Te Israel Tobolu Bidi Dabe 17:4 - Godigo dwagi yai po buku

⁴ Nosali Maikago te mone aga idabolo ma mawai. Tialima, Maikago idago te mone 200 silva selama, tama agai te silva sę ebo bidiba mawai. Tama agai te tibo god me deli te nigo nigilama, tama te tigidali silvago haluali. Tama te Maikago bede te tibo god muai elaluali.

Te Israel Tobolu Bidi Dabe 17:4 Referans Kwoze

Te Israel Tobolu Bidi Dabe 17:3

Tama Maikago te mone te aga idabolo ma mawai. Tama idago te po wali, “Ena digi eno te mone te Genuai Bidiba mawaibao, tama te wiegi yai mu yali. Tama augwaligo te ni dulama tama te tibo god me deli nigilama, tama te silvago tigidali haluaibao,” wali. “Tiali goli, hasia bolo eno te mone nagebolo ma mawaibao.”

Te Israel Tobolu Bidi Dabe 17:5

Te bidi Maika, agai dwasianu lotu be elaluali. Tama agai te pris bidi gudubo ugwa me te tibo god te lotu beba muani. Tialima, augwaligo teba lotu weyu, te aga ogwa digi me deli te pris bidi pedalumainu ilali.

Aisaia 30:22

Tama da, dagego duga tibo godigo piksa dabe saibao. Te da te bidi dabego nigilama, silva dali, gol dali sigo haluai piksa. Tama dagego te piksa dabe te dwai damua pai nai tonobo tiwai tonama, e tama po waibao, “Gedao. Dago nage subo hagela ebo.”

Aisaia 44:13

“Te nigo piksa noma nigibo koneai bidi dabego, augwa te wiegi yai ni dage selama, usu selama, te bugagia mu dodolama, te piksa nigainu ebo dao. Tialima, te pensilgo te piksa noma asęnama, te piksa togwabo bugagia usu nama usu sali. Nosali augwa te ni togobo nai sisel selama, te asęani dąįdu wali pelama, te piksa togoyu, sawi mu elama, te sawi gesi ogwa bidi me deli tonobo tiwai ebo dao. Tialima, augwa te nigo dulama nigali tibo god, te augwa lotu be tomoba muyu ebo dao.

Bomai Po 27:15

Te Livai dabego e tama wao, ‘Te bidi mego te tibo god te masigigo nigilama, ma te nigo nigilama, ma aingo nigilama, tama agai geme dualama, tama agai geme teba lotu po odubaso da, teda Godigo te bidi dolaibao. Te nai dabe da, te bidigo digi nigai nai dabe dao. Tama Godigo te tibo godiba lotu po wabo we bidi godolo ebo menio,’ wao. Tama te we bidi sesego te po wei ponoyu, e tama po waibao, ‘Te mu tama dao, Godigo te tama timainao,’ waibao.”

Te Israel Tobolu Bidi Dabe 18:17

Te bulu sa geme pelama sugi pali te a naga bidi dabe augwali te be tomoba pelama, te tibo god dabe sigi pali. Tama te pris te 600 ami bidi dabe dali te hanuba pabo sunumide bidali.

Habakuk 2:18

Dage bidi dabego te ni dage dabeba me, te masigi dabe me, te tiwai po waliyu, “Nage pila muani tagalama, hodaluao,” wabo. Dage dolaibao. Dagego homugo te nai hodaluama, te dagebolo magi me deli ola mawaiba homu eba, agawe? Tega, dage, te tibo god dabego dage magi ila tau saibawe? Augwaligo usu me egobeo. Tibo god nigibo sę da, te gol me, te ni dagego me selama, te bidigo digi nigibao. Tama tiyu, te nai dabego dage dali po me deli me wagobeo. Agai dage tibo po naga ola mawaibao, tama tiyu te dage dolaibao. Bidigo digi te tibo god nigo dulama nigali, tama agai homugo te naigo aga tau sabo usu yaiba homu yali. Tiali goli, agai usu munu me egobeo. Te tibo godigo mobo meni yai nai naga dao, tama po me wagobeo. Te dagego silvago me golgo bugagia mu au ilali goli, te tagalao. Agai magi sę me egobeo.