Jeremaia 30:19 - Godigo dwagi yai po buku

¹⁹ Tama te Israel dabego enaba buba hwi wabo tęąbi po waibao. Te augwa tęąbi weyu, wiegi yai pemene yaibao. Te eno augwali hani genuai pedalumainogo elama, te augwali dwasianu hani me bidigobeo. Tama te gasa we bidigo augwali haniba te genuai nogi momainogo elama, tama te hani dabego augwali nogi aiyaba elalumainogo me egobe dao.

Jeremaia 30:19 Referans Kwoze

Jeremaia 33:22

Te bidi dabegote hǫ dabe me nambisde masigi sani nedainu ebaso, usumu me egobeo. Te tiwai naga, te eno sę bidi Devitgo hanidali, te Livai hani dabe me, te hauwa umabo pedelama, te bidigo nedabo usu egobeo,” wali.

Aisaia 51:11

Te naga ma sali hani dabe tau sali, te augwa wiegi yai pemene elama, te Jerusalemba ma aselama, te augwa balia po weyu, genuai po dagą te sunumidu ola asaibao. Te augwa bugagia mu bidiyu, te augwa pemene umabo mu yaibao, augwa te pemene ebo me sia sogobeo. Te dene me haliga sęgę augwali dali me elalugobeo.

Aisaia 60:22

Jerusalem, te nagede bidibo mena bidi aga nogi me elalusiąbaso, te tagalao, aga te genuai hani wai dabego aya mu pedelaibao. Te dwasianu mu yali hani dabe te augwali umabo pedalu, te augwali genuai bomai kantri we bidi tiwai pedelaibao. Ena Genuai Bidigo eno te po obao, te sę dabe te eno bodolu muani sogo polo asesa pedelaibao,” te po wai dao.

Aisaia 35:10

Te Genuai Bidigo ma dobola sali we bidi dabe, te augwali wiegi yai pemene dali te Jerusalemba ma asaibao. Te augwa genuai po dagą weyu, balia weyu, te sunumidu aselawaibao. Te augwa wiegi yai bugagia mu dugulalu, te augwa pemene umabo mu yaibao. Augwa te wiegi yai pemene ebo munu me sia sogobeo. Te dene, me haliga sęgę, te augwalide munu ma me elalugobeo.

Esekiel 36:37

“Ena God Genuai Bidi eno te po obao. Te Israel dabe augwaligo enabolo te augwa we bidi hauwa ilao po hanalubo sogo da, teda eno augwaligo te gedu haluasa po wabo me odaibao.

Sekaraia 10:8

“Te eno ena we bidi dabe augwali tigidali i ola bilama, te augwali sisinaibao. Te eno augwali ma dobola selama, te augwali polobadu bidali tiwai gilama hauwa mu pedelaibao.

Jeremaia 31:4

Dage Israel, eno gedude dage te bidi dali pagela pisąwai gesi we tiwai dao. Tama te eno dage bomai hani we bidi ma pedalumainu yaibao. Te gesi ogwa wego pemene elama, hąbidi eleyu, te tęąbi wabo hani dabe dali pemene ebo tiwai dagego yaibao.

Sekaraia 12:8

Te tebo sogode Genuai Bidigo te Jerusalemde bidibo we bidi te obogo bagulubo tiwai yaibao, te boi hwįbo side mubo sabelego te tigi bea sabo tiwai gilama yaibao. Te eno augwali dąų walobaso, te boi hwįabo bomo meni yani bidi dabego me, augwali te polobadu bidali bidi king Devit tiwai bomai bidi pedelaibao. Tama te Devitgo bulali wąį nǫų dabe te nosali pedalubo hani bage te augwa polalubo bidi bidaibao, te Genuai Bidigo mobo bidi ensel tiwai, ma God aga tiwai digi bidibo tiwai yaibao.

Sekaraia 8:19

Agai te tama po wai, “Dagego me sogo side te polua me si me si 4 poluade, me te polua a nagade, me te polua a naga me si 7 poluade, me te nogo si poluade te nai tubo osogo habu selali, te dageba pedelali sęgę homu kone paliyu tiali. Tiali goli, te sęgę dabe kone palobo genuai side hasegelama, te tigidali Juda dabego wiegi yai homu pemene yabo si pedelaibao. Tialima dagego te mu po wabo godolo homu elama, te gasa we bidi dabe dali bugagia tegaluama bidibo kolesaga yao,” te po wai dao.

Esekiel 37:26

Tama eno augwali dali kontrak po dąų walama, tama augwali tigidali sogo bugagia bida bida peyu bidaibao. Tama eno augwali augwa tǫde bidimainu sula tagalama, tama augwali we bidi hani genuai hauwa mu pedelaibao. Tama eno be augwali tomode tigidali sogo mu elalua paibao.

