Galesia 4:9 - Godigo dwagi yai po buku

⁹ Tiali goli, megi dagego God koneai dao. Woo, meo, te po dwasianu usube. Te e tiwai dao, megi Godigo dage aga dali wadolai. Tama megi dagego God mu koneai digi, magi baso te tǫde dwai olo kolesaga ebo dologoba ma geasa peyu, tama dage te kolesagade kalabus sęde ma bidibo tiwai ebawe? Augwaligo dage tau sabo usu egobeo, bomo elalubeo.

Galesia 4:9 Referans Kwoze

1 Korin 8:3

Tiali goli, te bidi me deligo aga God dali dwagi yai homu eyu godolo ebaso da, teda Godigo koneama, te bidi te Godigo bidi dao.

Galesia 3:3

Tama Godigo Mobo Bidigo bomo dali dagego God wali pabo gagalali. Tama megi dagego homu eyu, ‘Te Godigo Mobo Bidigo bomo tagalama, tama dena bomo elama da te bomo yai po bugagia wali peyu, te tiwai bidiyu, tama dena kolesaga wiegi yai mu pedalaibao,’ dagego te homu eyu da, teda dage te homu kolesaga meni yai we bidi mu dao.

Polgo Po Pas Rom Dabeba Asęani 8:3

E tiwai yai dao. Te dena tigi tomode bidibo dwai sę ilibo kolesaga elalubaso, dago te Godigo bomai po dolo wali peyu tama da doloba pai we bidi pedalisiąbo dao. Tiali goli God aga digi da doloba pai we bidi aga gedude pedalalio. Agai aga Ogwa naga tagala palai, te aga tigi te da dwai sę ebo bidi tigi tiwai elaluali. Aga dago dwai sę yali sęgę sela sąwainogo asai, tama da bidigo dwai sę yali dene te Godigo aga delide naga wei ponai dao.

1 Jon 5:20

Dago koneai, Godigo Ogwa aga asai, tama agai homu kolesaga da mawai, dago te God aga God mu dao, te dago konemainogo te kolesaga da mawai. Da aga Ogwa Jisas Krais dali wadolama bidibaso, tama da God dali bidibo dao. Te Krais da, te aga God mu dao, tama agai te bidibo ula sesemane sogo bidada peyu, bidada pabo ula mabo dao.

Tuni Bidi Dabego Po Elalubo Buku Deli 28:9

“Tialima nage Solomon, eno ogwa da, eno te tiwai bomai po nageba obao. Nago homu kolesaga deli naga elaluao, te naga ayago God dologode bidao. Te nago agai homu wali pabo sę bomo mu yao. Nago te tiwai yao, magi baso meni, Genuai Bidigo dago homude magi homu te tigidali agai koneaibao. Te nago agai godolo yabo kolesaga wali pabo sę bomo ebo kolesaga sobaso da, teda te nago aga bugagia konemainu yaibao. Tiali goli nago aga tudiba mubaso da, teda agai nage sela sąnama, te sesemane sogo agai nage tudiba mueibao.

2 Pita 2:20

Mu tama, augwaligo te Jisas Krais koneani, aga dago Genuai Bidi tama da ma sali bidi dao. Tama tede koneyu augwali wi pelama, te tǫde elalubo dwai meda yai kolesaga tigidali tagalai. Tama augwali te kolesagade dąų ma weyu, tama te kolesagago augwali aiyaba elalubaso da, teda augwali tama tiwai bidaibao: te hasia mu augwali dąų olama, augwali dwai bidali, tiali goli nosali augwali ma dąų wai, tama augwali dwai mu bidibao.

Hibru 7:18

Tama Godigo te hasia polobadu te pris sęde wali bomo yai po te dagala sąyanio. Magi baso meni, te bomo yai pogo bomo usu menio. Te bomo yai pogo da tau me sabo usu ebeo.

Polgo Si Wali Pas Timotiba Asęani - 2TI 2:19

Tiali goli Godigo mu po te bidigo dolobo usu egobeo. Te bomai be tuni ni pos tiwai bulalio, tama te dolalubao, te be peme egobeo. Tama te tuni ni posde hagea siyu asęani po te tiwai elalubao, “Genuai Bidigo aga we bidi digi bugagia koneani.” Tama te po me asęani elalubo, “Te Genuai Bidi nogi nogi eyu ‘Ena aga bidi dao’ po wabo tigidali bidi, augwaligo te dolo isiąwai kolesaga tudiba muao,” te po asęani elalubao.

Efesus 1:17

Tama God da dago Genuai Bidi Jisas Krais aga God da, te dago genuai nogi mu elalubo Aya dao. Tama eno aga dali po weyu, eno homugo agai aga Mobo Bidi dagebolo mao. Tama menama, tama te Mobo Bidi agai dage wiegi yai homu kolesaga menama, tama agai God dagebolo waselaibao, te dagego God aga bugagia kuna konea silimainogo tiaibao.

2 Korin 4:6

Magi baso meni, e tiwai dao. Polobadu mu Godigo te po wai, “Te be hulia sai madi ula pedalomainao,” wai. Tama te po wali God aga ula digi da dali bidibao, tama da homu ula mu ilibo. Te ula e dao: dago te Godigo bomo yai ula te Krais gesabidide elalubo koneai dao.

1 Korin 13:12

Dago te ąį dulade subadi, te dena gesabidi dago kuna subo meni, te dwasianu hulia sai tiwai subo dao. Tama te tiwai me, dago God gisiga mu konebo menio. Tiali goli te sogo nosali da, te dago Godigo gesabidi mu dolo sueibao. Megi dago te God kuna konebeo, te me badu naga koneani. Tiali goli nosali da, te dago aga mu koneyu, te agai da mu konebo tiwai gilama yaibao.

