Filipai 4:8 - Godigo dwagi yai po buku

⁸ Eno ama dedeo, eno po silagasu wabo po me deli waibao. Dagego eno e nedebo kolesaga nogi selama tama augwalide naga dagego homugo bugagia kone pabalo piduao. E tobage kolesaga augwali dwagi yai dao, tama tigidali we bidigo e kolesaga ebo bidigo nogi ugwaba sabo dao. E dao: te tibo po wasiąbo kolesaga me, te wiegi yai kolesaga me, te Godigo gedude me bidigo gedude me dolo kolesaga, tama meda isąwai kolesaga dali, te abagi homu ilibo kolesaga dali, te doloba pai kolesaga dali, te dwagi yai nogi elalubo kolesaga dali, te tobage ebo kolesagade dagego homugo kone pabalu pidubadi geao.

Filipai 4:8 Referans Kwoze

Jems 3:17

Tiali goli niwai bidi augwaligo te God pagedu asobo te wiegi yai homu kolesaga sabo bidi dabe augwaligo ebo kolesaga e dao: polasa mu, te augwaligo meda isiąwai wiegi yai homu kolesaga wali pabo dao. Tama te kolesaga me, te augwaligo gasa bidi dabe dali wiegi yai kolesaga eyu deli homu elama bidiyu, tama augwali dali homu nagame eyu, tama tiyu augwaligo gasa bidi dabego po wabo odobo dao. Tama augwaligo homu dene eyu, we bidi tau sabo wiegi yai kolesaga ebo dao. Tama tiyu, augwaligo deli homu tiwai naga tigidali we bidi dali ebo dao. Tama augwaligo ugwadu homugo naga augwaligo po wabo menio.

Taitus 2:7

Tama naga digi nago ebo kolesaga tigidali ebogo te nago te gesi bidi dabebolo dwagi yai kolesaga naga tama ola mao. Tama tiyu, nago homu mu eyu, tama ‘E po sęgę yai po dao,’ te homu eyu elama, tama Godigo po ola mao.

2 Korin 8:21

Dago wiegi yai dolo kolesaga yabo homu ebo, te dago Genuai Bidigo gedude naga te kolesaga me egobeo. Menio. Te e tǫde bidi dabego gedude dali te kolesaga ebo dao.

Galesia 5:22

Tiali goli Godigo Mobo Bidigo te bidigo homude hodolobo dwagi yai kolesaga e dao: te we bidide dwagi yai homu eyu, godolo mu ebo kolesaga me, te dwagi yai homu ebo kolesaga me, te homu nagame ebo kolesaga me, te wei polo ponosiąbo kolesaga me, te we bidi tigidali tau sabo kolesaga me, te doloba pelama bilibo kolesaga me, te homu kęą pabo kolesaga me,

1 Pita 2:12

Tama dage te God konesiąwai we bidi tomode bidiyu, tama dwagi yai kolesaga naga yao. Magi baso meni. Augwaligo dage dali nogi posobo po weyu, “Dage dwai sę ebo we bidi dao,” po weyu da, teda augwaligo dagego dwagi yai sę naga ebo sulama, tama nosali te Godigo po tų yagasabo sogo asobo si augwaligo aga nogi ugwaba siyu te po waibao, “Ao, agai po wali pabo we bidi augwaligo dwagi yai sę yalio.”

Hibru 13:18

Dagego gedu haluasa po Godigo da tau somainogo weduao. Dago homugo koneani, te da God gedude dolo bidibao. Tama da tigidali sęde dolo bilabo homu ebo dao.

2 Timoti 4:12

Augwaligo suali, nage gesi bidi homu ebo, tiali goli augwaligo homugo nage te olo bidi yali homu ebo gogologio. Menio. Nage te polalubo bidi bidao. Tama tiyu, tama nago po wabo kolesaga me, te bilibo me, tama nago we bidi dali dwagi yai homu eyu godolo ebo kolesaga me, te nago Godiba homu begi pabo kolesaga badi, tama te magi dwai sę isiąwai wiegi yai kolesaga nago ebo augwaligo suyu, tama augwaligo homu Godiba begi pabo we bidi augwaligo nage wali asaibao.

Efesus 5:9

Tama te gide bulali nai bugagia holama, tama geninama walobo gilama tama te tiwai me te ulago agai te tigidali dwagi yai kolesaga ebo me, te doloba pai kolesaga me, te homu mu sai wiegi yai kolesaga, te tigidali hania bugagia ugwaba hanilama pedalobo dao.

