Aisaia 30:30 - Godigo dwagi yai po buku

³⁰ Genuai Bidigo bomonama mu hae olama, tama agai bomonama i hae wabo aga we bidi tigidaligo odama, augwaligo agai sębę ebo mobo augwaligo tigide dolomainu yaibao. Aga te moni bomai isi te tigidali nai dabe dabo isi, me moni genuai tulubage, me wali, me talua ge tulubage dali, tama aga asaibao. Tama te be kulu obaso, te tigidali we bidigo agai sębę ebo sueibao.

Aisaia 30:30 Referans Kwoze

Aisaia 29:6

Tigidali Bomo Elalubo Genuai Bidi te bomai wali dali, tǫ mali dali asaibao. Tama te be kulu weyu, te genuai kulukulu dwai mu waibao. Tama agai te tigidali nai dabe ulabo isi dwai dali sesaibao.

Josua 10:11

Tama te Amor dabe te Israel ami bidi dabede wi pabo sę elayu, tama augwali te Bethoron te bulu baguba me te Aseka teba wi aiyaba palio. Tialima, Genuai Bidigo te moni kedau ilibo talua ge kulubage te masigi tiwai tulumainu ilama, tama te Amor dabe ela muna silai. Te masigi du tiwai talua ge tulubagego ela muani bidi dabego nambago te Israel bidi dabego ela muani bidi te namba aiyaba elaluai dao.

Kraisgo Geme Dualali Sę Pedelabo Po Jonbolo Ola Mani 11:19

Augwaligo po ola silama, tama augwaligo te Godigo dagalude elalubo Moni Lotu Be tempel te be tų dawai. Tama polobadu Godigo te Israel we bidi dali po dąų olama, tama augwaligo te asęani po te halobage me deli tomoba muani. Tama te halobage te Lotu Be tomode munalubo eno hania suali. Tama te sogo tama te be sele eyu, tama moni u wabo me, te be kulu wali me, tama tǫ mali ebadi, te kedau ebo nai talua ge tulubage hauwa te dagaludu tǫba tulaluai.

Aisaia 28:2

Mu tamao. Genuai Bidigo te bomai hani me deli polo nage elalumainu sa muanio. Te hani te bomai wali tiwai asaibao, tama me te tulubage te talua ge tulubage tulubo tiwai yaibao, tama augwaligo nage togolama, tǫba tula palaibao.

2 Tesalonaika 1:8

Tama tiwai aselama, tama te sogo God konebo hagela yali we bidi dali, Genuai Bidi Jisasgo po wali pisąwani bidi dali augwalibolo agai dene mawaibao.

Matyu 24:7

Awe, tama genuai hwįyu, bidi hani me deligo te wąbi te gasa genuai bidi hani dali hwį yaibao. Tama me tuni bidigo bidi hani te gasa tuni bidigo bidi hani dali wąbi hwįyu hwį yaibao. Tama haniani bulu habu badu genuai nai nasi ela ela paibao, tama tǫ me mali ela ela paibao.

Maika 1:4

Tama te bulu du dabe te aga sągą dologode ąį tiwai pedelaibao, te ula ebo nai kandel te ula eyu, te aga ili te wę pedalubo tiwai yaibao. Te bulu du dabe te odogo malu tǫ pesageba te gea paliyu, te bulu dudu wę sąbo samanobo tiwai yaibao.

Aisaia 32:19

Te genuai talua ge tulubage tulama, te mone buside moni ni dabe me dolobadi me, tagala. Tama tigidali hanude be dabe tǫde wiala pai goli,

Kraisgo Geme Dualali Sę Pedelabo Po Jonbolo Ola Mani 1:15

Tama te bidigo sągą ula mu yali, te augwaligo te gasagi yai kapa nogi bras te genuai sia dabo digi ulama ąį tiwai pedaluyu, tama te gegemani ebo tiwai aga sągąde te tama tiwai mu yali, Tama eno odali, agai dogonide po wabo te mone sabo ąįgo u wabo tiwai odai.

Dwagi Yai Gesi Po Lukgo Asęani 1:51

Po sela sąyu augwaligo augwa nogi kegenanu ebo bage agai augwali besela sąwai dao.

Esekiel 10:5

Te bidi tiwai nai dabego bogo dabego pala pala wabo bomo yali, te genuai obo badu bidali we bidi augwaligo te augwali odobo usu yalio. Tama te pala pala wali, te Tigidali Bomo Elalubo Godigo i wabo tiwai yalio.

Aisaia 62:8

Genuai Bidigo nogo guni sisu muyu, bomai po dąų wali, te aga genuai bomode agai te dąų wali po mu pedelaibao. Agai po te tiwai, “Ena Genuai Bidi, te eno te boi bidi dabego nago we bidi dabego te sę dene elama, bulubo wit dabe munu ma sagasomainu me iligobeo. Tama eno te gasa tǫ kantri dabego te nago we bidigo nigibo wain ąį sagasomainogo me egobeo. Menio.

