Dwagi Yai Gesi Po Jongo Asęani 6:40 - Godigo dwagi yai po buku

⁴⁰ Eno Aya agai homu tama telalubo, aga ogwa osola suyu, agabolo bomo yai homu dąų olama muyu yai we bidi tigidali te augwali bidada peyu bidada pabo bomo selama, mu bidaibao. Tama augwali eno te tǫ dali dagalu dali silibo sogode augwali eno digi ma hodolaibao, ma bidimainogo,” Jisasgo te po wai.

Dwagi Yai Gesi Po Jongo Asęani 6:40 Referans Kwoze

Polgo Po Pas Rom Dabeba Asęani 6:23

Magi baso meni. Te dwai sęgo te aga sę ebo bidi augwalibolo te pe mabo dao. Te mabo pe te isibo sę naga dao, augwali te God dali dagalama tama aga dali bidada peyu bidada pogobeo. Tiali goli te da te ula sabo dolo meni yai goli, Godigo dabolo te wiegi yai olo mabo kolesaga eyu, te sesemane sogo bidibo ula mawaibao, te da te dago Genuai Bidi Krais Jisas dali wadolali we bidi dabolo agai te ula olo naga mawaibao.

Dwagi Yai Gesi Po Jongo Asęani 6:54

Bidigo eno tigi tuyu, tama eno kaneme tuali bidi da, aga bidada pabo bomo elaluaibao, tama eno aga te tǫ dali, dagalu dali silibo side aga ma hodolaibao.

Dwagi Yai Gesi Po Jongo Asęani 5:24

“Te eno mu po dagebolo obao, niwai bidigo eno po odama, tama te po wali pelama, tama ena tagala palali bidibolo te bidi agai bomo yai homu agabolo muyu da, te aga bidada peyu, bidada pabo bomo selama, bidaibao. Te bidi aga po tų aga dali me egobeo. Te agai isibo tagalama, tama megi aga bidabo bomode bidibao.

Dwagi Yai Gesi Po Jongo Asęani 11:25

Jisasgo te po wai, “Isai bidi hodalobo bomo dali, bidabo bomo dali, te ena digi eno tonalubo dao. Bidigo enabolo homu dąų olama, muani bidi isali, te aga bidabo bomo selama, ma bidaibao.

Dwagi Yai Gesi Po Jongo Asęani 4:14

Tialima, bidi me deli eno mabo ąį tuyu da, tigidali sogo te bidi ąį nogone ma egobeo. Te ąį eno mawainogo ebo ąįgo da, te tama tiaibao, te ąį da bidabo bomo mabo wę ulu pedalubo ąǫ te bidi tigi tomode tiwai yaibao. Tama te ąį tigidali sogo pedaliyu, te bidi mu bidada peyu, mu bidada paibao,” Jisasgo te po wai.

Dwagi Yai Gesi Po Jongo Asęani 14:19

Nosali gana tǫde hulia sai we bidi augwaligo ena ma sugobeo. Tialima, dagego ena nosali ma sueibao. Dagego ena ma subo sogode ena bidibo ula elalubaso, tama dage dali me te bidibo ula elalu, bidaibao.

Dwagi Yai Gesi Po Jongo Asęani 12:45

Tama niwai bidigo aga gedugo ena suali bidi, agai te ena tagala palali bidi me subo.

Dwagi Yai Gesi Po Jongo Asęani 6:27

“Dagego te mobia pabo nai naga sabo sę tiwai dagego egimio. Te menio. Dagego te bidada peyu bidabo bomo mabo nai sabo sę yao. Te tiwai nai Godigo Bidi Mu agai dagebolo mawaibao. Magi basowe? Aga Aya Godigo te bidide dwagi yai homu eyu, sa muai,” Jisasgo te po wai.

Dwagi Yai Gesi Po Jongo Asęani 3:36

Niwai bidi agai homu tigidali te Godigo Ogwaba mubaso, te bidigo bidabo bomo da bidada peyu, bidada paibao. Tialima, niwai bidigo Godigo Ogwago po wali pisąbaso da, te bidi aga bidabo bomo me sogobeo. Menio. Godigo sębę te bidide elalua paibao.

