Jeremaia 3:22 - Godigo dwagi yai po buku

²² Genuai Bidigo te po wai, “Dage te hagoma ebo wai puluba dabe, dage enaba ma asiąo. Te eno dagego ena te duga tudiba mubo kolesaga dodolama, te dage ena dali bugagia bidimainu yaibao.” Tama te we bidi dabego po wei ponoyu, te po wai, “Awe, megi da, da nageba ma asaibao, magi baso meni, nage God, te dago Genuai Bidi dao.

Jeremaia 3:22 Referans Kwoze

Hosea 14:1

Te Israel dabe, dage te Godiba ma asiąo, te duga Genuai Bidi dao, magi baso meni, te duga dwai sęgęgo dage tulalumainu yali dao.

Hosea 14:4

Genuai Bidigo te po wai, “Tialima, ena te tagalali we bidi dabe eno ma dobola saibao. Te eno haligago augwali godolo mu eyu, te eno augwaliba wado yabo homu begelama, munu me egobeo.

Sekaraia 13:9

Tama te me badu bugai elalubo te dwagi yai pedalabo sę usu sabo sę ilaibao, te bidi mebago te gol me silva te dwai hogomu sela sąmainogo te isiba ulubo tiwai yaibao. Tama augwaligo gedu haluasa po enaba obaso da, teda eno augwaligo gedu haluasa po wabo odaibao. Tama eno te tama po augwaliba walaibao, ‘Dage da, eno we bidi dabe da’ obaso, teda augwaligo te tama po waibao, ‘Nage God, dago Genuai Bidi dao,’ po waibao,” Genuai Bidigo te po wai dao.

Hosea 13:4

Genuai Bidigo te tiwai po wali, “Ena God, duga Genuai Bidi da, eno dage te Isipde selama, tedu eba odasa asai. Ena deli naga, ena duga God dao. Te gasa me menio. Enaduba deligo naga eno dage ma sabo dao.

Hosea 3:5

Te tiali sogo silibaso da, teda te Israel dabe te Godiba ma aselama, te Genuai Bidi deliba naga lotu waibao. Te augwaligo te king Devitgo wąį nǫų deli naga wali paibao. Tama augwa te Genuai Bidigo po dologoba naga pobaso, tama agai te haniani wiegi yai nai augwaliba mayu yaibao.

Jeremaia 30:17

Te nago boi bidi augwaligo te tiwai po waibao, ‘Saion te olo nai tiwai elama, te mu dwaibao. Te bidigo agade homu me egobeo,’ te po waibao. Tialima, ena Genuai Bidi, eno te tiwai po obao, eno digi nago tigi usu ma ilama, te nago keni pedela somainogo yaibao,” wali.

Jeremaia 31:18

Te Efraim hani dabego gela wabo eno mu odalio. Augwa gela weyu, te tiwai po wali, ‘Genuai Bidi, nago da keloago elali, te nago da dodolali, te bidigo te hagoma ebo ogwa bidi bulmakau elibo tiwai yai. Genuai Bidi, nage naga dago God, te da nageba ma asabo homu ebao. Tama tialima, nago da odasa asao.

Solomon 1:4

Nago ena selama, da udayu pinao. Nage eno king bidi tiwai, te nago ena selama, te nago be habuba pinao. Te da si pemene yaibao. Nago ena godolo mu ebaso, tama da pemene mu ebao. Dago wiegi yai pemene ebogo te bidi dabego wain ąįde pemene homu ebo aiyaba elalubo dao. Nage uganu mu elalubao. Tibaso, tigidali we dabe nagede mu tulalubo dao.

Hosea 14:8

Tama te sogo te Israel dabego te tibo godiba lotu munu me wagobeo. Te enaduba deligo naga augwaligo gedu haluasa po wabo odaibao. Te eno augwali bugagia tonalu, tama augwali te ena dologode bidiyu, te bidi te genuai ni wuli dologo tiwąi madi te giliga nanu posolo ebaso bidibo tiwai yaibao. Ena digi ena te tigidali wiegi yai nai augwaligo sabo page bidi dao,” God Genuai Bidigo te po wai.

