Aisaia 31:1 - Godigo dwagi yai po buku

¹ Dage te Isip buluba pelama, tama augwaligo dage tau somainu hanalugi pabo bage, hobede ya, dage dene saibao. Dage te Isip dabego hwįbo hos kibu hauwa elaluyu, me karis dabe me hauwa, me te ami bidi dabe hosde dualama hwįbo ami bidi dabe hauwa elalubo sulama, tama dagego homugo Isip dabego dage tau somaina homu ebao. Tiali goli, dagego Israel dabego Genuai Bidiba tonalubeo. Aga te Wiegi Yai Doloba Pai Kolesaga Naga Ebo God dao. Tama dagego agai tau sao po hanalubeo

Aisaia 31:1 Referans Kwoze

Godigo Nogi Ugwaba Sabo Tęąbi Po Wabo Buku Dabe 20:7

Te meba hanigo hagoma eyu, te hwįbo karis dabeba homu muani, tama gasa hani mebago te augwa hos dabeba homu muani. Tiali goli, dago te dena God Genuai Bidiba, Godiba, konealubo homu dąų wabo dao.

Jeremaia 17:5

Genuai Bidigo e tiwai po wali, “Te bidigo ena tudiba munama, te homu eyu, te bidigo naga bomo elalu, te augwaligo aga tau sobaso, bugagia bidaiba homu eyu da, teda te bidi dolobo dao.

Bomai Po 17:16

Te tuni bidi dolo siyu, tama agai ami bidigo hos kibu hauwa me selamo dao. Tama agai te bidi dabe te hos abelemainogo Isipba tagala palamuo. Magi baso meni, God Genuai Bidigo te po wai dao, ‘Eno we bidi te Isip buluba ma pelamuo,’ po wai dao.

Daniel 9:13

Nago te Mosesgo bomai po tomode wali po gilama dago te sęgę tigidali sali. Tiali goli, megi me dago te sęgę sabo kolesaga me tagalisiąma, tama dago nageba hanalu, te dabolo bugai haliga yabo po me hanalusiąwai, tama dago nago mu po wali me pisąwai.

Jeremaia 2:13

magi baso meni, eno we bidi dabego te dwai sę si yali. Hasia augwaligo ena tudiba muai. Ena te ulu wę tiwai te augwali bidabo ula maiabo wę elaluali, tiali goli, augwaligo ena tagalali. Tama me, tǫ diganama, augwa digi te wę sabobo nai nigali. Tiali goli, te wę sabobo nai te alua pelama, te ąį augwalide elalubo usu ebeo.’”

Aisaia 36:9

Nago homugo te Isip ami bidi dabe te hosidu ma karisdu aselama, te nage boi hwįbo tau sagasaibao homu ebao. Tiali goli, mu menio, augwali me asogobeo. Tama tialima, nago bomogo te dago dwasianu ami hani aiyaba elalueiba homu ebaso da, te usu me egobeo.

Aisaia 30:16

Tama dagego te po wali, “Tagalama, dago bomonama udabo kibu hos bidibao. Tama da te kibu hosde dualama, tama da wi paibao,” wali. Te dagego te boi bidi dabede wi paibao wabo po da, teda mu tama dao. Tiali goli, tagala, dagego kibu hos bomonama udabo da, tagalao. Te boi bidi dabego hos kibu bomonama mu dagego kibu hos nosali wali pobeasa asaibao.

Aisaia 36:6

Eno koneani, nago te kantri Isipba tonaludu, te agai nago hwįbo tau sagasomainu tonalubao. Tiali goli, eno nagebolo obao, Isip te togwa pai awi dili tiwai elalubao. Te nago bilibo dono tiwai tola selama, pobaso da, teda te awi dili sagago nago nogode dolaibao. Te Isip king bidigo kolesaga te tobage tiwai elalubao. Tama nago te boi hwįbaso, te aga aselama, nage tau me sagasogobeo.

Hosea 14:3

Te Asiria dabego da ma dobola sogobeo, usu egobeo, tama te hwįbo hos dabego me da tau me sogobeo. Te usu egobeo. Dago te tibo god nigali, te dago te tiwai po augwaliba ma weyu, ‘Dage te dago god da,’ me wagobeo. Genuai Bidi, nago dabolo te homu dene eyu, tau sabo wiegi yai kolesaga ebo dao, magi baso meni, da te aya meni yai wai puluba bidibao, te tau sabo usu meni yai bidibo dao.” Dagego tama gedu haluasa po agabolo wao.

