Jems 1:19 - Godigo dwagi yai po buku

¹⁹ Eno dwagi yai ama dedeo, dagego e po pagede bugagia kone palama, koneao. Dagego te po odabo homu sisi elama, wabo po odao. Te dagego polo asesa te po weyu, tama dagego polo wado po wabo homu olamu dao. Dua yao, sębę polo egimio.

Jems 1:19 Referans Kwoze

Bugagia Bidibo Kolesagade Po Asęai Buku 17:27

Te genuai kolesaga koneai elalubo bidi, te agai po hauwa me midugobeo. Tama te wiegi yai homu kolesaga elalubo bidi, te aga iminasa bidibo dao.

Bugagia Bidibo Kolesagade Po Asęai Buku 21:23

Te bidigo aga wabo po bugagia tonalubaso da, teda te sęgęgo aga me gegegobeo.

Bugagia Bidibo Kolesagade Po Asęai Buku 14:29

Te haliga polo sębę isiąbo bidi, agai wiegi yai homu elalubao. Tiali goli, te haliga sębę polo ebo bidi aga homugo te punasi kolesaga te polalubo kolesaga da homu ebo dao.

Bugagia Bidibo Kolesagade Po Asęai Buku 10:19

Te po hauwa wabo bidigo, agai te aga pode te sęgę sabo po weyu tebao. Tiali digi, te po hauwa me wasiąbo bidi da, agai homu kolesaga te wiegi yai elalubao.

Bugagia Bidibo Kolesagade Po Asęai Buku 18:13

Te hasia bolo bugagia olo munama, tama nosali nago te po wei ponao. Nago tiwai isiąyu da, teda nago te dobo kolesaga eyu, tama nage hale saibao.

Bugagia Bidibo Kolesagade Po Asęai Buku 13:3

Te bidigo aga po te sali selasa wabo bidi yai baso da, teda aga bugagia bidiyu, tama aga me dologobeo. Tiali goli, te po hauwa dogia pabo bidi dabe da, te dolaibao.

Bugagia Bidibo Kolesagade Po Asęai Buku 16:32

Te haliga sębę polo isiąbo bidi, te agai kolesaga wiegi yai ebao. Te kolesagago te ami bidi tiwai elama, te bomonama hwįbo kolesaga te aiyaba elalubao. Tama te bidi aga digi aga bugagia tonalubo bidi, agai te boi bomonama hwįnama, te hanu me deli sabo bidi te aiyaba elaluaibao.

Efesus 4:26

Tama me sogo dagego homu sębę eyu da, teda dua dao, te dagego sębę ebo homugo dage te dwai sę ebo kolesaga tomoba kekeidali weyu. Tama te giliga piode dega sigi pisiabadi te homu sębę polo tagalama silao.

Bugagia Bidibo Kolesagade Po Asęai Buku 15:18

Te haliga sębę polo ebo bidigo te gasa bidi dabego wado po omainu ilaibao. Tiali goli, haliga nagame ebo bidigo da, te bidi dabego wado po wabo te homu aiyaba elaluama, tama augwa deli homu ma elama bidibo dao.

Kolosi 3:8

Tiali goli megi dagego e tobage kolesaga tigidali sela sąyao: boi bidi homu ebo dali, haliga sębę ebo dali, gasa bidi dene mabo homu ebo dali, te nogi posobo dwai po wabo kolesaga dali, tama meda yai po wabo dali, te tigidali sela sąyao.

Efesus 4:31

Tama dagego boi bidi homu ebo me, te wado po weyu tama homu sębę ebo me, te genuai po daga wabo me, te posobo po me, te moni dwai homu ebo me, te tigidali dwai kolesaga ebo tagaliyu sela sąyao.

Bugagia Bidibo Kolesagade Po Asęai Buku 18:21

Te nago pogo bidi bugagia bidabo bomo elalubao. Me ma, nago pogo te bidi dolabo bomo me elalubao. Tama tiyu, nago wiegi yai po wabo kolesaga wei eyu da, te nage bugagia bidaibao.

Kolosi 3:15

Krais agai da dwagi yai homu nagame ilibo kolesaga ebo dao. Tama te kolesagago dagego homu tonalumainao. Magi baso meni. Dage dwagi yai homu nagame eyu bidimainogo God agai dage deli deli i olama tama deliba sisinama, tama dage tigi deli naga tiwai pedalai dao. Tama sesemane sogo dagego Godibolo puba hwi po weyu bidao.

