Aisaia 57:5 - Godigo dwagi yai po buku

⁵ Te duga haligade dwai homugo te bomonama hodolobaso, te genuai ni dologo te lotu wabo pesageba pelama, te penani ebo kolesaga ebao. Dagego te duga wai puluba dabe elama, te ofa tiwai eyu, te odogo tǫ pesagede te genuai masigi elalubo tomode ulubo dao.

Aisaia 57:5 Referans Kwoze

Esekiel 16:20

“Nago te wai dabe ame nani, tiali goli nosali nago te ena God Genuai Bidi eno te wai dabe selama, te nago augwali ela munama, te tibo god dabeba ofa yalio. Nago koneao, nago penani ebo kolesaga te wiegi yai me ebeo. Tialima, te kolesaga usu meni da, nago te homu elama,

Aisaia 1:29

“Magi baso meni, dagego genuai ni silide te tibo god dabeba lotu olama, tama tede dwagi yai homu eyu bidai dao. Tama me te gi elama, tama lotu wabo digi dao olama, hage yai dao. Tiali goli, dage te yali kolesaga dabede hobede elama, tama hale genuai mu yaibao.

Jeremaia 7:31

Augwaligo te lotu wabo pesage nigali nogi Tofet poali, te Hinom Odogo Bulude nigali. Te augwaligo augwa wai puluba dabe digi te isiba ulali, te tibo godiba ofa tiwai yali. Tialima, eno augwaliba te kolesaga yao po me wabeo. Tama me, te eno te tobage bomai po dageba maiabo homu munu me ebeo.

Jeremaia 3:13

Israel, nago te tiwai po dolasa hanilama pusao, “Eno te dwai sę yai da,” po wao. “Eno God, nage ena Genuai Bidiba hagoma yali, te ena tigidali genuai ni dologoba pelama, te tibo god dali dwai kolesaga yali. Te eno nago po sela sąwani.” Israel, ena Genuai Bidigo, eno te po nageba mobao,’” wali.

Jeremaia 2:20

God, Genuai Bidigo po ma weyu, te tiwai po wai, “Israel, odao. Polobadu digi nago enaba hagoma eyu, tama nago eno nageba mani sę tagalai, tama nago te po wali, ‘Eno nago sę munu ma egobeo,’ wai. Mu tama, nage te tigidali bulu duba holoyu, tama te tigidali genuai ni dologoba sisinama, te nago tibo god dabeba lotu wali, te wego bidi hauwa dali penani igi pabo tiwai yalio.

Te Israel me Juda Hani Sigo Tuni Bidigo Po Elalubo Buku Si 23:10

Te king Josaia agai te augwaligo te lotu wabo pesage nogi te Tofet wabo pesage te agai dolali, te bulu te Hinom bulu odogode elaluai dao, tama te bulu me te bidi dabego gedude meda mu ilali. Tama tibaso, te bidi dabe augwaligo augwa te buluba nosali ma begasa pelama, tama te augwaligo augwa wai bǫų elama, te tibo god Molekba te ofa nai tiwai gilama me augwaligo ula magi pogobe.

Pris Sę Ebo Bomai Po 18:21

“Odao, ena duga Genuai Bidi eno dagebolo te duga wai dabe elama, te isiba ulama, te tibo god Molekba ofa ebo habu selama, te po eno dageba bomai po obao. Tiyu, dagego eno nogi aiyaba elaluidalio, te dagego God dao,” wali.

