Jeremaia 4:31 - Godigo dwagi yai po buku

³¹ Eno odali, te wego wai ame nainogo te gela wabo tiwai odali. Te wego hasia wai ame nabo sogo, te aga genuai dene yaibao. Te taun Saiongo gela obao. Aga homu hę mu weyu, te aga nogo bomo sainu debalu te tiwai po waibao, “Hobede mu dao, ena mu dolobao. Te boi bidi dabego ena elama, ena isainu ebao,” wai dao.

Jeremaia 4:31 Referans Kwoze

Te We Bidi Dabego Jerusalem Hagede Gela Wali 1:17

Saiongo bidi mebago aga tau somainu homu eyu, aga nogo balalubao, tiali goli, te bidi aselama, aga dali hobede eyu, tau siyu me yagasobeo. Genuai Bidigo boi bidi dabe tigidali bulu badu i olama, tama te Israel hani dali hwįagasali. Tama te boi bidi dabego te Jerusalem te dwai damua pai pesage tiwai mu tonobo ąǫ yali.

Aisaia 1:15

Te dagego nogo ugwa selama, gedu haluasa po enabolo wabo si da, teda eno dage sugobeo. Tagala, dagego gedu haluasa po hauwa sogo obadi, me teda ena olo palia saibao. Magi baso meni. Te bidi dabe dagego elali bidi dabego kaneme dagego nogode me daganalubao.

Jeremaia 13:21

Nago te naga abagi meba pedalumainu ebo sę dene yali. Tiali goli, nosali augwaligo nage aiyaba elaluama, te nage tonalubaso, tama te sogo nago magi po waibawe? Te nage dene genuai saiba homu yaibao, te wego wai ame nainu dene sabo tiwai yaibao.

1 Tesalonaika 5:3

Tama te Godigo po wali pisiąwai we bidi augwaligo te po waibao, “Megi te da bugagia bidabo sogo dao, te da dolabo nai pąba asogobeo,” te po waibao. Tiali goli, augwaligo te tobage po obadi, sisi isiąwai, te sogo digi tama augwali dolabo nai polo augwaliba pedalaibao, augwali noma mu saibao. Te wede ebo sę tiwai, we mego wai ame nainogo tigide ebo dene tiwai ebo si pedelaibao, tama te we te dene wi pabo tų menio, wi sana pogobeo. Tama te tiwai te Genuai Bidi asobo sogode te Godigo po wali pisiąwai bage augwali wi pabo tų menio.

1 Korin 9:16

Eno te Kraisde wiegi yai gesi po pusubo, tede eno te ena nogi ugwaba sabo te usu menio. Te menio. Eno sunumi gasa me elalubeo. Dago Genuai Bidigo enabolo te sę naga mawai dao. Tama eno te wiegi yai gesi po pususiąyu da, teda ena hobedagia mu bidaibao.

Maika 7:1

Hobede ya, ena dwai mu bidibao. Ena te nasi ebo bidi tiwai elama, te tuabo wiegi yai nedu du me deli gegebeo. Te tigidali wain ni du me, ni kaya fik du me, augwa te tigidali sela silalio.

Hosea 13:13

Te Israel augwali bugagia bidimainu yali, tiali goli augwali te homu kolesaga meni yai umuna pelama, augwa hagela homu yai. Augwali da, te wai bou me deli tiwai dao. Te wai bou te idago haliga tomode elaluama, te idago ame nainogo ebo tiwai yali, tiali goli te wai tega pabo homu ebeo.

Te We Bidi Dabego Jerusalem Hagede Gela Wali 2:21

Te boi bidi dabego augwa moni ge hwągo te gesi wegi ogwa me, monu dabe me, ela silalio. Awe, augwaligo te we sasiąwai gesi bidi dabe dali, te bidigo sasiąwai gesi we dabe dali te ela muani. Tama augwaligo tigi dabe eno sunumi dabede subigila wilalua pabo. Genuai Bidi, nago eno te we bidi dabe dali sębę mu yalio. Tama nago augwali dali hobede me ebeo. Menio. Nago augwali elama, isilai dao.

Te We Bidi Dabego Jerusalem Hagede Gela Wali 1:20

“Genuai Bidi, ena suao. Ena genuai sęgę mu selama, tama ena dolama mu bidibao. Tama eno homu dwai mu elalubao. Magi baso meni, eno hagoma genuai mu elama, tama nago po sese tama sela sąwai dao. Te boi bidi dabe augwaligo eno we bidi dabe eno sunumi dabede ela wiala silalio. Tama me te bede bidaluali we bidi augwali nasi eyu, gasi me eyu, isai dao.

