Hibru 10:22 - Godigo dwagi yai po buku

²² Tama elalualigo da, teda da homu mu eyu, tama homu si me esiąyu dago Godiba konealubo po dąų mu olama, tama da aga pąba pinao. Agai dago yali dwai sę sęgę sela sąnama, tama dago homu wiegi yai ma ilali. Me agai dago tigi sese te wiegi yai ąįgo mu telawali.

Hibru 10:22 Referans Kwoze

Esekiel 36:25

Tama eno wiegi yai meda meni yai ąį selama, dage tigiba gelaibao, te dage eno gedude wiegi yai ma pedalomainu. Awe, eno dagego dwai damua pai kolesaga, me dagego tibo god dabe me sela sąwaibao, tama dage eno gedude wiegi yai pedelaibao.

Dwagi Yai Gesi Po Jongo Asęani 3:5

Jisasgo te po wei ponoyu, te po wai, “Mu tama eno nagebolo obao, bidi ąįde baptais sabo ąį dali Godigo Mobo Bidi dali gesi ma gagasiąyu da, te bidi God bidibo digi tomoba pogobeo.

1 Pita 3:21

Tama te ąį te augwaligo dage baptais mani ąį tiwai dao. Tama Jisas Krais aga te gų pagede ma hodalobaso, Godigo te baptais mani ąįgo dage tau siyu ma dobola sali. Te ąįgo te dagego tigide elalubo meda sela sąyu, tama dage tau siyu ma dobola sabo menio. Te meni. Te dagego te doloba pisiąwai sę idali weyu, tama dagego Godibolo te da tau sao po weyu, tama augwaligo dage baptais mawai dao. Tama te tiwai ebogo dage tau siyu ma dobola sabo dao.

Efesus 5:26

Tama Krais agai tama tiali te aga po wali pabo we bidi hani agai augwali Godibolo mawainogo agai augwali ąį telawali te meda meni yai pedaliyu, tama agai pogo me augwali tedali gasagi yai nigilali.

1 Korin 6:11

Tama polobadu dage meba te tiwai sę ebo we bidi dabe bidaluali. Tiali goli dagego te dwai sę ebo tagalama, tama baptais salio. Godigo dage aga da olama sa muai. Dagego te doloba pai nogi salio. Te Genuai Bidi Jisas Krais me te Godigo Tedali Mobo augwali sigo sę eyu, tama dage Godigo gedude doloba pai we bidi hani tama pedalai dao.

Hibru 7:19

Te Godigo Mosesgo pedauwalidu mani bomo yai pogo te magi nai me deli te wiegi yai mu ilama sese me pedalubo usu ebeo. Tiali goli Godigo gasa tų me dayali, te wiegi yai elama tama te polobadu mani bomai po te aiyaba elaluai, tama da dwagi yai homu eyu, agai da dali yabo dwagi yai sę asobo sogo bugagia tonaluyu ebadi, te tųdu da te God pąba pomainogo tiai dao. Da polobadu dwagi yai homu eyu tonaluali kolesaga te gesi kolesagago aiyaba elalubo dao.

2 Korin 7:1

Eno ama dede muo, dago te Godigo te da dali dąų wali po dabe tama salio. Tama tibaso, dago dena tigide me homu elalubo meda tigidali sela sąnama tama wiegi yai tedali bidinao. Tama dago Godide wi elama, tama wiegi yai doloba pai kolesaga mu naga sesemane sogo wali pinao.

Hibru 4:16

Tama dago te tobage genuai pris tobolu bidi elalubaso, da te dwagi yai homu eyu tama God pąba pao, te da wi me egimio. Aga da te olo tau siyu wiegi yai kolesaga mabo bidi dao. Tama da agaba peyu, tama agai da homu dene ebo homu eyu te da tau saibao. Tama dago sęgę elalubaso da, teda agai te olo tau sabo wiegi yai homu kolesaga ebogo te da tau saibao.

