

1 Korin 10:4

Tama augwali tigidaligo te Godigo Tedali Mobo Bidigo augwali mani ąį te augwaligo tuali. Awe, augwaligo te Tedali Mobogo te genuai sau pado masigidu asobo ąį tuali, te masigi augwali dali hodobo pai. Te masigi te Krais aga digi dao.

Aisaia 58:1

Genuai Bidigo enabolo te tiwai po wali, “Nago genuai po dągą mu olama, i wao, dua digi i me wagio. Nago bomonama i wabo, te bu wabo nai biugel bu wabo tiwai yao. Te eno we bidi dabeba weyu, te Jekopgo hani dabe, te augwa dwai sęgę me dwai kolesaga po wao,” po wali.

Pris Sę Ebo Bomai Po 23:36

Dagego enaba te Sarere usu nama ofa tigidali side yao. Te 8 wabo side, dage ma sisinama, lotu weyu, te dagego ofa yao. Te dei 8 wabo side da, te lotu wabo side naga dao, te dagego sę me igio,” te po wai.

Efesus 5:18

Te dage te bomo yai ąį hauwa tulama te polobo bidi tiwai egimio. Menio. Te tebo kolesagago dageba daganama dolainogo ebo dao. Dagego God agai wiegi yai Mobo Bidigo dageba daganama tonalumainao, te dage bugagia bidimainogo yao.

1 Korin 11:25

Augwaligo augwa hulide tuabo nai tula silibo si, tama agai te kap me selama, tama tiwai naga Godibolo puba hwi po olama, tama augwalibolo mayu te po wali, “Te kapde elalubo wain ąį te eno kaneme dao. Tama te kanemego eno te gesi dąų wali po dąų obao. Tigidali sogo dagego e ąį tubaso da, teda dagego tama tiyu ena homugo konealuao,” te bidi Jisasgo te po wai.

Dwagi Yai Gesi Po Jongo Asęani 14:6

Jisasgo Tomasbolo te po wai, “Ena digi ena te pabo tų dao, tama ena mu po wabo page dali, bidabo ula page dali te enade elalubo dao. Tialima bidi me deli Aya pageba gasa tųdu nogo habu sugunai tųdu me pogobeo. Pabo tų ena deli dao.

Dwagi Yai Gesi Po Jongo Asęani 6:37

Eno Ayago enabolo mabo we bidi tigidali augwali ena pageba asaibao, ena wali asomainogo. Ena pageba asobo bidi te aga eno me sela sągobeo, mu menio.

Dwagi Yai Gesi Po Jongo Asęani 5:40

Tiali digi dage enaba aselama, bidabo bomo sagasobo hagela homu ebo dao,” te po wai.

Dwagi Yai Gesi Po Jongo Asęani 1:23

Tama Jongo te po wai, “Te polobadu bidai bidi nogi Aisaia, Godigo po polo ola mani profet bidi, agai te tobage po wai, ‘Bidi me deligo bidi meni yai bulu tomode agai bomonama i weyu, te po obao, “Te Genuai Bidigo asabo tų dodolao.” ’ Te po wabo bidi ena dao,” Jongo te po wai.

Sekaraia 9:15

Tama Genuai Bidi Tigidali Bomo Elalubo Bidigo te aga we bidi tudi badu tonalu posolalueibao, tama augwaligo augwa boi bidi dabe ela silaibao. Te boi hwįbo side te augwaligo i wabo te bomai ąį tuai bidigo i hae wabo tiwai eyu, tama augwaligo te boi bidi dabe ela mueibao. Te boi bidi dabego kaneme te augwaligo te ofa yainu te poude tabilama te altaba gealubo tiwai yaibao.

Maika 6:9

Te dago Genuai Bidiba wi homu ebo, te wiegi yai homu kolesaga dao. Genuai Bidigo te Jerusalemba i weyu, te tama po wai, “Dage te taunde bidibo we bidi dabe, dagego odiąo, te dage dene mabo bomo elalubo bidigo wabo po sao,” wai dao.

Jeremaia 16:19

Genuai Bidi, nago ena dąų walama, ena obogo bagualubao, te nago ena te sęgę ebo sogo tau sobao. Te tigidali digibulu tǫ habu we bidi hani te nageba asama, augwa te tiwai po waibao, “Te dago wąį nǫų dabego tibo god, augwali te mu god menio. Augwali te olo bage tiwai elalu, te da tau sabo usu me ebe dao.

Jeremaia 2:2

“Nage pelama, Genuai Bidi eno te po te Jerusalem dabeba pusugi pao,” wali. “‘Eno homugo dage homu konealudu, dage eno we bidi hani pedelali sogo dagego duga homu enaba kęą pai. Te sogo dagego ena godolo mu yali, te gesi tamadi sai wego aga bidi godolo mu ebo tiwai yali. Te Isip tǫ kantri tagalama, dagego te dwai masigi kemi olo tǫ bulude, te bidi dabego gi bulusiąwai pesagede bilali goli, te dagego ena wali piduai dao.

Aisaia 55:3

“Odao, dage eno we bidi dabe dao. Dage bugagia bidimainu eyu, enaba asiąo. Te eno dage dali bomo yai po dąų walama, tama te dąų wali bomai po sesemane elalueibao. Te sesemane sogo eno dage godolo homu mu elama, te dageba wiegi yai sę yaibao. Te polobadu eno te bomo yai po te king Devitba dąų wali tiwai gilama yaibao wali.

