Galesia 5:1 - Godigo dwagi yai po buku

¹ Te da olo mu bugagia bidimainogo eyu tama Krais agai te da dąų wali nai pisigina sąnama, tama megi da olo bidibao. Tama tibaso, augwaligo dage te bomo yai po dologoba ma muidali weyu, tama dage bomo elama, tama dąų wasiąbo olo bidibo bidi dabe bidiąo.

Galesia 5:1 Referans Kwoze

2 Korin 3:17

Te pode, te Genuai Bidi wali, te da aga te Godigo Tedali Mobo Bidi dao. Tama Genuai Bidigo Mobo te bidi me deli dali bidiyu da, teda te nai me deligo te bidi me kęąlugobeo. Menio. Aga olo mu bidibo dao.

Galesia 5:13

Ama dede, polobadu God agai dage i wai dao, dage olo mu bugagia bidimainu yai. Tama dage megi olo mu bugagia bidiyu, tama bugagia suao. Te da te bomo yai po dologode bidisiąbaso, tama dago polo homu kolesaga wali peyu, tama dena tigigo kolesaga wali pinao, te homu egimio. Te menio. God agai da tau selama, tama da olo mu bugagia bidibaso, tama dage duga hasi dwagi yai homu eyu, duga abagi tau sao, te augwaligo olo sę ebo bidi tiwai bidao.

1 Pita 2:16

Tama dage God dali dąų olama, tama dage da aga olo sę ebo we bidi dao. Tama te dwai sę ebo kolesagago dage dąų waidali weyu, dage bugagia olo bidao. Tiali goli olo bidibadi dagego te homu egimio, ‘Te da olo bidibaso, tama dago dwai sę eyu da, te usu dao,’ te homu egio.

Polgo Po Pas Rom Dabeba Asęani 6:14

Dagego koneani, te dwai sę ebo kolesagago te dage tonaluamuo. Magi baso meni. Te Godigo dage ma dobola somainogo eyu dagego te bomai po bugagia wali pabo homu ebo meni. Te meni. Tede dagego koneani, me sogo dagego geda muyu dwai sę eyu ebo dao. Te usu egobeo. Tama dagego homugo te Godigo olo tau sabo wiegi yai kolesaga tego naga dage ma dobola sobaso dage te wiegi yai kolesaga dologode bidabo homu yao.

Polgo Po Pas Rom Dabeba Asęani 8:2

Magi baso meni, ena megi da Krais Jisasde tia selama tama Godigo Tedali Mobo Bidigo tų dalali. Te da te dena homude elalubo dwai sę ilibo kolesaga dologode me bidibadi, tama da te isai bidi tiwai bidiyu tama da Godide tedali bidai dao. Tama da te tama tiwai me bidibo tagalomainogo eyu, tama Tedali Mobo Bidigo gasa tų dawai, te da olo bugagia bidimainogo agai tama tiai dao.

Galesia 4:9

Tiali goli, megi dagego God koneai dao. Woo, meo, te po dwasianu usube. Te e tiwai dao, megi Godigo dage aga dali wadolai. Tama megi dagego God mu koneai digi, magi baso te tǫde dwai olo kolesaga ebo dologoba ma geasa peyu, tama dage te kolesagade kalabus sęde ma bidibo tiwai ebawe? Augwaligo dage tau sabo usu egobeo, bomo elalubeo.

Hibru 10:23

Tama dago homu nosali da Godigo bidibo digi bidigi paibao. Tama homu eyu, tama dago te gasa we bidibolo te homu ebo po haninama pusali. Awe, dago te konealubo pode dena homu bugagia dąų olama, tama tede homu si me ilamuo. Magi baso meni. Godigo ebo kolesaga dago koneani, tigidali sę te agai yaibao po wabo sę te mu tama agai te sę ebo dao.

Galesia 2:4

Tama te sogo gasa bidi meba asai. Tama augwaligo “Ao, da Jisas wali pabo bidi dao,” weyu, te tibo po naga wai. Sa asobo bidi tiwai augwali geme aselama, tama da dali wadolali. Tama polobadu da te da Juda dabego wąį dabego nigali bomo yai po dologode bidaluali. Tama da Krais Jisasde wadolama, tama agai da te kolesagade tagalali, da olo bugagia bidimainogo yai. Tiali goli te bidi dabe augwaligo te kolesaga page geme suagasai, augwaligo da te augwa bomo yai po dologoba ma munama tama tede dąų olama, da tede bidimainogo yai.

