Jeremaia 25:12 - Godigo dwagi yai po buku

¹² “Te bidi sese sela olama, nogo si kibu be, te 70 yia silibo si da, teda ena Genuai Bidi, te eno te Babilon kingba me te aga we bidi dabe dwai dene mawaibao, te augwaligo yali dwai kolesaga wei ponaibao. Tama eno te Babilon tǫ kantri dolaibao, te tǫ Kaldia dao, tama te Babilon tǫ sesemane olo mu elalua paibao.

Jeremaia 25:12 Referans Kwoze

Daniel 9:2

Te hasia kibu bede aga te king bidali, ena Daniel, eno te Godigo buku dabe nededuali. Tama eno te Genuai Bidigo te profet Jeremaiaba mani pode homu kone palali. Agai te po weyu, te Jerusalem dolama elalubadi, te kibu be bidi sese sela olama, te nogo si, te 70 yiaba usu naibao walio.

Aisaia 13:19

Genuai hanu Babilon te genuai mu elama, tama sawi mu elama, tama tigidali gasa hanu dabe aiyaba elaluali. Te Babilon bulu we bidi dabego augwa hanugo wiegi yai nogide mu gana pabo dao. Tiali goli, Godigo Babilon dolaibao, te agai Sodom de Gomora si dolali tiwai dolaibao.

Jeremaia 29:10

“Ena Genuai Bidi, eno dageba mani po page e tiwai elalubao. Eno te 70 yia, te bidi sese sela olama, nogo si kibu bede te dage Babilonde bugagia bidaibao, te tama dąį ilali. Tama te tudi badu nosali, te Babilon dolaibao. Te sogo te eno homugo dage koneama, te dage eno Jerusalemba ma odasa paibao, te eno dąų wali tau sabo poba usu naibao.

Aisaia 14:23

Te eno te Babilon eno te hogomu poabo naigo poabo tiwai yaibao, te tigidali nai dola silibo hogomu poabo nai dao. Tama eno te Babilon sele pu bulu nigilaibao. Tama te dwai ba dabe naga bidagasaibao. Ena Tigidali Bomo Elalubo Genuai Bidi, eno po polo walio,” wali.

Esekiel 35:9

Te eno dagego kantri olo bulu elalumainu ilama, tama te tiwai tigidali sogo tama elalua paibao. Tama dagego taun dabede bidi munu me ma bidigobeo. Tama tiyu, dagego e tama bugagia koneaibao, ena deli naga ena Genuai Bidi dao homu yaibao.’ Te po me pusao,” wali.

Jeremaia 25:14

Te eno Babilon dabeba dwai dene mawaibao, te augwa yali dwai kolesaga wei ponaibao. Te tǫ kantri hauwa bomai kingo te augwali aiyaba elaluama, te augwalibolo kalabus sę mawaibao,” Genuai Bidigo te po wali.

Jeremaia 23:2

Tama tibaso, ena Genuai Bidi, ena duga Israelgo God, eno po dolo te dage eno bidi tonalubo sę ebo bidi dabeba obao. Dagego eno sipsip dabe ela gudulama, te augwali pobelama, besela palio. Dagego augwali bugagia me tonalubeo. Tibaso, ena Genuai Bidi, eno po dolo obao, te dage eno bugagia tonalu, te dagego yali dwai kolesaga wei ponainogo tebo dao.

Aisaia 46:1

Genuai Bidigo te tiwai po wai, “Dage Babilon dabego te Bel me Nebo si nogi ugwaba sobao, te si duga tibo god si elalubao, te augwali si dagego tolasa, te genuai lotu wabo side sabilibao. Tiali goli, te augwali sigo genuai nogi te sia saibao, te dagego te tiwai sueibao, te augwa digi tau sabo bomo meni yaibao. Te boi bidi dabego te Babilon taun dolagasobaso, te dagego augwali si te donki dabede kęnaibao. Te donki dabego te hobedagia, te augwali si te kalabus dage dali sela pabo sę dene yaibao,” te po wai.

