Habakuk 2:8 - Godigo dwagi yai po buku

⁸ Dagego te tǫ kantri hauwa we bidi dabego doado bage kegelama sali. Tama dagego te we bidi hauwa ela munama, tama augwaligo taun dabe me dolali. Tiali goli, dagego bidi hani me badu gedelali, tama nosali augwali hogodalu, tama dagego augwali gasa hani bidi dabeba yali kolesaga tiwai dageba wei ponaibao.

Habakuk 2:8 Referans Kwoze

Aisaia 33:1

Dage te gasa bulu dabe dolobo hani, dage dolaibao. Te mu tama, dage me dolobe dao. Tiali goli, dagego gasa bulu dabe dolobo bodolu sia saibao. Tama duga digi duga dolaibao. Dagego te gasa hani dabe ili po walama, tama dagego te po mia selama, tama dagego augwali te boi bidi dabego nogoba mubo dao. Te mu tama, te gasa hanigo da dage me ili po me ola masiąbadi goli. Tiali goli, dagego te gasa bidi dabe ili po wabo sogo te sia saibao. Tama te gasa bidi dabego dage ili po olama, tama dage te boi bidi dabego nogoba muaibao.

Habakuk 2:17

Dagego te Lebanon bulu dulu ni subigila gela gela tagalabaso, tama megi da Godigo te tiwai deli kolesaga dageba yaibao. Te bulu uni hasa dabego te bulu hasa sibi hauwa elebo tiwai dagego tama yali dao, tialima megi da, te duga digi te dolaibao. Te tama sę pedelaibao, magi baso meni, dagego te haniani tǫde bidali we bidi dabe hauwa mu elama, munama, te augwaligo taun dabe dolai dao.

Jeremaia 27:7

Tigidali hani we bidi te aga dologode elaluama, te nosali augwali aga ogwa dologode bidama, te agai waigo wąį nǫų dabe dologode me bidaibao. Augwali te Babilon dologode bidada pedubadi, te eno Babilon dolabo bodolu muani sogoba usu naibao. Tama te sogo te tigidali tǫ kantri bomai king dabego te Babilon aiyaba elaluama, te augwa olo sę ebo bidi dabe tiwai mu pedelaibao,” te po wai dao.

Kraisgo Geme Dualali Sę Pedelabo Po Jonbolo Ola Mani 6:10

Tama te noma bidi augwaligo i bomonama weyu tama wai, “Tigidali nai tonalubo Genuai Bidi, nage magi sę me esiąyu wiegi yai mu bidibo, tama nago kolesaga te mu naga ebo dao. Te tǫde we bidi augwaligo dwai sę da dali elama, tama da ela muani. Tede dago homugo nago augwali dali po tų eyu, dago kanemede augwalibolo wei ponao. Nisu naga sogo bidai madigi tama nago augwalibolo wei nisu ponaibawe?” te po wai.

Sekaraia 14:12

Te Genuai Bidigo dwai gasi me deli te Jerusalemba boi hwįani bulu tǫ kantri tigidali bidi dabe augwaliba te gasi pedalomainu ilaibao. Te gasi e tiwai da. Te bidi dabe bididubadi digi te augwaligo tigi wali me gedu me hamena me te damueibao.

Sekaraia 1:15

Polobadu ena we bidi dali sębę dwasianu yai dao, tama gasa hani bidi dabebolo augwali dene magasao po wai dao. Tialima augwali aselama, tama augwaligo eno we bidi dwasianu gana me dolobeo. Menio. Augwaligo te magi edelama, tama augwali mu tama mu dolama tagalalio. Tama tede megi te kantri dabe augwali bugagia bidiyu augwali sęgę meni yai goli, eno augwali dali sębę dwai mu ebao.

Habakuk 2:10

Tiali goli, te duga dwai kolesagago digi te duga hani dabego nogi aiyaba elaluali dao. Dagego te bulu tǫ kantri hauwa ela tuali tiwai elama dolali, tama duga yali dwai sęgo te duga ma dolaibao.

Jeremaia 51:48

Te ena Genuai Bidi, eno obao, te sogo dagalu dali tǫ sigo te augwalide elalubo tigidali naigo te Babilon tulalubaso, wiegi yai pemene mu yaibao. Te haniani nai dabe dolabo bidi, augwali te not badu bidali tagalama asu, te Babilonba hwįagasaibao,

Jeremaia 51:44

Eno te Babilongo tibo god, te Belba dwai dene mabo sę eyu, te eno agai te dalali nai dabe bugulabo sę ilaibao. Tama te tǫ kantri we bidi augwali agaba me asogobeo. Tama te Babilon bagulali genuai obo te tigidali pepeda paibao,” te po wai dao.

Jeremaia 51:24

“Tialima, ena Genuai Bidi, eno te Babilon dabe augwaliba dwai dene mawaibao po obao, te augwaligo Saionba dwai kolesaga tigidali yali wei ponaibao. Te dage Israel me Juda, te eno ebo sę dagego suagameo,” te po wai.

