Tigidali Nai Gagalama Nigali Side 15:5 - Godigo dwagi yai po buku

⁵ Tama Yawego Abram buluba odasa solama, tama agabolo po bomonama weyu, te po wai, “Nago te dagalude te hǫ dabe suao. Te nago tigidali nedebo usu yaibawe? Tialima, nago wąį dabego wai dabe augwali te hǫ tiwai umabo mu pedelaibao,” wali.

Tigidali Nai Gagalama Nigali Side 15:5 Referans Kwoze

Hibru 11:12

Tama te bidi deli, aga monu dabe elama tama pąde isainogo yai goli, aga te wai hauwago aya pedalai. Tama augwali hauwa mu pedaludubadi geai, te dagalude elalubo hǫ dabe tiwai me, tama te tamu ąį sanede elalubo masigi sane tiwai pedaludali. Te bidigo augwali nedebo me usu egobeo.

Polgo Po Pas Rom Dabeba Asęani 4:18

Abrahamgo Godigo te sę yaibao po wabo tų te agai me susiąbadi, tiali goli agai konealubo po mu dąų weyu, te tų suai bidigo ebo tiwai yalio. Tama aga te bidi hani hauwago wąį monu bidi pedelali, te Godigo wali po tiwai yalio, “Te nago bulai wai hani dabe e tiwai geninama tama pedalaibao,” te po wai dao.

Bomai Po 1:10

God, dago Genuai Bidigo dage hauwa mu, te dagalude hǫ tiwai pedalumainu ilai dao.

Ma Dobola Sali 32:13

“Nago naga sę bidi Abraham, me Aisak, me Jekop, te homugo koneao. Tama nago te bomo yai po augwali dali dąų wali po, te homude koneao. Nago bomo yai po dąų mu weyu, e tiwai po wai, ‘Eno mu po obao, eno te dagego wąį nǫų dabe te dagebolo hauwa mu, te hǫ tiwai dageba mawaibao. Tama eno po dąų weyu, te eno dagebolo mawaiba wali te tǫ, teda te tǫ te eno duga wąį nǫų dabe augwaliba mawaibao. Tama augwali sesemane sogo mu te tǫde bidada paibao,’ nago te po wai.”

Tigidali Nai Gagalama Nigali Side 22:17

Eno te tiwai po obao, te eno nago hani wąį dabe te wai puluba hauwa mu, te dagalude hǫ, me te tamu ąį sanede masigi kemi tiwai hauwa mu pedelaibao. Tama nago wąį hani wai dabe augwaligo te boi bidi dabe augwali aiyaba mu elaluama, tama augwaligo doado bage mu saibao.

Bomai Po 10:22

Dagego wąį dabe Isip buluba pali da, teda augwali 70 we bidi tama naga pai dao. Tiali goli, megi da, God dago Genuai Bidigo dage hauwa mu, te dagalude elalubo hǫ tiwai pedalomainogo ilali dao,” Mosesgo te po wai.

Jeremaia 33:22

Te bidi dabegote hǫ dabe me nambisde masigi sani nedainu ebaso, usumu me egobeo. Te tiwai naga, te eno sę bidi Devitgo hanidali, te Livai hani dabe me, te hauwa umabo pedelama, te bidigo nedabo usu egobeo,” wali.

Godigo Nogi Ugwaba Sabo Tęąbi Po Wabo Buku Dabe 147:4

Agai augwaligo namba te hǫgo dąį ilama, tama mu tama, agai te augwali deli deligo nogi nodigi pabo dao.

Tuni Bidi Dabego Po Elalubo Buku Deli 27:23

King Devitgo te megi tama holobo gesi ogwa bidi augwaligo kibu be te bidi sese deliba usu nisąbo bidi dabego kibu be isąwai bidi augwali nedebeo, magi baso meni, Genuai Bidigo te Israel we bidi augwaligo namba ugwaba igulama, te hauwa mu te dagalude elalubo hǫ dabe tiwai pedalumainu hagede te Genuai Bidigo dąų wali bomai po wali peyu te tama tiai dao.