Bugagia Bidibo Kolesagade Po Asęai Buku 19:11

Te wiegi yai homu elalubo bidi, te agai wado po polo me wagobeo. Te agai polasa ebo kolesaga te tama tiwai. Te gasa bidigo agabolo dwai sę ebo te agai homu kone me palogobeo.

Bugagia Bidibo Kolesagade Po Asęai Buku 15:2

Te wiegi yai homu kolesaga elalubo bidi agai po pusainu yali, agai te bidi dabego te wiegi yai homu wei ebo kolesaga konemainu homu ebo dao. Tiali goli, te wiegi yai homu elalusiąbo bidigo po pusubo sogo, agai pedauwalide te odolali po naga te ąį bole tulalubo tiwai ebo dao.

Bugagia Bidibo Kolesagade Po Asęai Buku 25:28

Te bidigo aga haliga sębę ebo te pania sisąbaso da, teda te gasa bidi dabego aga aiyaba elaluaibao. Te tobage bidi te obo bagulisiąwai elalubo hanu me deli tiwai elalubaso, tama te boi bidi dabe te tomoba pelama, tama dolaibao.

Bugagia Bidibo Kolesagade Po Asęai Buku 14:17

Te haliga sębę polo ebo bidi dabego te esela pabo bidigo kolesaga ebo tiwai yaibao. Te bidigo aga homugo ebo kolesaga digi te usu nabo homu ebo bidi te we bidi dabego homude godolo mu me egobeo.

Matyu 5:22

Tiali goli megi eno po dagebolo obao: Tama bidi mego aga ama dali sębę eyu da, te bidi aga po tuba odasa paibao, tama dene saibao. Tama bidi mego aga ama dali dwai po obaso da, teda te bidi aga te polalubo kaunsil bidibo digiba pelama, po tų emainogo yao. Tama bidi mego aga ama dali nogi posobo po weyu, nage sę isiąbo homu meni yai dwai bidi dao weyu da, teda te bidi aga te dwai madigi sia dabo dene sabo buluba paibao.

Bugagia Bidibo Kolesagade Po Asęai Buku 17:14

Bidigo te wado po me deli wali, te tobage te bidigo te obo agebelidu te dwasianu dedage nigilama, te genuai wę gebo domainu palibo tiwai ebao. Te tama tebo kolesaga agai tagalu da, tama te genuai wado me pedalugobeo.

Jems 1:26

Te bidi me deli agai homu ‘Ena te baptais sali dwagi yai bidi dao, hauwa sogo eno lotu po wabo dao,’ te homu ebo bidi dao. Tiali goli agai bidi dene mabo dwai po waidali weyu, agai aga pedauwali bugagia tonalubo menio. Tama tiyu da, geda muyu, aga digi aga homugo agabolo tibo po naga wabo dao. Agai te baptais olo sali, agai lotu po wabo te olo po naga wabo dao.

1 Tesalonaika 2:13

Tama tibaso, sesemane sogo dago Godibolo gedu haluasa po weyu, dago nage usu dao po wabo dao. Magi basowe? Polobadu Godigo po dago pedauwalide wabo po dagego odai. Tama te po odama, tama te olo bidigo po dao homu eyu, dagego te po sai menio. Te meni. Te po Godigo po mu dao. Tama dagego te po odoyu, dagego te homu yai, awe, te Godigo po mu dao. Tama te pogo te Godibolo konealubo po dąų wabo bidigo homu kolesagade sę bomo mu ebo dao. Te Judia tǫde bidibo we bidi meba augwali Godigo we bidi hani mu dao. Augwali te Jisas Kraisde homu dąų wali we bidi dao.

Nehemia 9:17

Tama augwaligo nago po wali pabo hagela yali. Te nago augwali tau selama, te bomai sę genuai tigidali yali te augwaligo homu konesiąyu gegeda palali. Tama augwali hagoma mu elama, tama augwa te tobolu bidi me deli nigilama, te augwa kalabus sę yali Isip tǫba ma odasa pomainu yali. Tiali goli, God, nago da tǫde we bidigo sęgę sela sąbo dao. Tama nago da godolo geninama eyu, tama daba wiegi yai sę mu ebo da. Tama nago haliga sębę polo me egobeo. Menio. Nago te olo mu tau sabo wiegi yai homu kolesaga te umabo me elalu, tama tiyu nago dago wąį nǫų dabe tudiba me mubeo.”

Godigo Sęba Tagala Palai Bidigo Po 17:11

Te Beria bidi dabe te Tesalonaika be nani bidi hani tiwai meni. Te polobadu te Tesalonaika bagego tega sigo po polo sela sąwai dao. Tiali goli, te Beria bidi hani augwaligo da bugai homu elama, te po odali. Tama tigidali sogode Godigo po asęai bukude nedali, Polgo wali po usu niba pabo wenama suali.

