Aisaia 42:16 - Godigo dwagi yai po buku

¹⁶ Te eno ena we bidi dabe te polobadu augwali bilisąwai sunumidu odasa asaibao. Megi augwali gedu halua sai hulide bidibao, tialima te be hulia sai elalubo te eno sela sąnama, te augwaliba ula mawaibao. Tama eno te dwai pesage elaluali te dodolama, te dolo yai pesage ilama, te augwali bilabo madi tiaibao. Eno te sę dabe te mu pedalumainu yaibao, te eno te sę yaibao wali po tiwai gilama yaibao. Te eno magi nai me delide homu kone ebo me kegeda palogobeo.

Aisaia 42:16 Referans Kwoze

Aisaia 30:21

Tama dage peyu, te mena sunumide geda muainu ebaso da, te dolo nogo badu sunumi badu, o pobase nogo badu sunumi badu me, teda agai dage tudi badu bidama, tama mena sunumidu painu yali, agai dage ola mawaibao.

Dwagi Yai Gesi Po Lukgo Asęani 3:5

Tigidali odogo dabe mu pągąnao. Tigidali bobiabi dabe du dabe kigila palao. Gagila bilai tų dabe me dolo ma dodolao.

Aisaia 35:8

Tama genuai sunumi me deli te badu elalueibao. Te genuai sunumi nogi e tiwai waibao, “Godigo Tedali Gasagi Yai Genuai Sunumi Digi Dao,” wai. Te God gedude wiegi yai isąwani bidi dabe, augwali te sunumide me biligobeo. Mu menio. Te Godigo we bidi dabego sunumi naga elalueibao. Te homu kolesaga meni yai bidi dabe, te augwali te pąba me pogobeo.

Aisaia 40:4

Te tǫ odogo igulali pesage tigidali pągąniyu, te bulu du tigidali pebela aiyaba tulao. Te dolo si elalusiąwani pesage te dolo si elama, te du du yali pesage te malu tǫ naga pedelaibao.

Efesus 5:8

Te polobadu dage dwai kolesaga ebode biliyu tama dage be hulia side bidibo tiwai yai dao. Tiali goli megi dage te Genuai Bidide wadolama, tama agai dage wiegi yai ulaba munama bidibao. Tama tibaso, dagego wiegi yai kolesaga naga eyu dage te ula yai we bidi tiwai bidiąo.

Aisaia 32:3

Tama megi e tibo sogo, te we bidi augwaligo gedugo tigidali nai dabe subo usu mu yaibao. Tama me augwaligo olo bugagia dala pelama, tama augwaligo tigidali po bugagia odaibao.

Hibru 13:5

Dagego te monede pesą eyu godolo ebo kolesaga wali me pigio. Te dagego tolalubo naide te dagego e tiwai homu yao, “Te wiegi yai dao. Te ena usu yaibao.” Magi baso meni, Godigo digi te po walio, “Te ena nage munu me tagalogobeo. Te eno nage tudiba munu me mugobeo.”

Aisaia 29:18

Tama te sogo da, te olo degai dabego te bidigo te bukude nedebo po augwaligo odaibao. Tama te gedu hwidai dabe megi augwali moni hulia sai madi bidibo, te bidi dabe augwaligo ma gedu peda paibao, tama nai dabe ma suaibao.

Godigo Nogi Ugwaba Sabo Tęąbi Po Wabo Buku Dabe 94:14

Magi basowe, Genuai Bidigo aga we bidi augwali tagalobo menio. Mu tama, aga sa muani we bidi augwali tudiba me mugubeo.

Aisaia 48:17

Genuai Bidi, aga te Israelgo Wiegi Yai Doloba Pai Kolesaga Mu Ebo God, aga te dage tudibadu posolalu, te dage tau sabo bidi, agai te tiwai po wali, “Ena Genuai Bidi, te duga God dao. Sesemane sogo eno te doloba pai kolesaga dagego wali peyu, dage bugagia bidimai hagede ola mabo dao.

Aisaia 45:2

‘Te nage pabodu ena polasa peyu, te bulu du pesage dabe me alula tagalama, te doloba pai pesage nigilaibao. Eno augwaligo te brasgo nigai genuai hanu sunumi aluama, te boma pai ba aingo te dąų walali sunumi te me aluama, dala sąwaibao.

Aisaia 35:5

Tialima, te gedu widai bidi dabego gedu ma pedaibao, te olo degai bagego po ma odaibao.

Hosea 2:14

Genuai Bidigo te po begelama wabo pode te tiwai po wali, “Tialima, eno te wiegi yai po te we Israel dali olama, tama aga te masigi kemi pesageba ma kekasa paibao. Tama eno aga homu bega sabo po weyu, agabolo te tiwai po waibao, ‘Eno nage godolo mu ebao,’ waibao.

Hosea 2:6

Tama te homu ebaso, te eno ni sesane dabe selama, te we bidibo pesage bagulama elalueibao. Te eno aga soabo sunumide obogo togwa palama, tama aga te bidi dabeba ma pobaso, te usu me egobeo.

Aisaia 29:24

Tama te bidi dabe homu kolesaga megi umuna pabo bidi dabe, augwali te wiegi yai homu kolesaga ma saibao. Tama te konila po dabe hauwa olama, tama po sela sąbo bidi dabe, augwali te wiegi yai homu elama, eno po ola mabo odaibao,” te po wali.

Josua 3:4

Tama tiyu, dage pabo sunumi te duga konemainu ebao, magi baso meni, dage te buluba polobadu me sabolisiąwai. Tiali goli, te bomai po dąų olama muani halobage pąba dage munu me pelamuo. Menio. Dage te dwasianu digibulu gana te po dąų wali halobage tolasa pabo wali pao,” te genuai bidi nigali bidi dabego augwalibolo wali.