Jeremaia 50:43

Babilon kingo te boi hwįabo boi bidi dabe asobo u wabo odama, aga te wi mu elama, te aga nogo sągą dili kimi meni yaibao. Aga wi elama, te kone palobo dwai mu yaibao, te wego wai ame nainu tigi dene ebo tiwai mu pedelaibao,” te po wai.

Jeremaia 49:24

Te Damaskus taun we bidi dabe te bomo mu meni yani. Augwali te we me deli wi painogo ebo tiwai yali, tialima aga te wi dwai mu elama, te aga usu ebeo. Augwali te genuai dene me sęgę elaluali, te wego wai tega painu dene ebo tiwai yai dao,” wali.

Jeremaia 49:22

Te boi bidi dabe umagia aselama, te Bosra taun dolainogo ebao, te ba kemodage ugwaba bola holama, te tobolu nisiba mage bula selama, aiyaba dulama, te aga bogo diligasa dulu, te hasa bolo elibo tiwai yaibao. Tama te sogo te Idom ami dabe wi elama, homu si yaibao, te we dabego wai ame nainogo tigi dene ebo tiwai yaibao,” wali.

Jeremaia 48:41

Te boi bidi dabego te taun dabe me, te bomo elama, boi hwįbo pesage me saibao, tama te sogo te Moap ami dabe wi elama, homu si yaibao, te we dabe augwali te wai ame nainogo ebo sogo tigi dene ebo tiwai yaibao.

Jeremaia 45:2

“Baruk, odao. Nago te tama po wai, ‘Hobede dao, enade sęgę hauwa me dene elalubao, tama Genuai Bidigo eno sęgę didigili pabo sę mu ebao. Ena gela wabo sę ebogo te ena hagela mu ebao. Eno sęgę sia siyu me ebeo. Te me tama elaludu gębo dao,’ nago te po wai. Tialima, Baruk, odao. Genuai Bidi da Israelgo God, te eno nagebolo te po pusa mao wali, ‘Ena Genuai Bidi, eno po dolo obao. Megi eno te ena nigali nai dabe alubo sę yaibao. Te ena bulali nai dabe gudaibao. Te nai dabe eno aluama, guda sabo sę ebo, te tigidali tǫ habu pedaiba usu nama, te tama sę yaibao.

Jeremaia 30:6

Magi basowe? Te bidi dabego wai ame nabo dawe? Tialima, magi baso eno suali tigidali bidigo augwa haligaba nogo mubawe? Augwaligo te tama tebo te wego wai ame nainogo dene genuai ebaso ebo tiwai ebao. Magi baso augwaligo gesabidi te gasagi yai tedali dwai mu pedaliyu, te bidigo wi umabo ebo tiwai ebawe?

Jeremaia 22:23

Augwaligo nago be te wiegi yai Lebanon ni sidago sę yani, tama nage bugagia dugulaluali. Tialima, hobede ya, te nago dene te wego wai ame nainogo dene ebo tiwai ebaso, te nage dwai gela mu waibao,” wali.

Jeremaia 18:21

Tialima, megi da, eno homugo nago te augwaligo wai dabe te nai sǫą pelama, nasi eyu, isimainogo ilao homu ebao. Tama te boi bidi tagala palomainogo elama, te bidi dabego meba ela mumainogo ilao. Tama te bidi meba dwai gasi selama, isimainogo yao. Tama te gesi ogwa bidi dabe da, te boi hwįgi pabode isimainu yao. Tama te augwa we dabe sibi te wai meniama, te bidi me meni yaibao.

Jeremaia 15:18

Magi baso ena dene ebo silibewe? Eno keni genuai mu elalubao. Magi baso aga te pedelasiąbewe? Mu tamao, nago ena tau me sabeo. Ena ąį tueinu ąįba pabo bidi tiwai ebao, tiali goli, aga te wę sula sai subaso, te aga ąį tusiąwai tiwai ebo dao.”

Jeremaia 14:18

Te ena hanu bulu badu bilibadi, eno te hwįnama elali bidi tigi dabe suali. Tama ena te hanu sunumi dabedu pobadi, eno te nai mu meni yai we bidi te augwa tigi dolali elalubo suali. Te pris me profet dabe olo bilibao, te augwa mena sę ebowe, te augwa me konesiąwai dao,’ nago te po pusao,” wali.