Hibru 12:24

Tama dage Jisasba asai dao. Godigo da we bidi tau sabo po olama dąų walali. Tama te dąų wali tau sabo po dabolo waselemainogo eyu Godigo Jisas tagala palali, tama aga tomode bidiyu te dąų wali tau sabo po dodolali. Te polobadu bidai bidi Abel aga amago aga ela mubaso, aga gelali kanemego “Boi yao, boi yao,” po wali tiwai bidai. Tiali goli Jisasgo kaneme te dago sali dwai sęgę te sela sąbo kaneme dao, te boi ilabo kaneme meni. Tama teba me dage asai dao.

Taitus 3:5

te sogo agai da ma dobola sai. Agai dago doloba pai kolesaga ebaso, tama agai da ma sabeo. Dago te doloba pai kolesaga ebeo. Aga digi da we bidi hobede mu ebaso tama da ma sai dao. Tama aga digi da ąįgo paluama, tama da gesi noma wai ma pedalai dao. Tama tiyu tama agai Mobo Bidigo da gesi noma bidibo ula mawai dao.

Godigo Nogi Ugwaba Sabo Tęąbi Po Wabo Buku Dabe 73:28

Tiali goli, ena, te ena nage pąde bidibaso, tama te wiegi yai mu ebao. God, Genuai Bidi, nago ena mu seselalubo da, tama eno nago yali sę po tigidali hanilama, pusainu ebo dao.

1 Pita 1:2

Dago Aya God agai dage polobadu mu konebaso, agai dage hagea sai dao. Tama agai Mobo Bidigo dage doloba pai mu iliyu, tama dage wiegi yai kolesaga naga eyu bididuyu tama dage Jisas Kraisgo po odoyu, agai aga kanemego dagego yali dwai sę sela sąmainogo, God agai dage koneyu polobadu hagea sai dao. Tama eno homugo God agai olo tau sabo kolesaga dage dali genuai mu elama, tama dage bugagia mu bidao.

Efesus 3:12

Tama dago Krais agai te wiegi yai sę ebo suyu, tama dago homu kolesaga tigidali agaba muyu, tama aga dali wadolobaso, tama wi esiąyu, homu si esiąyu, tama da God pąba olo pabo da.

Jems 4:8

Tama tiyu, dage God pąba mu peyu tibaso da, aga dage pąba mu aselama, bidaibao. Tama dage te dwai sę me sogo me sogo ebo bidi dabe, duga nogogo dwai sę ebo tagalama, dwagi yai sę naga yao, te bidigo nogo ąįde telabo tiwai te meda meniama dwagi yai tiwai yao. Dagego te Godigo po wabo odobo me te tǫde kolesaga ebo te homu si elalubo, te dwai homu ebo kolesaga dagego homude elalubo te sela sąyao, homu deli naga eyu bidao.

Hibru 9:19

Tama tiyu, hasia bolo Mosesgo te tigidali bomo yai pogo te kolesaga yao po te we bidi augwalibolo pusai. Tama nosali agai te kibu bulmakau wai me te meme wai selama, tama elama, tama te kaneme dali, te ąį me, te mama yai sipsip nisi badi, te ni hisop dwasianu nologo me sai. Agai te nai dabe sobadi elama, tama te mama yai sipsip nisi te hisop ni nologoba gebelama, tama te naigo te taluali ąį dali kaneme te Godigo bomo yai po buku daiba me te tigidali we bidi tigiba te kaneme segeni tiwai sąsąga pai dao.

Matyu 3:11

“Te eno dage olo ąįgo baptais mabo te dage homu begelai elalubo te dąį tiwai dao. Tiali goli ena tudi badu nosali asobo bidi, te agai bomogo eno bomo aiyaba elaluaibao. Ena da, te wiegi yai bidi meni, tama tiyu eno agai sągą nadoba tolabo te usu egobeo. Agai dage te Godigo Tedali Mobo Bidi me te sia dali si dagebolo mawaibao, te baptais mabo sę tiwai.

Esekiel 16:9

“Eno ąį selama, te nage tigide elalubo kaneme ąį telawali. Tama eno nago tigiba te oliv wel muani.

