Aisaia 39:2 - Godigo dwagi yai po buku

² Hesekiago te bidi dabego po odolama, tialima megi da, agai te bidi dabeba te mone dabe, me te aga gasa nai dabe augwaliba ola mawai. Te agai mone mubo bede te tigidali silva me gol suali, te wiegi yai denami ebo pauda me sanda dabe, me te hwįbo nai tigidali, te gasa nai tigidali te aga bakstuade munolubo me, te ola mena silalio. Hesekiago te nai deli me dualubeo. Menio. Agai augwaliba te kingo moni be tomode elalubo nai tigidali ola mawai, me te aga tonalubo bulu tǫ kantri pedai tigidali ola mena silai dao.

Aisaia 39:2 Referans Kwoze

Tuni Bidi Dabego Po Elalubo Buku Si 32:31

Te kantri Babilon genuai bidi dabego Godigo te kantri Juda bulude te wiegi yai sę yali po odama, augwaligo te bidi dabego esiąbo bomai sę yali po page odainogo bidi me deli tagala palali, te Hesekiabolo hanalu wainu. Te sogo Godigo Hesekia tagalai madi, magi baso meni, agai Hesekia usu selama, tama agai kolesaga me homu kolesaga osola suainogo.

Tuni Bidi Dabego Po Elalubo Buku Si 32:25

Tama nosali Hesekiago gasi silali, tama agai Genuai Bidigo aga tau siyu yali te sę kone ebeo. Menio. Aga tobolu gagea pelama, tama Genuai Bidibolo buba hwi po wabeo. Tama tibaso, Genuai Bidigo aga dali sębę elama, tama aga dali Juda dabe me Jerusalem we bidi me dolabo homu yali.

Jeremaia 17:9

Genuai Bidigo te tama po wali, “Tigidali bidigo haligade tibo kolesaga sesemane yabo homu kone kone iduaibao. Bidigo homude dwai mu elalubo dao. Tama dego te page mu konegowe?

2 Korin 12:7

Te po hauwa Godigo enabolo te dagalude ola mani, te genuai wiegi yai nai mu dao. Tama tede ena digi ena ugwaba sabo te Godigo godolo me ebe, tama agai te dene mabo sesani ena tigiba enebo nai tiwai nai me deli enabolo mani. Te dene mabo nai te Satango sę ebo bidi tiwai dao, te ena elidumainogo ebao. Te ena aiyaba elaluama tama te eno te dagalude suali naide ena digi ena ugwaba me sidali olama tibo dao.

Kolesaga Koneai Bidigo Pusali Po Elalubo Buku 7:20

Te doloba pai bidi me deligo wiegi yai kolesaga sesemane sogo me idugobeo. Menio. Me sogo agai me sęgę sabo dao.

Bugagia Bidibo Kolesagade Po Asęai Buku 4:23

Te nage bidabo wiegi yai ula dodolabo wiegi yai homu kolesaga, te naga homude pedelaibao, te wę te idu wę gomo pedalubo tiwai ebo dao. Tama tiyu, tigidali sogo nago te naga homude ebo te bugagia mu tonaluao.

Tuni Bidi Dabego Po Elalubo Buku Si 32:27

Te Hesekia agai nai dabe hauwa mu selama, tama aga bomai king mu pedelali, tama agai genuai nogi elaluali. Agai te sę bidi dabebolo olama, tama augwaligo bakstua dabe sęnama tama augwaligo e tama tiwai nai dabe muani, silva, me gol, me genuai monego abelai wiegi yai masigi dabe, me wiegi yai denami ebo pauda dabe, me hwįbo ni name sabele dabe me, me gasa wiegi yai homua pabo nai dabe me te bede muani.

Tuni Bidi Dabego Po Elalubo Buku Si 9:9

Tialima Seba we kwingo te doado bage dabe te Solomonbolo manani. Agai agabolo gol hauwa mu mani, tama te golgo sęgę te 4 ton edelai. Tama me kwingo te wiegi yai mu dila pai masigi dabe me wiegi yai denami ebo pauda dabe agabolo mani. Kwingo Solomonbolo te wiegi yai denami ebo pauda hauwa mu mani, te pauda dabe te wiegi yai mu elama, gasa meba pauda dabego denami mu edelai dao.