Galesia 4:31

Tama tibaso, eno ama dedeo, suao. Da te olo sę ebo wego wai puluba menio, da te bomo yai po dologode bidibo menio. Da te dąų wasiąwai olo bidibo we Sarago wai puluba tiwai dao.

Kraisgo Geme Dualali Sę Pedelabo Po Jonbolo Ola Mani 3:3

Tama tibaso, te dagego polobadu Godigo po mu sali, te po dagego odali, te pode homugo ma kone palao. Tama te pode homugo ma kone paliyu, ge neyu, homu begeleyu bidao. Te dage pila muani tagaliyu hodalusiąyu da, te ena dagego bidibo digi te geme nai wi sainu asobo bidi tiwai eyu, tama ena dage pageba asobo sogo te bodolu dagego konegobeo.

2 Pita 2:19

Tama te tibo po ola mabo bidi dabe augwaligo te po te we bidibolo wabo dao, “Dagego dago po wali peyu da, teda dage olo mu bidaibao.” Tama augwaligo te tobage po wabo digi tiali goli augwali te augwa digi dolobo kolesaga ebo sę bidi bidibo dao. Te tiwai dao: tama te bidi te magi kolesaga me deligo te bidi me deli aiyaba elaluyu aga dąų obaso da, teda te bidi aga te elalubo kolesagade dąų wali bidi dao.

1 Korin 16:13

Dagego bugagia tonaluyu, tama te Kraisde konealubo pode bomo elama bugagia dolaluao. Dage bidi mu sesemane sogo bidiyu, tama bomo elama bidaloao.

Polgo Po Pas Rom Dabeba Asęani 7:6

Tiali goli megi da, megi te Godigo da ma dobola somainogo eyu, te da te Mosesgo mani bomai po wali pabo sę, te sę tagalama tama da olo bidibao. Magi baso meni. Da te isai bidi tiwai bidibao, te dago tigi me homu me augwali sigo ebo dwai sęgo da me tonalubo menio. Tama tiyu, dago te Godigo sę ebo dao, te bomai po dologode bidibo meni. Te meni. Dago te gesi noma kolesaga te Tedali Mobo Bidigo te sę hodolama dago te sę ebo dao.

Polgo Po Pas Rom Dabeba Asęani 6:18

Tama Godigo dage te dwai sę ebo kolesaga dologode bidali te dagala sanama, tama dage te doloba pai kolesaga dologode bidibo we bidi dabe bidibo dao.

Aisaia 61:1

Tigidali Bomo Elalubo Godigo Mobo Noma Bidi enaba bidagasali, magi baso meni, Genuai Bidi aga digi eno toboluba wel gelali, te ena dąį sa muyu, te aga wiegi yai po te magi doado bage meni yai bidi dabe selasa pomainu yai. Te agai ena tagala palali, te haliga sęgę genuai elalubo bidi dabego sęgę silimainu yai, te kalabuside bidibo bidi dabeba po pusu, te augwa kalabus tagalama, olo pao po omainogo yai.

Godigo Sęba Tagala Palai Bidigo Po 15:10

Tama dagego te Juda hani gagasiąwai bidi sęgę mabo tagaliąo. Dagego ‘Dage Mosesgo po naga wali piąo’ po augwalibolo wagimio. Magi basowe? Augwali usu egobeo. Suao. Dago wąį me, dago me, te Mosesgo mani bomo yai po wali pabo sę bugagia wali pogobeo. Te tiwai moni sęgę dago tudide tolobo dao. Tama tiwai sęgę dagego augwalibolo mobaso da, dagego God usu saibao.

1 Korin 7:22

Tiali goli te olo mu sę ebo bidi bidibadi tama Godigo aga i wali, megi da te aga dago Genuai Bidigo selama, tama te Genuai Bidigo gedude te aga olo sę ebo bidi me bidigobeo, te aga olo naga bidibao. Te tiwai naga, te olo wiegi yai bidali bidi, te olo sę me isąbadi tama Genuai Bidigo aga i wali, megi da aga te Kraisde masigi sisąbo olo sę ebo bidi tiwai pedalama bidibao.