Jeremaia 24:7

Te eno augwaliba homu kolesaga mobaso, augwa te tiwai koneaibao, ena digi ena Genuai Bidi bidibao. Te augwali enaba ma asiyu, te enaba homu kęą peyu bidaibao. Te augwali eno hani we bidi mu pedalaibao, te ena augwa God bidaibao,” wali.

Pris Sę Ebo Bomai Po 8:6

Tialima, Mosesgo Aron aga ogwa dabe dali selama, te we bidi augwali geduba dodolagaselama, tama agai augwali ąįgo paluali.

Jems 1:6

Tiali goli te bidi aga sęgę tolabo kolesaga habuge yai bidi agai Godibolo hanalu wabo po wabo si, deli homu naga eyu hanalu wao. Agai te homu si elamuo. Godigo te dwagi yai kolesaga ena magowe, ma magobewe, te homu egio. Magi basowe? Bidi homu si ebo bidi aga homu kolesaga te tamu ąį asiyu, dini besela pabo tiwai dao.

Bugagia Bidibo Kolesagade Po Asęai Buku 23:26

Ogwao, nago eno po bugagia odolama, tama eno kolesaga suyu, wiegi yai pemene yao.

Godigo Nogi Ugwaba Sabo Tęąbi Po Wabo Buku Dabe 119:7

Eno nago da dagalabo doloba pai kolesaga tigidali konea sainu idubadi, eno homu dolo elaluyu, tama eno nago nogi ugwaba sainogo ebo dao.

Godigo Nogi Ugwaba Sabo Tęąbi Po Wabo Buku Dabe 51:10

God, nago eno homu kolesaga tomode meda meni yai dwagi yai gesi kolesaga ilibo sę ma yao. Awe, ena nage dali homugo kęą pai bidi pedalumainu yao.

Israel Hanigo Namba 8:7

Nago e tama tiao: te bidi dabe eno gedude wiegi yai ebo ąį selama, tama augwali tigiba sąyao. Tama me augwaligo augwa tigide elalubo tigi nisi sese tama toga sąyu, me augwa ugwa wę telayu emainao. Augwaligo te tama tila silama da, teda augwali wiegi yai yaibao.

Pris Sę Ebo Bomai Po 14:7

Tama elama, agai te kaneme dwasianu te nogo a naga olama, te me badu nogo si wagi soabode te eno gedude dwagi yai pedelabo bidi tigiba sąsągą bilao. Tama prisgo agabolo te tiwai po walao, ‘Megi da nage God gedude wiegi yai pedelalio.’ Tama prisgo te bidibo ba selama, te buluba solama, te aga bola pomainogo yaibao.

Hibru 11:28

Agai Godide mu tiąlubaso tama agai te Israel we bidi te tedali sogo nogi Pasova tede yabo kolesaga ebo sę ilali. Te bidi elabo mobo bidigo te Israel dabego gomunai ogwa tigidali ela muidali weyu, agai augwalibolo te po wai, “Te duga be deli delide kibu sipsip wai elama, tama te kaneme te be tų sesegede pos niba segeni tiwai sąsąga pao,” te po wai.

Hibru 10:19

Ama dedeo, Jisasgo aga digi te dago sęgę sela sąbo ofa tama bugagia yaligo da, teda da wi isąbadi te Tedali Gasagi Yai Be Habu Mu tomoba pabo usu dao. Jisasgo digi aga kaneme geleyu tama isibaso, da te habu tomoba pabo usu mu ilai dao.

Sekaraia 13:1

“Te tiwai sę pedalubo si da, teda eno ulu ąį me deli munama elalueibao. Te Devitgo bulai wąį nǫų dabe me te Jerusalem we bidi dabe augwaligo te tibo god dabeba lotu olama, te sęgę hauwa sali. Tibaso, te ąįgo augwaligo te dwai sę yali sęgę tigidali sela sąwainogo yaibao,” Genuai Bidigo te po wai.