Jeremaia 33:6

“Tialima, nosali eno te taun tau selama, tama te taun dali, te we bidi dabe me, wiegi yai ma pedelaibao. Te eno wiegi yai sogo mu augwaliba menama, te augwali bugagia mu bidiyu, tama te boi bidi dabego augwaliba me hwįagasogobeo.

Aisaia 27:8

Genuai Bidigo aga we bidi agai augwali kalabusiba tagala palali sogo, augwali dene mawai dao. Agai te bomai wali te giliga asobo badu asiyu, te haniani nai dabe selasa pabo tiwai yali gilama, agai aga we bidi aga bomai waligo augwali sela sąyagasai dao.

Aisaia 1:2

Dagalu, olo saganama, odao. Tǫ, nago me odao. Magi baso meni, Genuai Bidigo te po wai dao, “Te wai dabe eno tonaluama, genuai yali. Eno augwali bugagia negali. Tiali goli, augwali da, augwaligo eno po sela sąbo dao.

Aisaia 57:17

Eno wado po dwai mu augwaliba wali, magi baso meni, te augwa haniani dwai kolesagade te augwaligo doado bage hauwa mu sabo homu yali. Tama tialima, te eno augwaliba dene mayu, te eno gesabidi augwaliba geme sesela sali. Tiali goli, augwa me hagoma idu gęyu, te augwa homu kolesaga wali piduai dao.”

Jeremaia 3:12

“Tama Jeremaia, nage dolugulama, te not badu bidibo Israel haniba i wao. Nago Genuai Bidi eno po te tiwai pusao, ‘Israel, nage da, te aga bidiba homu kęą pabo kolesaga tagalobo we da,’ wao, ‘nage enaba begasa ma asao. Ena Genuai Bidi, eno te po obao, eno nageba haliga sębę munu ma egobeo. Magi baso meni, ena te olo mu tau sabo wiegi yai homu kolesaga ebo God dao, te eno haliga sębę ebo te sesemane sogo elalua pidugobeo.

Jeremaia 4:1

Genuai Bidigo te tama po wai, “Dage Israel, te dage ma begasa asabo homu ebaso da, teda dage enaba naga asiąo. Dagego te dwai kugumini yai tibo god eno gedude mubo te sela sąyao. Tama dagego ena sesemane sogo wali asiąo,” wai dao.

Esekiel 33:11

Te Israel dabebolo e tama po walao, ‘Ena God Genuai Bidi, ena tigidali sogo bidibo dao, tama mu tama dao, te dwai kolesaga ebo bidi dabe isibaso, eno tede wiegi yai homu pemene egobe dao. Menio. Eno te dwai kolesaga dabeba tudi ola menama bidibo bidi dabeba eno wiegi yai homu pemene ebo dao. Dage Israel dabego odao. Ma begasa asao. Dagego duga ebo dwai kolesagaba tudi ola menama, tama dage enaba ma asiąo. Magi baso dagego isabo sę idu gebawe?’ Nago augwalibolo te po wao,” wali.

Aisaia 31:6

O dage Israel dabe, dagego Genuai Bidigo po sela sąbo dao. Tiali goli, dage mu begelama, tama agaba ma asiąo.

Esekiel 18:30

“Megi da, ena God Genuai Bidi, eno dage Israelde po elalubao. Te eno dage po tų ilibo sogo te dage deli deligo kolesaga eno dagalaibao. Tama tibaso, dage homu begelama, ge neyu, dagego te ebo dwai kolesaga tigidali tagalao. Te dagego tama tibaso da, teda duga te yali dwai kolesagago dage me dologobeo.

Hosea 14:5

Te eno Israel dabeba wiegi yai sę ilaibao, te tulubage segeni te wa pai tǫba tulama, te telabo tiwai yaibao. Te augwali te gasa wiegi yai sawi yai plauwa tiwai pedaliyu, tama te tǫ kantri Lebanonde te genuai bomai ni dabe tiwai pedaliyu yaibao. Te ni dabe sele te tǫ aya tomoba mu dulali tiwai ebo dao.

Joel 2:12

Tialima, Genuai Bidigo te po wai, “Mu dao, te tigidali sę pedelaibao, tiali goli megi dage haliga begelama, enaba ma asiąo,” wai. “Tama duga te nai habu selama, tama haliga hobede elama, gela weyu, enaba ma asiąo.