Jeremaia 16:6 - Godigo dwagi yai po buku

⁶ Te kantri tǫde bidali tigidali genuai bidi me, olo bidi me, te isaibao. Te augwali pubulabo bidi menia saibao. Te augwalide homu dene eyu, gela wabo bidi meniama, te aga digi aga tigi wali tologoyu, te aga tobolu nisi poawaibao, te aga homu dene ebo ola mayu, te tama tegobeo.

Jeremaia 16:6 Referans Kwoze

Bomai Po 14:1

Mosesgo po geninama weyu, te po wali, “Dage da, te Genuai Bidi dago God agai wai puluba dao. Tialima, dage te isai bidide gela weyu da, te usu dao. Tiali goli, dagego duga tigi wali me togoyu, o duga tobolu nisi gebo badu me poayu me igio. Teda te wani yaibao, te Godigo po wali pisąbo bagego ebo gilama yaibao.

Jeremaia 47:5

Te Gasa hanude bidibo bidi dabe augwa haliga sęgę dwai mu elama, augwa tobolu nisi pola sąwaibao. Tama te taun Askelon mu dolaibao. Dage te odo malu bulude bidalubo dwasianu hani, nisu sogo dagego homu dene ebo silama, te dagego duga tigiwali togobo kolesaga tagalaibawe?

Jeremaia 41:5

te bidi sese me si me si te taun Sekem, me Silo, me Samaria, te bulu bidi dabe te sunumidu aselama, te Mispa pąba yagasali. Augwaligo te nai wit meba badi, te wiegi yai denami ebo pauda me selama, augwali te Genuai Bidigo be te Jerusalemba selasa aselama, te ofa yainogo yali. Te bidi dabe augwa penani nisi poalama, te augwa ugwa pisilama, te augwa tigi tologolama, te augwa polobadu yali dwai sęde homu dene ola mayu tiai dao.

Pris Sę Ebo Bomai Po 19:28

Te dagego tigide todogo pelama masalu ebo sę iligio. Te bidi isaide, ma we isaide homu dene eyu, duga tigi togobo sę igio. Ena Genuai Bidigo eno dagebolo te kolesaga dabe ebo habu mu selibao,” wali.

Jeremaia 48:37

Augwa homu dene mu elama, augwa tobolu nisi me penane nisi poawaibao. Te augwa nogo dabe togoyu elama, te hobede ebo ugwa gudaibao.

Aisaia 22:12

Tama te sogo God, Tigidali Bomo Elalubo Bidigo homugo dage homu dene elama, gela omaina homu ebao. Tama dage duga tobolu nisi gudama, tama hobede ebo ugwa gudumainu homu ebao.

Kraisgo Geme Dualali Sę Pedelabo Po Jonbolo Ola Mani 6:15

Tama te tǫde tuni bidi dabe dali, te genuai nogi yai bidi augwali me, te ami genuai bidi augwali me, te walu hauwa dali te masigi hauwa munalubo bidi badi, te bomo yai bidi augwali me, tama te tigidali bidi, te masigi sisąbo sę ebo bidi dabe me, te bugagia olo bidibo bidi dabe me, tigidali hodobo augwali te tǫ olua bede duala siyu ela bilai, tama te genuai bulu dude elalubo masigi dologoba teba duala sisa bilai.

Jeremaia 16:4

“Tigidali te isaibao. Me badu te dwai gasi selama, isaibao. Te boi bidi asama, me badu ela mueibao. Te me badu nai sǫą peyu, isaibao. Tama augwalide hobedai gela olama, te augwali pubulabo bidi me elalugobeo. Menio. Augwaligo tigi dabe te tǫde yowi di munalua pabo tiwai yaibao. Tama te ba dabego me uni hasa dabego augwali tigi tuagasaibao,” wai dao.

Jeremaia 13:13

Tialima, nago te po augwaliba pusao, ‘Ena Genuai Bidi, eno te tiwai po walio,’ po wao. ‘Te dage tǫde we bidi tigidaliba wain mu pągąnaibao, te dage gęǫ page dwai mu yaibao. Te Devitgo king hani dabe, me te pris dabe, me profet dabe, me te Jerusalem we bidi tigidali badi, eno waingo pągąbo te tǫgo nigai sospen senede pągąwai tiwai gilama yaibao.

