Aisaia 33:2 - Godigo dwagi yai po buku

² O Genuai Bidi, dago homu kolesaga nage deliba naga elalubao. Nago da hobede elama, tama tigidali sogo da bugagia tonaluagameo. Tame te sęgę ebo sogo, nago da ma selama, tama dago augwali aiyaba elalumainu ilao.

Aisaia 33:2 Referans Kwoze

Aisaia 59:16

Te aga dwai midigi siyu, te tiwai suali, te gasa bagego dolali bidi dabe te tau sabo bidi elalubo subeo. Tama tibaso, te aga bomogo digi, te aga doloba pai kolesagago digi, te Genuai Bidigo augwali ma selama, te augwali bugagia bidimainogo ilai dao.

Aisaia 25:9

Te sę dabe pedalobo sogo, te we bidi dabego te e tama po waibao, “Mu tama dao, Genuai Bidi dago God dao. Dago homu agade dąų olama, tonaluai dao. Tama agai da ma oda sai dao. Aga deli naga Genuai Bidi dao. Tama agai da tau sai dao. Tama tibaso, da wiegi yai homu penene genina mu inao. Magi baso meni. Agai da polo ma oda sai dao,” te po waibao.

Godigo Nogi Ugwaba Sabo Tęąbi Po Wabo Buku Dabe 60:11

Nago da tau sobaso, tama dago te boi bidi dabe dali hwįaibao. Magi baso meni, te bidi dabego naga da tau sobaso da, te olo nai tiwai naga dao.

Godigo Nogi Ugwaba Sabo Tęąbi Po Wabo Buku Dabe 62:8

Eno hani dabe, sesemane sogo dagego te Godiba konealubo homu dąų waiyąo. Dagego te duga tigidali sęgę me, te tigidali homu te agaba pusao, awe, bidigo te wę gelibo tiwai eyu yao. Magi baso meni, da te agaba pelama, bugagia bidainu te tama tiao.

Godigo Nogi Ugwaba Sabo Tęąbi Po Wabo Buku Dabe 62:1

Mu tama, eno konealubo homu te God deliba naga dąų weyu, tama sagia siyu, tama eno te agai ena tau sabo tonalubo dao. Aga deligo naga te ena ma selama, tama ena bidibo ula dali bidibo dao.

Godigo Nogi Ugwaba Sabo Tęąbi Po Wabo Buku Dabe 46:1

God aga te da seselalubo bidi da, tama agai sesemane sogo da bomo mabo dao. Aga te pąde bidiyu, te dago genuai sęgę sabo sogo tau sainu sisi elalubo dao.

Ma Dobola Sali 14:27

Tama Mosesgo nogo ugwaba selama, te tamu ąį usu sali, tama be posobode te ąį ma asiyu, tama te polobadu elaluali tiwai ma yai. Tama te Isip dabe augwali wi pabo usu sali, tiali goli augwali usu meni yai, magi basowe, Genuai Bidigo augwali tigidali te tamu wę tomoba popogolo pai.

Hosea 14:2

Dage te Genuai Bidiba ma aselama, tama te gedu haluasa po dagego Godiba te ofa tiwai iyagameo. Dagego gedu haluasa po e tiwai wagameo, “God, nago dago sęgę tigidali sela sąyu, tama dago gedu haluasa po wabo odao. Tama dago te bulmakau elama, tama nageba ofa ebo usu egobeo. Menio. Te dago te dena polobadu dąų walali po wali gilama, te dwagi yai kolesaga naga yaibao.

Te We Bidi Dabego Jerusalem Hagede Gela Wali 3:23

Menio. Te agai te kolesaga tigidali bubugade gesi noma pedalobo tiwai ebo dao. Genuai Bidi, nago te homugo kęą pabo kolesaga da dali tigidali sogo ebo dao. Nago te kolesaga te wiegi yai mu dao.

