Aisaia 66:4 - Godigo dwagi yai po buku

⁴ Te pagede tama te augwaligo tolabo sęgę eno sa muani, augwa te wi mu ebo sęgę dao. Magi baso meni, eno augwaliba i obadi, te eno i wabo augwaligo wei ponobeo. Te eno po me augwaliba pusubadi, tiali goli augwa wali me pabeo. Menio. Augwa eno po sela sąyu, te eno gedude dwai kolesaga naga yali, te eno godolo homu isąbo kolesaga dabe mu dao.”

Aisaia 66:4 Referans Kwoze

Aisaia 65:12

Tiali goli, eno gasagi yai sogo dageba sa muai. Te boi dabego dageba hwįagaselama, te dage augwa bainat hwą dabego ela mueibao. Te duga kidu sugunama, te tobolu tǫba basigulama, te boi bidi dabego dage tobolu mage togwaibao. Te sę dabe pedelaibao, magi baso meni, eno dage i wali, te dagego eno i wabo wei ponobeo. Te eno po me dageba pusali, tiali dagego wali pabeo. Menio. Dagego eno po sela sąyu, te eno gedude dwai kolesaga naga yali, te eno godolo homu isąwai kolesaga dabe mu ebao wali.

Jeremaia 7:13

Te megi me, dagego te tobage dwai kolesaga ebao. Hauwa sogo eno dagebolo te dwai kolesaga tagalao po wali, tiali goli dagego te po odobo hagela yali. Te eno dageba i wabo sogo, dagego eno i wabo wei ponobeo.

Bugagia Bidibo Kolesagade Po Asęai Buku 10:24

Te dwai sę ebo bidi dabe te nai hauwade wi yaibao, tama te nai dabe te augwaliba pedelaibao. Tiali digi, te doloba pai bidi dabego wei homu ebo nai dabe Godigo mabo dao.

Bugagia Bidibo Kolesagade Po Asęai Buku 1:24

Eno dage i wali, te enaba asomainu yali, tiali goli dagego hagela yai.

Te Israel me Juda Hani Sigo Tuni Bidigo Po Elalubo Buku Si 21:6

Tama agai te aga ogwa elama, tama agai aga te wai te siaba sese ula palali, te ofa nai ulubo tiwai gilama yali. Tama agai te polobadu isali bidi isi bidigo aga tau somainu i wali, tama agai me te sogo yesi bidi me hanalu wali, tama te bidi dabe augwaligo aga tau somainu, tama agai te haniani kolesaga umabo mu yali. Manase agai te Genuai Bidi gedude sęgę sabo kolesaga genuai mu sęgę sali. Tama agai tama tibo dwai kolesaga ebaso, tama te Genuai Bidigo te king Manase dali sębę genuai mu yali.

Te Israel me Juda Hani Sigo Tuni Bidigo Po Elalubo Buku Si 21:2

Tama te king Manase agai te dwagi yai kolesagadu me wali pabe. Mu meni. Tama me te agai te tǫde polobadu te bidali bidi dabego yali haniani dwai kolesagadu wali peyu, tama Genuai Bidigo augwali sela sąnama, tama agai te tǫ te Israel hani dabe augwali te tǫ mani. Tama te king Manase agai te hanigo yali kolesagadu wali pali, tama te king Manase agai te Genuai Bidigo gedude dwai kolesaga mu iduali.

Godigo Nogi Ugwaba Sabo Tęąbi Po Wabo Buku Dabe 81:12

Tama tibaso, eno te augwa hagoma ebo kolesagade wali bilimainu sula tagalali, tama augwa te mena augwa homugo ela palio.

Matyu 24:24

Magi baso meni, te bidi meba aselama, tibo po e tiwai waibao, ‘Ena Krais, te sa muani bidi dao,’ ma ‘Ena te Godigo po pusubo profet bidi me deli dao,’ te tobage po waibao. Tama augwaligo bidi noma sabo bomai sę genuai eyu, tama haniani haniani sę yaibao. Augwaligo te we bidi God aga sa muani bage tibo po olama, te dwai sę ebo tomoba kegai hagede tebo dao. Tiali goli, te usu egobeo.

Aisaia 65:3

Te eno gedude augwa te eno haliga sębę elama, wado po wabo tobage kolesaga ebao. Augwa te Godigo po odisąbo bidi dabego ebo kolesaga yai. Augwa te lotu wabo pesage te gide elalubo te sisinama, ofa eyu, tama augwa te tibo god dabego altaba pelama, te wiegi yai denami yabo hano ilibo pauda ulubo dao.