Taitus 1:8

Te menio. Tiali goli gasa buludu asobo we bidi agai augwali dali dwagi yai homu eyu bugagia gesebo bidi bidao. Tama agai dwagi yai kolesaga naga godolo eyu, tama tiyu dwagi yai homu dali yao. Aga homu kęnai bidi bidao. Aga te doloba pai bidi bidiyu, tama Godigo gedude aga dwagi yai bidi bidao. Aga digi aga bidibo te kolesaga bugagia tonaluao.

1 Jon 3:3

Tama te augwali Krais tiwai pedalobo sogo bugagia tonaluyu bidibo we bidi tigidali, augwaligo magi sę isąyu dwagi yai naga tedali gagabo dao. Magi baso meni, augwaligo koneani, te Krais me aga magi dwai sę isąyu dwagi yai naga tedali bidibo dao.

1 Pita 1:22

Te dagego Godigo wiegi yai mu po bugagia wali peyu tama duga homu kolesagade elaluali dwai kolesaga sela sąnama, tama dagego duga hasi we bidide dwagi yai homu ebo gagalali. Tama tiyu, megi dage bomo eyu, homu mu elaluyu duga hasi godolo mu yao.

Taitus 3:14

Tama dago we bidi, te Krit tǫde bidibo Godigo po wali pabo we bidi, augwaligo te gasa we bidi tau sabo dwagi yai sę ebo kolesaga koneao. Augwali tama tiyu da, teda augwaligo te nai meni yai we bidi tau sabo sę ebo usu yaibao. Augwali te nai walisiąbo ni tiwai bidilamuo.

Polgo Po Pas Rom Dabeba Asęani 13:13

Da dolo bilao, te giligade bilibo bidi tiwai yao. Dago te hagoma eyu te bomai ąį tuai bidi tiwai dedege bilamuo. Dago te penani ebo kolesaga eyu tama te meda ebo dwai kolesaga dali gagali egio. Dago gasa bidigo nai pesa elama godolo ebaso, tama wado po dabe me olamu dao.

Bugagia Bidibo Kolesagade Po Asęai Buku 20:7

Te doloba pai bidigo te dwai sę me deli isiąyu, bididu dao. Tama tibaso, aga wai dabe nosali bugagia bidaibao.

Jems 1:27

Godigo gedude bidi agai wiegi yai kolesaga eyu, agai po bugagia odobo bidi agai magi dwai sę isąbo bidi, agai e tiwai kolesaga si yao: te kolesaga me e dao, niwai wai dabe meba augwa aya de ida si isiyu, tama te tiana wai dabe augwaduba naga bidibaso da, te me bidi isiyu we taga pai agaduba bidibaso me, te dago te tiwai wai dabe me, te wilawe we me augwali magi nai meni baso te sęgę sobadi tau sao. Te me kolesaga e dao: dago dena bilibo kolesaga bugagia tonalua bilao, tama e tǫde meda yai dwai kolesagago dago homu kolesaga dolidali weyu.

1 Jon 3:18

Dage eno wai dabe, dago te we bidi dali dwagi yai homu eyu godolo ebo kolesaga, te kolesaga dago pedauwaligo po wabogo naga ilamuo. Menio. Dago homu mu eyu, tama dago augwali dali dwagi yai homu ebo kolesaga te dago augwali tau sabo sęgo augwalibolo hania ola mao.

Taitus 2:2

Tama tiyu, nago augwalibolo e tobo wao: monu dabe yai bidi augwaligo te bomai ąį hauwa tulamuo, augwaligo augwa tigigo ebo kolesaga bugagia tonaluao. Augwaligo doloba pai homu kolesaga naga koneyu, tama augwa homu kolesaga bugagia tonaluao, te po wao. Tama te God dali konealubo pode augwaligo te po page kuna koneyu bidao. Tama tiyu, augwaligo God dali, gasa we bidi dali dwagi yai homu ebo kolesaga eyu, tama tigidali sęgę yai sę asobadi bomo elama dolalubo kolesaga selama bidao, te po te monu dabebolo ola mao.

