Aisaia 64:7 - Godigo dwagi yai po buku

⁷ Te nageba gedu haluasa po weyu, te nage nogi wabo bidi meni yai, te nage pąba asu, nageba homu kolesaga kęą pabo bidi meni, magi baso meni, nago naga gesabidi daba geme dula selama elalu, te nago dena sęgęgo da dodolomainu ilama, te da dwai mu bidibao.

Aisaia 64:7 Referans Kwoze

Esekiel 22:30

“Te eno po pusulama, te we bidi dabe enaba ma odasa asabo bidi deli me eno gegebo usu sali. Tialima, eno gegebo sę ela pali, menio. Te tobage bidi bidigi sogo da, aga te taun dolainu asobo boi bidi dabe asobo sunumi paligi da, te taun bagulali obo tiwai pedaligi da. Tama aga te obo alua pali badu dolalu, te boi bidi dabe taun tomoba asainu ebo sogo, te hwįbo bidi tiwai pedaligi da. Ena digi eno te Israelgo boi bidi tiwai pedelali, te eno augwaligo tǫ kantri dolainu yali, tiali goli te tobage bidi bidigi sogo da, eno tama sę igi menio. Tialima, eno te tiwai bidi me subeo. Mu menio.

Hosea 7:14

Augwaligo tibo gedu haluasa po enaba wabo dao. Tama augwali te tǫba degasa dulama, tama te dwai gela te Genuai Bidigo po odisąbo bidi haiden dabego wabo tiwai ebo dao. Te augwaligo nai me wain ąį sainu gedu haluasa po wabo sogo, te augwa digi augwa tigi dabe ge hwągo togobo, te haiden eno po wali pisąbo bidi dabego ebo tiwai ebo dao. Augwaligo ena dali hagoma mu ebo dao.

Aisaia 59:16

Te aga dwai midigi siyu, te tiwai suali, te gasa bagego dolali bidi dabe te tau sabo bidi elalubo subeo. Tama tibaso, te aga bomogo digi, te aga doloba pai kolesagago digi, te Genuai Bidigo augwali ma selama, te augwali bugagia bidimainogo ilai dao.

Hosea 7:7

“Augwaligo te wado po olama, te deli deli pedalubo king ela muyu iduali, te augwa tobolu bidi dabe dali te tama tiai. Te dwai kolesaga augwa bulu kantri tǫde elaluali, tama te bidi me deligo enaba gedu haluasa po weyu me ebeo,” Genuai Bidi Godigo te po wai.

Aisaia 59:2

Te duga sęgęgo naga tama tiyu, te God aga gesabidi seselasa elalu, te dagego gedu haluasa po wabo odobeo. Te duga dwai sęgęgo te duga tomode te duga God dali te obogo dąį elalubo tiwai ebao.

Aisaia 50:2

“Eno dage gegagasali sogo, magi baso eno te bidi me deli bidibo subewe? Te eno dage i wali sogo, magi baso dagego eno i wali wei ponobewe? Dagego homugo te eno dage ma sabo bomo meni da homu yali da, agawe? Odao. Eno te po obaso, te tamu ąį tigidali mu sula saibao. Eno te po obaso, te genuai soabo ąį te masigi sane olo elalueibao. Te sųgų dabe isilama, kugumini dwai yaibao.

Aisaia 27:5

Tiali goli, te boi bidi dabe augwaligo homugo augwali enaba aselama, augwali eno tonalumainu homu eyu da, teda augwaligo ena dali bugagia bidainu po deli dąų olama, asomainao. Awe, augwaligo te boi pimainao homu eyu, po deli dąų olama, ena dali bidagasomainao,” wali.

Hosea 5:15

“Te ena te ena buluba ma pelama, te ena we bidi tagaligi pelama da, tama te augwali te augwa yali dwai sęgęde te dene me sęgę sabo sogoba usu somainu yaibao. Tiali goli, nosali te augwali enaba ma asaibao. Te augwali dwai dene siyu bolo elama, te augwali enaba ma asaibao,” wai dao.

Esekiel 24:11

Tialima, te bras sene te iside ulalumainu elama, te posolo hobulu mu yai pedalumainao. Te sene meda mu yali, te eno homugo te isigo te dila pai pobele bage hogomu silimainu elama, te sene wiegi yai meda meni yai ma pedalumainu yao.

Jeremaia 9:7

“Tama ena, Tigidali Bomo Elalubo Genuai Bidi, eno te po obao, suao, te eno ena te we bidi usu saibao, te bidigo silva te siaba ulubo tiwai eyu, te silva aga hogomu pobele bage sela sąbo tiwai yaibao. Te eno we bidi hanigo dwai sęgę sabo sę ebaso, mena gasa sę eno augwaliba yabo me elalubawe? Menio.

Aisaia 59:4

Dagego te doloba pai po tų me ebeo. Menio. Dagego te tibo po dabe weyu, te po tų odoboba gasa bage dabe kekasa pali. Te dagego tibo po haniani weyu, te po tų ebo dagego po naga odomainu elama, te gasa bage aiyaba elaluai. Te dagego homu kolesagade te dwai sę ebo kolesaga hauwa mu pągąnalu, te dagego dwai sę haniani ebo dao.