Tuni Bidi Dabego Po Elalubo Buku Si 9:1

Te kantri Seba kwin we, te polalubo wego Solomongo genuai nogi elalubo po odali. Tama tialima, te kwingo Solomonbolo bidi me deligo wei ponabo usu isąyabo hanalubo po hanalu wainogo asali, te Solomongo kolesaga usu sela suainogo. Kwingo Jerusalemba aga sę bidi dabe hauwa me kibu kamel sibi hauwa dali asali. Te kamel kibu dabego gol dabe hauwa mu tolasa asiyu, me wiegi yai denami ebo pauda dabe hauwa, me te genuai umabo monego abelabo wiegi yai masigi dabe dali sesali. Tama te kwin polo sabolagaselama, teda agai te bomai bidigo ponobo usu isąwai po hanalu wainu kone palali po dabe Solomonbolo hanalu wali.

Te Israel me Juda Hani Sigo Tuni Bidigo Po Elalubo Buku Si 20:13

Tama te king Hesekiago te bidi dabego wali po odama silibo si, tama agai te bidi dabe te agai te moni bakstuaba te agai augwali odasa pelama, tama agai te tigidali mone me, tama me te gasa nai dabe me, te nai dabe me tigidali te bidi dabebolo agai augwalibolo wasilali. Tama te augwaligo te agai te mone mubo bede muani te tigidali silva me, me te gol me, te nai dabe tigidali augwaligo sula silali, tama te dwagi yai denami ebo pauda me, tama me te dwagi yai denami ebo sanda wel me, tama me te boi hwįbo nai dabe tigidali me, tama me te agai te bakstuade muani te gasa nai dabe tigidali augwaligo suali. Te king Hesekia agai te nai me deli me dualobe. Mu meni. Tama agai te kingo be obo tomode elalubo nai me, tama me te Jerusalem bulude elalubo nai dabe tigidali te agai augwalibolo ola mena silali.

Te Israel me Juda Hani Sigo Tuni Bidigo Po Elalubo Buku Deli 10:25

Te tigidali kibu bede te bidi dabe asiyu, tama tigidaligo te Solomonba wiegi yai homu eyu maiabo nai sesali. Augwaligo te bidi dabego te silvago me golgo nigai nai dabe sela asiyu, me augwaligo te wiegi yai ugwa dabe, me te hwįbo nai dabe sesali, tama te tobage pauda me te wiegi yai denami ebo nai, te hos dabe, me te donki dabe, te sela asiyu yai dao.

Te Israel me Juda Hani Sigo Tuni Bidigo Po Elalubo Buku Deli 10:15

Tama agai te tobage bisnis bidi dabede me te takis mone siyu yai. Tama te Arebia bulu kingo me, te Israel tǫ pedai dabede bidibo te polalubo kiap dagego me, te agaba mone mayu yai dao.

Te Israel me Juda Hani Sigo Tuni Bidigo Po Elalubo Buku Deli 10:10

Tialima, te Seba kwingo te gol hauwa te Solomonba mani, tama te golgo sęgęgo te 4 ton aiyaba elaluali. Tama kwingo te tobage nai pauda dabe te wiegi yai denami ebo nai me, te gasa wiegi yai masigi dabe me mani. Te pauda dabe te hauwa mu tamao. Tama nosali te sogo te tobage denami ebo pauda hauwa te Israel bulu tǫ tomoba me asobeo.

Te Israel me Juda Hani Sigo Tuni Bidigo Po Elalubo Buku Deli 10:2

Kwin te Jerusalemba asali, te aga sę bidi hauwa dali, te genuai hani kamel dali me asali. Te kamel dabego te gol hauwa mu me, te tobage pauda me, te wiegi yai denami ebo nai dabe me, te gasa sawi yai masigi dabe, te nai dabe sesali. Te kwin we sabolagaselama da, teda agai te hanaluabo homu yali po tigidali te Solomonba hanalu walio.

1 Jon 1:8

“Eno dwai sę menio,” dago te po weyu da, teda dago dena homu kolesagabolo ili po ola mayu, tama mu po wabo dago homu kolesagade me menio.