Dwagi Yai Gesi Po Lukgo Asęani 19:48

Tiali goli, te Jisas elabo tų augwaligo sube. Magi baso meni. Te we bidi tigidaligo bomo mu elama, Jisasgo wabo po odai hagede.

Dwagi Yai Gesi Po Makgo Asęani 2:2

Tama we bidi hauwa sisinama, tama te be pągąna salio. Tama bulu badu te be sunumi pąde te agebele olo me elalubeo. Tama agai te gesi dwagi yai po augwaliba pusubo sę yali.

Bugagia Bidibo Kolesagade Po Asęai Buku 19:19

Te wado po polo weyu ebo bidi da, teda aga dwai sę yali sęgę te aga tolomainao. Te nago aga tau selama, tama te sęgę silibo si da, teda nosali te nago aga ma tau somainu homu yaibao.

Godigo Sęba Tagala Palai Bidigo Po 10:33

Tama tibaso, eno nage pageba po polo te tagala palai dao. Tama nago dwagi yai kolesaga mu elama, da pageba sabolalio. Tama megi da tigidali Godigo gedude bidibao. Tama dago homugo Genuai Bidigo nagebolo mani po te dago odaibao,” Korniliusgo Pitabolo te po wai.

Godigo Sęba Tagala Palai Bidigo Po 2:42

Tama augwali wadolali we bidi augwaligo Jisasgo tagala palai sę bidi dabego augwalibolo po hauwa mu ola momaina homu yali. Tama augwali deli hani tiwai bidali. Tama augwali deli madi hodobo nai tubo da, augwali Jisasde homu dąų wai dao weyu yai. Augwali Godibolo hodobo po wabo da.

Dwagi Yai Gesi Po Lukgo Asęani 15:1

Te takis sabo bidi dabe dede, dwai kolesaga ebo bage me, augwali hauwa Jisas pageba asali, agai ola mabo po odainu hagede yali.

Nehemia 9:3

Tama te sela auade te bidi mebago te augwa Genuai Bidi Godigo bomai po te augwaliba neda mobaso, tama te we bidi dabego olo bugagia muai. Tama nosali, augwaligo te augwa sęgę pusulama, tama Godiba lotu ma udubadi, te sela aua usu nama bidali.

1 Jon 2:21

Dagego te mu po page konesiąbaso, tama te pode eno dagebolo e po asębao, te homu dagego egimio, te menio. Dagego te mu po page koneai, tama te mu pogo tibo po munu me wabo menio, te me dagego koneai dao, eno te homu elama te po eno dagebolo asębao.

Godigo Sęba Tagala Palai Bidigo Po 13:48

Tama te Juda hani isąwai we bidi augwaligo Polgo wali po odama, augwaligo bugai homu mu yai. Bugai homu mu elama, augwaligo te Genuai Bidigo po ugwaba sai. Tama tigidali we bidi Godigo sesemane bida bida pabo kolesaga somai hagede polobadu sa muai we bidi, tama augwaligo megi Godigo po odama, te po mu po dao homu elama, te poba augwa homu tigidali muani.

Dwagi Yai Gesi Po Makgo Asęani 12:37

Devitgo digi aga te Genuai Bidi nogi yali. Tama tibaso, te mena tama te Genuai Bidi aga te Devitgo bulai wai pedalaibawe?” Jisasgo te po wai. Te genuai we bidi hani augwaligo te Jisasgo ola mani po odoyu, wiegi yai homu pemene yai.

Nehemia 8:18

Augwaligo te genuai side te lotu wabo sogo te a naga olama, me badu si, te tama sogo bodolu muani, tama te tigidali side Esrago te bomai po elalubo bukude te Godigo bomai po meba te we bidiba neda mawai. Tama te 7 wabo side tigidali sisinama, tama te genuai side sia sabo lotu po walio, te bomai pode wali po tiwai gilama yai dao.

Israel Hanigo Namba 22:27

Tama te donkigo te ensel subaso, agai koneani, agai te ensel edelegobe homu koneama, tama aga te sunumide pigiluali. Tama tibaso, Balam aga sębę elama, te donki kibu wabi dage selama elali.

Bugagia Bidibo Kolesagade Po Asęai Buku 29:20

Te bidi me deli aga te wiegi yai homu me elalusiąbo bidi yai baso da, teda dago aga tau selama, te aga wiegi yai kolesaga konea somainu homu yao. Tiali goli, te bidigo po homu kone palama, bugagia po wasiąbo bidi yai baso da, teda dago aga tau sabo sę ebo dene mu yaibao.