2 Korin 13:7

Tama Godigo dage tau siyu, tama dagego dwai kolesaga me deli isąmainogo eyu, dago agabolo hanalu wabo po wabo dao. Dago magi baso te tiwai ebo dawe? Te dage wiegi yai we bidi bidibaso, dago dena sę dage dali bugagia yali, te homu emainogo eyu, te dago Godibolo te po hanalu wabo dawe? Woo, te menio. Dena homugo te dagego doloba pai kolesaga yao. Tama tiyu, tama da dageba asama te duga ebo kolesagade po meni baso, tama dago dage dali po tų ebogo dena bomo ola mabo tų meni eyu da, te usu da, magigo meni.

Kolosi 4:5

Dage te Godigo obo tomoba asisąwai we bidi dali bidibadi, dagego homugo kone palama tama bugagia bilao, subigila meni. Augwalibolo Godigo po pusubo sunumi dabaso da, teda augwalibolo pusao.

1 Pita 4:8

Tama dagego genuai hasia yabo sę e dao, te dage bomo eyu, te duga hasi te dwagi yai homu eyu godolo mu yao. Tama te we bidi godolo mu ebo kolesaga, te tebogo te augwaligo ebo dwai sę sula tagalabo kolesaga dao.

2 Samuel 23:3

Te da Israel dabego God te genuai masigi tiwai elama, tama da bobegelalubao. Agai enabolo te tama po wai, ‘Te king God dologode bidiyu, tama te we bidi doloba pai kolesagade tonalubaso da,

Polgo Po Pas Rom Dabeba Asęani 13:3

Magi baso meni. Te wiegi yai dolo kolesaga ebo bidi dabe augwali te gavman bidide wi ebo meni. Tiali goli te dwai kolesaga ebo bage augwali wi ilainogo te gavman bidi bidibao. Te nago te gavmanide wi ebo hagela homu ebowe? Teda, nago wiegi yai kolesaga naga ebaso, tama agai nago nogi ugwaba saibao.

Taitus 2:14

Aga digi aga bidibo ula tagalai dao, tama agai te bidibo ulago da ma abelama, tama dago te tigidali bomo yai po sela sąbo te kolesaga agai sela sąwainogo tama yai dao. Agai da penama, tama da we bidi aga hani mu pedalainogo te sę yai, tama dago tigidali dwagi yai kolesaga bomo elama te sę naga emainogo agai aga bidibo ula tagalai dao.

Filipai 3:1

Eno ama dede, eno po silainogo e po obao, eno homugo te dage te dago Genuai Bidi dali wadolobaso, te dage dwagi yai homu pemene yao. Te eno dagebolo polobadu pusali po, te po megi ma asębo eno hagelabo menio. Te po dagebolo ma asębogo dage tau siyu, tama gasa bidigo ola mabo pogo dage dologobeo.

Polgo Po Pas Rom Dabeba Asęani 2:29

Te mu Juda bidi mu bidibo bidi, aga agai homu kolesagade te God wali pabo bidi bidibo dao. E tiwai dao, aga homude te dwai kolesaga togwa sąwai bidi, te tobage bidi te Juda bidi mu dao. Tama Godigo Mobo Bidigo aga dali te sę ebo dao, te bomai po wali pabo kolesagago te tobage sę ebo usu menio. Tama te dwai kolesaga togwa sąwai bidi, aga te e tǫde bidi gedude nogi ugwaba sabo bidi tiwai bidigobeo. Menio. Agai nogi te Godigo ugwaba saibao.

Aisaia 26:7

Te sunumi te doloba pai we bidi dabe bilalubo sunumi da dolo naga te elalubao. Genuai Bidi, nage doloba pai God dao. Tama nago augwali bilibo sunumi dodolobo dao.

Bugagia Bidibo Kolesagade Po Asęai Buku 31:31

Dago te wego ebo wiegi yai kolesaga, me te agai ebo wiegi yai sę ebo, tede te dago homugo koneama, tama agaba genuai nogi mao. Te tigidali we bidi te sisinibo pesageba aselama, tama aga nogi uganu sao.

2 Timoti 5:10

Tama e tobage haniani wiegi yai sę yai nogi elalubo we tiwai: agai te aga wai puluba bugagia tonaluali. Tama agai te gasa bulu we bidi augwali te agai beba asobode nai mayu yali. Tama imilai homu eyu, agai te Godigo po odobo we bidi tau siyu sągą we tedabo sę yai dao. Tama agai te sęgę dali dene dali sali we bidi dabe tau siyu yai. Tama te wilawe we aga te tobage haniani we bidi tau sabo dwagi yai sę ebo kolesaga wali pabo we bidali da, teda nago te tobage we dabe augwali naga nogi te bukude asęąo.