Dwagi Yai Gesi Po Jongo Asęani 1:14

Te Po aga digi bidi pedalai, tama da we bidi tomode aga bidai. Dago agai genuai nogi dali agai moni bomo dali si suai. Te Godigo Ogwa deligo genuai nogi dali bomo dali si dago suai. Agai te we bidi olo tau sabo sę hauwa eyu, te agai mu po naga weyu yai.

Dwagi Yai Gesi Po Lukgo Asęani 2:30

Eno gedugo nago da ma sainu yali sę eno sualio.

1 Jon 2:25

Tama aga digi agai dabolo aga dąų wali po tama wai, agai da sesemane sogo bidabo ula mawaibao, te po wai.

Aisaia 52:10

Genuai Bidigo agai bomo hania ola mayu, te tigidali tǫ kantrigo sumainu yaibao. Dago Godigo te aga we bidi dabe ma saibao, tama te tigidali tǫde we bidigo sueibao.

Dwagi Yai Gesi Po Jongo Asęani 17:2

“Tama nago ena sa muyu, moni bomo mayu yai dao. Ena te tigidali tǫde we bidigo genuai bidi dao weyu, tama nago te bomo enabolo mawai dao. Magi basowe? Te bidada pabo bomo te we bidi nago enabolo mani we bidi augwali eno te bidada pabo bomo mawaibao, te homu eyu, nago enabolo te nogi yai sę mawai dao. Tama te bidada pabo bomo menama, tama augwali bidada peyu, bidada paibao, gamonaibao.

Dwagi Yai Gesi Po Jongo Asęani 10:28

Tama eno augwali bidada peyu, bidada pabo bomo mobao, tama augwali munu me isigobeo, hagagobeo. Menio. Bidi me deligo augwali eno nogode ma dobola sabo usu egobeo.

Jutgo Asęani Pas 1:21

Tama God agai dage dali dwagi yai homu eyu godolo mu ebo dao. Tama tibaso, dage duga ebo kolesagade bugagia tonaluyu tama dage aga pąde mu bidaluao. Tama tiyu, te dago Genuai Bidi Jisas Krais dagego tonaluao, te agai dage dali homu dene eyu, tau siyu elama tama agai te dagebolo te bidada peyu, bidada pabo ula mabo sogo te dagego bugagia tonaluyu bidiąo.

1 Pita 1:8

Tama dagego duga gedugo aga munu me susiąwai digi, dagego Kraisde dwagi yai homu eyu godolo ebo dao. Dagego megi me aga susiąbadi digi, dagego duga homu tigidali agaba muyu, tama wiegi yai homu mu ebo dao. Tebogo te tigidali gasagi yai dwagi yai homu ebo aiyaba elalubo dao. Tama te dagego wiegi yai homu ebo te genuai mu dao, augwaligo Godigo bidibo digide ebo wiegi yai homu ebo sabi si dao. Tama tialigo da, dagego pedauwaligo tede po wabo usu egobeo.

2 Korin 4:6

Magi baso meni, e tiwai dao. Polobadu mu Godigo te po wai, “Te be hulia sai madi ula pedalomainao,” wai. Tama te po wali God aga ula digi da dali bidibao, tama da homu ula mu ilibo. Te ula e dao: dago te Godigo bomo yai ula te Krais gesabidide elalubo koneai dao.

Polgo Po Pas Rom Dabeba Asęani 5:21

Tama tiyu te olo tau sabo wiegi yai kolesagago te dwai sę aiyaba mu elalubo dao. Magi baso meni, te dwai sęgo te isibo kolesaga nigilama, tama te isibo kolesagago da tigidali aiyaba elaluyu bidai. Tiali goli te tiwai me megi Godigo te olo tau mabo wiegi yai kolesaga te ugwadu daide bidibao. Te kolesagago da megi tonalubo dao. Godigo te olo tau mabo wiegi yai kolesaga elama tama da doloba pai we bidi nogi obaso, dago te sesemane sogo bidada peyu, bidada pabo ula elalubao. Dago te ula dago Genuai Bidi Jisas Kraisgo sęde sai dao.

Dwagi Yai Gesi Po Jongo Asęani 12:50

Tama eno koneai, eno Ayago pogo te bidada peyu, bidada pabo bomo te we bidibolo mabo dao. Tama tibaso, eno wabo po tigidali agai enabolo wali po eno te po tigidali wabo dao,” Jisasgo te po wai.

