Tigidali Nai Gagalama Nigali Side 34:30 - Godigo dwagi yai po buku

³⁰ Jekopgo Simeon de Livai augwali sibolo te po wai, “Dage sigo ena te dwai ilalio. Te tigidali we bidi tede bidalubo, augwali te Kenan hani me Peres hani, augwaligo te ena godolo ma egobeo. Eno bidi dabe te hauwa me elalube, tama te bidi dabe augwa hasi te deliba sisiniyu da, teda augwaligo ena dali, te eno we wai dabe dali tigidali ela silaibao,” te po wai.

Tigidali Nai Gagalama Nigali Side 34:30 Referans Kwoze

Godigo Nogi Ugwaba Sabo Tęąbi Po Wabo Buku Dabe 105:12

Godigo we bidi augwali dwasianu hani, tama augwali gasa bulu we bidi te tǫde bidibo tiwai.

1 Samuel 13:4

Te bidi dabego te tiwai po augwalibolo wali, Solgo te Filistia hani ami bidi dabe aiyaba elalubaso, tama megi da, te tigidali Filistia dabego te Israel dabe dali boi bidi ebao. Tialima, te bidi dabego te po odama, tama augwali Sol dali te Gilgal buluba sisinagasai.

Josua 7:25

Tama Josuago te po wai, “Magi elama nago te genuai sęgę daba sela asai dawe? Tama megi da, te Genuai Bidigo nagebolo me te sęgę mubao!” Te po ola silama, nosali te tigidali pali we bidigo te Akan aga we wai puluba dali tigidali te masigigo ela silama, tama augwali dali te augwa doado bage dali augwali tigidali te siago dai dao.

Ma Dobola Sali 5:21

Tama augwaligo te bidi si dali te po wai, “Dena homugo te Genuai Bidi Yawego dage sigo kolesaga osola suao, tama Genuai Bidi agai dage sibolo dene mawaibao, magi basowe, dage sigo te tuni bidi dali, te aga tobolu bidi dabe dali, augwaligo da te dwai nai tiwai mu, te homu ebo dage sigo ilalio. Te tuni bidigo da elemainogo dage sigo tų nigibao,” te po wai.

Tuni Bidi Dabego Po Elalubo Buku Deli 19:6

Te Amon dabe augwaligo koneani, augwaligo te yali kolesagago Devitgo haliga dwai posolo mu ilali homu yai. Tama tibaso Hanun dali aga hani dabego te Mesopotemia dabeba, me te Siria dabe te tǫ kantri Makade bidali bidi haniba, me te tǫ pedai Soba te augwaliba te boi hwįbo karis dabe meba me ami bidi meba badi te aga tau somainu hanalu wali, te hos dabede dualama hwįbo ami bidi dabe me, te aga tau sao wali. Tama Hanungo te silva hauwa tolali, te aga sęgę te bidi sese umabo 35,000 kilogram usu dao, te kantriba tolali, te ami bidi dabe me te karis dabe dali abeliyu yalio.

Tuni Bidi Dabego Po Elalubo Buku Deli 16:19

Polobadu Israel dabe augwali te dwasianu hani mu bidali, tama augwali te bulu wau bilibo bidi te tǫ meni yai bidi tiwai bidalio.

1 Samuel 27:12

Tialima, Akisgo te Devitba homu kęą peyu, tama tiwai homu yali, ‘Agai te Israel dabeba hwįgi peyu, te aga abagi dabeba digi hwįgi poba,’ homu elama, ‘tama tibaso, augwaligo aga wei ebo homu meni yani. Megi da, te agai ena tau siyu, tama eno sę sesemane sogo yaibao,’ te po wai dao.

Tigidali Nai Gagalama Nigali Side 13:7

Tama wado po te Lot de Abram augwa si hasa tonalubo sę ebo bidi dabe tomode pedelali. Te sogo te Kenan dabe me, te Peres dabe me tede bidalubadi dao.