Esekiel 14:23

“Dagego te tiwai tama koneama, eno odolali augwali me dolobeo. Menio. Te eno augwalide yali sę page mu elalubao. Ena God Genuai Bidi, eno te po wai dao,” wali.

Aisaia 54:13

“Te ena digi eno nago wai dabe ola mayu, te augwa bidabo pesage bugagia mu elalueibao.

Aisaia 41:3

Aga te deli sogo naga polo tama augwaliba pedelama, te augwali doliyu yali, tama augwaligo agaba magi sę yabo te usu meni yai. Te waligo digi aga sela pabo tiwai eyu, agai te tǫ me dwasianu diąbeo.

Kolesaga Koneai Bidigo Pusali Po Elalubo Buku 7:13

Te Godigo yali sę tigidalide bugagia homu kone palao. Te Godigo nai me deli nigali te gagea pai elalubaso da, teda dego mu ma dodolaibawe?

Kolesaga Koneai Bidigo Pusali Po Elalubo Buku 1:15

Te gagea pali nai dabe, te dago dodolainu ebo usu egobeo. Te elalusiąwani nai dabe, te dago me nedegobeo.

Godigo Sęba Tagala Palai Bidigo Po 26:18

Tama nago augwali hulide bidibo pesage tagalama, ulaba kegasa asao. Tama nago augwali hulide bidibo kolesaga tagalama, nago augwali ula buluba kegasa asao. Augwali Satango bomode bidibadi, nago augwali ma sao, augwali God pageba asomainu tama yao. Tama augwaligo homugo ena konealu baso da, te augwaligo dwai kolesaga ebo Godigo tigidali sela sąwaibao, te Godigo sa muai we bidi dali wadolagasaibao,’ agai enabolo te po wai,” Pol agai te po wali.

1 Pita 2:9

Me ma, dage da, dage te sa muani we bidi hani dao. Bidi meba augwali te we bidi dali, God dali tomode bidiyu, tama pris bidi sę eyu, augwaligo Godibolo te dwagi yai nai ula mabo sę ebo dao. Tama te tiwai dagego me te dago genuai tuni bidigo sę ebo dao. Dage da, te tedali gasagi yai doloba pai we bidi hani dao, God aga we bidi hani mu te dage dao. Tama agai dage i olama, tama dage te hulia sai bidibo digi tagalama, tama agai wiegi yai ula yai buluba bidagasai dao. Tama dagego agai yali wiegi yai sęde po te gasa we bidibolo pusumainogo te agai dage sa muani.

Aisaia 26:7

Te sunumi te doloba pai we bidi dabe bilalubo sunumi da dolo naga te elalubao. Genuai Bidi, nage doloba pai God dao. Tama nago augwali bilibo sunumi dodolobo dao.

Aisaia 30:18

Tiali goli, Genuai Bidi da, tigidali sogo doloba pai kolesaga naga ebo God dao. Tama tibaso, agai dage homu dene elama, agai hobede ebo dage ola mawainu te tonalubao. Te we bidi dabego Genuai Bidiba homu kolesaga dąų olama, tama agai augwali tau somainao olama, tonaluali we bidi dabe da, augwali wiegi yai homu pemene mu yaibao.

Aisaia 41:17

“Te eno we bidi dabe te ąį mu sǫą pelama, te augwali dogoni te ąį tuabo wa pali sogo, te augwaligo ena i obaso, tialima ena, Genuai Bidi, te eno augwaligo gedu haluasa po wabo odaibao. Ena, te Israelgo God, te eno dage homu kone me gegeda palogobeo.

Aisaia 45:7

Eno naga eno te po obaso, te be posoyu, be huliyu ebao. Te eno naga te we bidi bugagia bidimainu ebao, te eno augwali te genuai sęgę somainu yaibao. Genuai Bidi eno naga, eno te sę tigidali pedalumainu ebo dao.’”

Aisaia 52:12

Tiali goli, dage asesa polo me te Babilon tagalama, me wi polo soyu, te dagego polobadu te Isipde yali tiwai me egobeo. Menio. Te dage dua digi asaibao. Te God, duga Israel dabego Genuai Bidi, te dage pabodu polasa paibao, te aga dage nosali badu me asaibao, te agai dage tonalua asiyu, odasa asaibao.

Aisaia 58:10

te dagego suali, te bidi dabe te doado bage me nai dabe sǫą pai elalubo subaso, te dagego augwali homu dene mu elama, te augwali sǫą pali nai mobaso da, teda eno dage wiegi yai bugagia ilaibao. Te eno dageba wiegi yai sogo pedalumainu elama, te bomo yai giliga ula tiwai eyu, te be hulialuali hola sabo tiwai ebo dao.

Aisaia 62:12

Te augwaligo nago we bidi te tiwai nogi poaibao, “Te Genuai Bidigo tedali gasagi yai we bidi dao,” me “Te we bidi dabe te Genuai Bidigo ma salio.” Te augwaligo nage nogi te tiwai waibao, “Genuai Bidigo godolo mu ebo taun da,” me, te “Genuai Bidi ma aselama, bidibo taun dao,” waibao.

Amos 5:8

Godigo te hǫ dabe pedalumainu ilama, tama tigidali ula ebo nai ugwadu elalubao. Agai te be huliali hasegeleyu, tama te be posobo dao, te ula elalubo hasegeleyu, tama be hulibo dao. Tama agai te tamu ąį asomainu i ola asama, tama agai te tǫba ugwadu gea palagasaibao. Agai te bomai bidi dabe me doliyu, te augwa bomai be dabe me dolobo dao. Godigo digi te tobage tigidali sę ebo dao, tama aga nogi e tiwai elalubao, Genuai Bidi dao.