Jeremaia 10:19

Tama te Juda dabego te tama po waibao, “Hobede mu ebao, da dolalio. Te dago sęgę genuai mu elalubao, te genuai keni pedela sisąbo tiwai ebao. Tiali goli, tagalao, te sęgę daba pedelama, te dago tolobo dao,” te po wali.

Jeremaia 6:2

Taun Saion te tigi dene ilibo sę munu me isąwai sawi yai we mu me deli tiwai te homu wali sesemane piduali. Tialima, Genuai Bidigo te taun mu dolaibao.

Aisaia 42:14

Genuai Bidigo te tama po wai, “Te bobobage sogode eno pedauwali pania selama, te ena dua digi bidali. Eno ena haliga sębę te palia selama, te eno magi deli me ebeo. Tiali goli, megi eno te gela bomonama weyu, te wego wai ame nainu dene ebo sogo gela wabo tiwai obao. Ena te homu hę weyu, te homu hę wabo bomo elama, kekebo dao.

Aisaia 21:3

Te nade suali naigo ena wi ilama, didibili ilali. Tama eno tigide dene genuai me yali, te we sibigo wai sainu dene ebo tiwai yali. Eno wi mu elama, eno homu mu doali. Tama eno magi nai me suyu, me po me odoyu yabo homu me ebe.

Aisaia 13:8

Tigidali wi mu yaibao. Tama augwali genuai dene mu saibao, te wego wai sainu dene ebo tiwai yaibao. Te tigidali bagego gesabidi augwali tigidali dene ebao wabo gesabidi ola mawaibao. Tama augwaligo gasa bidi dabego gesabidiba tonobo sogo da, augwali wi mu yaibao.

Aisaia 6:5

Tama tibaso, ena wi ebaso, te po wali. “Mu tamao, ena mu dolaibao. Tigidali sogo eno pedauwalidu dwai po wabo dao. Tama ena dwai po wabo we bidi dabe tomode bidibo dao. Ena dwai sęgę wa abibo bidi dao. Tama megi da, eno te tuni bidi polo suali, aga Genuai Bidi Tigidali Bomo Elalubo Bidi. Tama tibaso, ena isaibao,” eno te po wali.

Godigo Nogi Ugwaba Sabo Tęąbi Po Wabo Buku Dabe 120:5

Ena dage tomode dwai dugulalu, tama te ena te bulu Mesek, me te Kedar dabe tomode dwai dugulaluali tobage tiwai ebao.

Jopgo Po Asęani Elalubo Buku 10:1

Tama Jop agai po genina ma weyu, e tama wali, “Ena bidibo ena hagela mu polo yali. Ena isabo goli da. Tama tibaso, eno te moni sęgę hanilaibao. Awe, eno homu ha mu eyu, tama eno te Godide elalubo po dolo pusaibao.

Tigidali Nai Gagalama Nigali Side 27:46

Nosali Rebekago e tiwai po Aisakbolo wai, “Eno te Hit hani we dabe te eno mu hagela idubao. Te Jekopgo me, te Hit hani we dabego me, te e bidibo we si tiwai kolesaga ebo we sobaso da, teda ena isimainu yaibao,” Rebekago te tiwai po Aisak dali wai.

Aisaia 26:17

Te nago gedude da te wego wai ame nainu dene ebo tiwai elama, bidai dao. Da te genuai dene dali, sęgę dali tolama, dago homugo tiali, dago wiegi yai nai dago me sugowe homu yali. Tiali goli, te menio. Dago magi nai me haninibeo. Dago te boi bidi dabe aiyaba elalubo bomo mu meni sai dao. Tama dago tǫde bugagia bidabo meni yai dao.

Maika 4:9

Jerusalem, magi baso nage gela genuai obawe? Magi baso nage te wego wai ame nainu tudi eliyu, tigi dene ebo tiwai ebawe? Nago king meni da, agawe? Nago kolesaga page koneai bidi dabe isila pai da, agawe?

Maika 4:10

Tialima, dage Israel we bidi dabe, dage i hai weyu, gela weyu, tama te wego wai tega painu te tigi dene ebaso, subigila bebegeli bilibo tiwai yao. Magi baso meni, megi dage te taun tagalama, te kala elalubo pesagede bididuaibao. Te dage augwaligo te Babilonba sela paibao. Tiali goli, nosali Genuai Bidigo dage te boi bidi dabego nogode ma dobola saibao wali.