Aisaia 29:13

Genuai Bidigo te po wali, “Te we bidi hani dabe augwaligo eno nogi augwaligo pedauwalidu naga ugwaba sabo dao. Tiali goli, augwaligo homu dali, homu kolesaga si enade digibulu mu elalubao. Augwaligo enaba mu lotu po wabo menio. Augwaligo te bidigo digi muai bomai po, te po naga augwali ola mani po, augwaligo te po naga wali pabo dao.

Tuni Bidi Dabego Po Elalubo Buku Deli 28:9

“Tialima nage Solomon, eno ogwa da, eno te tiwai bomai po nageba obao. Nago homu kolesaga deli naga elaluao, te naga ayago God dologode bidao. Te nago agai homu wali pabo sę bomo mu yao. Nago te tiwai yao, magi baso meni, Genuai Bidigo dago homude magi homu te tigidali agai koneaibao. Te nago agai godolo yabo kolesaga wali pabo sę bomo ebo kolesaga sobaso da, teda te nago aga bugagia konemainu yaibao. Tiali goli nago aga tudiba mubaso da, teda agai nage sela sąnama, te sesemane sogo agai nage tudiba mueibao.

Ma Dobola Sali 29:4

Tama Aron dali, aga ogomani augwali dali, te eno lotu ugwa beba odasa aselama, augwali wę paluao.

Hibru 9:10

Magi baso meni, te tiwai Godibolo maiabo ofa te tubo nai tiwai eyu, te tubo ąį tiwai yali, tama haniani wę paubo gagawai yai. Te e tigide bomai po naga dao. Godigo te tigidali bomai po muani te augwaligo wali peyu, te agai tigidali nai gesi nigilama dodolobo sogo usu nigi paibao.

2 Timoti 4:2

Bidi meba augwaligo dwai sę dali dwagi yai sę dagalabo homu te isali tiwai dao. Tama tibaso augwaligo augwa ebo sę dagalisiąyu tama augwali tibo po wabo bage dao. Tama “Eno mu po naga obao,” wai goli, augwaligo te dwai haubo noma bidi dabego tibo po naga ola mabo dao.

Jeremaia 30:21

Te augwa bidi dabe digi me deli te augwa tobolu bidi pedelama, te augwa tonalueibao. Ena Genuai Bidi, eno te po obao, te ena digi eno te bidi ena pageba oda saibao. Magi baso meni, te bidi dabe augwa homugo digi te ena pąba asobo usu egobeo.

Jeremaia 3:10

Judago ena tagalama, te dwai kolesaga ela biliyu, tiali te agai haliga munu ma begelama, enaba ma begasa asobeo. Menio. Agai haliga tibo begelainogo ebo tiwai yagasali. Ena Genuai Bidi, eno te po wai dao,” wali.

Aisaia 52:15

Tiali goli, nosali da, te bulu tǫ kantri hauwa we bidi dabe te agade dwai noma midigi mu selama, te king dabe pedauwali pania selama, te bomonama tononalu, te augwa po deli me wagobeo, magi baso meni, te augwaligo polobadu po odisąwani nai suali. Te augwa dwasianu me konesiąwani nai te hania koneaibao,” wali.

Godigo Nogi Ugwaba Sabo Tęąbi Po Wabo Buku Dabe 119:145

Genuai Bidi, eno gedu haluasa po bomonama mu nageba obao. Eno gedu haluasa po odao, tialima te eno nago po tigidali wali paibao.

Kraisgo Geme Dualali Sę Pedelabo Po Jonbolo Ola Mani 1:5

Tama Jisas Krais me, agai dagebolo te kolesaga si dagebolo momainao, te eno homugo. Aga te Godide homu kęą pai bidi bidiyu, tama agai Godigo po tigidali dolo mu pusali bidi dao. Aga da te isama, tama isali we bidi dabe tomode bidama, tama aga te hasia mu gų pagede ma hodaloali bidi dao. Aga da, te tigidali tǫde bidibo tuni bidigo polalubo genuai bidi dao. Agai da dali dwagi yai homu eyu godolo mu ebo dao, tama aga isaligo dago dwai sę yali sęgę tigidali sela sąwai dao, tama da megi olo bidibo dao.