Aisaia 40:6

Bidi me deligo te tiwai i wali, “Po pusao.” Te eno po me wali, “Mena po eno pusagawe?” Te agai te tiwai po wei ponani, “E po pusao. Tigidali we bidi te tǫde sesabi elama, bobobage sogo mu me bidigobeo. Augwali te nosai me plaua te polo tama wa pelama, te sia sabo tiwai ebo dao.

Nehemia 8:18

Augwaligo te genuai side te lotu wabo sogo te a naga olama, me badu si, te tama sogo bodolu muani, tama te tigidali side Esrago te bomai po elalubo bukude te Godigo bomai po meba te we bidiba neda mawai. Tama te 7 wabo side tigidali sisinama, tama te genuai side sia sabo lotu po walio, te bomai pode wali po tiwai gilama yai dao.

Pris Sę Ebo Bomai Po 23:39

“Te 7 polua 15 dei wabo side, te dagego tau yali nai sela aselama nosali, dagego te nogo a naga olama. me si wabo genuai si te osogo bidabo bede bidiyu, te ena Genuai Bidiba homu kone palao. Te hasia wabo dei me dei 8 wabo side, dage toma nabo side sę tagalama, bidao.

Dwagi Yai Gesi Po Jongo Asęani 7:28

Tama Jisas agai te Moni Lotu Be tempel tomode te we bidi agai po ola mobadi, agai i bomo elama weyu, te po wai, “Ao, dagego ena koneai dao, eno page bulu be dagego koneai dao. Tiali digi, ena homugo digi ena me asobeo. Ayago ena tagala palobaso, ena asai dao. Agai kolesaga te mu tama dao. Dagego aga me konebeo.

Aisaia 40:2

Te wiegi yai po te Jerusalem we bidi dabeba mao,” wali. “Augwaliba te tiwai po wao, te augwali kalabus bidali sogo te silalio. Ena Genuai Bidi, eno te augwaliba te augwa yali dwai sęde wei ponoma, te dwai dene mawai dao. Awe, eno augwaligo yali dwai sę dolo usu nama, tama te tiwai si naga te dene mawai dao. Tama tialima, megi da, eno augwaligo dwai sęgę tigidali sela sąwai dao.”

Solomon 5:1

Eno we, nage eno hobolu du mu da, ena te ena giba asalio. Tama eno te wiegi yai denami ebo nai dabe sisinagasali. Eno te wiegi yai pusu yai nai hani tuali. Te eno ame pę me wain dali tuali. Dage si abagi wali wiegi yai mu da, dage si nai me ąį tuao, dage si mu pągąną pao.

Bugagia Bidibo Kolesagade Po Asęai Buku 8:3

Tama aga te genuai taun hanu bagulali obo te sunumi dabe pąde dolalu, tama te tiwai i wabo sę iduaibao,

Matyu 3:3

Jon da, te agade Godigo te aga po pusali bidi Aisaia te profetgo pedauwalide wali po usu nani bidi dao. Aisaiago polobadu e po weyu asęani, “Te bidi meni yai bulude bidi me deligo i weyu, bomonama te po obao, ‘Genuai Bidigo asabo tų sisi ilao. Aga tų dabe dodolao,’” te po asęani.

Bugagia Bidibo Kolesagade Po Asęai Buku 9:3

Agai te aga sę ebo we dabe tagala palama, te taun pesage tomoba doligi pelama, tama augwaligo te tiwai i wali,

Bugagia Bidibo Kolesagade Po Asęai Buku 8:1

Wiegi yai doloba pai homu kolesaga te we me deli dolugulama, te da i wabo tiwai ebao.

Bugagia Bidibo Kolesagade Po Asęai Buku 1:20

Te wiegi yai doloba pai homu kolesaga te tiwai, te we me deli te sunumi tunu mage dabeba doligi pelama, me te maketba pelama, tama te we bidi dabeba po olama, i wabo tiwai ebo dao.

Bugagia Bidibo Kolesagade Po Asęai Buku 8:17

Tama mena we bidi dabego ena gegebo sę bomo eyu da, teda augwaligo ena sueibao. Mena we bidigo ena wei yali da, eno me te eno augwali wei mu yaibao.

Esekiel 47:9

Tigidali haniani ąį hasa dabe te ąį pabo pesagedu tama bidaibao. Tama te ąįde sųgų hauwa mu bidaibao. Magi baso meni. Te ąįgo sigi ąį Detsigo tamu ąį wiegi yai ilaibao. Tama te ąį pabo pesage tigidali badu da, te tigidali nai dabe holoyu naga yaibao.

Matyu 5:6

Tama te doloba pai kolesaga sainogo bomo eyu godolo ebo we bidi dabe augwali wiegi yai homu pemene emainao. Te homu tiwai ebo we bidi dabe augwaligo homu kolesaga te Godigo augwali mu usu nama te tiwai pedelaibao.

Dwagi Yai Gesi Po Jongo Asęani 4:11

Te wego Jisasbolo te po wai, “Genuai Bidio, nago ąį tuabo nai meni. Tama te ąį tubo dedage aba mu dao. Tama tiyu da, nago te bidabo bomo elalubo ąį menade saibawe?” te wego Jisas dali te po wai.