Galesia 2:6 - Godigo dwagi yai po buku

⁶ Te Jems dali, Pita dali, Jon dali, te tobage bidi dabe augwali Jerusalem hanude bidiyu, te we bidigo gedude augwali te Godigo bidi hani tobolu bidi dabe tiwai bidai. Tiali goli, eno homu augwali da genuai bidi dawe, ma olo bidi dawe, te magigo menio. God agai we bidi osola subo si, agai augwaligo tigide osola subo meni. Tama te tobolu bidi nogi elalubo bidi sela augwaligo gasa po te eno te Juda hani isiąwai we bidibolo wabo pode wadolobeo.

Galesia 2:6 Referans Kwoze

Galesia 2:2

Ena Jerusalemba olo pabeo. Menio. Godigo digi ena teba pao obaso, ena pai. Tama da teba sabolama, tama te tobolu bidi dabe augwaligo beba pali. Te dagebolo gasagi yai po ola mabo bage augwaligo te Jems dali, Pita dali, Jon dali, te bidi sela te tuni bidi dabe da, te homu ebao. Tama da augwaligo beba sabolama, tama eno augwalibolo naga te eno te Juda bidi hani isąwai we bidibolo pusali dwagi yai po te eno augwalibolo ola mawai. Te eno polobadu yali Godigo po pusubo sę me, megi ebo sę me te sę olo ela tagalidali weyu, eno augwalibolo te sę yali po page ola mawai.

Godigo Sęba Tagala Palai Bidigo Po 10:34

Te Pita agai po wabo sę gagalali, “Mu tama dao, megi eno koneanio. God agai deli hani naga homu ebeo. Te mu menio.

2 Korin 12:11

Te eno te ena digi nogi ugwaba sali po tamadi weyu, te eno te kolesaga meni yai bidi tiwai yali. Tiali goli dage, dagego ena hodolobaso tama eno te po wali. Te duga digi eno nogi ugwaba sigi sogo da, te doloba pai kolesaga egi da. Tiali goli tama me tibeo. Mu tama, ena te olo nai tiwai dao. Tama te gasa bidi dabe augwaligo homu te augwali Godigo po sela pabo sę ebo bidi dabe bidiyu, tama augwali te sęde polalubo bidi dabe dao, augwaligo augwa sęde te homu ebo dao. Tiali goli ena dali augwali dali si usu siyu da, teda augwaligo ena te dwasianu sę me delide ena aiyaba elalugobeo. Mu menio.

Galesia 6:3

Tama dage dua dao, bugagia suao. Te bidi deli agai te homu ebo, aga digi aga nogi ugadu elalubo homu eyu da, tama agaduba bomo dali bidibo bidi da homu eyu da, tiali goli aga nogi me bomo me elalusiąbaso, teda te bidi aga digi aga homu tomode ili po ola mabo dao. Tama aga tulamuidali weyu, agai te homu ilamuo.

2 Korin 11:5

Te bage augwaligo homu te augwali Godigo po sela pabo sę ebo bidi dabe bidiyu, tama augwali te sęde polalubo bidi dabe dao, augwaligo te homu ebo dao. Odao. Eno homu augwaligo ena te dwasianu sę me delide aiyaba elalubo menio.

Polgo Po Pas Rom Dabeba Asęani 2:11

Magi baso meni. God agai te we bidi dabe dagalobo si, agai te nogi yai we bidi tedali dagaloyu, te nogi meni yai we bidi tedali dagaloyu ebo menio. Aga da te tobage kolesaga ebo bidi menio.

1 Pita 1:17

Tama nogi yai bidi dali, nogi meni yai bidi dali God agai po tų ebo sogode dagalama egobeo. Te meni. God agai we bidi po tų eyu osola subo si, agai augwaligo yali sę naga osola subo dao. Tama tibaso, dagego agade dago Aya waligo da, teda dage e tǫde osogo bidibadi, agade wi eyu aga dologode bidao.

Hibru 13:17

Te duga tobolu bidi dabe augwaligo dage tau sabo homu elama, tama augwaligo dage sesemane sogo tonalubo dao. Magi baso meni, nosali augwaligo digi yali sę po tigidali te Godibolo pusaibao. Tama dagego augwaligo ola mabo po wali pelama, tama augwali dologode bidao. Te dagego tama tibaso da, teda augwali wiegi yai homu pemene elama, tama augwa sę tulama sę eyu, tama augwali homu sęgę me egobeo. Tialima augwaligo dage tonaluabo te homu sęgę ebaso da, teda te tebogo te dage tau me sogobeo.

