Daniel 2:45 - Godigo dwagi yai po buku

⁴⁵ Nago suali, te masigi olodali aluasa dulu te tulaluama, tama te piksa augwaligo te ain, me bras, me tǫ, silva, gol, te tama naigo nigali piksa elibo suai. Te masigi te Godigo bomo tiwai nigali. Te Godigo genuai nogi elalubao, agai nageba te nosali pedelabo nai dabede sę ola mawai. Te nade nago te suali nai dabede te sę te eno nagebolo wali po gilama te tiwai sę dolo mu pedelaibao,” Danielgo te po wai.

Daniel 2:45 Referans Kwoze

Aisaia 28:16

Tiali goli, God, Genuai Bidigo te po wali, “Odao. Eno te be page dąų walabo masigi dila pai deli me polo dąį ilai dao. Te aga te dwagi yai boma pai mu dao. Tama eno te masigi te bulu du Saionde muaibao. Te bidi dabego agaba homu dąų wabo bidi dabe da, teda augwali wi elama, didibili me egobeo.

Tigidali Nai Gagalama Nigali Side 41:32

Godigo te sę yabo te homugo konea selama, tama mu dąų walali. Tama agai nago aga dąų walali homu konemainogo iliyu, nago na si sogo emainu yali. Tama te sesabi elama bidisiąbadi, te pąde sogo tama Godigo te sę pedalumainu yaibao,” wali.

Malakai 1:11

“Te tigidali bulu tǫ kantri we bidi dabego enaba genuai nogi mawaibao. Te tigidali bulude bidi dabego te wiegi yai denami ofa hano iliyu, te tobage wiegi yai ofa dabe enaba mawaibao. Te tigidali we bidigo ena nogi ugwaba saibao.

Godigo Nogi Ugwaba Sabo Tęąbi Po Wabo Buku Dabe 48:1

Genuai Bidigo genuai nogi elalubao. Da te Godigo bulu duba holinao, tama agai taun tomoba pelama, tama dago agai nogi ugwaba mu sinao.

2 Samuel 7:22

“Tigidali Nai Tonalubo God, Genuai Bidi, nage te polalubo bidi mu bidibao! Te nage tiwai me elalubeo. Nage deli te God mu bidibo, te dago nǫų wąį dabego pedauwalide odali po tiwai odobo dao.

Bomai Po 10:17

Magi baso meni, God dago Genuai Bidigo te tigidali te tibo god dabe me te tigidali bomo elalubo te tigidali nai dabego bomo edelai mu elalubo. Aga te genuai bomai mu dao, tama tiyu tigidali nai dabe aga dologode naga elaluao. Agai te po tų ebode te abagi si ebo kolesaga wali peyu, me te we bidigo agaba magi nai mayu, aga homu bea sabo homu ebo kolesaga emainogo sula tagalobo menio, te haniani sę ebo kolesagade.

Tigidali Nai Gagalama Nigali Side 41:28

“Te tiwai eno nagebolo te po walio, Godigo te agai tamadi yabo sę te nagebolo ola mani.

Kraisgo Geme Dualali Sę Pedelabo Po Jonbolo Ola Mani 19:17

Tama te sogo eno suali, te ensel mobo bidi me deli te giliga ge pąde te dagalude dolaluai. Agai te dagalude ugwadu bola bilibo tigidali ba dabe dali bomonama i weyu, tama agai te po wai, “Dage te Godigo genuai nai tubo digi sisinagasao.

Kraisgo Geme Dualali Sę Pedelabo Po Jonbolo Ola Mani 4:1

Te bidigo enabolo te po wabo silama, tama eno te gasa na tiwai eyu tama eno suali, dagalude tų me deli dalaluai. Tama te pedauwalidu polobadu eno odali agai po enabolo mayu te genuai yadogoli tiwai naigo te bu wabo tiwai eyu, tama agai te po wali, “Nage edaba holao, tama eno nagebolo te nosali pedalabo sę tigidali ola mawaibao.”

