Dwagi Yai Gesi Po Jongo Asęani 20:17 - Godigo dwagi yai po buku

¹⁷ Jisasgo Maria dali te po wai, “Nago ena diągio. Ena eno Aya God bidibo digi dagaluba me pabeo. Tama tibaso, nago ena dąų ola sigio. Tialima, nage eno ama dabe bidibo digi pelama, augwali dali te po tama wagibao, ‘Ena eno Aya bidibo madigi dagaluba holobao, tama te aga dagego Aya me dao. Tama eno ena God bidibo digi pobao, tama te God dagego God me dao,’ te po eno ama dabebolo pusigi pao,” Jisasgo Maria dali te po wai.

Dwagi Yai Gesi Po Jongo Asęani 20:17 Referans Kwoze

Dwagi Yai Gesi Po Jongo Asęani 16:28

Polobadu ena Aya dali bidai, tama eno aga taga soyu, ena e tǫba dulai. Tama megi ma eno e tǫ taga peyu, Aya God bidibo digi painogo ebao,” Jisasgo te po aga bidi dabe dali wai.

1 Pita 1:3

Te dago dena Genuai Bidi Jisas Kraisgo Aya God aga nogi dago ugwaba sinao. Agai da moni homu dene mu eyu, tama da tau somainogo, agai Jisas Krais te isai bidi dabe bidibo digi tomodu ma hodolali. Tebogo dabolo te gesi noma ula mawai. Tama menama, da dwagi yai homu eyu, bugagia tonaluyu bidalubao.

Galesia 3:26

Te dage tigidali bidigo Jisas Kraisde konealubo po dąų weyu, tama dagego te konealubo po dąų wabode te dage da Godigo wai puluba dao.

Dwagi Yai Gesi Po Jongo Asęani 17:11

Tama megi da ena tǫde ma bidigobeo. Tialima, augwali da tǫde me bideibao. Tama ena da nage bidibo madigi asobao. Aya, nage magi dwai sę me isiąwai bidi, nago augwali tonaluao. Nago enabolo nago bomo mawai dao. Tama te bomogo nago augwali tonaluao, augwali me deli homu naga elama, bidimainogo yao. Dadi si deli homu elama bidibo gilama, te tiwai augwali me te emainao.

1 Jon 3:2

Abagi mu dede, megi da te Godigo wai dabe bidibao. Tama nosali da mena tama bidigowe, te dago megi bugagia hania konebeo. Tialima dago koneani, nosali Krais hania bulu ulaba pedalobo si, te sogo dago aga magi bidi dawe te dago te page mu hania koneaibao. Tama dago aga subaso, te sogo da aga tiwai gagawaibao.

Dwagi Yai Gesi Po Jongo Asęani 14:6

Jisasgo Tomasbolo te po wai, “Ena digi ena te pabo tų dao, tama ena mu po wabo page dali, bidabo ula page dali te enade elalubo dao. Tialima bidi me deli Aya pageba gasa tųdu nogo habu sugunai tųdu me pogobeo. Pabo tų ena deli dao.

Dwagi Yai Gesi Po Makgo Asęani 16:19

Genuai Bidi Jisas agai po augwaliba pusa silama, tama Godigo aga selasa te dagaluba holai. Tama megi da, aga te Godigo dolo nogo badude dualalu bidibao.

Godigo Nogi Ugwaba Sabo Tęąbi Po Wabo Buku Dabe 68:18

God te ugwanu mu yai bulu duba holama, tama agai te kalabus bidi hauwa sela pai. Agai te hagoma ebo bidi dabego te aga dali hwįani bagego nogode te haniani wiegi yai nai sela peyu, aga dali pali. God, Genuai Bidi, te bulu dude bidaibao.

Kraisgo Geme Dualali Sę Pedelabo Po Jonbolo Ola Mani 21:3

Tama eno odali, po me deli te tuni bidi dulalubo digi pedauwalidu pedalama, tama i bomonama e tama wai, “Odao! Megi te God agai bidibo digi te bidi dabe augwali dali elalubao. Tama aga augwali tomode bidiyu, tama augwali agai we bidi bideibao. Awe, God aga digi te augwali dali bideibao.

2 Korin 6:18

Tama ena dagego Aya bidiyu, tama dage eno wai ogwa me wegi me bidaibao, Genuai Bidi tigidali bomo page bidi, agai te po wai dao.”

Polgo Po Pas Rom Dabeba Asęani 8:29

Magi baso meni, te Godigo augwali polo koneani bidi dabe, agai augwali me hagea siyu tedali muani, te aga Ogwa tiwai pedalomainogo yai, tama ama name hauwa bidimai hagede yali, tama Krais te augwaligo ama gomunai bidi bidaibao.

