Jeremaia 1:16 - Godigo dwagi yai po buku

¹⁶ Tama eno ena we bidi dabe po tų kot ilama, te augwali dene mawaibao. Magi baso meni, augwaligo ena tudiba munama, te augwa digi tibo god nigilama, te augwaliba ofa eyu, te lotu augwaliba wai. Te kolesagade augwaligo te dwai sęgę saibao.

Jeremaia 1:16 Referans Kwoze

Jeremaia 19:4

‘Eno te tiwai yaibao, magi baso meni, te eno we bidi dabego ena tudiba munama, tama augwa te gasa tibo god dabeba te wiegi yai denami ilibo hano ebo ofa ebao. Te we bidi augwa digi, me te augwa wąį nǫų dabego me, te Juda king dabego me, te god polobadu me konebeo. Tiali goli, megi augwaligo te god dabeba lotu weyu ebao, tama tebo kolesagade augwaligo te pesage dwai meda mu eno gedude ilibao. Tama me, te augwaligo magi sęgę meni yai bidi hauwa ela muyu, tama augwaligo kaneme te pesagede geą sąbo dao.

Jeremaia 7:9

Te dagego nai wi siyu, te bidi dabe ela muyu, te penani sę ebo kolesaga te bidi dabe me bidigo sai we dali eyu yali. Te dagego bomai po dąų wabo sogo te tibo po obao. Te dagego wiegi yai denami hano ebo ofa te tibo god Balba ebao, te dagego polobadu lotu me wasiąwai tibo god dabeba lotu wabo dao.

Godigo Sęba Tagala Palai Bidigo Po 7:41

“Augwaligo te po olama, te sogo augwaligo bulmakau kibu wai tiwai nai me deli nigalio, te augwaligo tibo god. Tama nigilama, augwaligo hasa dabe elama, te tibo godibolo lotu po olama, nai ula mani. Augwaligo moni kibu da tiwai tuali, augwa nogogo nigai nai sulama, dwagi yai homu elama, moni nai kibu da tiwai tuali.

Aisaia 2:8

Tama me ma, augwaligo tǫ tibo god dabego piksago pągąna pali. Tama augwaligo augwa te nogogo nigali nai dabeba lotu po wabo dao.

Bomai Po 28:20

“Te dagego Genuai Bidiba tudi ola menama, dwai sę dabe yali da, teda agai haniani dwai sę dage tigide pedalomainu yaibao. Tama agai dage dolomainu elama, tama dagego ebo sę tigidali geda muyu elama, te nai dabe dolaibao. Tama polo tama dage sese dola silaibao.

Hosea 11:2

Eno te hauwa sogo augwali i weyu, te ena wali asao po wai. Tiali goli, sesemane sogo te augwaligo ena tudiba muani. Eno we bidi augwaligo te tibo god Balba ofa yalio. Augwaligo te wiegi yai denami ebo hano ilibo ofa te haniani tibo godiba yai dao.

Hosea 8:6

Te Israel sę bidi me deligo te tibo god nigali. Te God meni, te olo piksa noma naga dao. Eno te bulmakau piksa noma alua sąnama, te pobele bage kakali pedelaibao,” wai.

Jeremaia 44:17

Dago te dena yaibao olama, po dąų wali sę tigidali yaibao. Dago te wiegi yai denami ebo ofa te god weba idu geaibao, augwa te tama nogi yali, Te Dagalude Kwin We dao wali. Te dago agaba te wain ofa gelidu geaibao. Polobadu dena digi me, dago wąį me, king dabego me, te tobolu bidigo me, dago te tobage ofa Te Dagalu Kwin Weba yali. Dago te ofa te Juda taunde, me Jerusalem sunumi dabede yalio. Te dago tama tiali sogo, te dago nai hauwa elalu, te da bugagia bidiyu, te dwai me deli dabolo me pedalubeo,” te po wali.

