Jeremaia 6:20 - Godigo dwagi yai po buku

²⁰ Augwali te Sabea hani bidi dabeba pelama, te wiegi yai denami ebo hano yabo pauda abeligi pali. Tama augwa te tobage awi te wiegi yai denami ebo nai abelali, te digibulu bidi dabede abelai. Augwaligo homugo te nai dabego te augwa lotu wabo te wiegi yai eno gedude pedelaibao homu eyu tiali. Tialima, menio. Tama me, eno te augwaligo siaba ulama tigidali domainu ebo ofa, me te gasa ofa dabe augwaligo enabolo ebaso, te eno wiegi yai homu pemene ebo menio.

Jeremaia 6:20 Referans Kwoze

Aisaia 1:11

Genuai Bidigo te po odu gebao, “Dagego homugo, dagego haniani ofa enabolo mabo te eno godolo ebawe, homu ebowe? Mu menio. Dagego te sipsip kibu dabe hauwa dagego seselama, te isigo ula silabo ofa yainogo ebo dao. Tiali goli, ena mu hagela mu yali. Tama eno dagego dwagi yai genuai dagego sesebo hasa ili dabe eno godolo ebeo. Ena te kau kibu omai kaneme me, me te sipsip kibu gǫųgo kaneme, me meme kibu omai kaneme dabego enabolo usu yai dao.

Aisaia 60:6

Te Israel hani isąwai Midian bage me Efa bage, te augwaligo gesi kamel hauwa mugo te walu dabe nageba sesaibao. Augwali te tǫ kantri Seba teba pelama, te gol me, te wiegi yai hano denami ebo pauda me, te selasa asaibao. Te we bidi dabego Genuai Bidi, eno genuai nogi ugwaba saibao.

Godigo Nogi Ugwaba Sabo Tęąbi Po Wabo Buku Dabe 40:6

Nago te augwaligo elama ofa ebo kibu dabe te wei ebeo. Te tobage augwaligo te siaba tigidali ulama domainu te sęgę sela sąbo ofa, te me nago wei me isiąwai. Tiali goli, nago eno homu hodolobaso, tama eno nago po wali pabo dao.

Aisaia 66:3

“Tiali goli, te augwa digi dobo homu wali pabo we bidi dabego augwa te haniani dwai kolesaga godolo mu eyu, tama augwa te enaba lotu mu obao, te homu ebao. Tiali goli, augwaligo enaba te ofa ebo tigidali te eno godolo mu me isąwai. Te augwaligo bulmakau elama, enaba ofa ebo sogo, eno suali, augwa te bidi elali tiwai ebao. Te augwa sipsip wai elebo sogo, eno suali, augwa te yowi elama, te enaba ofa tiwai yali. Augwa te wit dabe ofa ebo sogo, eno suali, augwa te kibu kaneme ofa ebo tiwai yali. Te augwa wiegi yai denami ebo hano ebo ofa ebo sogo, eno suali, augwa te tibo god piksa me deliba ofa ebo tiwai yai dao.

Ma Dobola Sali 30:23

“Megi nago te wiegi wiegi yai denami ebo nai dabe sao. Hasia bolo te denami ebo nai sanda mea sao, te nai sęgę te 6 kilo te elalubao. Tama te sinamon pauda meba te wiegi yai denami elalubo, te aga te 3 kilo, tama te tobage wiegi yai denami ebo awi dili badi, te aga sęgę me te 3 kilo dao.

Esekiel 27:22

Te bulu Sebade bisnis sę ebo bidi dabe me, te taun bulu Rama bidi dabego me, te gol me, te wiegi yai denami ebo tobage nai nogi pauda me, te wiegi yai sawi yai masigi dabe me sesali, te nage dali dobu si eyu, nago mabo nai dabe sabo eyu, tama sę yai dao.

Esekiel 20:39

“Te dage Israel hani da, ena, God Genuai Bidi, eno te tama po te dageba obao, te dagego homu godolo ebo wida, dagego duga te tibo god dabe wali pao. Tegobao, te dagego godolo yali homu simina ela siminao. Tiali goli, dagego te tiwai ebaso da, teda nosali dagego eno po odoyu, mu wali paibao. Dagego te duga tibo god dabeba ofa eyu, eno nogi da aiyaba munu me elalugobe dao,” wali.

Godigo Nogi Ugwaba Sabo Tęąbi Po Wabo Buku Dabe 66:3

Dago te tama po Godiba wainao, “Te nago ebo sę tigidali te wiegi yai mu ebao. Te nago bomo genuai ugwanu mu igulai elalubao, tama nago boi bidi dabe te wi mu elama, tama augwali te nago gesabidiba pibia sagaselama, te kidu sugunagasobo dao.” Te tobage po wainao.