Bomai Po 16:20

Tigidali sogo dagego mu po naga olama, tama dagego doloba pai kolesaga naga te po tų ebode wali pao. Tama tiyu da, dage te Genuai Bidi dago Godigo mawainogo ebo te tǫde tigidali sogo wiegila bida bida peyu, bidaibao,” wali.

Efesus 6:14

Awe, dage e tama tiwai dola selama dolaluao. Dagego Godigo mu po te duga kugulu tiwai gudulama, tama bugagia dąų olama, tama te doloba pai wiegi yai kolesaga ebo te dagego duga hagawia sesela sabo nai tiwai abiao.

1 Tesalonaika 4:12

Dage magi nai me menia sidali weyu, te duga masigi sabo sę yao. Tama te Godigo po wali pesiąwai we bidi augwaligo dagego te dwagi yai kolesaga ebo sumainogo, tama dagego homu dwagi yai nagamea peyu, tama duga bidibo bugagia tonaluao.

Efesus 4:25

Te God agai dage te gesi noma we bidi nigaligo da, teda dagego dwai tibo po wabo kolesaga tagalama tama munu me egimio. Te menio. Tama dage tigidaligo duga hasi tomode mu po naga wao. Magi baso meni. Dagego koneani, da tigidali te deli tigide naga wadolama bidibo dao.

2 Korin 6:8

Tama bidi mebago dago nogi ugwaba sabo dao, tama bidi mebago da nogi aiyaba elaluyu ebo dao. Mebago posobo po dwai dabolo wabo, tama mebago gasa bidi dabe augwalibolo te dago wiegi yai kolesaga ebo po pusubo dao. Boi bidi dabe augwaligo da tibo po weyu, te we bidi dwai sę tomoba kegebo bidi da homu ebo dao, tiali goli menio, dago mu po naga wabo dao.

Godigo Sęba Tagala Palai Bidigo Po 10:22

“Dage magi pogo asaliwe?” wali. Augwaligo te po wei ponoyu, te po wali, “Te Rom ami genuai bidi nogi Kornilius, agai da nage pageba tagala palali. Te bidi da, aga dwagi yai bidi mu. Agai tigidali sogo Godibolo lotu po wabo bidi dao. Te Juda we bidi tigidali augwaligo agai nogi ugwaba sabo dao. Godigo dagalude sę ebo ensel bidi me deligo agabolo te po wai, ‘Nago Pita i olama, tama aga nago beba asomainao, Pitago wabo po nago odomainu tama yao,’ te ensel bidigo te po wali,” augwaligo te po wai.

Dwagi Yai Gesi Po Jongo Asęani 7:18

Bidi mego agai homugo digi po wabo bidi da, te bidi aga genuai nogi aga digi sainogo tibo dao. Tialima, bidi homugo tego ena tagala palama, ena asai da olama, agai Godigo nogi ugwaba siyu da, te usu yaibao, te tebo bidi da doloba pai bidi da, agade tibo dwai sę me isiąwai bidi dao.

Dwagi Yai Gesi Po Lukgo Asęani 2:25

Te sogo bidi me nogi Simeon Jerusalemde bidalio. Te aga doloba pai kolesaga eyu, te Godiba lotu wabo bidi bidai dao. Aga te Israel dabe tau sabo bidi asobo tonaludu gesege yai dao. Godigo Tedali Mobo Bidi aga dali bidibaso, tama Godigo Mobo Bidigo agabolo weyu, te aga polo isigobeo po wai dao.

Dwagi Yai Gesi Po Makgo Asęani 6:20

Magi baso meni, Herot aga te Jonde wi yai. Agai koneani, Jon aga te wiegi yai tama doloba pai bidi bidali. Tama agai te aga bugagia tonaluali. Agai te Jongo pusubo po odama, tama aga homu hauwa elama, tama aga homu sęgę iduali. Tiali goli agai te agai po odobo te godolo mu yai.

Bugagia Bidibo Kolesagade Po Asęai Buku 11:1

Genuai Bidigo homugo te bidi dabego te skel dąį hasegelibo homu te agai hagela mu ebo dao, te we bidi tibo po ola menama, tama augwaligo mone anoma elama sobao. Tiali goli, te bidi dabego te doado bage te dąį ilalidu dolo dobabo bidi dabede te agai wiegi yai homu pemene ebo dao.