Efesus 6:5

Dage olo sę ebo bidi dabe, dagego duga sę ebo tonalubo bidide wi eyu, augwaligo po wali peyu augwali dologode bidao. Tama tiyu, homu mu eyu, dage deli deligo te homu yao, ‘Eno yabo sę te Krais tobade yaibao.’

Godigo Sęba Tagala Palai Bidigo Po 8:21

Godigo gedude nago homu dolo meni baso, te nage da dali te sęde me bidigobeo.

Dwagi Yai Gesi Po Jongo Asęani 8:9

Augwaligo tama po odolama, tama augwali tomode te sęgę meni yai bidi meni baso, tama augwali tigidali buluba deli deli naga buluba pai. Tobolu bidi polasa pai, tama meba augwali nosali pai, te po tų ebo tagalama, tama augwali Jisas taga pai. Tama Jisas agaduba deli digi bidai, tama te we Jisas aga gesabide dolaluai.

Godigo Nogi Ugwaba Sabo Tęąbi Po Wabo Buku Dabe 119:80

Te eno homugo nago ena tau sobaso, te nago bomo yai po tigidali eno wali peyu, tama ena te ena ebo kolesagade hale sabo sę me egobeo.

Godigo Nogi Ugwaba Sabo Tęąbi Po Wabo Buku Dabe 119:69

Te dwai hagoma ebo bidi dabego tibo po hauwa enade te gasa we bidibolo weyu ebao. Tiali goli, eno gasa homu me isąyu, te eno nago bomai po naga tigidali wali pabo dao.

Godigo Nogi Ugwaba Sabo Tęąbi Po Wabo Buku Dabe 119:58

Eno nage bomonama hanalubao, nago ena homu dene eyu tau sao, magi baso meni, nago po dąų weyu tama wai.

Godigo Nogi Ugwaba Sabo Tęąbi Po Wabo Buku Dabe 119:34

Nago te dwagi yai po enabolo hania bugagia ola mayu da, te eno wali paibao. Eno homugo ena hodolobaso da, te eno te dwagi yai po tigidali wali paibao.

Godigo Nogi Ugwaba Sabo Tęąbi Po Wabo Buku Dabe 119:10

Eno homu deli naga elalubao. Tama eno homugo nago sę yainogo ebo dao. Eno nago bomo yai po wali pabo tagalidali weyu, nago ena tau sao.

Godigo Nogi Ugwaba Sabo Tęąbi Po Wabo Buku Dabe 119:2

Homu si isiąwai bidi dabe, augwali Godigo po tigidali wali pabo bidi dabe, augwaligo homu dwagi yai yao.

Godigo Nogi Ugwaba Sabo Tęąbi Po Wabo Buku Dabe 111:1

Genuai Bidi nogi ugwaba sao. Eno wei ebo homu te bomo elalubao, tama tiyu, eno agaba usu da po wabo genuai mayu, te aga we bidi tigidali sisinibo madi tiaibao.

Godigo Nogi Ugwaba Sabo Tęąbi Po Wabo Buku Dabe 94:15

Tama nosali bidi dabego po tų ebode, augwaligo sę dolo naga yaibao, tama dwagi yai doloba pai bidi augwaligo usu dao po weyu, te kolesaga wali paibao.

Godigo Nogi Ugwaba Sabo Tęąbi Po Wabo Buku Dabe 84:11

Genuai Bidi, te da seselalubo bidi, te dago genuai nogi elalubo king dao. Agai te olo tau sabo wiegi yai kolesaga dabolo eyu, tama daba genuai nogi mayu yali. Agai te bugagia dolasa bilibo we bidi dabede te mena nai me deli me dąų me ela sogobeo.

Godigo Nogi Ugwaba Sabo Tęąbi Po Wabo Buku Dabe 32:11

Dage te doloba pai we bidi, dage te bugai haliga elama, tama te Genuai Bidigo wiegi yai sę tigidali yalide te wiegi yai homu pemene yao. Dage tigidali we bidi, dage te God gedude doloba pai mu yali, dage te wiegi yai homu pemene elama, tama hae weyu, nogo eleyu yao.