Hosea 7:7

“Augwaligo te wado po olama, te deli deli pedalubo king ela muyu iduali, te augwa tobolu bidi dabe dali te tama tiai. Te dwai kolesaga augwa bulu kantri tǫde elaluali, tama te bidi me deligo enaba gedu haluasa po weyu me ebeo,” Genuai Bidi Godigo te po wai.

Esekiel 17:15

Tialima, te Juda kingo agai dąų walali bomai po wali pabeo. Agai te Isipba po ola tolama, te hos dabe me te genuai ami bidi hani dabe aselama, aga tau sagasao wali. Te Isip king bidi da, te si wabo ba kemodage tiwai dao. Tialima, te king aga bugagia bidaiba homu elama yali da, agawe? Menio. Agai te Babilon kingo po sela sąbaso, tialima te Babilon king aselama, te agabolo dwai dene mawaibao,” wali.

Aisaia 9:13

Te Israel we bidi homu begelebeo. Genuai Bidi Tigidali Bomo Elalubo Bidigo augwali dene mani. Tiali goli, augwali agaba ma asobeo.

Aisaia 22:11

Tama dagego genuai dedage deli te hanu bobegelali obo si tomode nigai dao, te tigidali uludu asobo wę ge bo dąį elalumainogo. Dagego te tama sę dabe yai dao. Tiali goli, dagego God me kone me ebeo. Agai deligo naga te nai dabe dageba pedalabo po polobadu digi bodolu muai dao.

Tuni Bidi Dabego Po Elalubo Buku Si 16:7

Tama te sogo profet Hanani pelama, te king Asa sugi pelama, agabolo e tama po walali, “Nago homugo Siria king bidigo nage tau sabo bomo genuai elalubao homu elama, tama nago dago Genuai Bidi dena Godiba homu dąų wabeo, tama agabolo nage tau sao olama hanalubeo. Tama tialima, nago naga boi bidi dabe aiyaba me elalubeo, me te Siria ami bidi dabe me nago aiyaba me elalugobeo.

Aisaia 57:9

Dagego au ebo, te sanda me pauda, te wiegi yai denami ebo naigo au elama, te dage tibo god Melekba lotu wagi pali. Dagego te bidi dabe digibulu buluba tagala palali, te dagego lotu wabo god gegemainu yali. Tama dagego te gų pagede me te tibo god dabe gegebo kolesaga ebo dao.

Aisaia 5:12

Te nai daa tuyu, wain wę tuyu, me haniani musik gitago eliyu, genagego eliyu, hąbidigo eliyu ebo, te dagego mu koneani. Tiali goli, Genuai Bidigo yainu ebo, te sę dabe dagego munu me konebeo. Dagego te sę dabe te olo nai dabe da homu ebo dao.

Aisaia 2:7

Te Israel dabego tǫ te silva, me gol, me hos, me karis dabego mu pągąna pali. Tama bidigo nedebo usu egobeo.

Hosea 11:5

“Tiali goli, augwali enaba me asisąwai. Tialima, augwa te Isipba ma pomainu ebowe, ma te Asiria dabego augwali tonalumainu egowe yaibao.

Aisaia 64:7

Te nageba gedu haluasa po weyu, te nage nogi wabo bidi meni yai, te nage pąba asu, nageba homu kolesaga kęą pabo bidi meni, magi baso meni, nago naga gesabidi daba geme dula selama elalu, te nago dena sęgęgo da dodolomainu ilama, te da dwai mu bidibao.

Bomai Po 20:1

Tama Mosesgo po wadolama weyu, te po wali, “Te dage te boi hwįgi pabo sogo, te dagego duga boi bidigo te karis me hos kibu elalubo suyu, me augwa ami bidi nambago dage edelai baso da, tagalao, dage wi me elamuo, augwalide. Magi baso menio. Genuai Bidi, dago God, agai dage Isip bulude selama, tama dage odasa asai dao. Aga digi dage dali bidaibao.

Aisaia 10:17

Genuai Bidi aga te Tigidali Wiegi Yai Doloba Pai Kolesaga Naga Ebo God dao. Tama aga te Israel dabego ula dao. Tiali goli, Asiria dabe dali da, aga te isi gagalama, augwaligo bulu isi ulaibao. Te deli bubagade naga agai te tigidali dwai nosai dabe isi ulaibao.

Aisaia 20:5

Te Filistia we bidi dabego te Sudan dabego augwali hwįbode tau siyu, me te augwaligo genuai nogi ugwaba sabo Isip dabe, te augwaligo te sę sulama, tama augwali noma selama, tama augwali homu dwai yaibao.