Kraisgo Geme Dualali Sę Pedelabo Po Jonbolo Ola Mani 18:3

Magi baso meni. Te moni hanu Babilon aga te bomo yai ąį wain hauwa tubo penani sę ebo we tiwai dao. Te we agai te bomonama tama te dwai dwai sę ebo dao. Tama agai aga bomo yai ąį wain te tigidali tǫde bidibo we bidibolo menama, tama augwaligo me te penani ebo kolesaga aga dali me yali dao. Tama te tǫde tuni bidi augwaligo me te penani ebo kolesaga aga dali me yali dao. Tama tigidali tǫde bidi augwaligo mone sabo bisnis sę eyu, tama tede te masigi hauwa mu umabo sali. Te moni hanu aga te we me deli tiwai bidiyu, tama te wego homugo ‘Eno ena tigi tau sabo nai, te tigide pusubo nai, te ena homu dwagi yai ilibo haniani nai, te tobage wiegi yai nai hauwa eno abelaio,’ te tobage homu eyu, tama te hanugo te bisnis bidi dabego nai umabo abelai dao,” te ensel mobo bidigo te po wai.

Esekiel 20:31

Dagego te tibo god dabeba ofa ebo sę me idubao. Dagego me te duga wai dabe elama, augwaliba ofa ebo dao. Te tebo kolesagade dage eno gedude meda yai mu pedelebao. Tialima, dage Israel hale dwasianu me isąma, te eno mena homu elalubo te hania koneainu dage enaba asobo sę idubao. Tiali goli, dage odolali asobao. Ena God Genuai Bidi, ena sesemane sogo bidaibao, eno po dolo mu megi dagebolo obao, eno dagego hanalu wali po deli wei me ponogobeo,” wali.

Esekiel 20:26

Te eno augwa te tibo god dabeba ofa emainu sula tagalu, te augwa eno gedude meda pedalubo sę ilali. Te augwa gomunai ogwa dabe te tibo godiba ofa tiwai yainu te elebo eno sula tagalali. Te augwa tama sę emainu eno sula tagalali, magi baso meni, augwa te tebo kolesagade te augwa dwai noma siyu, hagela mu yabo sę eno digi ilali. Te augwa te tiwai bugagia koneama, ena digi ena Genuai Bidi da omainu yai dao,” wali.

Esekiel 6:13

Te boi bidi dabego te Israel dabe augwaligo tigi te augwa tibo god dabe me te alta dabe pąba sąsąwaibao, tama te lotu wabo pesageba me, te bulu du dabe daide me, te tigidali genuai ni dabe dologoba me, te augwa tibo god dabeba te ofa dabe ula mabo pesage tigidaliba te augwali isasa pali bidi dabego tigi sąsą paibao. Te sogo te tigidali Israel dabego koneama, ena digi ena Genuai Bidi bidibao po waibao.

Jeremaia 51:7

Polobadu Genuai Bidigo te tigidali tǫ kantriba dwai dene momainogo yali, tama te tǫ kantri Babilongo agai te sę yalio. Babilon te kap gol me deli tiwai Genuai Bidigo nogode munama, tama Genuai Bidigo digi te gasa hani dabe te kapde wain tumainogo yai. Augwali te ayoge elama, te augwali umuna pai tiwai yai dao.

Jeremaia 50:38

Te poi pibo sogo bobobage sesabi elama, te Babilonde elaluama, te agai wę tigidali sula somainao. Magi baso meni, te tibo god dabego piksa te tǫ kantride pągąnaluali. Te Babilon augwaligo te tibo god dabe wali pidubaso, augwali te esela pelama, wabo pabo bidi tiwai pedelaibao.

Jeremaia 32:35

Tama augwaligo te tibo god Balba lotu wabo pesage te odogo bulu Hinomde nigai. Tama augwa wai dabe digi te tibo god Molekba ofa ilali. Tiali goli, eno augwalibolo te kolesaga yao po me wabeo. Tama me eno te tobage bomo yai po augwaliba maiabo homu munu me ebeo. Eno homugo augwaligo te kugumini yai kolesagago te Juda dabe hodolama, te dwai sę emainogo ilibo te eno hagela homu ebo dao,” wali.

Jeremaia 17:2

Sesemane sogo dage hanigo wai pulubago me te tibo god altaba homu kone kone eyu, te tibo god we Asera piksaba kone palu ebao, te dagego genuai ni dabe dologode muyu, me te tigidali bulu du bagede mubo dao.