Aisaia 51:9

Genuai Bidi, nage hogodao. Nage hogodama, te nage genuai bomo dali aselama, te da tau sagasao, te nago polobadu yali tiwai yao. Nago tama nago te Rehap enani, te tamu ąįde bidali moni hasamani, te nago dwasianu dedelege miani.

Godigo Nogi Ugwaba Sabo Tęąbi Po Wabo Buku Dabe 98:1

Dago gesi balia Genuai Bidiba wao. Agai te haniani wiegi yai sę yai. Te agai genuai bomogo, tama aga tedali wiegi yai kolesagade naga, agai te hwįbo boi bidigo bomo aiyaba elaluai.

Godigo Nogi Ugwaba Sabo Tęąbi Po Wabo Buku Dabe 46:6

Te haniani tǫ pedai kantri we bidi hani dabe augwali dwai midigi selama, tama hwįyu dali yai, tama te king dabe dali, te augwa we bidi dabe me, te augwali dolaibao. Godigo genuai po dągą mu obaso, tama tǫ te olo wę tiwai pedelaibao.

Godigo Nogi Ugwaba Sabo Tęąbi Po Wabo Buku Dabe 2:5

Aga te haliga sębę posolo elama, tama augwaliba bomai po mobao. Tama agai wado po genuai weyu, te augwali wi dwai ilibao.

Jopgo Po Asęani Elalubo Buku 40:9

Te nago bomo genuai mu eno bomo tiwai tama dawe? Eno i wabo da, te be kulu wabo tiwai tama wabo dao. Nago me eno te ebo tiwai yaibawe?” wali.

1 Samuel 7:10

Te Samuelgo ofa idubadi, te Filistia dabe pąba aselama, boi hwįainu yai. Tiali goli, Genuai Bidigo te dagaludu delege be bomo mu elama, te Filistia dabego ugwadu delege be elebo odobaso, tama augwali homu mu puna pelama, tama augwali wi tedela pobadi, tama te Israel dabego augwali sualio.

Ma Dobola Sali 15:16

Genuai Bidi, nago genuai bomo augwaligo sulama, tama genuai wigo augwali mesegelama, tama augwaligo magi sę me deli yabo usugobeo. Augwali te ni tigi tiwai, olo naga dolalubadi, tama naga we bidi da ela soala silibo usu yaibao. Genuai Bidi, nago da Isipde ma sela asaligo tama da olo bugagia bidaibao.

Ma Dobola Sali 9:23

Tama Mosesgo dono ugwaba sali, tama Genuai Bidigo dagalu kulukulu omainogo yali, tama dagalude te be sele ebo ula te tǫba dulali, tama te talua ge tulubage tǫba tagala palai. Genuai Bidigo te talua ge tulubage te tigidali Isip tǫba tulumainogo yai.

Jopgo Po Asęani Elalubo Buku 38:22

“Mena tama tiali nago te ais dali, te talua ge tulubage ais si sabodubo pesage nago suai yali bogo, agawe?

Aisaia 10:5

“Ena Genuai Bidi, eno te po obao, te bulu tǫ kantri Asiria dolaibao. Megi da, te Asiria te wąbi tiwai nigilama, tama eno we bidigo ena sębę ilibo we bidi te elebao.

Aisaia 30:29

Tiali goli, Genuai Bidigo we bidi dagego da, te sę dabe ebo subo sogo da, teda dagego homu gana pabo balia te genuai lotu wabo sogo wabo tiwai waibao. Dagego te bidi dabe te Genuai Bidigo bulu duba holama, tama wiegi yai homu eyu, te genagego ona dabe elebo tiwai yaibao. Genuai Bidi da, te genuai bomai masigi tiwai dao. Tama aga te Israel dabego duala sabo pesage tiwai dao.

Aisaia 30:31

Genuai Bidigo dagą wabogo te Asiria dabe wi mu ilaibao. Tama agai aga keloa toulama, te Asiria dabe genina mu elaibao.

Aisaia 33:14

Te Saionde te dwai kolesaga ebo we bidi augwali wi elama, noma sali. Tama augwaligo e tama po obao, “Genuai Bidigo sębę da, te da te bomai isi tigidali sogo dabo isi tiwai, tama tigidali nai dabe dela silibo tiwai dao. Te da tomode de mu te isi dali bidaibawe?”

Aisaia 66:16

Magi baso meni. Te Genuai Bidigo isigo te we bidi uluyu, te agai hwą ge bainatgo te we bidi hauwa mu ela mueibao, te augwa yali dwai sę wei ponoyu, tiaibao.

