Jeremaia 14:17 - Godigo dwagi yai po buku

¹⁷ “Tama Jeremaia, eno homugo te nago naga po digi te we bidi dabeba pusao. Nago te tama po wao, ‘Ena Jeremaia, te ena gela umabo mu udubadi gęyu, te eno gedudu gela guwa gealudaibao. Eno te tebo kolesaga te ulade me, hulide me, tagalogobeo, magi baso meni, te boi bidi dabego eno we bidi dabe dwagilama mu eliyu, te we bidi hobedagia mu dolali.

Jeremaia 14:17 Referans Kwoze

Jeremaia 8:21

Ena Jeremaia, eno suali, ena hani dabe dolali, tibaso eno homu dwalio. Eno haliga sęgę dwai mu elama, te eno gela umagia mu wai dao.

Te We Bidi Dabego Jerusalem Hagede Gela Wali 2:13

Jerusalem, eno nage hobede mu dwalio. O Jerusalem, te meba taun dabe nago te sali dene tiwai me sai menio. Tialima, eno mena po mu olama, nago homu dąų walaibawe? Nage dolali, te ene genuai mu tomoba pali tiwai yalio, te tamu ąį ge te aiyana mu dulali tiwai yalio. Tama nage dego wiegi yai ma pedelemainu egowe? Woo, bidi menio.

Jeremaia 13:17

Tialima, te dagego po odisąma, te dagego hagoma idubaso da, teda te boi bidi dabego dage Genuai Bidigo we bidi sagaselama, te gasa tǫ kantriba kalabus mugi paibao. Tama tibaso, ena Jeremaia, te enaduba bididu, te dagede gela wedu gedubadi, te eno gedude gela guai gealuama, te eno gesabidiba dualibao wali.

Jeremaia 9:1

Idao! Te eno tobolu te ulu wę me deli tiwai elaluyu, tama te eno gedu sidu te ąį hauwa geligi da, teda eno homu dene dwai mu eyu, gela wabo usu igi da. Te eno giligade me hulide gela udigi da, magi baso meni, te boi bidi dabego te eno hanigo we bidi dabe ela muai dao.

Maika 6:13

“Tama tialima, megi da, eno dagego te dwai sę ebo sęgęde homu kone palama, tama eno dage dolobo sę gagalama yaibao,” po wai dao.

Te We Bidi Dabego Jerusalem Hagede Gela Wali 2:18

Te nago we bidi augwaligo Genuai Bidigo augwali tau somainogo hwą te waiyąo. Hobedai, Jerusalem, nage hulide me giligade gela genina mu elama, tama nago gela uga te ąį sabo tulubo tiwai emainao. Nage hodo me doligio. Nage gela wabo sę naga idu geao.

Jeremaia 10:19

Tama te Juda dabego te tama po waibao, “Hobede mu ebao, da dolalio. Te dago sęgę genuai mu elalubao, te genuai keni pedela sisąbo tiwai ebao. Tiali goli, tagalao, te sęgę daba pedelama, te dago tolobo dao,” te po wali.

Aisaia 37:22

Tama tialima, megi da, agai te Senakerip dali po elalubao, te Asiria king dao. Genuai Bidigo te tiwai po wali, ‘Senakerip, te Saion bulu dude bidibo we bidigo nageba gisugu mabo dwai mu eyu, tama te Jerusalem bagego nageba posobo dwai weyu, te nage begela dolobo dao.

Godigo Nogi Ugwaba Sabo Tęąbi Po Wabo Buku Dabe 39:10

Nago ena me dolamuo dao. Nago ena dene mu menama, tama pąde ena isainu ebao.

Amos 5:2

Te tiwai balia obao, “Te gesi wegi Israel, aga degasa dulalio, ela mubaso, te ma hodalubo usu ebeo. Aga te aga tǫde pila mubao, te aga tau selama hodolabo bidi deli me meni dao.”

Godigo Nogi Ugwaba Sabo Tęąbi Po Wabo Buku Dabe 119:136

Eno gela hauwa weyu, tama eno gedu ąį gela gigua umagi mu yaibao, magi baso meni, te bidi dabe augwaligo nago bomo yai po wali pisąbaso, te ena gela wabo dao.

Jeremaia 8:18

Eno hobede elama, tama haliga sęgę dwai mu elama, tama eno homu kolesaga tigidali dolalio.

Te Israel me Juda Hani Sigo Tuni Bidigo Po Elalubo Buku Si 19:21

Tama megi te agai te king Senakerip dali naga po elalubao wali, te Asiria king bidi. Genuai Bidigo e tama po wali, ‘Senakerip, te taun Jerusalemgo te nage dali te gisugu dwai mu weyu, tama nage dali posobo po weyu, tama nage dali dwai bidi mu da olama, tama dwai mu da wabuo,’ wali.

Jeremaia 9:18

Tialima, te we bidi dabego te tiwai po wali, “Awe, te augwali polo asesą aselama, te daba hobede ebo tęąbi wagasomainao, te da gela umagia weyu, te dago gedude gela guai tulaluyu, te dago gesabidiba dulumainu yaibao,” te po wali.

Jeremaia 18:13

Tama tibaso, Genuai Bidigo po ma weyu, te tama po wai, “Ena Genuai Bidi, eno po dolo obao. Te gasa we bidi dabeba hanalu wagi pao. Te augwaligo te we bidi mebago dwai kolesaga mu yali po odali, te Israel dabego yali tiwai eba, agawe? Eno te Israel hani mu sai dao, bidigo te bidi dali pagela pisąwai gesi we sabo tiwai yali. Tiali goli, augwaligo dwai sę mu yali.

Te We Bidi Dabego Jerusalem Hagede Gela Wali 2:11

Eno te Jerusalemde pedelali nai dabe homu kone palama, tama ena gela waligo eno gedu dene mu ebao. Eno te hobedai we bidi dolama elalubo sulama, ena gasa homu dwai mu ebo dao. Eno homu dene dwai mu yalio. Magi baso meni, eno suali, te nai tusiąwai wai puluba dali, wai bǫų dabe dali suali. Augwaligo bomo kimi meniama, tama didibili elama, te Jerusalem sunumi dabede tuloluama, munalua pabo sualio.