Jeremaia 14:8

Sesemane sogo da Israelgo nageba konealubo homu dąų weyu, te nageba tonalu, te nago da tau somainu yali. Te sęgę me sabo sogo, nago da ma siyu yai. Tialima, megi da, magi baso te nago da konesiąbo homu ebawe? Magi baso nage te digibulu bidi asai bidi te da dali deli pilama pabo tiwai yai dawe?

Aisaia 40:10

Suao. Tigidali nai tonalubo Genuai Bidi aga bomo dali asobao. Agai te boi bidi dabe aiyaba elaluama, te aga we bidi dabe ma dobola sali, te aga boi hwįnama, te wiegi yai nai sabo tiwai yalio.

Aisaia 26:16

Genuai Bidi, nago naga we bidi dodolomainogo eyu, dene mu mani, tama augwaligo bomo mu sia salio. Tiali goli, augwali moni homu dene dali nage pageba aselama, nageba gedu haluasa po walio.

Aisaia 26:8

Awe, Genuai Bidi, da nago bomai po wali peyu, bilibo dao. Tama dago nage deli naga tonaluyu, tonalubo dao. Dago nago genuai nogi godolo mu ebo dao.

Aisaia 25:4

Nage te nai meni yai bidi dabe duala sabo bulu tiwai nage bidai dao. Tama augwali sęgę ebo sogo augwali bugagia bidai dao. Te dwai bidi dabego homu sębę te bomai waligo te be daga tigiba hudula palobo tiwai dao, me te sesana pai giliga te kemi tǫ wa pai bulude nanebo tiwai dao. Tiali goli, te tulubage sogo, me wali ebo sogo, nago augwali mesegelama, tonaluai dao. Te nai meni yai bage nago tonaluai dao. Tama bomai giligago augwali ulumainu sula tagalai menio. Genuai Bidi, nago te boi bidi dabego pedauwali paninama, tama te dwai bidi dabego i hae wabo tama sia sabo dao. Te pǫgo te sesana pai giliga dualobo tiwai ebo dao. Tama te bulu kedaua pabo dao.

Godigo Nogi Ugwaba Sabo Tęąbi Po Wabo Buku Dabe 123:2

Te sę ebo bidigo te aga tonalubo bidiba homu muyu, tama te sę ebo wego me te aga tonalubo weba homu muaibao. Te tiwai naga gilama, dago konealubo homu me nageba muyu, Genuai Bidi, te dago God dao, te nago olo tau sabo wiegi yai kolesaga dabolo ebaso, te usu dao.

Godigo Nogi Ugwaba Sabo Tęąbi Po Wabo Buku Dabe 91:15

Te augwaligo enaba gedu haluasa po wabo sogo, te eno augwaligo wabo po odaibao. Tama te sęgę augwaliba pedalubaso da, te ena augwali dali bidaibao. Tama eno augwali ma selama, tama augwaliba te genuai nogi mawaibao.

Godigo Nogi Ugwaba Sabo Tęąbi Po Wabo Buku Dabe 90:15

Hasiabolo nago daba sęgę mawai. Tialima, megi da, nago da te wiegi yai pemene yabo usu nao, te sogo dabe da te sęgę tolali. Mu tama, hauwa kibu bede te da dwai bidali, tama nago da te wiegi yai pemene ilibo te tigidali kibu bede dwai bidali usu nama, tama tiwai yao.

Godigo Nogi Ugwaba Sabo Tęąbi Po Wabo Buku Dabe 62:5

Eno konealubo homu te God deliba naga dąų wabo dao. Tama eno te agai deligo ena tau sabo tonalubo dao.

Godigo Nogi Ugwaba Sabo Tęąbi Po Wabo Buku Dabe 50:15

Dagego tama tibo si, tama te sęgę pedalubo sogo, dagego enaba i waiyą, tama te eno dage tau mu siyu, tama dagego eno nogi ugwaba sagameo,” po wali.