Jeremaia 25:32

Tigidali Bomo Elalubo Genuai Bidigo po ma weyu, te po wai, “Odao, tigidali tǫ kantri dolaibao. Te sę te tǫ kantri me delide gagalasa, pidubadi genama, te tigidali tǫ kantri mu usu naibao. Te dolobo sę te wali moni bage tiwai, me te tulubage tiwai digibulu bulude hogodama, te tigidali tǫ pedai habu usu nama bilaibao,” wali.

Esekiel 13:13

“Tama tibaso, ena God Genuai Bidi, eno te tama po obao. Eno haliga sębę dwai mu elama, eno te genuai tulubage, me te talua ge ais tulubage, me bomai wali tagala palama, te obo dolomainu yaibao.

Joel 2:5

Te augwali bulu duba samanobo sogo, augwali te karis masigiba samanu kidagalo wabo tiwai ebao, tama te kala siago deyu, podo podo wabo tiwai ebao. Augwali te genuai ami hanigo te boi hwįainu wasibo tiwai yaibao.

Amos 1:14

Eno te moni taun Raba aiyaba isi tula palama, tama te taun bomai be dabe isi ulaibao. Te ami bidi augwa boi hwįbo sogo, te i hai bomonama weyu, tama te hwįbo bomai pedalu, te bomai wali me deli te dwai sogo pedalubo tiwai yaibao.

Ma Dobola Sali 9:24

Tama te talua ge tulubage me mu tutulu pidubadi geai, tama dagalude te be sele ebo ula te sia dabo tiwai eyu, tama te tigidali habuba pidubadi geai. Tama polobadu te Isip bage augwaligo te tiwai talua ge tulubage me subeo. Mu menio.

Josua 10:10

Te Amor dabego te Israel ami bidi dabe asobo sulama, tama Genuai Bidigo augwali wi ilama, tama augwali homu kolesaga umuna palai. Tama te Israel dabe augwaligo te Amor dabe augwali te Gibeon hanude dolobo sę ilama, tama augwaligo augwali pobeasa duluyu, te bulu du bagua sali te Bethoron teba dulai. Augwaligo te Amor dabe dolobo sę ela pidubadi, te Aseka te bogo badu usu nama, te Makeda teba dąį iligi pai.

Jopgo Po Asęani Elalubo Buku 38:23

Eno te nai dabe hagea selama muani naigote dwai kolesaga elama, gasa bidi dabe dali wąbi hwįbo gagalobo bidi dabe tigide dene ilimainu yai da.

Aisaia 4:6

Te bogwą waligo te Jerusalem bulu haluama, tama bomai giliga posolo palialuaibao. Tama me, agai Jerusalem te mone tulubage sogo bugagia bidimainu yaibao.

Aisaia 10:16

Megi da, Genuai Bidi Tigidali Bomo Elalubo Bidigo te Asiria dabebolo genuai gasi me deli augwalibolo menama, tama augwali bomo sia somainu yaibao. Tama me ma, bidigo magi nai dolainu sia nogebo tiwai eyu, agai te Asiria bagego bomo me, genuai nogi dali, mu dolaibao.

Aisaia 10:26

Ena, Genuai Bidi, Tigidali Bomo Elalubo Bidi, eno augwali bįgo elaibao, eno te Midian dabe te Orepgo Masigi nogi wabo bulude dali tiwai elali. Eno nogo ugwa selama, tama elaibao, te polobadu eno Isip dabe te tamu węde elali tiwai yaibao.

Aisaia 31:4

Genuai Bidigo enabolo e tama po wali, “Te bulu yowi laiongo sipsip kibu me elama, tudubadi da, teda aga wi elama, tama te sipsip taga peyu, wi me pogobeo. Te sipsip kibu tonalubo bidi hauwa aselama, aga tonaluyu, hae mobadi goli, aga wi me egobeo. Menio. Agai augwali dali wado elama, tama te sipsip kibu bugagia tonaluaibao. Te tama tiali goli, ena Tigidali Bomo Elalubo Genuai Bidi, te eno te bulu du Saionba hwįagasaibao, te Jerusalem bulude. Tama magi nai dabe mego ena togolobo usu me egobeo.

Aisaia 52:10

Genuai Bidigo agai bomo hania ola mayu, te tigidali tǫ kantrigo sumainu yaibao. Dago Godigo te aga we bidi dabe ma saibao, tama te tigidali tǫde we bidigo sueibao.

Aisaia 66:15

Te dagego Genuai Bidi te sia dali asobo sueibao, te aga karisde dugulama, bomonama, umagia mu udayu, te bomai wali asobo tiwai yaibao. Te aga haliga sębę ebo siago te aga boi bidi dabe ulama, te augwali mu silaibao.