Jeremaia 10:1 - Godigo dwagi yai po buku

¹ Dage Israel, te Genuai Bidigo poba olo bugagia muao.

Jeremaia 10:1 Referans Kwoze

Kraisgo Geme Dualali Sę Pedelabo Po Jonbolo Ola Mani 2:29

“Olo elalubo bidi, agai te Godigo Mobo Bidi agai Godigo po odobo we bidi hani dabebolo wabo po bugagia odao.”

1 Tesalonaika 2:13

Tama tibaso, sesemane sogo dago Godibolo gedu haluasa po weyu, dago nage usu dao po wabo dao. Magi basowe? Polobadu Godigo po dago pedauwalide wabo po dagego odai. Tama te po odama, tama te olo bidigo po dao homu eyu, dagego te po sai menio. Te meni. Te po Godigo po mu dao. Tama dagego te po odoyu, dagego te homu yai, awe, te Godigo po mu dao. Tama te pogo te Godibolo konealubo po dąų wabo bidigo homu kolesagade sę bomo mu ebo dao. Te Judia tǫde bidibo we bidi meba augwali Godigo we bidi hani mu dao. Augwali te Jisas Kraisde homu dąų wali we bidi dao.

Amos 7:16

Tialima, Genuai Bidigo po odao. Agai te Israel dabede wado po elalubao, tiali goli nago enabolo te profet po augwaliba pusubo te habu selibo dao.

Hosea 4:1

Genuai Bidigo te kantri tǫde bidibo we bidi dabeba po kisilama wali. Dage Israel, te Genuai Bidigo po odao. Agai te tama po wai, “Te bulu tǫ kantride bidibo we bidi dabego te mu po wabo kolesaga konesiąma, tama augwa abagi dabe digi te godolo homu me ebeo. Augwaligo te ena augwa Genuai Bidi da homu me isąwai.

Jeremaia 42:15

Te tobage po dagego obaso da, teda ena Genuai Bidi, eno dage te dwasianu Juda hani we bidide po elalubao. Ena Tigidali Bomo Elalubo Genuai Bidi, ena Israelgo God, eno te po obao, te dage Isipba bidigi pabo bomo mu ebaso da,

Jeremaia 22:2

“Nago te tama po wao, ‘Nage te Juda king, nage te king Devitgo duayali sia kingde dulalubao, nago te Genuai Bidigo po odao. Nage, te naga ofisa dabe dali, te nago we bidi dabe dali, dage tigidaligo te po odao.

Jeremaia 2:4

Dage Jekopgo bulai wąį wai puluba dabe, dage tigidali te Israel hani dao, dagego te Genuai Bidigo te tiwai po odiąo.

Aisaia 28:14

Dage e Jerusalemde we bidi tonalubo we bidi, dagego Genuai Bidigo po odiąo. Dagego homugo Genuai Bidigo po olo nai dao homu ebo.

Aisaia 1:10

Dage tobolu bidi dabe, me dage Jerusalem we bidi dabe, dage te bidi dwai dabe te hanu Sodom de Gomora side polobadu bidali bidi dabe tiwai mu tama dao. Megi da, dagego olo bugagia munama, tama Godigo bomai po odao, dago Genuai Bidi. Agai dabolo mawainu ebo po bugagia odao.

Godigo Nogi Ugwaba Sabo Tęąbi Po Wabo Buku Dabe 50:7

Godigo te po wali, “Dage te eno we bidi da, odao. Eno po elalubao. Dage Israel dabe, eno dage po tų ilaibao. Ena naga, ena te God mu da, tama ena te dagego God dao.

Te Israel me Juda Hani Sigo Tuni Bidigo Po Elalubo Buku Deli 22:19

Tialima, Mikaiago po wadolama weyu, te tama po wai, “Tialima, megi da, eno homu nago olo bugagia munama, odao, te eno nagebolo te Genuai Bidigo enabolo ola mani nai dabede po waibao. Eno suali, te dagalude Genuai Bidi te aga dugulalubo sia saide dugulaluali, te tigidali mobo bidi ensel dabe aga pąde dolalubo suai dao.

Jeremaia 9:26

Te e bage te Isip dabe, me Juda dabe, me Idom dabe, me Amon dabe, me Moap dabe, me te olo masigi kemi tǫde bidalubo bage me, te augwa gesabi badu tobolu nisi pęwadage sugą sobao. Te hani augwali te Genuai Bidigo po odisąbo bage, te Israel dabe augwaligo me te hani bagego kolesaga wali palio. Te Israel dabe me, augwa hale ebo tigiwali togosiąwai ąǫ tiwai yai dao,” wali.

Jeremaia 10:2

Agai te tiwai po obao, “Dagego te gasa tǫ pedai kantride bidibo hani dabego kolesaga wali pigimio. Augwaligo te gasagi yai nai te dagalude pedalubo sulama, te augwa wi mu yaibao. Tialima, dage da, wi me elamuo. Menio.

Aisaia 40:18

Tama tialima, God te de mu tiwai dawe? Te elalubo nai me deli te God tonobo tiwai ebo da, agawe?

Aisaia 44:6

Tigidali Bomo Elalubo Genuai Bidi, aga te Israel king da, te dage tudibadu pogalu, te dage tau sabo bidi, agai te po wai, “Ena Genuai Bidi, ena hasia polasa mu bidali, tama ena nosali te sabi badu mu bidaibao. Te gasa god munu me bidibeo, enaduba deli naga bidibo dao.