Jeremaia 51:13

Babilon, te nago tǫ kantride te ąį hauwa me wiegi wiegi yai nai hauwa elalubao. Tialima, nage dolabo sogo te pąba yagasalio. Nage bidibo ula te ugwa hobolobo hobi tiwai elaluali, te megi da, augwaligo togwainogo ebo dao.

Jeremaia 51:8

Tialima, te Babilon aga digi te tulaluama, dolaibao. Tibaso, dagego agade hobedai gela waiyąo. Dagego te aga keni dabe pedela sabo marasin sigi pao. Te aga usu ma yaibao homu ebao.

Jeremaia 50:37

Te Babilongo hos me kekebo karis dabe te dolomainao. Te gasa hani ami bidi dabego te Babilon tau sali, te ami tigidali dolaibao. Augwali te we dabe tiwai elama, bomo meni yaibao. Te Babilongo wiegi wiegi yai doado bage tigidali dolao. Te boi bidi dabego sagaselama, sela paibao.

Jeremaia 50:28

Te Israel me Juda meba te Babilon taga soyu, te Saionba wi ma asali. Odao! Augwa e tiwai po obao, “Genuai Bidi dena God, agai be dolali hani dabeba te dwai dene wei ponama, mabo dao,” wabo.

Jeremaia 30:16

Tialima, mu tama, te hani dabego nage dolobo sę ebao, te augwa digi dolaibao. Te nago boi bidi dabe augwali te digibulu buluba kalabus paibao. Te nageba dwai sę eyu, te nago doado bage tigidali wi sali hani dabe, te boi bidi dabego dwai sę augwaliba elama, te augwa doado bage dabe wi saibao.

Aisaia 47:6

Eno wado po dwai mu te ena we bidi dabeba wali, te eno augwali te ena we bidi da te tiwai homu kone munu ma ebeo. Te eno nage aselama, augwaliba dwai sę yagasomainu ilali, te nago augwaliba homu dene dwasianu me ebeo. Menio. Nago augwaliba dwai dene mu ilama, te augwaliba genuai sęgę mawai. Te nago monu dabeba me te augwali genuai sęgę mu tolomainu ilalio.

Aisaia 33:4

Tama augwaligo te taga pabo nai dabe da, te gasa bidi hani dabego polo sagasaibao. Teda te gide mano dabego gide nai dabe tula silibo tiwai yaibao.

Godigo Nogi Ugwaba Sabo Tęąbi Po Wabo Buku Dabe 137:8

Babilon, odao. Te nage dolaibao. Te nago dabolo yali dwai sę wei ponobo bidi da, te bidi aga pemene yagameo.

Jeremaia 50:14

Genuai Bidigo te Babilongo boi bidi dabeba e tiwai po wali, “Dage te enesigigo ene enebo mu konea pai hani dabe, dagego te genuai taun Babilon bagulama, te lain wasilama, boi hwįao. Dagego enesigi umagia kekelama, te ene hauwa agaba enao. Dagego te taunba umabo sę mu yao, magi baso meni, te Babilon dabego ena Genuai Bidiba dwai sę ebo dao.

Esekiel 28:16

Nago bisnis sę bulu hauwaba yali. Tama nago te we bidi dabe dali hwįnama, tama nago bisnis sę tau somainogo yali, tama nago sęgę sali. Mu tama, nage tonalubo ensel bidi tiwai dao, tiali goli nage eno gedude meda mu yai pedelai dao. Tama eno nage sela sąnama, tama nago eno bulu du taga soali. Tama nage te udula pai masigi tomode ma me bidibeo.

Esekiel 39:10

tama te kibu be a naga olama, me badu nogo si te kibu bede augwaligo buside o kala sili bulude isi gegebo sę meni yaibao. Menio. Te augwaligo te hwįbo nai dabe naga augwaligo isi ulubo sę eyu yaibao. Tama te kolesagago da, te Israel dabe augwaligo augwa boi bidi dabe augwaligo dwai kolesaga wei ponaibao. Te boi bidi dabego Israel dabe doado bage dabe wi sai, tama megi da, te Israel dabego te boi bidi dabego nai dabe saibao. Te da, God Genuai Bidi eno po dao,’ nago te po te bidi Gokbolo pusao,” wali.

Amos 3:10

Genuai Bidigo te tama po wali, “Te Samaria we bidi augwaligo te nai wi siyu, hwįbo kolesaga eyu, te nai hauwa selama, te augwa bomai be dabe pągąnani. Augwa te doloba pai kolesaga me konebeo. Mu menio.

Obadia 1:15

Tama Genuai Bidigo te tiwai ma wali, “Eno te tigidali we bidi hani po tų ilabo bodolu si, te pąba yagasalio. Te dage Idom dabego yali dwai sę te eno dageba dolo mu wei ponaibao. Te duga yali dwai kolesagade usu nama, te dage sęgę saibao,” wai.

Bugagia Bidibo Kolesagade Po Asęai Buku 22:23

magi baso meni, Genuai Bidigo augwali tonaluyu, tama augwali tau saibao. Tama te bidigo te magi nai doado bage meni yai bidi dabeba te dwai sę ebaso da, teda Genuai Bidigo te bidi agaba te dwai sę wei ponobo dao. (2)