Tigidali Nai Gagalama Nigali Side 20:17 - Godigo dwagi yai po buku

^17-18 Yawego te Abimelekgo hanide te tigidali we sibi haliga palia silama, te augwaligo wai ame nabo usu isiąwani. Agai tama tiali, te Abimelekgo te Abrahamgo we Sarabolo yali, te kolesaga wei ponoyu, tama tialio. Tama Abrahamgo Godibolo gedu haluasa po olama, tama Godigo Abimelek usu ma ilali. Tama Godigo Abimelekgo we me usu ilibadi, te aga sę ebo we dabe dali usu ilama, tama augwaligo wai ame nabo usu ma yai dao.

Tigidali Nai Gagalama Nigali Side 20:17 Referans Kwoze

Jems 5:16

Tama tibaso, dagego duga dwai sę yali te duga ama dabebolo pusao, te duga hasi tau somainogo Godibolo te po hanalu wao, te God agai dage dwagi yai ma usu ilimainogo yao. Tama tiyu, te doloba pai bidigo gedu haluasa po wabode bomo elaluyu, tama agai te gedu haluasa po wabogo te we bidi tau sabo sę ebo usu yaibao.

Filipai 4:6

Dagego haniani naide moni homu egimio. Te menio. Te dageba pedalobo sę tigidalide dagego Godibolo tede po weyu, tama agabolo buba hwi olama, tama te dagego sǫą pabo naide aga hanalu wao.

1 Tesalonaika 5:25

Dago abagi dabeo, dagego God agai da tau somainogo gedu haluasa po wao.

Matyu 21:22

Tama dagego konealubo po dąų olama gedu haluasa po weyu da, teda te nai dagego sainogo gedu haluasa po wabo, te nai dagego saibao,” Jisasgo te po wai dao.

Matyu 7:7

“Te dagego gedu haluasa po Godiba hanalu da, teda agai dagego te hanalubo nai te dageba mawaibao. Dagego te nai gegebo sę idu da, teda te nai dagego sueibao. Tama dagego be tuba eliyu bebego wedu da, teda Godigo dagebolo te tų dalaibao.

Aisaia 45:11

Genuai Bidi, Israelgo Wiegi Yai Doloba Pai Kolesaga Mu Ebo God da, te God agai te Israel deli hani we bidi pedalubo sę ilali, agai te tama po wai, “Te nosali pedelabo nai po wabode dagego te eno ena wai puluba tonalubo sę po munu me wagio, te mena kolesaga te eno ena sę eyu, wali pabo po me wagio.

Bugagia Bidibo Kolesagade Po Asęai Buku 15:8

Genuai Bidigo te dwai kolesaga ebo bidigo ofa ebo te wei mu me egobeo. Menio. Agai tede dwai homu mu ebo dao. Tiali goli, agai te doloba pai bidigo gedu haluasa po wabo te wei mu eyu, wiegi yai pemene mu ebo dao.

Esra 6:10

Dagego te tama tibaso da, teda te augwaligo te augwa dagalude bidibo Godiba te wiegi yai ofa ebaso, tama te agai wei eyu godolo homu mu yaibao. Tama augwa te Godiba gedu haluasa po weyu, te enaba me, te eno ogwa dabeba me, te bugagia bidimainu te tama tiaibao.”

Tigidali Nai Gagalama Nigali Side 29:31

Te Yawego suali, te Jekopgo Lea te godolo kuna me isąwai. Tama agai te Lea haliga emainu tau sai. Tiali goli, Reselgo wai meni yai.

Tigidali Nai Gagalama Nigali Side 20:7

Tiali goli, megi nago te we aga bidiba ma tagala palao. Te bidi aga te eno po pusubo bidi profet dao, te agai gedu haluasa po weyu da, te nage me isigobeo. Te nago te we ma tagala palisiąwani da, teda nage me, te naga bidalubo tigidali we bidi dali, mu isila paibao,” Godigo te po wai.

Godigo Sęba Tagala Palai Bidigo Po 3:24

Pita agai po me wali, te po wai, “Te Godigo po pusa mabo bidi nogi Samuel dali, te nosali asai bidi dabe dali me, te Godigo po pusa mabo bidi dabe tigidali, augwaligo Jisasgo yabo sę po polobadu pusa mawai. Tama megi te sę dią holali.

Bugagia Bidibo Kolesagade Po Asęai Buku 15:29

Genuai Bidi te dwai kolesaga ebo bidi dabede te digibulu bidibao. Tiali goli, agai te doloba pai bidi dabego gedu haluasa po waboba olo mubo dao.

Israel Hanigo Namba 12:13

Tialima, Mosesgo Genuai Bidiba e tama po i walio, “Godio, eno homugo nago Miriam ma usu ilao,” wali.

Israel Hanigo Namba 21:7

Tama te we bidi te Moses pageba aselama, e tama po wali, “Dago sęgę polo salio, te dago Genuai Bidi dali, me nage dali wado po walide. Megi nago Genuai Bidibolo gedu haluasa po wao, agai te gula mani sela sąmainao,” wali. Tama Mosesgo te we bidi tau somainogo Genuai Bidibolo gedu haluasa po wali.

Jopgo Po Asęani Elalubo Buku 42:8

Tama tibaso, dagego kau kibu omai nogo a naga, me badu si sobadi, kibu sipsip a naga, me badu si sobadi, tama elama, tama eno sę bidi Jop pageba sela pao. Tama dagego augwali elama, tama ofa nai iside sese tama ulao. Tama Jopgo enabolo gedu haluasa po olama, tama eno dage dolabo homu yali tagalaibao. Teda eno agai gedu haluasa po wabo odaibao. Tama eno dagego te wali dwai po dabe usu nama, dagebolo dene me magobeo. Magi baso meni. Dagego eno ebo sę po dolo pusubeo, te eno sę bidi Jopgo pusali yali gilama,” Genuai Bidigo Elifasbolo wali.

Tigidali Nai Gagalama Nigali Side 12:17

Tiali goli, Yawego te haniani dwai gasi dabe te genuai tuni bidibolo me, te aga bede bidali we bidibolo dali tagala palama, te tuni bidigo te Sarai dali emai hagede dwai sę te wei ponoyu, tama tiai dao.