Tigidali Nai Gagalama Nigali Side 12:2

Te eno nago wąį hani dabe te genuai hani mu pedalumainu yaibao. Te eno nage dali dwagi yai sę mu yaibao. Eno te nago nogi genuai ilaibao. Tama gasa we bidi dabe augwaligo te tiwai po waibao, ‘Eno homugo te Godigo enabolo dwagi yai sę emainao, te agai Abram dali yali tiwai yao.’

Tigidali Nai Gagalama Nigali Side 28:14

Te nago ogwa dabego ame nabo wai dabe augwali te tǫ hogomu tiwai hauwa umabo mu pedelaibao. Tama augwaligo te augwa tǫ sese pedai tigidali pedaiba usu elama, bidaluaibao. Tama tigidali tǫde bidalubo bidi dabe augwaligo enabolo te augwali dali dwagi yai sę yao po hanalu, te eno nage me, te nago ame nani waigo wai dabe augwali dali dwagi yai sę yali tiwai gilama dwagi yai sę yao po hanalu waibao.

Tigidali Nai Gagalama Nigali Side 26:4

Te nago wąį hani augwali te umabo mu pedalumainu yaibao, te dagalude elalubo hǫ dabe tiwai gilama yaibao. Tama eno e tǫ pedai te tigidali eno augwalibolo mawaibao. Tama te tǫde tigidali bidi dabego te augwali da dali dwagi yai sę yao wabo po enabolo hanalu, te eno nago hani wąį dabe dwagi yai sę yali tiwai gilama yao po waibao.

Tigidali Nai Gagalama Nigali Side 16:10

Nosali agai po ma weyu, te po wai, “Te eno nago hani wąį te wai dabe hauwa umabo pedelama, tama bidi dabe augwaligo nedainogo ebo usu me egobeo.”

Tigidali Nai Gagalama Nigali Side 13:16

Te eno nago wai puluba dabe hauwa mu te masigi sane kemi tiwai pedalumainogo ilaibao. Te bidigo te masigi kemi tigidali nedebo usu yabo homu eyu da, teda agai te nago wai puluba pedalubo tigidali te nedabo usu yaibao.

Tigidali Nai Gagalama Nigali Side 17:2

Te nage dali eno dwagi yai tau sabo bomai po dąų wali po, tede eno megi usu da po weyu, tama nagebolo menama, tama eno nago hani wai dabe te umabo hauwa pedalumainu ilaibao,” wali.

Josua 24:3

Tiali goli, eno te duga wąį Abraham te wę Yufretis u badu elaluali tǫde selama, tama eno aga te Kenan tǫ pedai tigidali badu selasa bilali. Tama eno te agabolo wąį hauwa mani. Eno te ogwa Aisak deli agabolo mani,

Te Israel me Juda Hani Sigo Tuni Bidigo Po Elalubo Buku Deli 3:8

Megi da, ena te nago da olama, te sa muani te we bidi hani dabe tomode bidibao,” wali. “Augwali te hauwa umabo mu ebaso, tama te bidi dabego nedebaso, te usu me egobeo.

Nehemia 9:23

Tama nago augwaliba te wai dabe hauwa mawai, te dagalude elalubo hǫ dabe tiwai pedelali. Tama nago te augwaligo te boi bidi dabe aiyaba elalumainu ilama, tama nago te augwa bulali wąį nǫų dabeba mawainu te po dąų walali tǫ somainogo yai dao.

Jopgo Po Asęani Elalubo Buku 35:5

Nago dagaluba tonama, te pǫ dabe suao. Augwali ugwanu mu bidibao. Godigo te dagalu dali, pǫ dali nigai dao.

Tigidali Nai Gagalama Nigali Side 32:13

Jekop te hulide bididu, tama aga ama Iso homu nagame iliyu maiabo nai te kibu dabe meba dodola muai.