Godigo Nogi Ugwaba Sabo Tęąbi Po Wabo Buku Dabe 46:5

God te taunde bidibao, tama tiyu, te taun munu me dologobeo. Te be posisąbadi, tama te Godigo aga tau saibao.

Godigo Nogi Ugwaba Sabo Tęąbi Po Wabo Buku Dabe 37:39

Genuai Bidigo digi te doloba pai dabe ma sabo dao. Te sęgę augwaliba pedalubo sogo, augwali te udulama, agaba pobaso, tama agai augwali tonalubo dao.

Godigo Nogi Ugwaba Sabo Tęąbi Po Wabo Buku Dabe 25:3

Awe, nageba te konealubo homu ąų wabo bidi dabe, te augwaligo konealubo odolali dąų omainu elama, tama me tagaliyu me egobeo. Menio. Te nageba hagoma polo ebo bidi dabe, augwali naga te dwai dene somainu elama, tama augwa yali kolesagade hale yaibao.

Godigo Nogi Ugwaba Sabo Tęąbi Po Wabo Buku Dabe 143:8

Eno konealubo homu nageba muani. Tialima, eno homugo te tigidali sogo kigamu nago eno homu te nago ena godolo ebo kolesagade ma homu kone palomainu ilao. Eno gedu haluasa po nageba naga wabo dao. Tama tiyu, nago enaba te sunumi ola mobaso, te eno wali paibao.

Godigo Nogi Ugwaba Sabo Tęąbi Po Wabo Buku Dabe 27:1

Genuai Bidi God aga te eno ula page da, tama agai ena tau sabo da. Tama tiyu, te bidi me delide ena midigi me egobeo. Genuai Bidigo naga ena seselalubao, te moni bomai obo tiwai te palialubao. Tama tiyu, te magi nai me delide ena wi me egobeo.

Aisaia 17:10

Magi baso meni. Israel dabe, nago te God nage ma oda sabo God nago homu kone ebeo. Aga te genuai masigi te dwai sogo duala sigi pabo masigi tiwai dao. Tiali goli, mu tama, nago aga mu gegeda pali. Tama nago gasa hanigo godiba lotu po wali. Tama nago homugo tibo te god dabego nage tau selama, tama nage bugagia bidiba homu ebo. Tiali goli, nage dolama, tama nage usu ma yabo sunumi mu menia saibao. Te naga gide ni wain wai bulama, tama kulubi polo holama, tama aga du walainu duduli ebo sulama nage wiegi yai homu ebo tiwai dao. Tiali goli, nago agai du sogobeo. Menio. Deli sogo polo tama te wain ni dolama, sasi elama, te wain gi dolaibao.

Aisaia 37:3

Augwali pela sabolama, Aisaiabolo te tiwai po wagi pali, “Kingo te po walio, megi te genuai haliga sęgę ebo sogo elalubao. Te Asiria dabego dabolo te da begela dolobo dwai posobo po hauwa waligo te da hale genuai elalubao. Da te haliga yai we me deli elalubo tiwai eyu, te wai ame nabo sogo pąde pedelalio. Tiali goli, te wego wai ame nabo te bomo me elalubeo.

Aisaia 51:5

Te eno augwali tau siyu, ma sabo sogo, te pąba pedelalio. Te ena bomogo digi eno te tigidali tǫ kantri tonalueibao. Te digibulu bulu pesage we bidigo te eno bomoba homu dąų weyu, te eno augwali tau sabo tonalueibao.

Godigo Nogi Ugwaba Sabo Tęąbi Po Wabo Buku Dabe 33:22

Genuai Bidi, dago konealubo homu dąų olama, tama nago da tau sabo tonalubao. Nago te olo tau sabo wiegi yai kolesaga daba sesemane sogo yao.

Aisaia 8:17

Megi da, eno te Genuai Bidi agai yaibao wali te sę ebo deli naga tonaluaibao. Agai Israel we bidiba polo tudi ola mawai dao. Tama agai augwaliba te begela ma tonogobeo. Tiali goli, eno agai bomo deli naga konealuaibao.