Godigo Sęba Tagala Palai Bidigo Po 1:15

Te nosali si sela sogo silibaso, tama te sogo te Jisasde homu dąų wai we bidi dabe deliba sisinagasali. Bidi sese me sela me sela 120 tama bidi sisinagasali. Tama Pita doligulama, te we bidibolo po me wai.

Jems 1:2

Eno ama dedeo, haniani sęgę dagebolo pedalobaso da, teda dwagi yai homu yao.

Jems 1:16

Eno dwagi yai ama dedeo, dagego homu te dwai sę ebode geda mugimio. God agai we bidi dwai sę yao olama sinabaso, te dwai sę ebo menio. God agai te dwai sę egobeo. Te menio. Te Godigo tigidali dwagi yai olo mabo kolesaga me, te tigidali agai da mabo nai te dwagi yai mu dao, tama te dwagi yai sę tigidali dagaludu asobo dao. God agai naga te dagalude ula ebo nai tigidali nigali bidi, agai te dabolo dwagi yai sę naga tǫba mabo dao. Tama God Aya agai te kolesaga subigila hasegelebo menio. Aga te magi nai me giligade noma pedalobo tiwai eyu, tama te noma bobobage elama, pęwadage ma eyu ebo, God agai te tiwai egobeo.

Jems 2:1

Eno ama dedeo, dagego dago Genuai Bidi Jisas Kraisde duga homu tigidali muyu bidibao. Aga genuai tobolu bidi mu dao, moni nogi me, moni ula yai bomo me elalubo dao. Tama dagego Jisasde konealubo po dąų waligo da, teda dagego te nogi yai bidibolo naga dwagi yai sę eyu, te olo nai meni yai bidi dagego tudiba muyu, te kolesaga munu me egio.

Jems 2:5

Eno ama dedeo, eno dagebolo dwagi yai homu eyu, godolo mu ebaso, eno dagebolo te po obao. Bugagia odao. Te tǫde tigidali bidi gedude magi nai meni yai bage, te Godigo te tiwai bidi sa munama, tama augwaligo te Godigo po dąų waligo te augwaligo te homu kolesagade te masigi me walu hauwa munalubo bidi tiwai yaibao. Te polobadu Godigo tama po wai, “Niwai bidi agai homu enaba muyu godolo ebo bidi, te aga eno we bidi bugagia tonalubo madi tomoba asagameo,” te po wai. Tama tiyu, agai te magi nai meni yai bidi augwali sa muyu, augwaligo te Godigo po mu dąų waligo da, te augwali te dąį ilali madi te pesage saibao.

Jems 4:11

Ama dedeo, duga hasi bidi dolabo po dagego wagimio, te tagalao. Niwai bidi agai aga abagi dali te nogi posobo po weyu, “Nage dwai sę elama, tama sęgę sao,” te tobage po weyu da, te bidi agai Godigo bomo yai po me posoyu, te bomo yai po dolai dao. Tama nago te Godigo bomo yai pode posobo po weyu da, teda nage te bomo yai po odoyu wali pabo bidi me menio. Nago te bomo yai po osola sulama, tama ‘Te bomo yai po usu ebe’ homu eyu, nago te bomo yai po bolobo bidi dao.

Jems 5:12

Ama dedeo, dagego polasa te yabo sęgę sę e dao: Dagego te God aga bidibo madi dagalu me, tǫ me, te gasa nai me nogi eyu, tama dagego te po wabo dao te pogo dąų wagimio. Tama dagego “Awe” weyu duga wabo po dąų walomainu, “Awe” naga wao, te usu yaibao. Me ma, dagego mu po weyu, “Menio” weyu, duga wabo po dąų walomainu, “Menio” naga wao, te usu yaibao. Bidi mego aga wabo po dąų walomainu Godigo nogi weyu da, te bidibolo Godigo sęgę mawaibao. Tama Godigo dagebolo sęgę maidali weyu, dagego te Godigo nogi olo nogi igio.

Jems 5:19

Eno ama dedeo, dage tomode ama me deli agai te Godigo mu po tagalobaso da, tama ama me bidigo te ama ma oda siyu da,

Jopgo Po Asęani Elalubo Buku 32:16

Suao, augwali olo mu dolalubo. Eno homugo augwaligo po meba ma wabo ąǫ ebe. Tama tibaso, eno tonaluabo ąǫ me ebeo.