Rutgo Po Elalubo Buku 3:11

Tigidali e bulude bidibo we bidi augwaligo koneani, nage wiegi yai we dao. Tama nage wi me igio. Te nago enabolo wali sę tigidali te eno yaibao.

Dwagi Yai Gesi Po Lukgo Asęani 16:15

Tialima, Jisasgo augwalibolo te po wai, “Dagego homugo we bidi augwaligo dagede e homu yaibao, dage doloba pai bage dao. Tiali goli, God agai dagego homu kolesaga mu konebo dao. Tama we bidigo gedude wiegi yai nai dabe, te nai dabe Godigo gedude meda yai nai naga dao,” Jisasgo te po wali.

1 Korin 4:5

Tama tibaso, te sogo me elalubadi, te dago Genuai Bidi asisąbadi dagego te gasa bidi mego ebo kolesaga dagaligio. Aga asama tama agai te we bidi augwaligo augwa homu tomode geme dualaluali po tigidali selama te ulaba muagasaibao. Tama tigidali bidigo homu kolesaga hania hanilaibao. Tama te sogo Godigo da tigidali deli deli bidi te dago yali sę osola sulama, tama te sę usu baso agai te sę yali bidigo nogi ugwaba saibao. Bidi deli deligo yali sę usu nama te aga nogi te tama naga ugwaba saibao.

Godigo Sęba Tagala Palai Bidigo Po 22:12

“Te Damaskus be nanide te bidi me deli bidali, agai nogi Ananaias. Te bidi Godibolo lotu po wabo da, da Juda dabego bomo yai po me agai wali pabo da, tama tigidali Juda te Damaskus tǫde bidali bidi dabe augwaligo homugo ‘Te dwagi yai bidi da,’ homu yai dao.

Solomon 5:16

Agai ena dali naboge si dilibo sogo da, eno te pusu umagi mu yalio. Agai tigi pedai tigidali badu usu nama, te wiegi yai naga yali. Dage Jerusalem we dabe, eno bidi da te tama tiwai tobage bidi me dao.

Tigidali Nai Gagalama Nigali Side 18:19

Eno aga sa muani, te agai aga wai pulubabolo me te aga wąį dabe augwalibolo olama, te augwaligo eno po wali pomainogo yaibao. Tama tiyu, augwaligo wiegi yai doloba pai kolesaga wali paibao. Tama tiyu, te eno agabolo te tigidali sę agabolo eno wali po gilama yaibao.’

1 Jon 4:1

Abagi dedeo, tibo po ola mabo bidi dabe hauwa augwali tigidali tǫde bilalubao. Tama bidi hauwago te po obao, “Godigo Mobo Bidi agai enabolo mu po olama, tama eno te mu po pusubo dao.” Te po obaso, dagego homu te augwaligo ola mabo poba olo subigila dąų wagio. Dagego koneainogo, tigidali te po ola mabo bidi osola suao, te Godigo tagala palali Mobo Bidi augwali dali bidibawe, ma meniwe, te suainogo tama tiao.

2 Timoti 5:2

Tama nago te mosi dabe dodoloyu, te naga ida mosi dabe dodolubo tiwai gilama yao. Tama nago te gesi we dabe dodoloyu, te naga abe dodolubo tiwai eyu, te wiegi yai dolo homu naga ebadi augwali dodolao. Mena bidi nago dwai sęde dodolabo homu ebo bidi, nago sesena pai homu eyu dodologio.

Dwagi Yai Gesi Po Lukgo Asęani 23:50

Te bidi me deli bidai, te bidi nogi Josep. Te bidi aga Judia tǫ hanu bidi dao, te hanu nogi Arimatea.

Bugagia Bidibo Kolesagade Po Asęai Buku 31:29

“Te da bidibo bulude te wiegi yai kolesaga mu ebo we elalubadi, tiali goli nago augwali aiyaba elaluama, te nage uganu mu ela holalio.” Aga bidigo te po wai.

Bugagia Bidibo Kolesagade Po Asęai Buku 16:11

Genuai Bidigo homugo te tigidali skel me usu sabo nai meta te dąį wali dolo pomainu homu eyu, tama te we bidi ili po ola momainu igio.