Jeremaia 17:13

Genuai Bidio, sesemane sogo da Israelgo konealubo po nageba dąų olama, te nago da tau sabo tonalubao. Te bidi dabego nage tudiba muani, augwali hale dwai mu yaibao. Polo tama te bidi dabego augwali homu kone palubo tagalu, te nogi me deli homu kone gegeda pabo tiwai eyu, bidigo te tǫ hogomude asęai po polo hola pabo tiwai yaibao. Genuai Bidi, nage te ąį ulu tiwai dabolo ula mabo tiwai ąį elalubao. Tiali goli, te bidi dabego nage tagalobo dao.

Jeremaia 4:12

Te wali te bomai wali, tama te waligo augwali mu dolaibao. Ena digi eno po obaso, te wali asaibao, magi baso meni, eno te we bidi dabe po tų ilama, te megi da eno augwaliba dwai dene mawaibao,” wali.

Aisaia 37:19

Tama te king augwaligo te hani we bidi dabe augwa god dabe sela sąyu, te tigidali siaba ulali. Te god dabe dolali, magi baso meni, augwali te tibo god naga dao. Te bidi augwa digi te ni me masigi selama, augwa nogogo nigai dao.

Te Israel me Juda Hani Sigo Tuni Bidigo Po Elalubo Buku Si 22:17

Te tigidali we bidigo ena tudiba ilama, tama augwaligo te tibo god dabeba ofa nai ula mabo sę ebo dao. Tama augwa te dwai kolesaga ebogo te eno augwali dali eno wado te ebao. Eno sębę genuai mu te Jerusalem dali eyu, tama eno te sębę ebo sę te eno polo sia sogobeo,’ wali.

Josua 24:20

Tama mu tama, agai polobadu dagebolo wiegi yai sę mu yali, tiali goli te dagego Genuai Bidi tagalama, tama te gasa hanigo tibo Godiba lotu po obaso da, teda Genuai Bidigo po wado po olama, tama agai dage dene ilama, tama agai dage dolaibao,” te po wai.

Bomai Po 31:16

Tama Mosesbolo Genuai Bidigo te po walali, “Pąde tama nage isaibao. Tama nosali te Israel we bidigo eno augwali dali dąų wali po togolama, ena tagalaibao, te bidi me aga we tagalama, te penani ebo weba pabo tiwai gilama. Tama tiyu augwaligo ena tudiba togolama, tama augwaligo tibo godiba lotu po waibao, te augwaligo megi sigi painogo ebo te bulude bidiyu tiaibao.

Esekiel 24:14

“Ena Genuai Bidi, eno mu po obao, te dage eno dolaibao. Te dagego meda yai kolesaga ebode te tigidali eno homu kone ebo gegeda palogobeo. Te dage eno homu dene me isąma, te eno dageba olo mu tau sabo wiegi yai kolesaga me egobeo. Mu menio. Te eno dage po tų ilama, te dagego yali dwai kolesaga tigidali dolo wei ponaibao. Ena God Genuai Bidi, eno te po wai dao,” wali.

Jeremaia 51:17

Bidi augwali te tiwai ebeo. Tigidali te umuna pelama, te kolesaga konesiąwai elaluai. Te golgo tibo god dabe nigibo bidi augwali augwa te nigibo naide augwa hale yaibao. Te god dabe augwali te god mu menio. Augwa bidibo ula me elalube dao.

Jeremaia 16:11

Te we bidi dabego te tama po obaso da, teda nago e po augwaliba wei ponao, ‘Ena Genuai Bidi, eno te kolesaga dagego nǫų wąį dabego ena tudiba munama, te tibo god dabe wali peyu, augwaliba lotu wali. Augwaligo ena tagalama, te eno bomo yai po wali me pabeo.

Jeremaia 15:6

Ena Genuai Bidi, eno po dolo tama obao, naga digi ena tudiba mudu, te ena digibulu pali. Tama tibaso, te ena digi ena nogogo te nage elama dolobao. Hauwa sogo eno nage hobede yali, tiali goli megi ena hagela pai dao.

Jeremaia 11:17

Ena Tigidali Bomo Elalubo Genuai Bidi dao, eno te ni bulali, tialima, megi eno te po obao, aga dolomainao. Dage Israel hani dabe me Juda hanigo te god Balba lotu weyu, te wiegi yai denami ebo ofa me ebao. Dagego te dwai kolesagago te ena haliga sębę dwai mu ilibo dao,” wali.