Godigo Nogi Ugwaba Sabo Tęąbi Po Wabo Buku Dabe 51:12

Polobadu nago ena ma sobaso, te ena dwagi yai homu yai, nage dali. Tama megi eno te homu yai, nago ena te dwagi yai homu kolesaga enabolo ma mao. Nago eno homu kolesaga hodolama, tama nago po eno wali paibao. Eno tama homu kolesaga emainogo nago ena dąų walagameo.

Bugagia Bidibo Kolesagade Po Asęai Buku 23:23

Nago te mu kolesaga sainu bomo eyu, tama te wiegi yai homu, me te tobage wiegi yai kolesaga dabe sabo bomo yao. Nago te wiegi yai kolesaga tagalabo homu me igio.

Jutgo Asęani Pas 1:3

Eno abagi mu dede, hasia eno homugo te Godigo da tigidali ma dobola sabo sęde eno po dagebolo asęna tolabo homu bomo yai. Tiali goli, eno homu hasegelali, tama megi dagebolo gasagi yai po asęna tolobao. Magi baso meni, gasa bidi dabe augwali dage Godigo we bidi hani tomoba geme asai, te sa asobo bage tiwai asai. Te polobadu te deli sogo naga te God agai aga po te aga we bidibolo mu mawai dao. Tama te po e dao, te dago te God dali Jisas dali augwali side konealubo po dąų wao. Tiali goli, te geme asai bagego augwaligo ebo dwai dwai kolesaga bolainogo augwaligo te Godigo mani po hasegelali, tama tibo po dagebolo ola mayu, “Woo, te God agai da olo tau siyu, tama dago ebo dwai sęgę sela sąbaso, teda dago dwai dwai penani ebo kolesaga eyu da, te usu da,” augwaligo te tibo po ola mabo da. Tama tibaso, eno megi dagebolo e po asęna tolali, te dage bomo elama tama te Godigo mani po bugagia tonaluyu paliąo, augwaligo te po dolidali weyu yao. Tama augwaligo te tobage tibo po weyu, augwaligo te Jisas Kraisde hogwa sabo po wabo dao. Augwaligo dago Polalubo Bidi, te dago Genuai Bidi deli naga tudiba mubo dao. Tama polobadu mu Godigo po asęani bidi augwaligo te po asęani, te God agai te tobage dwai dwai sę ebo bage sa munama tama sęgę mawaibao, te po te bukude asęani.

Filipai 1:27

Te enade nosali pedalabo sę te dago megi konebeo. Tialima te tagalao, te sęgę menio. Te sęgę nai, te e dao: te dago Kraisde ola mabo wiegi yai po, te po te da usu sabo usu ni tiwai dao, tama te dagego ebo kolesaga te usu niba kadu wao. Dagego tama tiyu da, teda ena dage bidibo digi pabo ma gasa bulude bidibo, te usu dao, eno dagego ebo kolesagade dwagi yai po naga odaibao. Dagego te Kraisde ola mabo wiegi yai po bugagia wali pobaso da, teda dage duga hasi deli homu naga eyu, tama bomo elama dolaluaibao. Tama me dagego ebo kolesaga deli naga eyu, tama duga hasi tau siyu, tama te Kraisde dwagi yai konealubo po aiyaba elaluabo dwai sę ebo bage augwaligo dage dologobeo. Dagego tama ebo kolesaga po eno odaibao.

Efesus 6:14

Awe, dage e tama tiwai dola selama dolaluao. Dagego Godigo mu po te duga kugulu tiwai gudulama, tama bugagia dąų olama, tama te doloba pai wiegi yai kolesaga ebo te dagego duga hagawia sesela sabo nai tiwai abiao.

Kraisgo Geme Dualali Sę Pedelabo Po Jonbolo Ola Mani 2:25

E sę naga yao: dagego megi ebo wiegi yai kolesaga bomo elama tolalua peyu, tama ena ma asobo sogo bugagia tonaluao.

Hibru 4:14

Te God aga te dago ebo kolesaga dagalabo bidi bidibaso, dago te Kraisde homugo konealubo po, te gasa we bidi dabebolo pusabo po, dago te pode dago homugo mu kęą pao. Magi baso meni, dago genuai pris tobolu bidi te bidibao, tama aga te dagaluba holama tama Godigo bidibo digi tomoba mu pai. Aga te bidi Jisas, te Godigo Ogwa dao.