Hibru 13:7

Dagego duga tobolu bidi dabego yali kolesaga homugo bugagia koneao, polobadu augwaligo Godigo po dagebolo pusai. Dagego augwali bilali kolesaga dali, augwali isali kolesaga dali si homugo koneama, tama augwaligo konealubo po dąų weyu Godiba tią pali kolesaga te wali pao.

2 Korin 5:16

Tama tibaso, megi dena digi te poloba te tǫde bidi dabego ebo homu kolesaga wali me pisąma tama bidi me deligo kolesaga me dagalogobeo. Mu tama, polobadu dago te tǫde poloba homu kolesaga wali peyu tama Krais dagaloyu tiwai. Tiali goli megi dago aga te dagalabo kolesagade me dagalobeo.

Dwagi Yai Gesi Po Lukgo Asęani 20:21

Tama augwaligo agabolo tibo po weyu, te po wali, “Po ola mabo bidi, te nago naga ola mabo po dolo yai po mu naga wabo dao. Nago homude tigidali we bidi usu si dao. Nago homude bidi me ugwaba me dią holobo menio, bidi me aiyaba me elalugobe, tigidali we bidigo kolesaga te deli tama dao. Godigo bomo yai po nago te we bidibolo dolo mu ola mabo dao.

Dwagi Yai Gesi Po Makgo Asęani 12:14

Augwali aselama, tama augwaligo agabolo te po wai, “Tisa, po ola mabo bidi, dago koneani, nage mu po wabo bidi dao. Tama nago homugo te bidi delide homu naga me egobeo. Nago te nogi yai bidi dali gasa po me tedali weyu, te nogi meni yani bidi dali gasa po me tedali weyu me egobeo. Menio. Nago te mu pode naga te Godigo kolesaga te we bidi augwali ola mayu ebao. Nago mena homu ebawe? Te dago takis te Rom gavman tuni bidi mu Sisar agabolo mobaso, tebogo dago te Godigo bomai po bolobowe, ma meniwe? Dago mawaibawe, ma dago magobewe?” Augwaligo te po wai.

Matyu 22:16

Tama augwaligo augwa wali pabo bidi dabe augwali dali, te genuai gavman bidi Herotgo bidi dabe me tagala palama, tama augwaligo Jisas pageba pedalama, te po wai, “Po ola mabo bidi, dago koneani, nage te doloba pai bidi mu dao. Tama nago mu pode naga te we bidi augwalibolo te Godigo te yao wali wiegi yai kolesaga po ola mabo dao. Bidi me deli aga genuai nogi elaluyu da, te nage aga wi menio, nago deli po tiwai naga te tigidali bidibolo wabo dao.

Jopgo Po Asęani Elalubo Buku 34:19

God deligo naga agai te tama po wabo usu yaibao, magi baso meni, agai te tigidali we bidi nigai dao, tama agai gedude tigidali deli tigi poąį naga bidibao, te augwali doado bage hauwa elalubo bidi dabe me, te doado bage hauwa elalusiąbo bidi dabe me, tede moni homu me elalubeo, te tagalao. Te tigidali bidi Godigo gedude deli tigi tiwai naga bidibo dao.

Bomai Po 10:17

Magi baso meni, God dago Genuai Bidigo te tigidali te tibo god dabe me te tigidali bomo elalubo te tigidali nai dabego bomo edelai mu elalubo. Aga te genuai bomai mu dao, tama tiyu tigidali nai dabe aga dologode naga elaluao. Agai te po tų ebode te abagi si ebo kolesaga wali peyu, me te we bidigo agaba magi nai mayu, aga homu bea sabo homu ebo kolesaga emainogo sula tagalobo menio, te haniani sę ebo kolesagade.

Godigo Sęba Tagala Palai Bidigo Po 5:36

Polobadu te bidi nogi Teudas dią holama, te po wali, ‘Ena genuai bidi mu dao.’ Tama bidi hauwa 400 aga wali pai. Tiali goli, gasa bidigo te bidi elebaso, aga wali pali bidi me badu wi pela silali, te agai sę silali.