Aisaia 50:2

“Eno dage gegagasali sogo, magi baso eno te bidi me deli bidibo subewe? Te eno dage i wali sogo, magi baso dagego eno i wali wei ponobewe? Dagego homugo te eno dage ma sabo bomo meni da homu yali da, agawe? Odao. Eno te po obaso, te tamu ąį tigidali mu sula saibao. Eno te po obaso, te genuai soabo ąį te masigi sane olo elalueibao. Te sųgų dabe isilama, kugumini dwai yaibao.

1 Samuel 8:19

Tiali goli, te bidi dabego te Samuelgo wabo po odisiąma, tama augwaligo agabolo te tama po wai, “Tagalao, dago homugo te nago king me deli nigilao,” wali.

Aisaia 59:7

Sesemane sogo dagego te dwai kolesaga yabo homu godolo mu ebao. Te sesemane sogo dagego te magi dwai sę me isąwai bidi dabe ela muabo homu hogodali. Dagego te dwai sę dabe yabo homu naga ebao. Te dage udayu, te gasa we bidi dabego bidibo ula dolabo sę ebo dao.

Aisaia 65:7

Te eno duga yali sęgo sęgę dali, te duga bulai wąį nǫų dabego yali sęgę dali tolomainu yaibao. Te duga bulai wąį nǫų dabe te lotu wabo pesage te bulu du bageba holama, tama augwa te wiegi yai hano denami ilibo ofa eyu, tama augwa te haniani dwai kolesaga ena gedude yali. Tama eno augwa yali dwai sę tigidali usu nama, dolo mu te wei ponaibao,” wali.

Jeremaia 7:30

Genuai Bidigo te tama wai, “Te Juda dabego dwai kolesaga hauwa eno gedude yali dao. Augwaligo te kugumini yai tibo god noma piksa dabe te augwaligo enaba lotu omainogo eno sa muani be tomode te tibo god piksa noma dodolama lotu wali. Te tama tebo kolesagade te be eno gedude meda ilibao.

Jeremaia 35:17

Tama tialima, ena Genuai Bidi, ena Tigidali Bomo Elalubo God, ena Israelgo God, eno te po obao. Dage Juda me Israel we bidigo, odao. Polobadu eno po dageba pusali, tiali goli dagego te poba olo me mubeo. Eno dage i wali, tiali goli dagego eno i wali wei me ponobeo. Tama tibaso, eno te dwai dene mabo sę tigidali dageba pedalumainogo ebao, eno te sę yaibao po wai dao,’ te po te Jerusalem bage dali te Juda bagebolo pusigi pao,” Genuai Bidigo Jeremaiabolo wali.

Esekiel 11:8

Eno koneani, dage te boi bidi dabede, me te bainat hwąde dali wi ebao. Tialima, ena God Genuai Bidigo, eno po dolo dageba obao, eno te augwaligo dage elagasomainogo tagala palaibao,” wali.

Esekiel 14:4

“Augwaligo te kolesaga ebaso, megi nago ena God Genuai Bidigo e po te tobolu bidi augwaliba mao. Te Israel bidi me deligo te tibo god dabeba naga homu kone elama, tama agai te sęgę page elalubo kolesaga tagalobo homu isąbadi, te aga profet me deliba aselama, te eno homu kolesaga koneainu enaba hanalu wagasobaso da, teda eno po agade elalubao. Te agai tibo god hauwaba lotu wabo eno homugo te koneama, te eno homu kolesaga mu te agaba ola mawaibao,” po wai dao.

Esekiel 20:25

“Tama me, eno gasa tobage po me te dwai bomai po meba augwaliba mani, te bomai pogo augwali tau selama, bugagia me bidigobeo wali.

Aisaia 59:15

Te doloba pai kolesaga deli dade me elalubeo. Te bidi me deligo aga dwai kolesaga tagalobaso da, teda te gasa bage dabego te aga dolabo haniani sunumi gegebo dao,” wali. Genuai Bidigo te we bidi dabego doloba pai kolesaga ebo me susiąbaso, te agai augwaliba dwai haliga yalio.

Aisaia 65:2

Te tigidali side eno nogo dinigalubao, tama eno te eno po sela sąbo we bidi ma sainu tonalubao, te dwai kolesaga ebo sunumidu augwa homugo digi wali bilibo we bidi te ma sainu tebo dao.