Dwagi Yai Gesi Po Jongo Asęani 6:61 - Godigo dwagi yai po buku

⁶¹ Bidi mego agabolo te po wasiąbadi, Jisas aga digi koneai, aga wali pabo bage hauwa augwa hasi tomode te hagelabo po wai. Tama tibaso, agai augwalibolo te po wai, “Eno wali pode dage sębę elama, dagego ena tagalaibawe?

Dwagi Yai Gesi Po Jongo Asęani 6:61 Referans Kwoze

Dwagi Yai Gesi Po Jongo Asęani 6:64

Tiali digi, me badu bidi dage tomode augwaligo enade bomo yai homu dąų olama, mube,” Jisasgo te po wai. Polobadu digi, aga sę ebo gagalali sogode, Jisas aga koneai agade bomo yai homu dąų olama, musiąbo bage. Tama aga koneai me, te aga te boi bidigo nogoba sela maiabo bidi, te me agai polobadu koneai.

Kraisgo Geme Dualali Sę Pedelabo Po Jonbolo Ola Mani 2:23

Tama agai wai dabe me, te eno augwali mu ela silaibao. Tama tiyu, te Godigo po odobo we bidi tigidali augwaligo koneaibao, te ena da, te tigidali bidigo homu kolesaga osola subo bidi dao. Tama dage deli delibolo eno dagego yali kolesaga dolo si wei ponaibao.”

Hibru 4:13

Te Godigo nigali nai me deli te God agai gedude te geme dula sainogo ebo te usu munu me egobeo. Menio. Te tigidali nai te hania mu te Godigo gedude tigidali te elalubao. Tama Godigo naga te dago ebo kolesaga tigidali dagalabo bidi dao.

Dwagi Yai Gesi Po Jongo Asęani 21:17

Tama bidama gana, tama sela sogo agai Pitabolo te po ma hanalu wai, “Saimon, nage Jongo ogwa dao, ena da nago abagi dawe?” Tama agai Pita dali sela sogo “Ena da nago abagi dawe?” obaso, Pita aga homu sęgę yai. Tama Pita agai Jisasbolo te po wai, “Genuai Bidi, nago tigidali nai koneai dao. Tama nago koneai dao, nage eno abagi dao,” Pitago te po wai. Tama Jisasgo agabolo te po wai, “Nago enabolo homu muani we bidi augwali eno po nago augwalibolo ola mao.

Matyu 11:6

Tama bidi enade homu si isiąma tama ena aga tudiba musiąbo bidi, te bidi aga wiegi yai homu pemene yao,” Jisasgo te po wai.

Matyu 17:27

Aga homu agai te takis mone masiąbaso da, te usu da, te homu eyu tama agai Pitabolo po me wai, “Tiali goli, e takis sabo bage augwaligo da si dali dwai homu idali weyu, tama nage te sigi ąįba pelama, te sųgų sabo huk te ąįba sągi pao. Tama nago hasia sabo sųgų, te nago selama penane pedegao, tama nago te sųgų tomode te mone ge me deli sueibao. Te mone ge nago selama, augwalibolo mao, te dadi si talua sigo takis mone usu nama muaibao,” Jisasgo te po wai.

Dwagi Yai Gesi Po Jongo Asęani 16:19

Augwaligo Jisas aga dali hanalu wainogo ebo agai koneai. Tama agai augwalibolo te po wai, “Dagego eno wali pode tama duga hasi te po page hanalu obawe? Eno te po wai, ‘Nosali ganama dagego ena sugobeo, tama nosali ma dwasianu sogo te dagego ena ma sueibao,’ te pode dagego hanalu obawe?