Aisaia 12:1

Tama te sogo dage Israel dabego te balia po waibao. “Genuai Bidi, eno nago nogi ugwabo sobao. Nago ena dali sębę yali, tiali goli nago sębę silalio, tama nago ena wiegi yai sę ilalio. Tama megi da, eno homu bugagia bidibao.

Nehemia 8:12

Tama te we bidi augwa beba pelama, tama augwa homu wiegi yai pemene elama, te nai me wę tuyu yai. Tama augwaligo te nai dage te nai sǫą pali we bidi mawai. Megi da, augwaligo te Godigo po page bugagia koneama, tama tiyu augwaligo te sę dabe yai dao.

Esra 6:22

Augwa te wiegi yai homu pemene ebo te me sela, me sela, me deli, te 7 tama sogo elama, tama te bo disąwai nai bret tuali sogo, te genuai side yali kolesaga te wali palio. Augwaligo homu pemene yali te genuai mu yai, magi baso meni, Genuai Bidigo te Asiria king bidigo haliga wiegi yai ilibaso, tama agai augwali tau selama, te augwa Genuai Bidi Godigo tempel be ma sę yai dao.

1 Pita 1:7

Tama te haniani dene mabo sę augwaligo page elalubao. Dage duga homu tigidali Godiba muani sę, te sę usu somainogo te dene mabo sę dageba pedalobo dao. Eno megi te wiegi yai kapa nogi gol te naide po digi po begelama obao. Augwaligo te kapa gol te tǫde diganama, tama te dwai nai sela sąwainogo augwaligo te gol siade ulubo dao. Siago uludama, tama nosali te wiegi yai kapa gol naga pedalama, augwaligo saibao. Tama te gol te osogo wiegi yai nai dao, te tǫde elalubo nai dao, tama nosali te nai mu dolaibao. Tiali goli dagego duga homu tigidali Godiba mubo sę te wiegi yai mu dao, tebogo te kapa gol aiyaba elalubo dao. Tialigo da, dagego konealubo po dąų wabo kolesaga usu selama, tama usu baso, te Jisas Krais aga ma asobo hanilabo sogode te Godigo dagego nogi ugwaba mu siyu, dagebolo dwagi yai genuai nogi mawaibao.

Aisaia 60:19

“Te giligago nageba te bubugade ula mayu, elalubo tiwai munu me elalusiąyu, te poluago me nageba ula mayu, me egobeo. Menio. Genuai Bidi ena digi ena te giliga tiwai, me polua tiwai ula elalu, te eno sesemane nageba ula maduaibao. Te ena, nago God, ena te genuai ula elalu, te nago au ilibo nai elalubo dao.

Aisaia 52:9

Dage te Jerusalem badu dolalio, dagego te pemene elama, i waiąo, magi baso meni, Genuai Bidigo te Jerusalem ma selama, te agai aga we bidi dabego sęgę silalio.

Sekaraia 2:4

Tialima namba wan enselgo namba tu enselbolo e tama po walali, “Nage te usu sabo bono string tolalubo te bidi pageba usayao, tama agabolo e tama po walao, ‘Te Jerusalemde te we bidi hauwa bidiyu, me kau kibu hauwa bidiyu yaibao. Tama te pesage genuai mu elama, tama augwaligo taun obo bagulabo usu me egobeo.

Jeremaia 31:27

“Ena Genuai Bidi, eno te tiwai po wai, eno tebodolu me deli munama elalubo, tama te sogo eno te webidi dabe, me te hasa sibi hauwa, te Juda tǫde me Israeltǫde pedalumainogo ilaibao, te bidigo gide sę elama, naihauwa pedalubo tiwai yaibao.

Aisaia 51:3

“Ena Genuai Bidi, eno te Jerusalemde homu dene mu yali, te taun dolai elaluali, te eno agai sęgę tigidali sia somainu yaibao wali. Megi te olo masigi sane pesage elaluai, tiali goli eno te wiegi yai sę hauwa pedalumainu elama, tama te tonobo gasa sawi mu eyu, te eno nigali Iden gi tonobo tiwai yaibao. Te wiegi yai homu genuai pemene ebo pesage pedelama, te sesemane sogo aga we bidigo te enaba usu da wabo balia po waibao.”

Aisaia 27:6

Te me sogo nosali, te Israel dabe te Jekopgo wąį auwa bidi dabe, augwali te ni wain pedali tǫba pelama, dudili hauwa walama, du hauwa walama, dili elama, dolalubo tiwai yaibao. Tama augwaligo nologode da, Genuai Bidigo augwalibolo wiegi yai sogo me tǫde we bidibolo mawaibao.