Godigo Nogi Ugwaba Sabo Tęąbi Po Wabo Buku Dabe 9:1

God, eno nageba usu da weyu, gedu haluasa po mu obao. Eno te we bidi augwaliba te nago midigi sabo wiegi yai sę tigidali yali po waibao.

Tuni Bidi Dabego Po Elalubo Buku Deli 29:17

“Eno God, nago tigidali bidigo haliga usu sabo da, tama nago te bugai haliga te doloba pai kolesaga ebo bidigo ebo sueibao. Eno te homu kone palama, tama me eno nago genuai nogiba homu kone elama, tama eno haliga hogodalu, eno te nai dabe nagebolo mawai. Te tobage deli kolesagade naga, nago te we bidi dabego te augwa nai dabe manio. Te eno augwaligo tama tebo sę ebo sulama, eno wiegi yai homu pemene umagi mu ebao.

Tuni Bidi Dabego Po Elalubo Buku Deli 12:33

Tama te Sebulun hani bidi dabe te bidi sese umabo hauwa mu te 50,000 dwagi yai ami bidi bidali. Augwa te Devit deli naga tau sabo homu kolesaga naga elaluai. Tama augwa te tobage boi hwįbo nai doado bage dabe dali sesu asalio.

Te Israel me Juda Hani Sigo Tuni Bidigo Po Elalubo Buku Deli 15:3

Te Abiya agai te aga ayago yali dwai sęgę sabo kolesaga yali gilama, Abiya agai me te tigidali haniani kolesaga dwai mu yali. Agai te aga wąį nǫų Devitgo yali dwagi yai kolesagadu wali pabe, tama agai te God dali deli homu ebe, aga Genuai Bidi.

Pris Sę Ebo Bomai Po 16:4

“Tama agai prisgo te tobage gasa ugwa gudaibao. Agai te bobage aiyaba tagalalubo ugwa gudama, te pęwadage trausis ugwa me muani, te ugwa nami agai haligade kukulu tiwai kekelama, te nami ugwa me deli te toboludu madi tiwai munama, kekaluao. Te tedela ugwa dabe naga muao. Ena digi te prisgo gudabo ugwa dabe dąį ilali. Tama tibaso, Aron aga ąį bolo paluama, nosali te ugwa doado bage mubaso usu dao,” wali.

Dwagi Yai Gesi Po Lukgo Asęani 1:1

Genuai bidi Tiofilus, polobadu te bidi hauwa augwaligo te Godigo polobadu da tomode yali sę po asębo homu eyu bugagia sina wai dao.

Godigo Sęba Tagala Palai Bidigo Po 22:16

Nage magi baso tonalubawe? Nage hodaluama, tama baptais sao. Nago dago Genuai Bidi i wao, tama agai nago dwai kolesaga yali sęgę tigidali sela sąmainu tama yao,’ Ananaiasgo enabolo te po wai,” Pol agai te po wali.

Hibru 6:11

Tama bomonama eno homugo dage tigidali deli deligo te tiwai sę bomo naga eyu, tama dwagi yai homu ebadi duga konealubo po dąų weyu, tama Godigo duga ma sabo te tonaluao. Dagego te tiwai sę ela pidu, te duga e tǫde bidibo sogo te silibode te usu nigi pao.

Hibru 10:1

Te Juda dabego ofa mabo bomai pode dago te nosali pedalabo dagalude elalubo wiegi yai nai dabe noma naga subao. Te bomai po da, te nai dabego te hania piksa noma mu menio. Te bomai pogo te po wai, augwaligo te deli tigi poai ofa naga te tigidali sogo yao wai, te tigidali kibu bede me te yao wai. Tama te ofa maiabo bomai pogo te we bidi augwali te God pąba asomainogo dodolobo te usu egobeo. Te bomai pogo augwali te wiegi yai mu munu me pedalogobeo.