Dwagi Yai Gesi Po Jongo Asęani 17:25

Aya, nage doloba pai bidi mu dao. Tama tǫde we bidi augwaligo nage konebeo. Tiali goli, eno da nage koneai dao. Tama e bidi dabe augwaligo konebao, te nago ena tagala palama, ena asai dao.

Matyu 28:7

Tama sulama, tama dage si polo pelama, aga wali pali bidi dabebolo te po wao, aga gų pagede ma hodalualio. Odiąo. Aga dage asabo madi polasa te Galili tǫ teba paibao, tama dagego aga tede sueibao, augwalibolo te po wao. Te eno po tama dao,” te ensel bidigo te po wai.

Matyu 12:50

Eno Aya dagalude bidibo bidi agai homu wali pabo we bidi da, te eno ama dabe me, abe dabe me ida dabe dao,” Jisasgo te po wai.

Kraisgo Geme Dualali Sę Pedelabo Po Jonbolo Ola Mani 21:7

Tama niwai bidi agai bomogo te dwai sę ebo kolesagago bomo aiyaba elalubo bidi, te bidi agai te tama siyu, tama ena agai God bidiyu, tama aga eno ogwa bideibao.

Hibru 8:10

Tama Genuai Bidigo po ma wai, “Te tama tiali sogo te hasia silali. Tama nosali eno gasa augwali tau somainogo dąų wabo po augwalibolo mawaibao. E tiwai yaibao. Te eno bomo yai po dabe tigidali te eno augwaligo homu tomoba munama, tama eno augwaligo homu kolesaga tomode te po asęaibao. Tama ena augwaligo God bidiyu, tama augwali te eno we bidi bidiyu yaibao.

Dwagi Yai Gesi Po Jongo Asęani 20:27

Tama agai Tomasbolo te po wai, “Nago nogo dani eba da muao. Tama nago eno nogo me suao. Tama nago nogo eno punali badu palama suao. Nago homu si ebo tagalao. Enade nago homu deli yao, te tiwai bidao,” Jisasgo te po Tomas dali wai.

Dwagi Yai Gesi Po Jongo Asęani 17:5

Polobadu, te tǫ pedalisiąbadi digi, tama ena nage dali bidai dao. Tama ena nage dali bidiyu, bomo yai ula elaluai dao. Aya, ena nage dali bidiyu, tama nago megi enabolo te bomo yai ula digi ma mao,” Jisasgo te po God dali wai.

Dwagi Yai Gesi Po Jongo Asęani 14:28

Dagego eno mani po odai dao, eno dage taga peyu, ena pelama, tama ena dage bidibo digi ma asaibao. Dagego ena godolo mu egi sogo da, teda ena Aya pageba ma pabode dagego dwagi yai homu egi da. Magi basowe? Aya God aga genuai bidi mu dao, tama ena aga dali usu menio.

Dwagi Yai Gesi Po Jongo Asęani 14:2

Eno Ayago be tomode dąį habu togwali te bidibo madigi hauwa elalubo. Te tiwai elalugi menigi sogo da, te eno dagebolo te po wagi menio. Eno dage bidabo bulu dodoligi pobao.

Dwagi Yai Gesi Po Jongo Asęani 13:3

Tama Jisasgo koneai, ‘God agai tigidali bomo enabolo mawai dao. God agai ena tǫba tagala palai, te ena God aga pageba ma paibao,’ te me aga koneai.

Dwagi Yai Gesi Po Jongo Asęani 13:1

Te olo bidibo si nogi Pasova pedalisiąbadi, deli sogo naga elalubadi, tama Jisasgo koneai, aga e tǫ tagalama, Aya pageba pabo sogo te pąba yagasai. Tama Jisas agai aga te tǫde bidibo we bidi tigidali sogo godolo mu eyu bidai. Megi agai te godolo mu ebo sę tagalobeo. Agai augwali godolo mu ela pidubadi te aga isibo sogoba usu nai dao.

Dwagi Yai Gesi Po Jongo Asęani 7:33

Tialima, Jisasgo te po wai, “Dwasianu sogo ena dage dali bidaibao. Te silibo si, ena te ena tagala palai bidi pageba ma paibao.

Dwagi Yai Gesi Po Lukgo Asęani 10:4

Te mone ge bubo be me, nai gonobo wa me, sągą nadoba dabe sela pigimio. Tų dilide gasa bidi babe dali po weyu gesego igimio.

Esekiel 37:27

Tama eno bidibo madi augwali dali bidaibao. Tama ena augwaligo God bidaibao, tama augwali eno we bidi bidaibao.

Esekiel 36:28

Tama dage eno duga wąį dabebolo mani te tǫde bidaibao. Tama dage ena we bidi dolo mu pedelaibao, tama ena dagego God mu bidaibao.

Jeremaia 32:38

Tama augwali eno we bidi hani dabe bidiyu, te ena augwaligo God bidaibao.