Ma Dobola Sali 33:17

Tialima, Genuai Bidigo Mosesbolo te po wai, “Eno te nago wali po selama, te sę yaibao. Magi baso meni, eno nage godolo eyu, tama eno nage bugagia koneai dao.”

Polgo Po Pas Rom Dabeba Asęani 8:29

Magi baso meni, te Godigo augwali polo koneani bidi dabe, agai augwali me hagea siyu tedali muani, te aga Ogwa tiwai pedalomainogo yai, tama ama name hauwa bidimai hagede yali, tama Krais te augwaligo ama gomunai bidi bidaibao.

Dwagi Yai Gesi Po Jongo Asęani 17:3

Tama te bidada pabo bomo page e dao. Augwaligo nage koneyu, nage God deli mu dao. Augwaligo Jisas Krais koneyu, nago aga tagala palobaso asai bidi dao. Augwaligo te si mu koneyu da, teda te bidada pabo page te dao.

Dwagi Yai Gesi Po Jongo Asęani 10:27

Eno kibu sipsip dabego eno po wabo dogoni odobo dao. Eno augwali koneai, tama augwali ena wali asobo dao.

Dwagi Yai Gesi Po Jongo Asęani 10:14

Ena da, te kibu sipsip dabe bugagia tonalubo bidi da. Eno Ayago ena konebo dao, te eno ena Aya me konebo dao. Tama te tiwai egilama, eno ena kibu sipsip konebo dao, augwaligo me ena konebo dao. Eno te sipsip tau sidubadi, bidi mego ena ela muiyu da, te usu dao. Eno homu ena te sipsip tau saibao.

Matyu 11:27

Te we bidibolo Jisasgo te po wai, “Eno Aya agai tigidali nai eno nogoba muai dao. Tama niwai bidi me deli agai te Ogwa mu konea silai menio. Aya agaduba deligo naga te Ogwa konea silai dao. Tama niwai bidi me deligo agai te Aya me konea silai menio. Ogwago naga konea silai dao, tama te we bidi dabebolo te Ogwa aga digi te Aya augwalibolo ola mobaso da, te augwaligo me te Aya konea silaibao,” wali.

Habakuk 2:14

Tama tigidali we bidigo me, tigidali tǫde nai sibigo me, te Genuai Bidigo genuai nogi dali bomo dali si konemainogo yalio. Te konebo kolesaga te tigidali tǫ pedai habu mu usu nigi paibao, te tamu ąį bo deyu, te dąį eboba usu nugulubo tiwai gilama mu yaibao.

Jeremaia 31:34

Te ena Genuai Bidi, eno po dolo obao, te sogo te bidi dabego te augwa abagi dabe, me augwa ama dede, te po ola mabo po weyu, te tiwai po weyu, ‘Dagego Genuai Bidi koneiąo,’ po me wagobeo. Menio. Te nogi meni yai bidi, me nogi elalubo dabe, tigidaligo ena koneaibao. Magi baso meni, te eno augwa sęgę tagalama, te eno augwaligo yali dwai sę homu kone munu me egobeo,” wali.

Bugagia Bidibo Kolesagade Po Asęai Buku 2:5

Nago te sę dabe ebaso da, teda nago te Genuai Bidide wi eyu, aga dologode bidibo kolesaga page te mu koneama, tama nago te God bugagia koneaibao.

Godigo Nogi Ugwaba Sabo Tęąbi Po Wabo Buku Dabe 9:10

God, te nageba asobo we bidi te nago augwali tudiba munu me mugobeo. Tama tibaso, te nage koneani bidi dabego da, te nageba konealubo homu dąų mu wabo dao.

Godigo Nogi Ugwaba Sabo Tęąbi Po Wabo Buku Dabe 1:6

Magi baso meni, Godigo te doloba pai bidi dabe bugagia tonalubo dao, tialima dwai kolesaga ebo bidi dabe, augwali dwai dene ebo bulude bidada peyu, bidada pabo elalubo.

Te Israel me Juda Hani Sigo Tuni Bidigo Po Elalubo Buku Deli 8:43

teda Genuai Bidi, nage te naga bulu dagalude bidiyu, tama nago agai gedu haluasa po wabo odolama, tama nagebolo hanalu, te yao wali sę te sę nago yao. Tama tiyu, te tigidali bulu bidi hanigo te nage koneama, te nage dologode bidaibao, te da Israel dabe, te nago we bidi dabego ebo tiwai gilama yaibao. Tama te augwa koneama, eno te sę yani be, te nago be elalubaso, tama te pesageba te we bidi dabe nage pąba asomainu te tama tiao,” po wali.

1 Korin 15:34

Dagego te wabo pabo kolesaga tagalama tama dolo homu kolesaga yao. Dagego dwai sę ebo tagaliąo. Dagego odao. Dage tomode meba augwaligo te Godigo te isai we bidi ma hodalugobe po wabo bage, augwaligo God kuna konebeo. Te dage hale ilainogo eyu eno te po dagebolo obao.

2 Korin 11:20

Awe, te bidigo dage te aga dologoba mubaso, ma agai dagego nai tigidali silibaso, ma agai dage dali hagoma ebaso, ma agai dage gesabidide elibaso da, teda agai tama temainogo te dagego gogolobo dao, po meni!

Galesia 4:3

Tama te tiwai polobadu dago bugagia konesiąbadi, da e tǫde dwai olo kolesaga ebo dologode bidai dao.

Dwagi Yai Gesi Po Lukgo Asęani 5:38

Gesi bomai wę te gesi sipsip waligo nigali botolba tabiao.