Godigo Nogi Ugwaba Sabo Tęąbi Po Wabo Buku Dabe 53:6

Eno homugo Godigo te Saion bulu bidi me deli tagala palumainu elama, te Israel dabe ma sagasomainu homu yai. Nosali Godigo te aga bage tau selama, tama augwali bugagia ma bidimainu yaibao, teda te Israel hani augwali wiegi yai pemene yaibao. Ae, te Jekop aga hani augwali bugai haliga mu yaibao.

Nehemia 8:17

Te Babilon tagalama ma asali we bidi tigidali, augwaligo te osogo bidabo be sęnama bidali. Te polobadu mu te Nungo ogwa Josua bidali sogo, te Israel dabego te tobage osogo bidabo be sę yani. Tiali goli, te nosali Josua isai madi, augwaligo te kolesaga tagalama, bidada asali, te megi te sogoba usu nagasai. Tama megi da, te Israel dabego te kolesaga ma hodolama yali. Tama tiyu, tigidali we bidigo homu wiegi yai pemene mu yai dao.

Dwagi Yai Gesi Po Jongo Asęani 17:22

Nago enabolo te bomo mani, te bomo eno augwalibolo manio, augwali deli homu elama, bidimainogo, dadi si deli homu elama bidibo tiwai, augwali me te deli homu elama bidimainogo eno te bomo augwalibolo mani.

Aisaia 60:9

Te digibulu buludu asobo sip dabe dao. Mu tama, te digibulu bulu we bidi dabego te eno augwali tau sabo tonaluai. Augwaligo te genuai sip dabe tagala palali, te nago ogwa dabe nageba ma sesalio. Te we bidi dabego te hauwa silva me gol te sip dabego sela somainu tolali. Augwa tama tiali, magi baso meni, augwaligo te eno nageba wiegi yai sę bugagia eyu, genuai nogi elalubo sulama yali, te augwaligo Israelgo Genuai Bidi, te ena Godiba genuai nogi mayu yali, ena te Wiegi Yai Doloba Pai Kolesaga Mu Ebo God dao,” te po wai.

Aisaia 55:5

Mu tama, te dagego polobadu konesiąwai te bulu tǫ kantri we bidi dabe augwali i wabo sogo, te augwaligo me dage me konesiąwai, te augwali dageba polo udada asaibao. Magi baso meni, ena Genuai Bidi, dage Israelgo God, ena te Wiegi Yai Doloba Pai Kolesaga Mu Ebo God, eno dage te genuai nogi dali bomo dali si mu elalumainu ebao,” Genuai Bidigo te po wali.

Jeremaia 17:26

Te we bidi dabego te tigidali tǫ kantri pedai taga soyu, te Genuai Bidi, eno beba ofa sela asaibao. Te Juda taun we bidi dabego, me te Jerusalem pąde, me te Benjamin hani tǫ bage me, te bulu du bagede bidibo bage me, te giliga degasa dulubo pedai dwasianu bulu du badu bidibo bage me, te Juda te saut pedai badu bidibo bage me, tigidali te enaba asaibao. Tama augwa te siaba tigidali domainogo ulubo ofa, me te gasa ofa dabe kibu hasa, me te wit ulubo ofa dabe, me te wiegi yai denami holomainogo ulubo ofa, me te enaba usu da wabo, te tama ofa dabe sesaibao.

Esekiel 37:10

Tialima, eno Genuai Bidigo te po pusali, tama te wali te bidi tigiba dabe asali, tama augwali sese tama bidibo mobo selama, tama augwali sese tama hodalubo suali. Augwali te genuai ami bidi hani tiwai mu elaluali.

Aisaia 26:15

Genuai Bidi, nago dago hani genina mu ilalio. Awe, nago we bidi hani moni hani mu pedelalio. Tama dago bulu genuai mu pedalumainu eyu, nago dago tǫ dąį ibanu mu kidilalio. Tama te tialigo naga genuai nogi genuai mu pedalumainogo yalio. Awe, dago bulu genuai mu pedalomainu ilalio.

Jeremaia 3:16

“Te ena Genuai Bidi, eno te po obao. Nosali dage te duga tǫ kantride hauwa mu pedelaibao. Tama te sogo dagego te Genuai Bidi, eno Dąų Wali Bomai Po Munolubo Halobage po me wagobeo. Tama te bokis kontrakde po me wasiąma, tama dagego tede homu hauwa me egobeo. Tama dagego gesi te tobage Halobage me nigigobeo. Menio.