Hibru 3:14

Magi baso meni. Polobadu dago Godide konealubo po dąų wali, teda te konealubo po megi me dago bugagia dąų weyu, teda da isiboba usu nigi paibao. Dago tama tiyu da, teda da te Krais dali wadolama, tama sę deli naga aga dali hodobo eyu tama bidaibao.

Hibru 3:6

Tiali goli Krais aga da te Godigo Ogwa, tama agai da te Godigo hani augwali tonaluyu tama te tobolu bidi bidibo sę elaluyu, tama agai me te sęde Godide homu kęą pai bidi bidibao. Tama tibaso, agai nogigo te Mosesgo nogi aiyaba elalubo dao. Tama sesemane sogo dago konealubo po dąų weyu tama wi isąyu tama dago wiegi yai homu pemene elama tama Genuai Bidi naga tonaluyu da, teda da me te Godigo hani mu bidaibao, te da agai be tiwai elaluaibao.

2 Tesalonaika 2:15

Abagi dedeo, God agai dagebolo te dwagi yai sę ebaso, dage bomo elama, dago dagebolo pusali po me, pasde asęani po me, te po tigidali mu dąų olama, tama bugagia bidao.

1 Tesalonaika 3:8

Magi baso menio. Dage Genuai Bidi agai bomode bomo elama, tama aga dali bugagia wadoloyu ebaso, teda te tebogo dago sęgę dali dene dali si aiyaba elaluali. Tama elama, da moni dwagi yai homu elama, da bugagia bidibao.

Galesia 4:26

Ao, tiali goli megi eno te gesi hanu me Jerusalem tede po digi po begelama obao, te hanu aga dagalude megi tonalubo dao. Te gesi hanu Jerusalem te gasa we dao, te we nogi Sara dao. Aga te olo sę ebo we menio. Tama da te Godigo mani gesi kontrak po dologode olo bugagia bidibo, tama te we Sara aga te dago ida tiwai bidibo dao.

Galesia 3:25

Tialima, megi te dena homu Jisasba muabo sogo asaligo da, te da te bomo yai po dologode bidabo sogo sia sali dao.

1 Korin 15:58

Eno ama dede muo, te da nosali ma hodaluama tama tebogo te isibo kolesaga aiyaba mu elalubaso, megi dage bomo elama bidiyu, tama wi homu eyu dwasianu ibaba kila selamuo. Te dagego Genuai Bidigo sę dene ebo, te olo me tagalogobeo, te sę ebogo aga du mu walaibao. Dagego te tiwai koneama, tama sesemane sogo dagego dago Genuai Bidigo sęde sę bomo mu yao.

Matyu 23:4

Tama tiyu, augwaligo te mesegaluai sęgę te bidi dabe augwali nageba ugwadu muaibao, tiali goli augwa digi augwaligo dwasianunu me nogo danigo naga me te tola selama, te sęgę tolobo bidi dabe augwali tau me sogobeo.

Polgo Po Pas Rom Dabeba Asęani 7:3

Tama te bidi bidibadi tama we gasa bidi dali pobaso da, teda te we sabo kolesaga te wego dolobo nogi waibao, te penani ebo we dao te waibao. Tiali goli, te bidi isai digi yaibaso da, te bomai pogo aga ma kęąlubeo. Tama te we aga gasa bidi dali pobaso da, teda agai te we sabo kolesaga me dolobeo, aga te penani we dao wagobeo.

Polgo Po Pas Rom Dabeba Asęani 8:15

Magi baso meni, te Godigo dagebolo mani Mobo Bidi da, te dage olo sę ebo bidi bidiyu God ma wi ilibo Mobo Bidi meni. Te menio. Te mani Mobo Bidigo dage Godigo wai dabe ilibo Mobo Bidi dao. Te Tedali Mobo Bidigo dago i olama tama Godibolo “Aya, Aya” wabo dao.

2 Korin 11:20

Awe, te bidigo dage te aga dologoba mubaso, ma agai dagego nai tigidali silibaso, ma agai dage dali hagoma ebaso, ma agai dage gesabidide elibaso da, teda agai tama temainogo te dagego gogolobo dao, po meni!

Dwagi Yai Gesi Po Lukgo Asęani 5:38

Gesi bomai wę te gesi sipsip waligo nigali botolba tabiao.