Jeremaia 26:5 - Godigo dwagi yai po buku5 ‘Te eno sę bidi, te eno profet dabego, dagebolo mabo po tigidali te wali pao. Hauwa sogo eno te profet dabe tagala palama, te dageba po pusagasali, tiali goli, dagego augwaligo po wali me pabeo. Gade chapit la |
“Te profet dabe, te augwali nago sę bidi dao, te bomai po nagade digi selama, tama augwaligo dabolo pusai dao. Tama augwaligo pedauwalide nago dabolo te tama po wali, ‘Te tǫ megi dagego sabo te eno gedude wiegi yai me ebeo,’ wali, ‘magi baso meni, te tǫ pedai we bidi hauwago te dwai kolesaga eyu, tama te tǫ badu tigidali te dwai meda yai kolesaga usu nai elalubao,’ wai.
Tama nago po konesiąbo haniani tǫde bidibo bage augwali sębę mu yai. Tiali goli megi nago sębę yabo sogo te pedelalio. Tama megi te isali we bidi augwali te po tų eboba pedalobo sogo dao. Tama megi e sogo naga sę ebo bidi dabe, te nago nosali yabo sę po pusali bidi, augwalibolo te wiegi yai nai mabo sogo pedalai dao. Tama nago we bidi tigidali, te nogi yai bidi me, te nogi meni yai bidi, tigidali nagede wi eyu nago bomo dologode bidibo we bidi, te megi da te nago augwalibolo me te wiegi yai nai mabo sogo pedalai dao,” augwaligo te po wai.
Menio. Tama nosali te nogo a naga olama me badu nogo si wali te ensel mobo bidi me deligo agai te ona tiwai nai elebadi, te sogo te Godigo homude polobadu dualali nosali yabo sę te hania pedalama, tama agai te sę yaibao. Polobadu agai aga sę ebo bidi augwalibolo te aga nosali yabo sę po pusali, tama augwaligo koneani, te sę hania pedalaibao,” te ensel mobo bidigo te po wai.
Tiali goli eno po te profet sibi dabego pedauwalidu eno pedelaibao wali te sę dabe duga wąį dabeba polo pedelai dao. Augwaligo eno augwalibolo mani te po wali pai menio. Tama tialigo augwali te dolali dao. Tama nosali augwali homu begelama augwaligo e tama po wai dao, ‘God, Tigidali Bomo Elalubo Genuai Bidi, agai dabolo wali gilama tama agai dabolo dene mawai dao. Te dena dagede tama dao,’ augwaligo te po wali,” God Genuai Bidigo te po wai.
Ena God Genuai Bidi, eno po te ena sę bidi dabebolo polobadu mu mawai dao, te augwali te Israel dabego profet dabe dao. Tama kibu be hauwade augwaligo po pusuyu, e tama po wai dao, nosali God eno te bidi me seselama, tama te Israel dabe dali hwįmainu yaibao. King Gok, te bidi te nage tama dao.’ Te po te king Gokde pusao,” Genuai Bidigo enabolo te po wai.
Tama tibaso, Genuai Bidi Godigo te Babilon hani bidi me siyu, me te Siria hani bidi dabe me siyu, tama me te Moap hani bidi dabe me siyu, tama me te Amon hani bidi dabe me siyu elama, tama te king Jehoiakim dali boi hwįnama, tama te Juda hanigo bulu Jerusalem taun dolomainu Genuai Bidigo tagala palali. Genuai Bidigo agai tama tiali sę te agai te profet bagebolo pusa mani poba usu nigi pai, te profet bidi dabe te aga sę ebo bidi dabe da.
Tama nosali te Genuai Bidigo augwali hagela mu ebaso, tama augwali aga pąde me bidisiąmainogo eyu, agai augwali te gasa buluba bidigi pomainu digibulu mu sela sąyani. Genuai Bidigo tama tiali, magi baso meni, te Israel hani bidi dabe augwaligo te tigidali po agai te aga sę bidi profet bidi dabego pedauwalidu ola mani podu wali pabe, te profet bidi dabe te aga sę ebo bidi dabe dao. Tama tibaso, te Asiria hani augwali asama, te Israel hani dabe dali boi hwįagaselama, te Israel hani augwali aiyaba elaluali, tama augwali te Asiria buluba odasa pali. Tama augwali te bulude me bidibao. Te gasa hani we bidi dabe augwali asama, te Israel hanigo buluba bidagasali.
Tama te Genuai Bidigo te profet bidi dabe me te nosali pedalubo sę koneai bidi dabe me augwali te Israel haniba me, me te Juda haniba me tagala palali, tama augwalibolo bomai po e tama wali, “Dagego kolesaga begelama, tama dagego te dwai kolesaga ebo sę tagalama, tama dagego te tigidali bomai po te eno po odama wali pao,” wali. “Te bomai po dabe me te eno te dagego wąį nǫųbolo mawai po dao, tama te po dabe te eno sę ebo bidi dabego eno ola mobaso, augwaligo pedauwalidu pusai dao, te bage te profet bidi dabe dao,” te po wali.
Hauwa sogo eno sę bidi, te profet dabe, te dageba tagala palidu geai. Tama augwa te po wali, dage deli deligo te duga homu begelama, dwai kolesaga tagalama, te duga kolesaga dodolao. Te dagego tibo godiba tibo po ola mayu, te augwaliba lotu me wagimio. Dagego eno te po wali pobaso da, teda dage te eno duga wąį nǫų dabeba me dugaba me mani tǫde bugagia bidaibao. Te profet dabego te tobage po pusali, tiali goli, dagego eno po me odisąyu, te wali me pabeo.
Tama tialima, ena Genuai Bidi, ena Tigidali Bomo Elalubo God, ena Israelgo God, eno te po obao. Dage Juda me Israel we bidigo, odao. Polobadu eno po dageba pusali, tiali goli dagego te poba olo me mubeo. Eno dage i wali, tiali goli dagego eno i wali wei me ponobeo. Tama tibaso, eno te dwai dene mabo sę tigidali dageba pedalumainogo ebao, eno te sę yaibao po wai dao,’ te po te Jerusalem bage dali te Juda bagebolo pusigi pao,” Genuai Bidigo Jeremaiabolo wali.