Bugagia Bidibo Kolesagade Po Asęai Buku 15:27

Te monede pesą eyu ebo bidigo tama te mone sainu te tobage haniani dwai kolesaga ebaso da, teda agai te dwai sęgę te aga we wai dabede te pedalubao. Tiali goli, te gasa bidi dabego te haniani dwai sęde te mone mabo sisąbo bidi da, teda aga te bugagia bidaibao.

Bugagia Bidibo Kolesagade Po Asęai Buku 11:29

Te bidigo aga we wai te bugagia tonalusiąwani da, teda aga doado bage te tigidali hagawaibao. Tama tiwai naga te wiegi yai homu kolesaga meni yai bidi dabego, te augwa doado bage tigidali tagalama, tama augwali te wiegi yai homu kolesaga ebo bidi dabego olo sę ebo bidi pedelaibao.

Bugagia Bidibo Kolesagade Po Asęai Buku 11:17

Te nago gasa bidi homu dene elama, tama nago aga wiegi yai ilibaso da, teda te kolesagade te naga digi naga wiegi yai ilibao. Tiali goli, nago gasa bidiba dwai dene mabo sę eyu da, te nagaba digi naga te dwai sę ma ilibo tiwai dao.

Tuni Bidi Dabego Po Elalubo Buku Deli 16:12

Dage te wąį nǫų Abrahamgo wai dabe, aga te Genuai Bidigo sę bidi, dage Jekopgo hani, dage we bidi dabe Genuai Bidi aga da olama sa muani, dagego homu kone ma palao, te Genuai Bidigo bomai sę dabe te bidigo isąwai noma sabo sę agai yalio. Te dagego homu kone palao, agai yabo sę dabe te dwai bidi dabeba te dwai dene mawaibao.

Tuni Bidi Dabego Po Elalubo Buku Deli 2:7

Akan, te Kamrigo ogwa, aga te Serago hani da. Te Israel dabego Godiba sa muai nai dabe agai salio. Te tama tiali hagede Godigo te Israel we bidi genuai sęgę mawai dao.

Te Israel me Juda Hani Sigo Tuni Bidigo Po Elalubo Buku Deli 18:18

Tama Elaijago Ahapgo poba wei ponoyu, te tiwai po wai, “Nago tibo po obao. Te sę yabo page eno menio. Te sę yabo page nago dali, te nago ayago hanide dali elalubao, magi baso meni, dagego te Genuai Bidigo po sela sąnama, te dagego tibo god Bal dabeba lotu oduai dao.

2 Samuel 10:6

Te Amon dabe augwa koneani, augwa te tiali kolesagade te Devitgo haliga sębe mu ilabo sę yali homu yai. Tama tiyu, te Devit augwali dali hwįagaselama, augwali aiyaba elaluidali homu eyu, augwa te bidi meba te Siria tǫba tagala palama, te Betrehop bulu bidi dabe me, Soba bulu bidi dabe, augwali dali te bomai po dąų walali. Tama te bulu side te ami bidi umabo mu, te 20,000 bidi tagala palu, te Amon dabe dali hwįbode tau sagasomainu tialio. Tama te Amon dabego te Top bulu bidi dabe dali me te bomai po dąų walama, te ami bidi umabo mu, te 12,000 bidi sainu tiali. Tama te Amon dabego te Maka bulu king bidi dali me bomai po dąų walama, te augwali te Devit dali hwįbode tau sabo ami bidi dabe umabo, te 1,000 bidi me abelama, salio.

1 Samuel 27:1

Nosali Devitgo te tama homu yali, ‘Te pąde sogo tama te Solgo ena ela muaibao,’ homu yali. ‘Tama te wiegi yai mu da ena te Filistia tǫ pedaiba wi pelama, bidigi pobaso da, teda Solgo ena me sogobe da,’ homu yali. ‘Tama Sol te hagela ebaso, tama ena gegebo sę munu ma egobeo,’ te homu yali.

1 Samuel 16:2

Tiali goli, Samuelgo Genuai Bidiba te tiwai po wai, “Eno te sę mena tama egowe? Te Solgo eno tama tiali po odobaso da, teda agai ena ela muaibao.” Tialima, Genuai Bidigo agabolo te po wali, “Menio. Te bulmakau so kibu me deli te Betlehemba sela pelama, tama te taunde bidibo we bidibolo te tiwai po weyu, ‘Ena te Genuai Bidiba ofa yainu asai dao,’ po wao.