Te Israel me Juda Hani Sigo Tuni Bidigo Po Elalubo Buku Deli 10:10

Tialima, te Seba kwingo te gol hauwa te Solomonba mani, tama te golgo sęgęgo te 4 ton aiyaba elaluali. Tama kwingo te tobage nai pauda dabe te wiegi yai denami ebo nai me, te gasa wiegi yai masigi dabe me mani. Te pauda dabe te hauwa mu tamao. Tama nosali te sogo te tobage denami ebo pauda hauwa te Israel bulu tǫ tomoba me asobeo.

Bugagia Bidibo Kolesagade Po Asęai Buku 15:8

Genuai Bidigo te dwai kolesaga ebo bidigo ofa ebo te wei mu me egobeo. Menio. Agai tede dwai homu mu ebo dao. Tiali goli, agai te doloba pai bidigo gedu haluasa po wabo te wei mu eyu, wiegi yai pemene mu ebo dao.

Bugagia Bidibo Kolesagade Po Asęai Buku 21:27

Genuai Bidigo te dwai kolesaga ebo bidigo ofa te wei mu me egobeo, aga tede sębę ebo dao. Tama te bidigo te tibo kolesaga wali peyu, te ofa ebaso da, teda Genuai Bidigo te dwai kugumini yai kolesaga mu da homu ebo dao.

Jeremaia 14:10

Tialima, Genuai Bidigo te tiwai po wali, “Te we bidi hani, augwa te wau bilabo homu godolo ebao. Te augwa bilibo bugagia me tonalubeo. Tama tibaso, ena, Genuai Bidi, eno wiegi yai homu pemene augwaliba me ebeo. Megi da, eno augwa ebo dwai kolesagaba kone palama, te eno augwaliba te tigi dene mabo sę yaibao,” wali.

Jeremaia 14:12

“Te augwaligo nai habu selama, enaba gedu haluasa po obadi goli, te tagalao, eno augwaligo i wabo munu me odogobeo. Te augwaligo sia ulama, tigidali dela pabo ofa ebadi goli, te tagalao, te wit ulubo ofa ebo me, eno te we bidi augwaliba wiegi yai pemene me egobeo. Menio. Te eno boi bidi dabe tagala palama, augwali elagasomainu yaibao. Te eno augwali nai menia somainu ilama, te augwali isaibao. Tama genuai gasi augwaliba pedalumainu elama, te augwali isila paibao. Tama tebo kolesagade te eno augwali silimainu yaibao,” wali.

Hosea 8:13

“Augwaligo te ofa hauwa eyu, te ofa ebo mi tubo dao. Tialima ena, Genuai Bidi, eno augwaliba te wiegi yai homu pemene me ebeo. Tibaso, megi da, eno augwa yali dwai sęde homu kone palama, te dene mawaibao,” wali. “Te eno augwali Isipba ma kalabus igi pomainu tagala palaibao,” wai.

Hosea 9:4

Dage te gasa hani dabego bulu tǫ kantride bidibo sogo da, teda dagego Genuai Bidiba te wain me, kibu hasa me, te ofa me magobeo. Tama duga naigo digi te dage God gedude meda ilaibao wali, te bidi dabego te bidi isaide te diligide gela weyu bidibo sogo te ulama tubo naigo, te augwali meda pedalubo tiwai yaibao wali. Tama te naigo te dagego haliga pągąnobo tiwai naga yaibao. Te dagego te nai me badu te Genuai Bidigo tempel beba sela aselama, te ofa yagasainu ebaso, usu me egobeo. Mu menio.

2 Samuel 15:12

Augwa pelama, te Hebronba sabolama, tama Apsalomgo te ofa me yai. Tama aga te ofa yali sogo, agai te taun hanu Giloba te bidi meba tagala palama, te Ahitofel sela asomainu yai. Ahitofel aga te king Devitba wiegi yai homu kolesaga mabo bidi dabede te bidi aga me deli dao. Tama aga te Gilo, te aga hanu tagasu, tama Apsalomba asai. Megi da, te Apsalom wali pabo bidigo namba te genuai pedaliyu, tama augwali te bomai hani mu pedelalio.

Malakai 1:10

Te Tigidali Bomo Elalubo Genuai Bidigo te po wali, “Te bidi me deligo eno be sunumi dabe palibaso da, teda dage te tomoba me pisąma, tama eno altade te dwai ofa dabe yabo sia me udulugobeo. Te usu dao. Magi baso meni, eno dagego ebo kolesagade wiegi yai pemene homu me ebeo. Tama te dagego enaba sesebo ofa dabe eno me sogobeo,” wai dao.