Aisaia 33:23 - Godigo dwagi yai po buku

²³ Ma, te boi bidi dabego te Jerusalem sabo homu yali da, teda augwali usu me egobeo. Augwali te sip boskru bage te sip pomainu, te pobigisąma ebo boskru dabe tiwai bidaibao. Magi baso meni. Te sip tobolu bugagia dolalusiąma eyu, me te bono dabe bugagia bomalusiąma eyu, me te sel dinigalusiąma eyu isąma ebaso. Tama tibaso, boi bidi dabe wi peyu, te nai dabe hauwa tagalama paibao. Tama te Jerusalem dabe udala, te nai dabe sigi paibao. Tagala, te sągą dwai bidi dabe me, augwali me te gasa bidi dabe nosali aselama, augwaligo me te nai dabe hauwa mu saibao.

Aisaia 33:23 Referans Kwoze

Te Israel me Juda Hani Sigo Tuni Bidigo Po Elalubo Buku Si 7:8

Tama te sogo te me si me si tama bidi augwali te Siria bidi dabe bidali pesageba sabaligi pali, augwaligo pelama, te sel ugwa be me deli tomoba pali, tama augwaligo te be tomoba subadi yaide, te Siria bagego tubo nai me, te wain ąį me, te be tomode munalubo suali. Tama augwaligo te nai selama tuyu, te ąį me selama tuyu bidali. Tama nosali augwaligo te silva me, gol me, ma name ugwa me, te Siria bagego doado bage hauwa mu augwaligo selama, tama te tolasa pelama, te gasa madigi me deli dualigi pai. Tama augwali ma aselama, tama augwaligo te me sel ugwa bede muani doado bage dabe me ma sali. Tama augwa ma tolasa pelama, gasa madigi me dualigi pali.

1 Korin 1:27

Te meni. God agai homugo eyu tama te tǫde haniani naide kuna koneani we bidi hale emainogo eyu, agai te augwaligo gedude te homu kolesaga meni yai bage dią sali. Tama me te tǫde genuai bomo elalubo bage hale emainogo eyu, agai te tǫde we bidigo gedude bomo meni yai we bidi dią sali.

Godigo Nogi Ugwaba Sabo Tęąbi Po Wabo Buku Dabe 68:12

Te po e tama wali, “Te king dabe dali te tigidali ami dabe me, tigidali te wi palio,” po wai. Tama te augwa bidali pesagede bidali we dabego te augwa bidi dabego hwįyu sali doado bage te dobayalio.

Godigo Sęba Tagala Palai Bidigo Po 27:19

Tama te sogo ma te gebade sę ebo bidi augwaligo te gebade muani ni me, te bono me, te nami ugwa me augwaligo nogogo selama, sąyani.

Aisaia 33:21

Genuai Bidi te dago boma pai polalubo bidi tede bidaibao. Tama agai te Jerusalem te wiegi yai sawi yai genuai wę me, dwasianu wę me elalubo bulu nigilaibao. Tiali goli, te dwasianu geba kanu me, genuai hwįbo sip dabe me, te wę dabedu me asogobeo.

Aisaia 33:4

Tama augwaligo te taga pabo nai dabe da, te gasa bidi hani dabego polo sagasaibao. Teda te gide mano dabego gide nai dabe tula silibo tiwai yaibao.

Aisaia 33:1

Dage te gasa bulu dabe dolobo hani, dage dolaibao. Te mu tama, dage me dolobe dao. Tiali goli, dagego gasa bulu dabe dolobo bodolu sia saibao. Tama duga digi duga dolaibao. Dagego te gasa hani dabe ili po walama, tama dagego te po mia selama, tama dagego augwali te boi bidi dabego nogoba mubo dao. Te mu tama, te gasa hanigo da dage me ili po me ola masiąbadi goli. Tiali goli, dagego te gasa bidi dabe ili po wabo sogo te sia saibao. Tama te gasa bidi dabego dage ili po olama, tama dage te boi bidi dabego nogoba muaibao.

Tuni Bidi Dabego Po Elalubo Buku Si 20:25

Tama tialima, Jehosafat me aga ami dabe augwali te tigi dabe munalubo tomodu pali, tama augwaligo nai nai dabe hauwa me elalubo suali. Tama augwaligo tubo nai dabe siyu, wiegi yai ugwa dabe siyu, me augwaligo meba wiegi wiegi yai nai dabe sali. Augwaligo te nai dabe sidubadi sela sogoba mu usu nani. Magi baso meni, te doado bage nai dabe hauwa bage me elalubaso.

Te Israel me Juda Hani Sigo Tuni Bidigo Po Elalubo Buku Si 7:16

Tama te sogo te we bidi dabego te nai dabe suali po odobo si, augwali polo udulama peyu, te Siria bage bidali pesageba sabolama, tama augwaligo te Siria bagego taga pali nai dabe tigidali sai. Tama augwaligo te o gagawai nai te plaua umabo mu sali, tama me te nai bali me umabo mu sali. Tama tibaso, augwaligo 3 kilogram te sęgę te dwagi yai o gagawai nai plaua, o 6 kilogram sęgę te bret bali, te nai si te maket munama, te mone podolai sabo usu naga muani, te Genuai Bidi Godigo tama tiaibao wali podu wali peyu, tama tiai.

Aisaia 35:6

Te sągą dwai penelai bidi dabe gesa soyu, posoga palaibao, me te pedauwali pania sai bage te i weyu, pemene yaibao. Te wę dabe te masigi kemi tǫde pedaliyu, te tigidali habuba usu nama paibao.

Esekiel 38:13

Tama te sogo te kantri Seba me Dedan hani, me te kantri Spen taun bisnis bidi dabe augwaligo dage asobo sulama, tama augwaligo dagebolo hanaluyu, te po waibao, “Te nago naga ami hauwa sisinama, tama augwali dali hwįnama, augwaligo wiegi yai nai dabe hauwa sainogo yai da, agawe? Tama dago homugo dagego gol me silva hauwa saibawe, me augwaligo kau kibu, me te meba nai dabe hauwa sainogo homu eba, agawe? Te wiegi yai mu dao,” augwaligo te po nagebolo hanalu waibao.’ Te po king Gokbolo wao,” te po wali.

Godigo Nogi Ugwaba Sabo Tęąbi Po Wabo Buku Dabe 68:13

Te we dabe te silvago, me golgo te gasagi yai au mu elama, tama augwa te tonani te gasa wiegi yai ba sawi yai tiwai yali, tama aga te silvago ula tiwai yali, tama aga bogo te golgo gegemani ebo tiwai ebao. Tiali goli, magi baso bidi meba te sipsipgo obo tomode bidibawe?