Jeremaia 31:13 - Godigo dwagi yai po buku

¹³ Te sogo te wegi ogwa we wiegi yai homu pemene elama, te tęąbi po weyu, te gesi bidi me, monu dabe me, pemene yaibao. Eno augwali homu dene ebo silama, te augwali bugagia haliga tegalumainogo yaibao. Te eno augwali haliga nagame elama, dua digi bidiyu, pemene emainogo yaibao.

Jeremaia 31:13 Referans Kwoze

Godigo Nogi Ugwaba Sabo Tęąbi Po Wabo Buku Dabe 30:11

Nago eno homu sęgę elaluali te sela sąnama, tama nago ena te wiegi yai homu pemene tęąbi po omainu yali. Hasia ena te bidi isaide gela wabo bidi tiwai yali. Tiali goli, nago eno gela wabo hasegelama, tama eno homu pemene wiegi yai mu ilali.

Aisaia 61:3

Te Saionde gela udubo we bidi dabeba eno te nagame yai haliga dua eyu, pemene ebo homu me selasa asaibao, te augwa bomo silali bageba tama tiwaibao. Augwali homu dene ebaso, te sia keli augwa toboluba muani. Tiali goli, eno te nai hasegelama, tama dwagi yai au yabo nai augwaliba mueibao. Awe, eno augwaligo tigiba te wiegi yai denami ebo wel mawaibao, tama augwali homu dene ebo tagalama, dwagi yai homu pemene eyu bidaibao. Te augwa bomo ma selama, te Genuai Bidiba pemene ebo balia waibao. Augwa tigidali te doloba pai kolesaga naga ebo sę bomo yaibao. Te gasa bidi dabego sueibao, augwali te Genuai Bidigo digi bulali ni kali tiwai elalubao, tama augwaligo Genuai Bidigo nogi ugwaba saibao.

Aisaia 51:11

Te naga ma sali hani dabe tau sali, te augwa wiegi yai pemene elama, te Jerusalemba ma aselama, te augwa balia po weyu, genuai po dagą te sunumidu ola asaibao. Te augwa bugagia mu bidiyu, te augwa pemene umabo mu yaibao, augwa te pemene ebo me sia sogobeo. Te dene me haliga sęgę augwali dali me elalugobeo.

Jeremaia 31:4

Dage Israel, eno gedude dage te bidi dali pagela pisąwai gesi we tiwai dao. Tama te eno dage bomai hani we bidi ma pedalumainu yaibao. Te gesi ogwa wego pemene elama, hąbidi eleyu, te tęąbi wabo hani dabe dali pemene ebo tiwai dagego yaibao.

Dwagi Yai Gesi Po Jongo Asęani 16:22

Tama dage dali me te tiwai dao. Tama tiyu, megi dage homu sęgę ebao. Tiali goli, eno dage ma sueibao, tama dage dwagi yai homu ma yaibao. Tama niwai bidi mego dagego te dwagi yai homu ebo me sela sągobeo,” Jisasgo te po aga bidi dabe dali wai.

Aisaia 51:3

“Ena Genuai Bidi, eno te Jerusalemde homu dene mu yali, te taun dolai elaluali, te eno agai sęgę tigidali sia somainu yaibao wali. Megi te olo masigi sane pesage elaluai, tiali goli eno te wiegi yai sę hauwa pedalumainu elama, tama te tonobo gasa sawi mu eyu, te eno nigali Iden gi tonobo tiwai yaibao. Te wiegi yai homu genuai pemene ebo pesage pedelama, te sesemane sogo aga we bidigo te enaba usu da wabo balia po waibao.”

Aisaia 35:10

Te Genuai Bidigo ma dobola sali we bidi dabe, te augwali wiegi yai pemene dali te Jerusalemba ma asaibao. Te augwa genuai po dagą weyu, balia weyu, te sunumidu aselawaibao. Te augwa wiegi yai bugagia mu dugulalu, te augwa pemene umabo mu yaibao. Augwa te wiegi yai pemene ebo munu me sia sogobeo. Te dene, me haliga sęgę, te augwalide munu ma me elalugobeo.

Godigo Nogi Ugwaba Sabo Tęąbi Po Wabo Buku Dabe 149:3

Dagego tęąbi weyu, aga nogi ugwaba sao. Mu tama, te habidi dabe, me taborin, me gita, te tama eliyu, te agai nogi ugwaba sao.

Esta 9:22

Te side si sogo te Juda dabe augwaligo te augwa boi bidi dabe sela sąwani side dao. Tama te poluade naga te augwali homu sęgę me homu dene yali hasegelama, tama dwagi yai homu pedelai. Tama Mordekaigo augwalibolo weyu, te side si sogo te genuai nai daa tuyu, tama abagi dedebolo, me te magi nai meni yai bidi dabebolo, te nai dobayu yao po wai.