Jeremaia 11:12

Te Jerusalem dabe me te gasa Juda bage te augwa wiegi yai denami hano holobo ofa ebo tibo godiba paibao. Tama augwa te god dabeba i waibao, tialima, te god dabego augwaliba te dwai sę ebo sogo ebo side tau sainu ebaso, usu me egobe dao,” wali.

Jeremaia 10:15

Augwali te olo nai mu tiwai elalubao, te bidi dabego posobo po augwaliba waibao. Te god dabe da dolama, te mu sia saibao.

Jeremaia 5:29

“Ena Genuai Bidi, eno dolo yai po obao. Mu tamao, eno te bidi dabeba dwai dene mabo sę yaibao, te augwa ebo kolesaga wei ponoyu, tama tiaibao.

Jeremaia 5:9

Ena Genuai Bidi, eno dolo po obao, mu tama eno te we bidi dabeba dwai dene mawaibao, augwa te yali dwai kolesaga wei ponoyu tiaibao,” wali.

Jeremaia 4:28

Te pagede naga tama, te tǫgo hobede ebo tęąbi weyu, te dagalu husuga sai pedelaibao. Eno homu kone palama, te sę emainu yali, te eno homu me hasegelabo homu me egobeo. Mu menio,” wali.

Jeremaia 2:17

Te naga digi yali sęgo te sę nageba pedelali. Magi baso meni, ena Genuai Bidi, naga God, eno nage te sunumidu odasa asainu yali, tiali goli, naga hagela eyu, ena tudiba muai dao wai.

Jeremaia 2:13

magi baso meni, eno we bidi dabego te dwai sę si yali. Hasia augwaligo ena tudiba muai. Ena te ulu wę tiwai te augwali bidabo ula maiabo wę elaluali, tiali goli, augwaligo ena tagalali. Tama me, tǫ diganama, augwa digi te wę sabobo nai nigali. Tiali goli, te wę sabobo nai te alua pelama, te ąį augwalide elalubo usu ebeo.’”

Aisaia 65:3

Te eno gedude augwa te eno haliga sębę elama, wado po wabo tobage kolesaga ebao. Augwa te Godigo po odisąbo bidi dabego ebo kolesaga yai. Augwa te lotu wabo pesage te gide elalubo te sisinama, ofa eyu, tama augwa te tibo god dabego altaba pelama, te wiegi yai denami yabo hano ilibo pauda ulubo dao.

Aisaia 44:15

Augwa te ni dabe togolama, te me badu togwa sabo ni dage te tigi posolo ilabo nogabo sia sali, tama te togwa sabo delage me badu te bret ulabo sia sali. Tiali goli, te ni dage me deli augwa selama, te augwa tibo god piksa nigilama, augwa lotu po teba wai dao.

Tuni Bidi Dabego Po Elalubo Buku Si 34:25

Te we bidi augwaligo enaba tudi ola menama, tama augwaligo tibo god dabeba ofa yai dao. Tama augwaligo te dwai kolesagago eno augwali dali sębę emainu ilai dao. Eno te Jerusalem dabe dali sębę mu elama, tama eno te sębę munu me siligobeo.

Tuni Bidi Dabego Po Elalubo Buku Si 15:2

Tama king Asa te Jerusalemba ma asobadi, te Asaria aga tiąba pelama, tama agabolo e tama po wali, “King Asa, me tigidali Juda dabe, me tigidali Benjamin hani, dagego odiąo. Tialima dage Genuai Bidi dali pąde mu bidiyu da, teda aga dage dali pąde mu bidaibao. Ma, dagego aga gegebo sę iyu da, teda dage aga pąba mu asobo usu yaibao. Tiali goli, dagego aga tudi ola mayu da, teda agai dage tudi ola mawaibao.