Aisaia 43:15

Ena naga ena Genuai Bidi, ena dagego te Wiegi Yai Doloba Pai Kolesaga Naga Ebo God dao. Eno dage Israel dabe te deli hani we bidi pedalumainu ilama, te megi ena duga king bidibo dao.”

Jeremaia 37:7

“Ena Genuai Bidi, ena dage Israelgo God, eno te po obao, te Juda kingo dage si enaba tagala palama, te eno dage tau sogowe, ma meniwe, koneainogo yai. Tialima, nago kingba te tiwai po walao. Te Isip kingo dage tau sainogo te Isip ami dabe asali. Tiali goli, augwali dageba me pedalugobeo. Menio. Augwali te sunumide begelama, augwa page buluba ma paibao.

Jeremaia 42:14

Menio. Da Isipba paibao. Da te Isipde naga bidibadi, te boi bidi dabego da dali me hwįagasogobeo. Te bidi dabego hwįgi painogo biugel bu weyu da, i me wagobeo. Te nai me da me sǫą pogobeo.”

Esekiel 29:16

Tama te Israel dabe augwaligo te sę te Isip dabede pedelali sę suaibao, tama augwaligo koneaibao, augwaligo te Isip dabego augwali tau sao walide augwaligo sęgę sali koneaibao. Tama te Israel dabe augwaligo te kolesaga ma egobeo. Tama te Israel dabe augwaligo e tama bugagia koneaibao, ena deli naga ena God Genuai Bidi da homu yaibao.’ Esekiel, nago te po te Isip king bidibolo wao,” Genuai Bidigo te po wai.

Hosea 11:9

“Eno dageba haliga sębę yali, tiali goli eno dageba te dwai dene da me magobeo. Magi baso meni, eno kolesaga te bidigo kolesaga tiwai menio. Ena God, te eno kolesaga tedali gasagi yai elalubao, tiali goli ena te dage dali bidibao. Eno wado elama, te eno dage doloyu da me egobeo,” wabo dao.

Habakuk 1:12

God, polobadu mu me, megi tama me, nage Genuai Bidi me te bidibao. Eno Genuai Bidi, nage te tedali wiegi yai doloba pai kolesaga ebo God dao, tama nago da isimainu sula tagalogobeo. God, nage eno Genuai Bidi dao, tama nage te bomai masigi tiwai dao, tama da te tudi badu te tiwąį madide duala sabo tiwai dao. Nago te Babilon dabe magi elama, tama augwali bomo ilama, tama augwaligo da tonalubo sę emainu magi ilai dao, te dago dwai sęgę wei ponoyu tiai dao.

Habakuk 3:3

Godigo te tǫ Idom bulude bidali tagalama, te aga ma asalio. God te wiegi yai doloba pai kolesaga tigidali mu ebo God, aga te Paran tǫ pedai bulu dude bidali hogodama, asali. Agai bomo te be posali ula tiwai pedelama, tama te dagalu tigidali pedai badu mesega salio. Tebogo te tigidali tǫde we bidigo agai te genuai nogi ugaba sabo homu ebo sę ilalio.

Tigidali Nai Gagalama Nigali Side 47:17

Tialima, augwaligo te hos dabe me, te sipsip me, meme dabe me, bulmakau dabe me, te donki dabe me, te augwaligo Josepba sela asobaso, tama Josepgo augwali nai mani. Josepgo te tiwai sę ela pidubadi, te kibu be siligi pali.

Tuni Bidi Dabego Po Elalubo Buku Si 16:9

Tigidali sogo Genuai Bidigo aga dologode elalubo bidi dabe naga bugagia tonalubo dao. Augwali menade tǫ dabede bidibo me tagala. Agai augwali tau selama augwali bomo ilibo dao. Tiali goli nago Siria king bidibolo nage tau somainogo hanalu wali da, teda te dwai kolesaga mu dao. Tama tialima nage dali te Juda dabe dage bugagia dua me bidigobeo, menio. Tigidali sogo boi bidi dabego dage dali boi hwįagasiyu yaibao,” wali.

Jopgo Po Asęani Elalubo Buku 39:11

Nago koneani, agai bomo genuai mu elalubo. Tama tibaso, nago homugo agai nage tau selama, nago genuai sę yaiba eyuwe?

Sekaraia 10:5

Tama tibaso, te Juda dabego te boi bidi dabe aiyaba elalubo sę eyu, te ami bidi dabego te taun sunumi dabede te tǫ pude te boi bidi aiyaba agabo tiwai yaibao. Te Genuai Bidi augwali dali bidibaso, te augwaligo hwįbo bomo eyu, te hos kibude dugayali boi bidi dabe me augwali aiyaba elaluboba usu naibao,” wali