Bomai Po 7:7

“Dage te genuai bidi hani edelebaso, te Genuai Bidigo dage koneama, tama dage sa muai meni. Menio. Dage te dwasianu hani naga bidai dao.

Tigidali Nai Gagalama Nigali Side 46:27

Te Josepgo wego ogwa si te Isipde ame nani. Tama tialima, te Jekopgo hani tigidali augwali te Isipba pali bage nedeyu, tama Josep aga we waide nedali te deliba sisinama, te namba te bidi sese sela olama, gasa bidigo nogo si, te 70 tama augwali te sogo Isip tǫba sisinama, bidai dao.

Tigidali Nai Gagalama Nigali Side 12:12

Te Isip bidi dabego nage sulama, te po waibao, ‘Te Abramgo we da,’ po waibao. Tama augwaligo ena ela munama, tama nage saibao.

Tigidali Nai Gagalama Nigali Side 12:2

Te eno nago wąį hani dabe te genuai hani mu pedalumainu yaibao. Te eno nage dali dwagi yai sę mu yaibao. Eno te nago nogi genuai ilaibao. Tama gasa we bidi dabe augwaligo te tiwai po waibao, ‘Eno homugo te Godigo enabolo dwagi yai sę emainao, te agai Abram dali yali tiwai yao.’

Tigidali Nai Gagalama Nigali Side 34:2

Hamor, aga te Hivi hani bidi me deli, aga tede tobolu bidi nigilama bidai. Agai ogwa, te Sekem, agai te Daina sulama, tama agai aga nogo tulama, tama aga dali dwai sę yali.

Tigidali Nai Gagalama Nigali Side 34:29

Augwaligo te tigidali wiegi yai nai me, te augwaligo tigidali we wai me sali, tama augwaligo te be tomode munaluali tigidali doado bage me, te tigidali sela silama, tama augwali pai.

Tigidali Nai Gagalama Nigali Side 34:31

Tiali goli, augwali sigo te po wai, “Dago te bidi me deligo dago abe te penani we nogi sidali weyu, te dago me gogologobeo,” wali.

Tigidali Nai Gagalama Nigali Side 46:26

Te Jekopgo ogwa dabe me wąį hani dabe dolo te Isipba pali, te 66 hani augwali Kenandu pali. Te nedali te Jekopgo ogwa dabego we dabe te augwali nedebe.

Bomai Po 4:27

Teda Genuai Bidigo dage sese tama gasa buluba dabe subigila sela sąwaibao. Tama we bidi hauwa mu isila paibao, tama dage dwasianu we bidi naga te gasa haniani bidi hani tomode bidaibao.

Tigidali Nai Gagalama Nigali Side 12:6

tama Abram te tǫ tomodu ma pelama, tama aga te gasa pesage te hanu nogi Sekem teba saboligi pai. Tama te bulude te gasa moni ni mu deli nogi More te elaluali. Tama te sogo te Kenan hani bidi dabe te bulude bidibadi dao, tama augwaligo augwa tibo god dabebolo te moni ni pagede te augwa lotu po weyu, bidaluali.

2 Samuel 16:21

Tama Ahitofelgo te po wali, “Nage pelama, te naga ayago si wali we hani dali pigi pao, agai te kingo be tonalumainu taga pai. Te nago tama tiyu da, teda te tigidali Israel we bidi hanigo te tama koneaibao, nago te naga aya dali boi bidi ebo tiwai mu pedelaibao. Tama tiyu, te megi nage wali painu ebo we bidi tigidaligo, augwa te nage wali pabo bomo mu yaibao,” wali.

Te Israel me Juda Hani Sigo Tuni Bidigo Po Elalubo Buku Deli 11:25

Tama te Solomon king bidali sogo, Resongo te Israel dabe dali boi bidi ebo sę yali, te Hadatgo ebo kolesaga tobage tiwai yali. Tama Reson te Siria tǫde king bidiyu, tama te Israel dabe te agai wei isiąyu, godolo homu me isiąwai.