Nehemia 12:43

Te side augwaligo te Godiba ofa hauwa eyu, tama augwa wiegi yai pemene genuai elaluali, magi baso meni, Godigo digi augwali te wiegi yai pemene ilali. Tama te we dabe me, wai puluba dabego me wiegi yai pemene yai. Tama te digibulu bidali we bidi, augwaligo te genuai i wabo me pemene ebo po odai dao.

Nehemia 12:27

Te Jerusalem hanu moni masigigo nigai obo silali sogo, te tigidali bidi sisinagaselama, te obo te Godigo da olama, sa mubo lotu wali. Tama augwaligo te Livai dabe i weyu, te bidali pedai badu te taga soyu, te augwali dali deliba siginagaselama, te wiegi yai homu pemene elama, te Godiba balia po weyu, usu da wali. Tama augwaligo te tiwai balia po wabo sogo, te Livai mebago te musik weyu elabo kapa plet si tola siąo wai, tama mebago te haniani gita eliyu yalio.

Sekaraia 8:19

Agai te tama po wai, “Dagego me sogo side te polua me si me si 4 poluade, me te polua a nagade, me te polua a naga me si 7 poluade, me te nogo si poluade te nai tubo osogo habu selali, te dageba pedelali sęgę homu kone paliyu tiali. Tiali goli, te sęgę dabe kone palobo genuai side hasegelama, te tigidali Juda dabego wiegi yai homu pemene yabo si pedelaibao. Tialima dagego te mu po wabo godolo homu elama, te gasa we bidi dabe dali bugagia tegaluama bidibo kolesaga yao,” te po wai dao.

Aisaia 60:20

Nago te giliga me polua iba dega sigi pelama, te be hulia siyu ebo me pedalugobeo, magi baso meni, ena Genuai Bidi, sesemane sogo ena te nago ula tiwai elalueibao. Tama nago sęgę dali homu dene ebo sogo me tigidali silaibao.

Esra 6:22

Augwa te wiegi yai homu pemene ebo te me sela, me sela, me deli, te 7 tama sogo elama, tama te bo disąwai nai bret tuali sogo, te genuai side yali kolesaga te wali palio. Augwaligo homu pemene yali te genuai mu yai, magi baso meni, Genuai Bidigo te Asiria king bidigo haliga wiegi yai ilibaso, tama agai augwali tau selama, te augwa Genuai Bidi Godigo tempel be ma sę yai dao.

Te Israel Tobolu Bidi Dabe 21:21

tama tonaludu yao. Te genuai nai daa tubosi pedalubo sogo tama te Silo hanu gesi wegi ogwa we dabe sabolama, te tęąbi ebaso da, teda dage pedelama, tama dage deli deligo te wegi mani deli deli pageabi yao. Tama duga te we dabe selama, tama duga bulu tǫba ma piagameo.

Aisaia 61:2

Agai ena tagala palu, te tama po pusao wali, te dago Genuai Bidi, Godigo sę yabo sogo pedelalio, te aga we bidiba wiegi yai sę bugagia ilama, te boi bidi dabeba dwai dene mawaibao, wai. Te agai ena tagala palali, te homu dene eyu, gela wabo we bidi dabego haliga dąų walomainu tagala palai dao.

Godigo Nogi Ugwaba Sabo Tęąbi Po Wabo Buku Dabe 126:5

Te gela wabo sę eyu, te nai bulali bidi dabe, te augwa wiegi yai pemene elama, te inayu tau yali nai nosali saibao.

Godigo Nogi Ugwaba Sabo Tęąbi Po Wabo Buku Dabe 148:12

tama te gesi bidi, me gesi wegimani dabe, tama te monu dabe, me te wai puluba dabe, dage tigidaligo te Genuai Bidigo nogi ugwaba sao.

Aisaia 12:1

Tama te sogo dage Israel dabego te balia po waibao. “Genuai Bidi, eno nago nogi ugwabo sobao. Nago ena dali sębę yali, tiali goli nago sębę silalio, tama nago ena wiegi yai sę ilalio. Tama megi da, eno homu bugagia bidibao.

Jeremaia 33:11

tama augwa bugai haliga elama, pemene eyu, tama augwa te we bidi we sabode nai ulubo sogo te nai tuyu, wiegi yai homu pemene yaibao. Tama te we bidi dabego buba hwi wabo ofa selama, te Genuai Bidi, eno beba sesaibao. Tama augwa te ofa nai sela asobo sogo da, teda augwa tęąbi po e tiwai waibao, ‘Dago buba hwi te Tigidali Bomo Elalubo Genuai Bidiba wainao. Agai dabolo wiegi yai sę mu ebo dao. Sesemane sesemane sogo agai da godolo mu ebo dao.’ Augwaligo te tobage balia po te sogo waibao. Magi baso meni, te sogo ena Genuai Bidi, te eno te tǫ te polobadu elaluali tiwai wiegi yai ma elalueibao,” te po wai dao.