Kraisgo Geme Dualali Sę Pedelabo Po Jonbolo Ola Mani 1:19

Tama tibaso, nago te gedugo suali sę po asęąo, te megi pedalobo sę me, te nosali pedalabo sę po me asęąo.

Dwagi Yai Gesi Po Lukgo Asęani 17:20

Te Farisi hani bidi me badu augwaligo Jisas hanalu weyu, te po wali, “Te Godigo we bidi tonalubo sogo nisu asogowe?” wali. Tama Jisasgo te po wei ponani, “Te Godigo we bidi tonalubo sogo asobo sunumi te bidigo polo konegobeo, bidigo gedugo susiąbo nai dao.

Matyu 24:35

Te dagalu de tǫ si da, te silaibao, tiali goli eno po da, te munu me sia sogobeo,” Jisasgo te po wai.

Matyu 21:24

Tama Jisasgo po wei ponoyu, augwalibolo te po wai, “Eno me eno magi nai po me deli naga dagebolo hanalu waibao. Tama dagego eno po wei ponebaso da, teda eno me eno dagebolo te eno magi bomo elaluyu, eno e sę ebo te po dagebolo waibao.”

Sekaraia 12:3

Te tama tiabo sogo pedalubaso da, teda eno te Jerusalem te sęgę yai masigi me deli mu tiwai ilaibao. Te tigidali bulu tǫ kantri bidi dabe te Jerusalem dali boi hwįainu teba sisinagasaibao, tiali goli augwa digi dolaibao, bidigo te moni sęgąį masigi ugaba sagulubo tiwai gilama mu yaibao.

Daniel 2:44

“Tama te king dabe bidalubadi, te Godigo te we bidi tonalubo bomo te tomo hodolama, tama te tonalubo bomo te sesemane bidada peyu, bidada paibao. Te gasa king dabego te Godigo tonalubo bomo te elalueinu ebaso, usu me egobeo, te gasa bagego te bomo me sogobeo. Tiali digi, te agai da te augwali aiyaba elaluama, tama te gasa king dabe mu dola silama, tama agai tonalubo bomo te sesemane elaluaibao.

Daniel 2:24

Daniel te Ariokba pali, te bidi te kingo nogo tų dąį ilama, te Babilon po page koneai bidi dabe elimainu yali bidi da, tama Danielgo agaba te tama po wai, “Nago te po page koneai bidi dabe munu me eligio,” wai. “Nago ena te kingba sela pao, tama eno agaba te na yali po olama, tama te na yali page agaba pusaibao,” wali.

Godigo Nogi Ugwaba Sabo Tęąbi Po Wabo Buku Dabe 145:3

Genuai Bidigo genuai nogi elalubo, tama dago agai nogi ugwaba mu sidu geao. Agai ugwanu mu elaluyu, tama dago agai genuai nogi tigidali koneainogo ebo te usu me egobeo. Magi baso meni, dago homu kolesaga te habuge dao.

Godigo Nogi Ugwaba Sabo Tęąbi Po Wabo Buku Dabe 135:5

Eno koneani, Genuai Bidigo nogi te genuai mu elalubao, tama aga te tibo god tigidali daide ugwadu aga bidibao.

Godigo Nogi Ugwaba Sabo Tęąbi Po Wabo Buku Dabe 96:4

Genuai Bidigo te genuai nogi elalubao. Dago agai nogi ugwanu mu sidu geao. Da te tibo god dabe wi me igio. Dago te Genuai Bidide naga wi yao.

Jopgo Po Asęani Elalubo Buku 36:26

Tama Elihu agai po genina ma weyu, e tama wali, “God da, polalubo bidi mu da, tama aga ugwanu mu dao. Dago aga munu me kuna konegobeo. Tama dago agai kibu be nisu naga yaliwe olama, konegobeo.