Bugagia Bidibo Kolesagade Po Asęai Buku 12:4

Te bidi me deligo wego te wiegi yai kolesaga ebaso da, teda te tebogo te aga bidiba te genuai nogi mobao. Tiali goli, wego te dwai kolesaga haniani eyu, tama aga bidi hale ilibo we yai baso da, teda te wego te dwai gasigo te aga bidigo dili te dolobo sę tiwai ebao.

2 Timoti 3:4

Aga bugagia kęnasa bidiyu, agai te aga digi we wai puluba bugagia tonaluyu, tama te wai dabe aga dologode bidiyu, te augwaligo agai po wali pomainogo yao.

Godigo Sęba Tagala Palai Bidigo Po 6:3

Tama tibaso, abagi dede, dagego bidi nogo a olama, me badu nogo si sao. Augwaligo te nai dobabo sę tonalumainao. Augwali Godigo Dwagi Yai Mobo Bidi augwalide bidibo bidi, dwagi yai kolesaga ebo bidi, te tobage bidi sao, te nai dobabo sę emainu yao.

Matyu 22:16

Tama augwaligo augwa wali pabo bidi dabe augwali dali, te genuai gavman bidi Herotgo bidi dabe me tagala palama, tama augwaligo Jisas pageba pedalama, te po wai, “Po ola mabo bidi, dago koneani, nage te doloba pai bidi mu dao. Tama nago mu pode naga te we bidi augwalibolo te Godigo te yao wali wiegi yai kolesaga po ola mabo dao. Bidi me deli aga genuai nogi elaluyu da, te nage aga wi menio, nago deli po tiwai naga te tigidali bidibolo wabo dao.

Bugagia Bidibo Kolesagade Po Asęai Buku 31:10

Te bidigo te wiegi yai kolesaga mu ebo we sabo homu ebo da, agawe? Teda aga gegebo sę dene mu yaibao. Te tobage tiwai wego te tobage te gasa sawi yai masigi dabe te aiyaba elalubo tiwai ebo dao.

Hibru 11:2

Te polobadu e tǫde bidali we bidi meba augwaligo Godide konealubo po dąų olama tama agade tiąlubaso, tama Godigo te po wai, “Augwaligo kolesaga te wiegi yai yalio,” te po wai dao.

2 Timoti 3:11

Tama te bidi dabe augwaligo we dabe, te we dabe te wiegi yai kolesaga ebo we bidao. Augwali te posobo po wabo we dabe bidamuo. Te augwaligo augwa homu bugagia dodolama tama bidao. Sesemane sogo te augwaligo wiegi yai dolo kolesaga naga yao.

2 Korin 8:18

Tama dago ama me deli aga dali hodobo tagala palaibao. Te tigidali bulude te Godigo po odobo we bidide te ama agai Godigo gesi wiegi yai po pusubo sę ebo nogi elalubao.

2 Samuel 1:23

Te Israel aga hanigo bidigo te Sol de Jonatan si godolo homu mu eyu yai. Augwali si te wiegi yai bidi mu dao. Te sesemane sogo augwa si bugagia mu kisasa bilama, tama augwa si isali me te kisalubadi isalio. Augwali si te polo asesa mu udayu, te boi bidi dabe pobeasa pali, tama te ba kemodagego te hasa dabe ela tuainu pobebo te aiyaba mu elaluali. Tama augwali sigo bomogo te laiongo bomo aiyaba elaluai dao.”

2 Pita 3:1

Eno abagi dede dabe mu, megi eno e asęna tolobo te eno pas si dao. Tama eno dagebolo asęna tolali pas side te dagego homu wiegi yai ilimainogo hodolobo po wai dao, te po dagego ma koneiąo.

Godigo Nogi Ugwaba Sabo Tęąbi Po Wabo Buku Dabe 82:2

Agai te tama po wali, “Dagego te tibo po tų eyu, te po me bugagia dodolobeo. Tama dagego te bidi dwai dabe te po tųde tau sabo sę eyu yali. Te tobage dwai kolesaga ebo tagaliąo.

Polgo Po Pas Rom Dabeba Asęani 14:18

Tama bidi te tobage kolesaga ebogo te Kraisgo sę bidi bidiyu da, teda aga Godigo usu niba kadu waibao, tama te bidi dabe augwaligo homugo te aga wiegi yai bidi da te homu yaibao.