Tuni Bidi Dabego Po Elalubo Buku Si 7:19

“Tiali goli dage Israel dabego eno bomai po me eno gasa po dabe wali pisąma, dagego tibo godiba lotu po olama wali peyu ebaso da,

Joel 2:11

Genuai Bidigo te aga ami bidi dabeba i bomonama wali, te agai pedauwalide te dagalu kulukulu wabo tiwai yali. Te agai po wali pabo bomai ami hauwa elaluali. Idaya, tegobao! Te Genuai Bidigo bodolu side te dwai mu dao. Tialima, de aga te bugagia bidiyu, te aga me dologobe dawe?

Kraisgo Geme Dualali Sę Pedelabo Po Jonbolo Ola Mani 9:20

Tama tigidali gasa bidi dabe augwali te dwai nai selago ebo sęde isisąwai bage, augwali homu begelesiąma tama augwa nogogo nigali nai tagalama tudiba musiąyu me bidaluali. Tama tiyu augwaligo te dwai haubo noma bidi dabebolo lotu po wabo tagalobe. Augwaligo te tibo god dabe te kapa golgo dali silva dali te bras me, te masigi me, te nigo me, tama naigo nigai tibo god dabebolo augwaligo lotu po wabo tagalobeo. Te nogogo nigali tibo god augwaligo gedugo sugobeo, ma ologo odogobeo, ma biligobeo. Tiali goli augwalibolo te bidi dabego lotu po weyu bidaluali.

Jeremaia 2:28

Tiali goli, tega! Juda te dage tau somainogo duga digi te nigali god dabe mena bidibawe? Augwa namba te duga taun dabe namba tobage gagawai yali. Te dageba sęgę me pedalubo sogo, augwaligo digi dage tau somainao, te augwali usu elalubaso da, te emainao,” wali.

Jeremaia 10:3

Suao. Te hani dabego mu kolesaga me ebeo. Augwaligo ebo kolesagago augwali tau sabo usu egobeo. Augwa te ni me deli buside gelama, tama te ni piksa dulubo konebo bidi dabego te ni selama, tama tego tibo god dulama, nigali.

Tuni Bidi Dabego Po Elalubo Buku Si 28:2

Agai dwai kolesaga naga iduali, te Israel dabego king dabego ebo kolesaga tiwai yali. Agai te sę bidi dabebolo olama, tama augwaligo bras dabe selama, augwaligo tibo godigo piksa Bal noma dabe nigali.

Jeremaia 2:19

Naga digi ebo dwai kolesagade te nageba dwai dene mawaibao. Nago ena tudiba mubaso, tama naga te kolesagade nageba wado ilaibao. Nago ena Genuai Bidi tagalu, te nago God, te nago ena dologoba me bidagasobe. Tama nago bugagia homu kone palama, koneao, nago te dwai kolesaga dabe mu ebogo te nageba dwai dene mobao. Ena God, Tigidali Bomo Elalubo Genuai Bidi, eno te po wai dao.”

Jeremaia 7:17

Te nago te kolesaga augwaligo te Juda dabego taunde ebo, me te Jerusalem sunumi dabede ebo susąyu eba, agawe?

Jeremaia 7:18

Te wai pulubago nogąbo sia sisinibaso, tama te aya dabego sia nogoyu, tama ida dabego te bisket nigabo plaua begelaibao, tama augwa te bisket dabe te nogi ebo tibo god weba ofa ebao, te nogi Dagalude Kwin dao wali. Tama me, augwa te haniani godiba wain gelebo sę me ebo dao. Te tama tebo dwai kolesagade augwaligo te ena sębę ilainu ebo dao.

Jeremaia 18:15

Tialima, ena we bidi augwaligo ena homu kone me isąma tagalali. Tama augwa te wiegi yai denami ilibo hano ebo ofa te tibo godiba ebao. Tama tebo kolesagade augwali tulaluama, te polobadu wiegi yai sunumi wali pabo tagalali. Te megi da, augwa te dwai sunumi wali pabo dao.

Esekiel 16:18

Tama te au hauwa dogia pai elalubo ugwa name nago te selama, tama nago te piksa noma dabe au ilali. Tama nago te oliv wel me, te wiegi yai denami ebo hano ilibo pauda me sali, te nage eno mani, tama nago te piksa noma dabeba ofa yai dao.