Aisaia 20:1

Te Asiria tuni bidigo pode te aga polalubo ami ofisa bidigo aga ami bidi dabe selama, te hanu Asdotba me bulu Filistiaba hwįgi pali.

Aisaia 15:6

Magi baso meni, te wę Nimlim sese mu sula selama, tama te nosai da, te wę sesegede elaluali me sasia pali. Tama te pesagede tonali, te nosai me, ni dabe me, me holabo badi tonobo ąǫ ebeo.

Te Israel me Juda Hani Sigo Tuni Bidigo Po Elalubo Buku Si 24:1

Te Jehoiakim aga te Juda hanigo king bidi nigilama bidibo sogo, te Babilon bulu king bidi Nebukatnesargo te aga ami soldia bidi dabe selama, tama te augwaligo te Juda hani dabe dali boi hwįagasali. Tama te augwaligo te king Jehoiakim aga hani dali augwali aiyaba elaluali. Tiali goli, nosali te kibu be sela silibo si, te king Jehoiakim agai homugo te king Nebukatnesargo aga munu me tonalugobe homu yali, tama teyu, te king Jehoiakim aga te king Nebukatnesar dologode munu ma bidibe.

Tuni Bidi Dabego Po Elalubo Buku Si 36:22

Te Sairus aga kantri Persia king bidibadi kibu be deli wabode, Genuai Bidigo Sairusgo homu hogodolama, tama agai po me wali. Agai te po asęnama, tama agai te tonalubo tǫ tigidaliba tolali. Tama te po sela pabo bidi dabego te po augwaligo te we bidibolo neda mao wali. Te sę pedelali te polobadu Genuai Bidigo profet Jeremaiabolo menama, tama Jeremaiago te Israel we bidibolo pusali poba usu nagasali.

Godigo Nogi Ugwaba Sabo Tęąbi Po Wabo Buku Dabe 137:8

Babilon, odao. Te nage dolaibao. Te nago dabolo yali dwai sę wei ponobo bidi da, te bidi aga pemene yagameo.

Aisaia 33:1

Dage te gasa bulu dabe dolobo hani, dage dolaibao. Te mu tama, dage me dolobe dao. Tiali goli, dagego gasa bulu dabe dolobo bodolu sia saibao. Tama duga digi duga dolaibao. Dagego te gasa hani dabe ili po walama, tama dagego te po mia selama, tama dagego augwali te boi bidi dabego nogoba mubo dao. Te mu tama, te gasa hanigo da dage me ili po me ola masiąbadi goli. Tiali goli, dagego te gasa bidi dabe ili po wabo sogo te sia saibao. Tama te gasa bidi dabego dage ili po olama, tama dage te boi bidi dabego nogoba muaibao.

Jeremaia 27:7

Tigidali hani we bidi te aga dologode elaluama, te nosali augwali aga ogwa dologode bidama, te agai waigo wąį nǫų dabe dologode me bidaibao. Augwali te Babilon dologode bidada pedubadi, te eno Babilon dolabo bodolu muani sogoba usu naibao. Tama te sogo te tigidali tǫ kantri bomai king dabego te Babilon aiyaba elaluama, te augwa olo sę ebo bidi dabe tiwai mu pedelaibao,” te po wai dao.

Jeremaia 27:22

‘Te boi bidi dabego te nai dabe doado bage selama, te Babilonba selasa paibao. Tama te nai te doado bage te Babilonde munalubadi, tama eno augwaliba homu kone ma palobo sogo me deli teba ma yagasaibao. Tama tebo sogo te eno augwali ma sela aselama, te augwali Jerusalemde ma munalueibao,’ te po Genuai Bidigo wai dao,” wali.

Habakuk 1:17

Te Babilon dabego augwa boi bidi dabe hobede dwasianu me ebo menio. Tiali goli, Genuai Bidi, nago augwaligo hwįnama, tama meba kantri dabe dolomainu sesemane sogo sula tagalaiba, agawe?