Jeremaia 31:33

Tialima, eno te Israel we bidi dali dąų wainu ebo bomo yai po e tiwai elalubao. Te eno bomo yai po augwaligo homude munama, te augwaligo haligade te bomo yai po asębo tiwai yaibao. Te ena augwaligo God bidiyu, te augwali eno we bidi hani dabe bidalueibao.

Godigo Nogi Ugwaba Sabo Tęąbi Po Wabo Buku Dabe 89:26

Tama agai enabolo te tama po waibao, ‘Nage Aya me eno God dao. Nago ena tonalu, tama ena sesemane tau sabo dao.’

Te Israel me Juda Hani Sigo Tuni Bidigo Po Elalubo Buku Si 7:9

Tama nosali augwa digi augwa tomode po miyu, te e tiwai po tama wali, “Tialima, dago dwagi yai kolesaga ebeo. Megi dago dwagi yai nai mu sualio. Tama da pelama, te tigidali we bidibolo wagi pinao,” wali. “Tialima, dago te pedauwali dąų ola selama bidiyu, tama te be posoboba usu nigi peyu da, teda dago sęgę mu elaluaibao. Polo tama, da megi pelama, tama te kingo sę ebo gavman tobolu ofisa bidi dabe augwalibolo wagi pinao,” wali.

Matyu 25:40

Tama tuni bidigo po wei ponoyu, augwalibolo te po waibao, ‘Eno mu po dagebolo obao, te tigidali sę dagego te eno amanu e tiwai te nogi meni yai bidi dali yali wiegi yai sę, te sę dabe te dagego ena dali te yali dao.’ Tuni bidigo te po waibao.”

Godigo Nogi Ugwaba Sabo Tęąbi Po Wabo Buku Dabe 48:14

Dagego augwaliba te tama waiyagameo, “Te Godigo da tonaluai da,” po wao, “Aga te dago sesemane sogo bidada peyu, bidada pabo God dao. Tama sesemane sogo te aga poligi soyu, tama dabolo te sunumi ola mawaibao,” te po wao.

Godigo Nogi Ugwaba Sabo Tęąbi Po Wabo Buku Dabe 43:4

Tama tialima, ena te God, nago alta sai teba paibao. Magi baso meni, nago ena wiegi yai haliga iliyu, te pemene ilibo dao. Nage eno God da, te eno gita selama, te musik weyu, tama nago nogi ugwaba sabo tęąbi po naga waibao.

Godigo Nogi Ugwaba Sabo Tęąbi Po Wabo Buku Dabe 22:22

Nago tama tiwai ebaso da, teda eno te ena hani bidi dabebolo nago yali sę po pusaibao. Augwali te lotu weyu, deliba sisinibo side, tama eno nago nogi te augwali tomode ugwaba saibao.

Te Israel me Juda Hani Sigo Tuni Bidigo Po Elalubo Buku Si 4:29

Elisago te wego wabo po odama silibo si, tama Elisago aga sę ebo bidi Gehasibolo e tiwai po tama ola mani, “Naga gudubo name ugwa dąų olama, guda selama, tama te eno tolasa bilibo dono selama, tama nage te Sunem hanuba polo pao. Tialima, tomode bidi me deli nago me subaso da, teda nago siade da po olama, nago dolalubo sesabi egio. Tialima, bidi me deligo nage dali siade da po obaso da, teda nago agai te po wei ponogio, taga pao. Nage te wego beba dolo mu pelama, tama eno tolasa bilibo dono te wai gesabidide ugwa badu te eno dono muao,” po wali.

Hibru 11:16

Tiali goli augwaligo te tiwai me ebeo. Menio. Augwaligo homu gasa tǫba paiba homu elaluali, tego te augwaligo taga soali bulu aiyaba elaluama tama wiegi yai mu yalio. Te dagalude elalubo dao. Tama te po wabo bidi dabe dali te Godigo hale homu me egobeo, “Nage dago God dao,” te po wabo. Menio. Agai te agade konealubo po dąų wali bidi dabe dali hale homu me isąbaso, agai te augwali bidabo hanu me deli sisi elama elaluai dao.

Aisaia 41:10

Dage wi igio, magi baso meni, ena duga God da, ena dage dali bidibao. Te eno dage boma pai pedalumainu ilama, te dage eno tau saibao. Te dage eno bugagia tonalu, te eno genuai bomogo te eno dagego boi bidi aiyaba elalueibao wali.

Dwagi Yai Gesi Po Makgo Asęani 12:26

Tiali goli te isai bidi dabe ma hodaluaiba po wabo, te dagego te Mosesgo asęani bukude te dwasianu nide sia dali po wali te po nedebo meniwe? Te wali pode Godigo te po Mosesbolo te polobadu isali bidi dabede wai, ‘Ena te Abrahamgo God, me Aisakgo God, me Jekopgo God te dao,’ te po wai.