Aisaia 60:13 - Godigo dwagi yai po buku

¹³ “Te bidi Lebanon genuai busiba holama, te bobage bobage sawi yai ni wuli, me saipres, me te gasa wiegi yai ni dabe togolama, te augwaligo nageba sesaibao. Te ni dabe dali, te bidi dabego eno be ma sęnama, te be gasa sawi wiegi yai mu pedelaibao. Ena te ena duabo sia kingde dugulalu, tama te be da eno sągą teba manama elalubo tiwai elalueibao. Tama te be eno polalubo be mu pedelama, tama aga genuai nogi elalueibao.

Aisaia 60:13 Referans Kwoze

Aisaia 35:2

Te wa pai bulu tǫ tonobo te sawi wiegi yai mu yaibao. Te aga genuai i hai dali weyu, genuai pemene yaibao. Te wiegi yai sawi yai nai hauwa mu pedaliyu, te bulu tonobo wiegi yai sawi me tedali eyu, te Lebanon genuai busi tonobo tiwai eyu, te Saron bulu odogo tonobo tiwai yaibao. Te we bidi dabego bomonama tonoyu, te genuai nogi, me te dago Genuai Bidi Godigo wiegi yai au dali elalueibao.

Tuni Bidi Dabego Po Elalubo Buku Deli 28:2

Tialima king Devit dolugulama augwaliba te tiwai po walali, “Dage eno hani ama dabe, me te eno we bidi dabe, te eno dageba wabo po odiąo. Eno bomai homu elama te Genuai Bidigo Dąų Wali Bomai Po Muani Halobage muabo wiegi yai be sę yaibao homu yali, tama te be da te dena Godigo dugabo nai sia sai tiwai elalueibao. Tama eno te be sę yabo doado bage sisinani.

Godigo Nogi Ugwaba Sabo Tęąbi Po Wabo Buku Dabe 132:7

Tama dago te po wai, “Iya, tegoba, da te Genuai Bidigo beba pinao,” wali. “Dago te aga sia king pąba lotu wagi pinao,” wai dao.

Godigo Nogi Ugwaba Sabo Tęąbi Po Wabo Buku Dabe 96:6

Genuai Bidi te genuai nogi elalu, te king bidibao. Te aga tedali wiegi yai tempel bede te tigidali doado bagego te agai bomo dąį ilama, tama aga gasa sawi yai au te elalubao.

Aisaia 66:1

Genuai Bidigo te po wai, “Dagalu da, te ena dugabo sia king tiwai elalu, te tǫ eno sągą ugwadu mubo pesage dao. Tega. Te dagego eno be sę ebo usugowe? Te mena badu ena toma nabo pesage elalueibawe?

Aisaia 55:13

Te ni wuli dabe te megi dwai ni dabe elalubo madi pedelaibao. Te gasa sawi yai dwasianu ni dabe te megi sesane bono elalubo pesagede pedelaibao. Tama sesemane sogo te tobage ni dabe te pesagede pedelama, te sesemane sogo te dąį ilali tiwai te we bidi dabego sulama, te Genuai Bidi, eno yali bomai sę homu kone palomainu yaibao,” wali.

Esra 7:27

Ena Esra dao, eno te pas nedelama, tama eno e tiwai po obao, “Eno homu wiegi yai pemene eyu, tama Godiba usu da po obao, te dago wąį nǫų dabego Genuai Bidi dao. Magi baso meni, Godigo te kingo homu hodolobaso, tama kingo te Genuai Bidigo be Jerusalemde dwagi yai ilaibao po walio.

Godigo Nogi Ugwaba Sabo Tęąbi Po Wabo Buku Dabe 99:5

Dagego te Genuai Bidigo nogi ugwaba siąo, aga te dena God dao. Dage pąba pelama, tama agaba lotu waiyąo. Aga te tedali wiegi yai mu dao.

Aisaia 60:7

Te Kedar me Nebaiot dabego te tigidali wiegi yai sipsip hani nageba sesaibao. Tama ena we bidigo te sipsip dabe seselama, te eno alta daiba ofa ebaso, te ena wiegi yai pemene ebao wali. Te eno be te polalubo be mu pedelama, te genuai nogi elalueibao,” te po wai dao.

Esekiel 47:7

Te da si ma geasa pabo sogo eno te ąį u badu me, e badu me, te ni dabe hauwa dolalua pabo suali.

Tuni Bidi Dabego Po Elalubo Buku Si 2:15

“Tialima king Solomon, megi da dago homugo nago te tolaibao wali te wit, me bali, me wain, me oliv wel tolaiba wali, te nai dabe tolao homu ebao, nago te wali gilama.