Jeremaia 7:29

Jerusalem, nago naga tobolu nisi togola sąyu, te nago hobede ebo ola mao. Te nage bulu duba holama, te hobede ebo tęąbi wao, magi baso meni, te nago we bidi dabego te Genuai Bidi haliga sębę dwai mu ilibao. Tama tialima, Genuai Bidigo te hani we bidi dabe homu godolo munu me isiąma, te augwali tudiba muai dao.

Aisaia 24:2

Tagala, augwali mena tiwai we bidi yaibaso me, augwali deli sę tiwai naga suaibao. Te pris bidi dabe dali, me te olo we bidi dabe me, tama me te tonalubo bidi dabe me, olo sę bidi me, olo sę we dabe me. Tama me te bisnis bidi dabe, me te augwalide nai dabe abelebo bidi dabe me, tama me te nai negeli sabo bidi dabe dali, te nai negeli mabo bidi dabe dali me. Tama me te moni bidi dabe dali, me nai meni yai bidi dabe dali me. Augwali tigidali sese tama te dwai dene saibao.

Kraisgo Geme Dualali Sę Pedelabo Po Jonbolo Ola Mani 20:12

Tama eno ma suali, te isai we bidi dabe augwali bidaluali, te augwali nogi yai bidi dali, te nogi meni yai bidi dabe dali, augwali te tuni bidi dulalubo nai te gesabidide dodolalubo, te eno suali. Tama te saide dulalubo bidi agai te buku meba dagawai. Tama agai gasa buku me deli dagawali, te augwali isiąma gamonaibao wali we bidi nogi asęani buku dao. Tama agai te tigidali isai we bidi dagalai. Agai te augwaligo yali kolesagade po te buku dabede asęani po nedama, tama te asęani pode agai augwali dagalali.

Amos 6:11

Magi baso meni. Genuai Bidigo po obaso, te tigidali genuai be me, dwasianu be dali, te subigila todogola pelama, olo pobele bage hogomu pedelaibao.

Matyu 9:23

Tama Jisas ma pelama, te Juda hani genuai bidigo beba sabolama, tama Jisas te be tomoba pai. Te be tomode agai te diligide ona elebo bage suali, te we bidi augwaligo moni gela weyu, genuai kiligili wabo agai odali.

Tuni Bidi Dabego Po Elalubo Buku Si 36:17

Tialima Genuai Bidigo te Babilon king aga ami bidi dabe dali augwaligo te Juda dabe dolomainu tagala palali. Te Babilon dabe augwaligo te Juda dabego gesi bidi te tigidali Jerusalemde ela siliyu, me te Genuai Bidi aga bede ela siliyu yali. Kingo Juda dabe hobede dwasianu me ebeo. Mu menio. Te Babilon dabe augwaligo te Juda dabe gesi bidi me gesi wegi sese tama, me monu dabe, me te mosi dabe mu yai bage pąde tama te isabo ąǫ yai bage te Genuai Bidigo te Juda dabe sese tama te Babilon kingo nogoba muani.

Pris Sę Ebo Bomai Po 19:27

Te dagego tobolu nisi te dagego olo pąde togogimio, te dagego penani nisi togolama pęwadage iligimio.

Jeremaia 8:2

Te Juda dabego te giliga, me polua, me hǫ dabe, te godolo homu mu yalio. Tama augwa te nai dabeba kidu sugunama, gedu haluasa po augwaliba weyu, te augwali tau somainu augwaliba hanalu wali. Te augwaligo te tobage kolesaga dabe augwaliba lotu weyu ebo sę dabe yali. Tama tibaso, te boi bidi dabego te Juda dabego tigi dili dabe selama, te tǫba sąyu, te yowigo di tabo tiwai yaibao. Te giligago, me poluago, me hǫ dabego te tigi dili sueibao. Tama te dili dabe selama, te ma pubulabo bidi dabe meni yaibao.