Aisaia 57:17

Eno wado po dwai mu augwaliba wali, magi baso meni, te augwa haniani dwai kolesagade te augwaligo doado bage hauwa mu sabo homu yali. Tama tialima, te eno augwaliba dene mayu, te eno gesabidi augwaliba geme sesela sali. Tiali goli, augwa me hagoma idu gęyu, te augwa homu kolesaga wali piduai dao.”

Aisaia 56:4

Genuai Bidigo te tiwai po wali, “Te tobage tiwai bidi dabego te Sabat side bomo yai po wali peyu, te eno godolo homu ebo kolesaga wali peyu, te eno ena we bidi dabe dąų wali bomai po tigidali wali pobaso da,

Aisaia 1:15

Te dagego nogo ugwa selama, gedu haluasa po enabolo wabo si da, teda eno dage sugobeo. Tagala, dagego gedu haluasa po hauwa sogo obadi, me teda ena olo palia saibao. Magi baso meni. Te bidi dabe dagego elali bidi dabego kaneme dagego nogode me daganalubao.

Godigo Nogi Ugwaba Sabo Tęąbi Po Wabo Buku Dabe 14:4

Genuai Bidigo te po wai, “Te bidi dabe augwaligo dwai kolesaga yai, augwaligo homu kolesaga meni, agawe? Augwaligo te eno we bidi dabe ela silibao, te augwaligo te bret tubo tiwai gilama te mu silibao. Tama augwaligo enaba gedu haluasa po wabo menio,” wali.

Jopgo Po Asęani Elalubo Buku 8:4

Tialima, nago wai pulubago dwai sę ebaso, agai augwa sęgę wei ponani bogo.

Ma Dobola Sali 32:12

Ma, nago te tiwai kolesaga augwalibolo ebaso da, teda te Isip dabego te po waibao, ‘Godigo aga we bidi augwali dali dwai homu yai. Tama tibaso, augwali agai te Isipde selama, tama augwali odasa asali, te augwali te bulu dude mu dola silama, tama tigidali ela muani da,’ te po wabuo. Tiali goli, Genuai Bidi, tagalao. Tama nago te sębę yali homu te nago tagalama, tama nago homu kolesaga hasegelama, tama te we bidi augwali nago me dolamu dao.” Mosesgo te po wai.

Jopgo Po Asęani Elalubo Buku 10:9

Konea, nago ena nigali te bidigo tǫ sene nigibo tiwai yai dao. Tama megi da, mena tama tialiwe? Nago homugo ena tǫ ma gagamainu ebawe?

Godigo Nogi Ugwaba Sabo Tęąbi Po Wabo Buku Dabe 100:3

Dagego Genuai Bidi homugo konebo tagaligio, aga deli te God mu dao. Aga deligo da nigai, tama da aga we bidi dao. Da agai we bidi, da agai te kibu sipsip tiwai dao.

Aisaia 45:9

Mena bidigo te Godigo aga nigalide wado po wabo bidi da, te bidigo kolesaga te umuna sai mu yali, magi baso meni, da bidi te olo nai gagawai dao. Da te tǫgo nigibo sene pepeda pelama, e tǫde tedali munalua pabo tiwai elalubao. Te tǫgo nigibo senego te nigibo bidiba te tiwai po hanalu, “Nago magi nai nigibawe?” po wagawe? Menio. Te tǫgo te po wabo homu yaibao, “Nago te nai nigibo konesiąwai dao,” te tobage po wabo usugowe? Mu menio.

Aisaia 63:16

Tiali, nage te dago aya dao. Te da bulai wąį monu aya, Abraham me Jekop augwali te da dali me bidibe, te augwaligo da konesiąwai. Tialima, nage Genuai Bidi, nage dago aya mu dao. Tama nago nogi te tiwai elalubao, “Te da tudibadu tonalu, polobadu digi tau sesa asali bidi dao.”

Malakai 1:6

Te Tigidali Bomo Elalubo Genuai Bidigo te tiwai po te pris dabeba wali, “Ogwago te aga ayago po wali peyu, te aya dologode bidaibao, me te sę ebo bidigo me te aga tonalubo bidigo po wali paibao. Odiąo. Ena duga aya dao. Magi baso dage ena dologoba aselama bidisąbo meniwe? Ena duga tonalubo bos bidi dao. Magi baso dagego eno po wali pisąma ebawe? Dagego ena tudiba muyu, te eno nogi te olo nai dao homu eyu ebo dao. Tiali goli dagego enaba hanalu, ‘Dago magi ilama nage tudiba mubawe?’ te po wali.

Malakai 2:10

Da tigidaligo Aya te deli naga elalubao. Te God deli naga te agai da nigali. Tialima, magi baso dago te dena abagi dabe dali dąų wali po bolobo dawe? Tama magi baso dago te dena wąį nǫų dabe dali dąų wali kontrak po te dago wali pabewe?