Nehemia 9:32

“Dago God, nago genuai nogi me genuai bomo elalubao. Da tigidali te nago bomo dologode bidibao. Tigidali sogo nago te naga dąų walali bomai po wali pelama, tama nago dabolo te olo mu tau sabo wiegi yai kolesaga ebao. Megi da te genuai sęgę tolai, tama tiyu dago homugo nago da homu koneama tau sao. Polobadu te Asiria king dabego te dago kingba, me tobolu bidi dabeba, me pris, me profet dabeba dwai sę eyu, te dago wąį nǫų dabeba me te tiwai yai. Tama te sęgę dade elalua asidubadi, te megi e sogoba usu nagasobao.

Nehemia 4:14

Eno suali, te we bidi wi elama, haliga sęgę elaluai, tama tibaso eno te tobolu bidi dabeba, me ofisa dabeba, me te tigidali we bidiba te tama po wali, “Dage te boi bidi dabede wi me igio,” wali. “Dagego te sę ebo te bugagia homu kone palao, Genuai Bidi te bomai mu da, tama tiyu te tigidali bidi agade wi ebo dao. Tama tialima, odao. Dagego te bomo elama hwįbaso da, teda te dagego abagi dabe me, we wai puluba me, te duga be dabe, te doado bage me, te me dolisąma bugagia elalueibao,” wali.

Tuni Bidi Dabego Po Elalubo Buku Deli 16:25

Genuai Bidi te polalubo bidi mu da, tama dago agai nogi ugwaba mu sinao. Te gasa god dabe te Genuai Bidi tiwai me elalubeo. Tama tibaso, da te Genuai Bidi dologoba pelama bidinao.

Daniel 2:28

Tiali goli, te dagalude bidibo God deli elalubao, tama agai te geme dualalubo nai page hania hanilaibao. King, Godigo nageba te nosali pedelabo nai dabede te na nagebolo ola manio. Megi da, te eno nageba te nago na yali po waibao.

Daniel 2:29

King, nage pilamubadi, tama nago te nosali pedelabo sęde homugo kone paluyu, tama te nade Godigo nageba te nosali pedelabo nai dabe ola mani. Te God, te geme dualalubo nai dabe hanilibo God dao, tama agai nageba te nai dabe pedelaibao olama, te ola mani dao.

Daniel 8:25

Agai te we bidi dabe tibo po ola mabo sę ebo tomoba mu pabo bidi pedelama, tama aga te tibo po homu hauwa dogia pabo kolesaga tigidali te ugwanu mu igulaibao. Tama aga haligade digi, aga te polalubo bidi mu da homu yaibao. Te we bidi dabego homude augwali te bugagia bidiba homu yaibao, tiali goli te polo tama mu te aga homu hogodalu, te augwali hauwa dolaibao. Aga te hagoma eyu, te tigidali king aiyaba elaluali, te genuai King God dali hwįabo homu yaibao. Tama te sogo te mena bidi mego te aga me dologobeo, tiali goli te aga dolaibao.

Tigidali Nai Gagalama Nigali Side 41:26

Te nisali bulmakau a naga olama, me si, te kibu be a naga olama, me si dao, tama te wiegi yai yuyu sia dabe me te tiwai, te kibu be a naga te me si tama. Augwali te page deli tiwai elaluali.

Godigo Nogi Ugwaba Sabo Tęąbi Po Wabo Buku Dabe 2:9

Te nago augwali te nago bomogo tonaluagameo. Tama te nago augwali dwasianu kakali minama, te bidigo te tǫgo nigai sene alubo tiwai yaibao,’ Genuai Bidigo te po wai.”

Hagai 2:22

‘Eno te haniani tǫ kantrigo king bage augwaligo bomo dolama, tama augwaligo bomo munu ma egobeo. Tama eno te augwaligo te boi hwįbo karis dali, te tede dolalubo ami soldia bidi dabe dali, augwali dolaibao,’ wali. ‘Tama te tigidali te boi hwįbo hos kibu dabe me isaibao,’ wali, ‘tama te kibu hosde dugayali ami soldia bidi dabe, augwaligo augwa hasi te deli sę ebo bage augwa hasi ma elaibao,’ wali.