Aisaia 64:9 - Godigo dwagi yai po buku

⁹ O Genuai Bidi, nago dade haliga sębę mu idu, te sesemane sogo dago ebo dwai sęde homu kone paludigio. Menio. Da tigidali te naga we bidi da homu elama, te nago daba olo mu tau sabo wiegi yai kolesaga yao.

Aisaia 64:9 Referans Kwoze

Godigo Nogi Ugwaba Sabo Tęąbi Po Wabo Buku Dabe 79:13

Nago te tama tibaso da, teda da naga we bidi dabe, da te nago sipsip wai tiwai yaibao, teda dago nageba te usu da weyu, gedu haluasa po sesemane sesemane sogo waibao. Tama te nosali nosali pedalubo wąį nǫų dabego, teda augwaligo me te nago nogi ugwaba saibao.

Kraisgo Geme Dualali Sę Pedelabo Po Jonbolo Ola Mani 20:10

Tama te augwali ili po ola mani bidi Satan aga Godigo te genuai dedage pageba te posolo yai sia ula te masigi salfa teba sąwai dao. Tama te dedage pageba polobadu augwaligo te dwai hudigi ebo hasa dali, te ili po ola mani bidi si aba sąwai dao, tama augwali sela te siade me hulide me dene siyu, tama te dene ebo sesemane bidada pabo sogo te dene ela pidubadi bideibao.

2 Pita 2:17

Tama te tibo po ola mabo bidi dabe augwali te wę ulu meba te wę meni yai pedalisiąbo tiwai dao. Tama augwali te pǫ tiwai elama, te genuai waligo besela sąnama tedela pabo tiwai gilama ebao. Godigo te be sisi yai hulia sai digi aba mu tama augwali teba pabo sisi yai elalubo dao.

Malakai 1:4

Te Idom dabego te po weyu, “Te dago taun dabe dolalio, tiali goli te dago ma nigaibao,” wabo. Tialima Genuai Bidigo augwaliba te tiwai po wei ponaibao, “Duga ma da nigaibao, tiali goli te eno augwali ma aluama dolaibao,” wali. “Te gasa hani dabego te Idom dabe nogi te tiwai nogi yaibao, ‘Te dwai hani bage dao, te Genuai Bidigo sesemane sogo augwaliba wado po weyu, haliga sębę ebo hani bage dao,’ te po waibao,” wali.

Habakuk 3:2

Genuai Bidio, te nago bomogo yali sęde po eno odolama, te ena noma siyu, nage dologode bidabo homu ebao. Te polobadu nago yali genuai genuai sę dabe, eno homugo nago te tiwai bomai sę dabe te nago da megi bidibo sogo ma emainu homu ebao, te megi e sogo bidibo bidi dabe augwaligo nago te tebo sę ebo kolesaga sulama konemainao. Mu tama, nago dade sębę ebo page elalubao, tiali goli, nago te hobede ebo God da, te eno nagebolo hanalubo, te nago da hobede elama, tama da tau sao.

Te We Bidi Dabego Jerusalem Hagede Gela Wali 5:20

Tialima, nago da magi baso tudi ola menama, tama da magi baso sesemane sogo gegeda pobawe?

Jeremaia 10:24

Genuai Bidi, nago da dodolao, tiali goli, nago da selebo sę igio. Tiyu, nago da dali haliga sębę eyu, nago da mu dolidalio.

Jeremaia 3:12

“Tama Jeremaia, nage dolugulama, te not badu bidibo Israel haniba i wao. Nago Genuai Bidi eno po te tiwai pusao, ‘Israel, nage da, te aga bidiba homu kęą pabo kolesaga tagalobo we da,’ wao, ‘nage enaba begasa ma asao. Ena Genuai Bidi, eno te po obao, eno nageba haliga sębę munu ma egobeo. Magi baso meni, ena te olo mu tau sabo wiegi yai homu kolesaga ebo God dao, te eno haliga sębę ebo te sesemane sogo elalua pidugobeo.

Aisaia 63:19

Tama megi da, da we bidi hobedagia mu bidibo tiwai ebao, polobadu nago tonalu, tolalusąwai tiwai bidibao. Tama da hani dabe te nago nogi augwalide musiąwai bage tiwai bidibao.

