Aisaia 45:8 - Godigo dwagi yai po buku

⁸ “Dagalu, nage te dage pǫ dabe me, dagego te wiegi yai sogo augwaliba ilibaso, te tulubage tǫba tulumainao. Te augwa bugagia bidimainu, te wiegi yai doloba pai kolesaga bomo elama, pedalumainu ebao, te tǫgo tulubage selama, te gide nai dabe bugagia holobo tiwai emainao. Ena Genuai Bidigo digi, eno te sę dabe pedalumainu tebo dao,” te po wali.

Aisaia 45:8 Referans Kwoze

Hosea 10:12

Eno te Israel me Juda augwaliba te tama po walio, ‘Dagego te dwai kolesaga tagalama, te doloba pai kolesaga wali peyu, te enaba lotu waiąo,’ wali, ‘bidigo te gesi gide tǫ elama, te nai bulama, te nai bugagia holama, te hauwa walobo tiwai yaibao,’ wai. ‘Megi te dage ena God duga Genuai Bidiba ma asobo sogo dao. Te dage enaba ma asali da, teda eno dage bugagia mu wiegi yai sę ilaibao.’ Eno dagebolo te po wai.

Aisaia 61:11

Magi baso meni. God, Genuai Bidigo doloba pai kolesaga dali, te aga nogi ugwaba sabo kolesaga dali, te we bidi dabe tomode pedelaibao, te gide bulali nai wai kulubi pedelama, te genuai ebo tiwai yaibao. Tama te gasa Israel hani isąwai we bidi dabe tigidaligo sumainogo yaibao.

Godigo Nogi Ugwaba Sabo Tęąbi Po Wabo Buku Dabe 72:6

Nago te king wiegi yai bidi pedalumainu ilao, teda agai kolesaga wiegi yai eyu, te tulubage te gi nasi dabeba tulama, tama te nai wiegi yai pedalubo tiwai emainu yao.

Aisaia 44:3

Te ąį sǫą pabo tǫba eno te ąį gelaibao, tama te wa pai tǫde te ąį somainu ilaibao. Te eno mobo bidi te dagego wai dabeba gelaibao. Te eno dagego waigo ame nabo wai dabeba wiegi yai bugagia ilaibao.

Joel 3:18

Te sogo wain gi pedalama, te bulu du mesega sigulaibao, te bulmakau hauwa te dwasianu bulu du dabede bidalueibao. Te Juda we bidi dabego wę hauwa elalueibao. Wę me deli te Genuai Bidigo bedu gomo gudama, te Odogo Bulu Tǫ Te Ni Akas Elalubo madiba dulaibao,” wai.

Aisaia 32:15

Tiali goli, Genuai Bidi aga mobo bidi daba ma tagala palaibao, bidigo wę gelebo tiwai yaibao. Tama te nai meni yai kemi sane nai meni yai olo elalubo bulu wiegi yai bulu tǫ ma yaibao. Tama haniani nai dabe tede holaibao. Teda te mone buside te ni dabe olo holobo tiwai holaibao.

Aisaia 11:1

Te Jesigo hani te ni bidi dabego gelai ni tane tiwai bididuali. Tiali goli, gesi age te ni tanede ma kolibo tiwai yaibao. Awe, te ni tanedu te gesi ni tigi holama, tama nologo me deligo du walaibao.

Aisaia 4:2

Te me sogo nosali pedalaibao, Genuai Bidigo te ni me deligo gesi nologo ma kolimainu yaibao. Tama tǫgo dwagi dwagi yai nai dabe holiyu yaibao. Tama te Israel we bidi dabe dolisąma me bidibo bage, augwaligo te nai dabe wiegi yai holobo sulama, augwali dwagi yai homu ela paibao.

Aisaia 60:21

Te sogo te nago we bidi tigidaligo doloba pai kolesaga naga eyu, te eno augwa tǫ da olama, sa muani tǫ te augwa saibao, tama augwa tede sesemane bidada paibao. Te ena nogogo digi eno augwali te deli hani we bidi pedalumainu ilali, tama augwali te eno bulai ni nologo tiwai pedelali. Eno tama tiali, te gasa hani we bidi dabego sulama, te enaba genuai nogi momainogo tiai dao.

Aisaia 53:2

Genuai Bidigo aga sę bidi te olo ni me deli tiwai te tǫ pesagede pedalumainu ilali. Awe, aga te ni me deli te wa pai tǫdu pedalubo tiwai pedalali. Te sę bidigo nogi meni yai, magi baso meni, te bidi dabego gedude tonobo sawi isiąwai. Te agade te bidi dabego godolo elama, tonabo nai me deli elalusąwai.

Godigo Nogi Ugwaba Sabo Tęąbi Po Wabo Buku Dabe 72:3

Nago te wiegi yai sę hauwa te augwaligo sęde pedalumainu yao. Tama nago te we bidi dabego te doloba pai kolesaga sesemane sogo emainu yao.

Efesus 4:24

Tama dagego dwai meda yai kolesaga ebo tagalama, tama dagego wiegi yai gesi kolesaga eyu tama dage te gesi noma bidi tiwai pedalao, te aga tigi wę paluai bidigo aga gesi ugwa gudubogia tiwai yao. Tama dage te gesi noma bidi tiwai pedaloyu, tama God aga digi agai te dage gesi noma bidi nigali, tama dage God aga homu kolesaga tiwai mu pedalainogo nigali. Tama tibaso, gasa we bidi augwaligo dagego Godigo po odoyu bidibo sumainogo te dagego bugagia bidiąo. Tama tiyu, dage gasa we bidide te wiegi yai dolo mu kolesaga naga eyu, tama God agade te dagego aga pabo tųdu naga peyu yao, aga gedude doloba pai we bidi mu bidiąo.