Jeremaia 3:6

Te Josaia king bidali side, Genuai Bidigo enabolo te tiwai po wali, “Nago te enaba homu kęą pabo kolesaga tagalali we Israelgo ebo dwai kolesaga suyu digi eba, agawe? Aga te tigidali bulu duba holama, me te tigidali genuai ni dologoba pelama, te dwai penani kolesaga ebo dao.

Tuni Bidi Dabego Po Elalubo Buku Si 28:3

Tama aga te Hinom Dabego Odogo Malu buluba pelama, agai wiegi yai denami hano holobo pauda te buluba ofa igi pelama uligi peyu yali. Tama me agai dwai kolesaga mu iyu yali. Agai aga ogwa wai dabe elama, tama aga tibo godiba te isigo mu dela silibo ofa uligi peyu yali. Agai te tǫde polobadu bidali dwai we bidigo dwai kolesaga wali pali. Tiali goli Genuai Bidigo augwali sela sąnama, tama Genuai Bidigo te tǫ te Israel dabebolo mawai dao, polobadu.

Te Israel me Juda Hani Sigo Tuni Bidigo Po Elalubo Buku Si 17:10

Tama augwaligo te kolesaga yali, augwali te bulu duba holama me, tama me te moni ni dologode me tama kolesaga yali, tama augwaligo te masigigo te ni pos tulubo ąǫ elama, tama te tibo god we Asera noma muna muna pali, tama augwaligo te teba lotu po wali.

Te Israel me Juda Hani Sigo Tuni Bidigo Po Elalubo Buku Deli 14:23

Megi tama te Juda hani dabe me augwaligo te lotu po wabo pesage te augwaligo te bulu dude me, te moni ni dologode me, tama ninigi pali. Tama augwaligo te masigigo te kąų ni tiwai te pos nigilama, tama augwaligo tulama, tama te tibo god we Asera noma te kąų nide te lotu po wabo pesagede wawalo pali, tama augwaligo te nomabolo lotu po wali.

Bomai Po 12:2

Tama dage te bulu dabe polo sabo si da, dagego te we bidigo tibo godiba lotu wabo pesage dolama, mu silao. Te bulu dabe te genuai bulu dude, me dwasianu bulu dude te elalubao, me te moni genuai ni silide te elalubao.

Israel Hanigo Namba 25:6

Moses te we bidi dabe dali augwali te Godigo ugwa be sunumide bidiyu, gela odubadi yaide, tama augwaligo suali, te Israel hani bidi me deligo te Midian we me deli odasa, aga ugwa be tomoba odasa soabo suali.

Ma Dobola Sali 32:6

Tialima, te sogo nosali kigamu mu, te we bidi dabe augwaligo te ofa eyu, te siaba ulabo kibu bulmakau dabe sela asali. Tama augwaligo homu kolesaga deliba naga muainogo te ofa yabo kibu sipsip dabe me sela asai. Tama augwaligo te nai tuyu, te bomai wę tuyu elama, tama nosali te bidi dabe augwali pelama, te we dabe dali gagali igi pai.

Esekiel 20:28

Te eno augwali mawaibao olama po dąų wali tǫba te augwali odasa asali sogo, augwaligo te genuai ni dabe te genuai bulu du dabe sulama, te augwaligo te homu eyu, te tibo god dabeba lotu wabo pesage dabe wiegi yai elaluba homu yali. Tama augwaligo te hasa dabe me wain dabe hauwa seselama, augwaligo ofa yali, te tiali kolesagade augwaligo ena haliga sębę dwai mu ilai dao.

Te Israel me Juda Hani Sigo Tuni Bidigo Po Elalubo Buku Si 17:7

Te tama sęgę te Israel hani augwali tigide pedalali, magi baso meni, augwaligo te Godigo gedude augwaligo sęgę sabo dwai kolesaga yali, augwa Genuai Bidi. Augwaligo te homu ebe, augwa wąį nǫų dabe te augwali te Isip king bidi nogode ma sali augwaligo te konebe. Meni. Israel hani augwaligo te tibo god dolo lotu po wabo sę yali,