Aisaia 60:10

“Jerusalem, te gasa bulu tǫ kantri bidi dabego nago genuai obo te masigi dabego ma nigagasaibao. Te augwa king dabego nago sę yaibao. Hasia eno wado po dwai nageba wali, te eno dene nageba mawai. Tiali goli, megi eno bugai haliga eyu, te nageba olo tau sabo wiegi yai kolesaga ebao.

Aisaia 57:17

Eno wado po dwai mu augwaliba wali, magi baso meni, te augwa haniani dwai kolesagade te augwaligo doado bage hauwa mu sabo homu yali. Tama tialima, te eno augwaliba dene mayu, te eno gesabidi augwaliba geme sesela sali. Tiali goli, augwa me hagoma idu gęyu, te augwa homu kolesaga wali piduai dao.”

Aisaia 43:25

Tialima, ena Genuai Bidi, ena genuai nogiba digi homu kone palama, te eno dagego dwai sę ebo sęgę tigidali sela sąbo dao. Tama eno te dwai sę dabeba homu kone me palogobeo,” te po wali.

Godigo Nogi Ugwaba Sabo Tęąbi Po Wabo Buku Dabe 119:94

Ena naga nai mu tama, tama tiyu, nago ena ma sao. Sesemane sogo eno nago po wali pabo homu ebao.

Godigo Nogi Ugwaba Sabo Tęąbi Po Wabo Buku Dabe 38:1

Genuai Bidi, nago wado yabo homu elalubao, tiali goli nago enaba wado me iligio. Nago haliga sębę yai, tiali goli nago enaba dene me magio.

Godigo Nogi Ugwaba Sabo Tęąbi Po Wabo Buku Dabe 6:1

Genuai Bidi, nago wado yabo homu elalubao, tiali goli nago enaba wado po me wagio. Nago haliga sębę yali, tiali goli nago enaba dene me magio.

Aisaia 63:8

Genuai Bidigo te po wali, “Te hani dabe, augwali te eno hani we bidi dabe mu da, te augwa hagoma elama, eno po me sela sągobeo.” Tama te aga augwali ma sali bidi pedelai dao.

Jeremaia 44:21

“Te dage, me duga wąį nǫų dabe, me king dabe, me tobolu bidi dabe, te Juda tǫde tigidali we bidi te Juda taun dabede bidali, me Jerusalem sunumi dabede bidali, te wiegi yai denami ebo ofa yali, te Genuai Bidigo dagego te yali kolesagade homu kone isąwai da, agawe? Menio. Agai bugagia homu kone palai dao.

Esekiel 29:16

Tama te Israel dabe augwaligo te sę te Isip dabede pedelali sę suaibao, tama augwaligo koneaibao, augwaligo te Isip dabego augwali tau sao walide augwaligo sęgę sali koneaibao. Tama te Israel dabe augwaligo te kolesaga ma egobeo. Tama te Israel dabe augwaligo e tama bugagia koneaibao, ena deli naga ena God Genuai Bidi da homu yaibao.’ Esekiel, nago te po te Isip king bidibolo wao,” Genuai Bidigo te po wai.

Pris Sę Ebo Bomai Po 26:31

Te eno dagego taun dabe me lotu be dabe dolaibao, tama eno dagego te ebo ofa dabe homu godolo me egobeo.

Te Israel me Juda Hani Sigo Tuni Bidigo Po Elalubo Buku Si 25:9

Tama agai te Genuai Bidigo tempel be me, tama me te Juda hanigo king bidigo be me, tama me te Jerusalemde bidibo genuai bidi dabego be dabe tigidali sia tulama, tama siago dela pela silali. Te Babilon hani augwaligo mu te be me tulube.

Aisaia 63:18

Te pęwądage sogo naga nago digi te sa muani be te nago we bidi dago nogode elaluali, te nosali dena boi bidi dabe asu, dolama, te nago be mesegelama, agala dolali.

Te We Bidi Dabego Jerusalem Hagede Gela Wali 2:7

Genuai Bidigo te aga tempel be, me tede elaluali ofa maiabo altaba tudi mu ola mani. Agai te boi bidi dabego te Jerusalem taun siyu, me agai tempel be hųgiyu emainu sula tagalalio. Tama me te boi bidi dabe augwali te Genuai Bidigo tempel be tomoba pelama, tama augwaligo te be tomode subigila hae me po dabe wali. Polobadu dago tede wiegi yai homu eyu, Godiba lotu po wedu geai goli, megi da, augwaligo hae bomonama wedu geai. Magi baso meni, augwaligo te be sai dao.