Efesus 2:10

Tama God aga digi agai da gesi noma ma nigilai. Agai da Krais Jisas dali wadolama, tama da tǫde bidibo sogo tigidali dago we bidi tau sabo sę naga ela bilimainogo eyu, agai da gesi noma ma nigilai. Tama dago te we bidi tau sabo sę yabo te sę agai polobadu sisi yai.

Godigo Sęba Tagala Palai Bidigo Po 2:33

Tama Godigo Jisas ma hodolama, aga dolo nogo badude muani, tama te nogi yai bidi bidibo madi. Tama Godigo agabolo aga Dwagi Yai Mobo mawai, te aga aya Godigo polobadu mawaibao olama polo po dąų walai. Tama megi Jisas agai Godigo Dwagi Yai Mobo dabolo olo mu menama, e dagego suali sę me, odali po me pedalali.

Esekiel 34:26

“‘Tama eno te bulude wiegi yai sę iliyu, me eno bulu du bagualubo tǫ wiegi yai ilaibao. Tama tulubage side da, eno te tǫba tulubage hauwa te tǫba tulumainu yaibao, tama te tulubagego te tǫ wiegi yai mu pedelemainu ilaibao.

Jeremaia 31:22

Dage te ena wegi wai tiwai, tiali goli, dagego ena tudiba muani. Mena sogo te dagego haliga si ebo tagalama, te enaba ma asaibawe? Ena Genuai Bidi, eno gesi noma kolesaga te tǫde yaibao. Te kolesaga e tama dao. Wego digi te bidi pageabi elama, te agaba hanalu, te aga godolo eba waibao,” wali.

Aisaia 66:22

“Ena Genuai Bidi, eno te po obao, te gesi dagalu me gesi tǫ eno nigaibao, te eno gedude sesemane bomo elalueibao, te tiwai duga wai dabe te sesemane sogo bomo elalu, te dagego nogi me sia sogobeo.

Aisaia 61:3

Te Saionde gela udubo we bidi dabeba eno te nagame yai haliga dua eyu, pemene ebo homu me selasa asaibao, te augwa bomo silali bageba tama tiwaibao. Augwali homu dene ebaso, te sia keli augwa toboluba muani. Tiali goli, eno te nai hasegelama, tama dwagi yai au yabo nai augwaliba mueibao. Awe, eno augwaligo tigiba te wiegi yai denami ebo wel mawaibao, tama augwali homu dene ebo tagalama, dwagi yai homu pemene eyu bidaibao. Te augwa bomo ma selama, te Genuai Bidiba pemene ebo balia waibao. Augwa tigidali te doloba pai kolesaga naga ebo sę bomo yaibao. Te gasa bidi dabego sueibao, augwali te Genuai Bidigo digi bulali ni kali tiwai elalubao, tama augwaligo Genuai Bidigo nogi ugwaba saibao.

Godigo Nogi Ugwaba Sabo Tęąbi Po Wabo Buku Dabe 68:8

Te sogo te tǫ gęǫ elama, tama tulubage genuai aiyaba tulali, magi baso meni, God, nage asalio. Mu tama, te da Israel dabego God nage asobaso, tama te Sainai bulu du gęǫ umabo mu yai dao.

Aisaia 48:18

Te dagego eno po odigi sogo da, teda dage bugagia megi bidiyu, te sesemane sogo dagego bidabo ula te wiegi yai pemene ebo pągąnalugi da, te ąį sesemane sogo sodu, te sula sisąbo tiwai igi da. Te dagego doloba pai kolesaga te bomo elama, sesemane sogo pedaludu, te tamu ąį nambisde peda pabo tiwai igi da.

Te Israel me Juda Hani Sigo Tuni Bidigo Po Elalubo Buku Si 19:25

“‘King Senakerip, nago konebeo, polobadu digi eno nage tama sę emainu dąį ilai dao. Ena digi nagebolo tama bomo menama, tama nago te bomai obo elalua pabo taun dabe dolomainu bomo eno nage mawai dao. Tama nago eno homu kolesagadu wali peyu, tama nago te taun dabe dolama, tama augwali te moni masigi pesage tiwai nigilama, tama te moni pobele bage tiwai pesage holao, eno te homu polobadu elama, tama nago tama tiai dao.

Aisaia 44:24

“Ena Genuai Bidi, ena dage tudibadu pogwalu, te dage ma dobola sabo bidi, eno naga eno sisilama, dage dąį ilali, te ena hani da olama, te dage e tǫba pedalisiąbadi tama tiali. Eno te tiwai po dageba wainu ebao. Enaduba deligo naga eno te tigidali nai pedela silimainu ilali. Eno naga eno te dagalu me tǫ nigilama, te augwali bidabo pesageba munama, te megi elalubo dao.

Aisaia 46:13

Menio. Te pąba pedelalio. Te eno munu ma tonalugobeo. Te eno dage Israel dabeba boi bidi ebo bidi dabeba dene mu menama, te dage bugagia ma bidaibao. Te Jerusalem taun me wiegi yai bugagia ma ilaibao, te eno ena genuai nogi me bomo te dage Israel dabe tomode hania pepeli diliba pedalumainu yaibao,” wai dao.