Dwagi Yai Gesi Po Jongo Asęani 8:56

“Duga wąį mu Abraham agai ena e tǫba nosali bidagasaiba, te agai polobadu koneyu tama agai dwagi yai homu yai. Tama agai ena bidagasobo sulama tama agai tede dwagi yai homu mu yai dao,” Jisasgo te po wai.

Dwagi Yai Gesi Po Makgo Asęani 16:16

Te enade konealubo po dąų olama, tama aga homu enaba tialuyu tama te baptais sabo bidi, aga te Godigo ma dobola selama, tama aga bidi da waibao. Tiali goli te enade te konealubo po dąų me wasiąwani bidi, aga te po tų ebo sogode hagawaibao.

Aisaia 53:2

Genuai Bidigo aga sę bidi te olo ni me deli tiwai te tǫ pesagede pedalumainu ilali. Awe, aga te ni me deli te wa pai tǫdu pedalubo tiwai pedalali. Te sę bidigo nogi meni yai, magi baso meni, te bidi dabego gedude tonobo sawi isiąwai. Te agade te bidi dabego godolo elama, tonabo nai me deli elalusąwai.

Hibru 11:1

Te konealubo po dąų wabo kolesaga te e tiwai ebo dao: te da Godide tiąlubaso da, teda te da dwagi yai homu eyu asobo tonalubo naide da hania konebao, Godigo te nai dabolo mu mawaibao. Tama dago gedugo susiąwai nai digi, tede dago homu si isąbadi te dago homugo mu konealuai.

Hibru 11:27

Te bidi Mosesgo konealubo po Godiba dąų olama tama agade tią piduali baso, agai te tuni bidigo sębę homu ebode te aga wi me ebeo. Meni. Aga hogodolama tama Isip tǫ taga soali. Te e tǫde bidigo God gedugo me susiąbo digi, tiali goli Mosesgo te God subo tiwai yali, tama tiyu aga bomo elama geasa ma pabeo.

Dwagi Yai Gesi Po Jongo Asęani 14:17

Te bidi da, te mu po naga wabo Godigo Mobo Bidi dao. E tǫde hulia sai we bidi augwaligo aga sogobeo. Magi basowe? Augwaligo aga susuąyu, tama augwaligo te Mobo Bidi aga konegobeo. Tialima, dagego aga koneai, aga dage dali bidibao, tama aga dage deli deli tomode bidaibao,” Jisasgo te po aga bidi dabe dali wai.

Matyu 10:15

Eno mu po dagebolo obao, te tigidali we bidi po tų ebo bodolu muani sogo, te dagego po odobo hagela yai we bidi augwaligo sabo sęgę te genuai mu saibao, te sęgęgo te hanu si Sodom me Gomora side polobadu bidali dwai dwai kolesaga yali we bidigo sabo sęgę aiyaba elaluaibao,” Jisasgo te po wai.

Matyu 25:46

Tama te bidi hani augwali te dwai dene genuai sigi paibao, te sesemane sogo dene iduabo bulude bidaibao. Tiali goli te doloba pai we bidi dabe augwali da, te sesemane sogo bidada peyu, bidada pabo ula selama bidaibao,” Jisasgo te po wai.

Dwagi Yai Gesi Po Jongo Asęani 6:39

Tama te ena tagala palai bidi agai homugo tama tiwai, agai enabolo mani we bidi eno me deli hagalamuo. Menio. Agai homugo eno augwali te tǫ dali dagalu dali sia sabo sogo augwali tigidali eno ma hodolaibao.

Dwagi Yai Gesi Po Jongo Asęani 6:44

Bidi me deli ena pageba olo me asogobeo. Menio. Ayago ena tagala palobaso, ena asai dao. Tibaso, agai bidi me deli kegali da, tiali da, te bidi ena pageba asagameo. Tama te bidi eno aga nosali tǫ dali dagalu dali silibo side ma hodolaibao, aga ma bidimainogo tama yaibao.

Dwagi Yai Gesi Po Jongo Asęani 11:24

Martago te po wai, “Eno koneai, aga nosali tǫ dagalu dali silibo side hodaluama, ma bidaibao. Te sogo tigidali we bidi ma hodaluaibao,” Martago te po wai.

Israel Hanigo Namba 21:9

Tama Mosesgo te brasgo gula mani me nigilama, tama bobobage ni posde walali. Tama te gula manigo te we bidi gąǫ kelali da, teda augwaligo te bras gula maniba tonobo si da, augwali usu ma yali.