Aisaia 30:15 - Godigo dwagi yai po buku

¹⁵ God, Israel dabego Genuai Bidi, aga te Wiegi Yai Boma Pai Kolesaga Naga Ebo God dao. Agai e tama po wali, “Dage bugagia bidabo sunumi da, e tama dao. Dage enaba ma aselama, tama dage bugagia homu nagame elama, bidiąo. Tama dagego ena deli naga wali asiąo. Tama eno deli naga dage tau saibao. Tama eno dage ma aselama, tama dage bugagia tigidali sogo bomo elama, bidaibao.” Godigo te tama po wali. Tiali goli, dagego agai te po wali pabo hagela mu yali.

Aisaia 30:15 Referans Kwoze

Aisaia 32:17

Tama te doloba pai kolesagago te bidi hasi godolo ebo kolesaga ilaibao. Tama te we bidi wi me isąma elama, tama augwali tigidali sogo bugagia dili elama, dolaluaibao.

Dwagi Yai Gesi Po Lukgo Asęani 13:34

Aua, dage Jerusalem bage dao. God agai po ola mabo bidi dabe dageba tagala palali. Tialima, dagego augwali ela muani, te masigi dabe sąyu, eleyu yali. Tama hauwa sogo eno homugo eno dage deliba sisinai hagede, pagia somainu, te ba kakaruk kimi aga gou dabe bogo dologode munama, bogogo bea sabo ąǫ tiwai. Tiali goli dagego hagelabo wali.

Dwagi Yai Gesi Po Jongo Asęani 5:40

Tiali digi dage enaba aselama, bidabo bomo sagasobo hagela homu ebo dao,” te po wai.

Tuni Bidi Dabego Po Elalubo Buku Deli 5:20

Te boi hwįgi pabo sogo te Israel dabe augwaligo Godiba gedu haluasa po weyu hanalu te augwali tau somainu yali. Tama Godigo augwali tau mu selama, tama augwaligo te boi bidi dabe aiyaba elaluali. Te Israel dabego homu kolesaga bomo elama, te Godigo augwali tau somainu ebaso, tialima agai augwali tau salio.

Tuni Bidi Dabego Po Elalubo Buku Si 16:8

Nago koneani, polobadu te kantri Sudan me kantri Libia ami sigo nage dali boi hwįagasai dao. Augwaligo ami sibi hauwa mu elaluyu, me augwaligo karis hauwa elaluyu, me augwaligo ami hani hauwa te hosde dualama boi hwįyu yai dao. Tiali goli te sogo nago Genuai Bidiba homu dąų olama, tama nago agabolo nage tau sao po hanalu wai dao. Tama Genuai Bidigo nagebolo bomo menama, tama nago augwali aiyaba elaluai dao.

Tuni Bidi Dabego Po Elalubo Buku Si 32:8

Te Asiria king bidigo bomo te bidi dabede sali dao. Tiali goli dago bomo te Genuai Bidi dago Godidu te asali dao. Aga da dali bidiyu, tama agai da tau saibao, tama dago boi bidi dabe aiyaba elaluaibao,” wali. Te we bidigo kingo te po odama, tama te pogo augwaligo homu dąų walali.

Aisaia 7:4

Te tuni bidibolo aga homu dąų olama bidao, tama te haniani po dabego agai homu elalumainu elamo dao po walao. Aga yaide dua bidama, tama te tuni bidi Resin aga hani dali, me te Israel dabego tuni bidi dabe dali, wi igio po wao. Te tuni bidi sigo sębę te isi pąde sula sainu dabo tiwai ebao. Te sula sainu hano naga holobo tiwai te ebao.

Hibru 12:25

Dage dua dao. Tiyu dage olo pania selama tama megi e po wabo bidigo po sela sąyabuo. Polobadu digi e tǫde Godigo bomai po te we bidi augwalibolo mani, tiali goli augwaligo agai po sela sąwai. Tama te sogo polobadu, te augwali wi me pabo usu meni eyu, tama augwa sęgę te geda sabeo. Megi God te dagalude bidiyu dabolo agai po mawai. Tama dago aga tudiba muyu da, te da wi peyu te dabolo mabo sęgę geda sabo usu egowe? Mu menio.

Matyu 23:37

“Jerusalem, Jerusalem, nago te Godigo tagala palali bidi profet dabe augwali ela munama, tama nago te Godigo nageba tagala palali sę bidi masigi sąnama, augwali me ela muanio. Hauwa sogo mu eno nago we bidi sisinainogo ebadi, te so ba kakarukgo te aga wai dabe augwali te bogo dologoba sisinibo tiwai, tiali goli dagego hagela yai dao.

Aisaia 30:7

Te Isip dabego te gasa bulu bidi dabe ili ili po olama, tau saibao po wabo dao. Tiali goli, agai te sę ebo menio. Tama tibaso, te Isip te gesi nogi te nogi ebao, ‘Te Olo Dulalubo Gula Mane dao,’ wabo,” te po wai.

Matyu 22:3

E me te tiwai yainogo tama hasia bolo agai te bidi meba te we sabode nai tuagasomainogo i wai. Tama te nai tubo sogode te aga sę ebo bidi dabe tagala palama, te nai tuagasiyu asomainogo i wagi pali. Tiali goli augwali asobo hagela elama me asobeo.

Jeremaia 23:36

Tialima, dagego te tama po ma wagimio, ‘Genuai Bidigo po sęgę mu elalubao,’ wagio. Menio. Duga pogo digi duga sęgę mobao. Te duga digi eno po selama, tama po yalelebo po wabo sę ebao, ena sesemane sogo bidibo God, ena Tigidali Bomo Elalubo Genuai Bidi, ena duga God dao.

Aisaia 30:11

Dage digibulu mu bidiyu, tama dago sunumi paligimio. Dago te Israel dabego Godigo po odobo da hagela ebao. Aga te Wiegi Yai Doloba Pai Kolesaga Naga Ebo God dao,” wali.

Ma Dobola Sali 14:14

Odao, Genuai Bidigo dage tau siyu, hwįaibao. Tiali goli, duga digi magi sę me elamuo. Dagego pedauwali dąų naga wao,” wali.

Godigo Nogi Ugwaba Sabo Tęąbi Po Wabo Buku Dabe 116:7

Megi da, eno homu dua digi ma tegalubao, magi baso meni, Genuai Bidigo enaba wiegi yai sę mu yalio.

Aisaia 28:12

Aga digi aga we bidi te tǫ badu tagalai dao. Tama agai augwalibolo te po wai dao, “Te bulude dage toma tuyu, bugagia dua bidiaganio. Tama te bidi dabe, augwaligo tigi boma pelama, augwaligo tigi hagela pobaso da, augwali hodo doliyu, te bulude dua bidagameo,” wai dao. Tiali goli, augwaligo agai po odobo hagela mu yali.

Aisaia 32:18

Tama Genuai Bidigo e tama po wali, agai we bidi dabe augwali bugagia bidiyu, augwali augwa bulude bugagia homu tegaluama, toma tuaibao. Tama augwali magi naide wi me egobeo.

Aisaia 42:24

Dego mu te sę yao po obaso, te boi bidi dabe aselama, te da Israel dabego nai dolama, wi sagasaliwe? Dego mu te da Jekopgo hani bage te augwaligo nogoba muaniwe? Te Genuai Bidigo naga dao. Magi baso meni, dago aga tudiba munama, te dwai sęgę sabo sę yai. Dago te agai wei homu ebo kolesagade dolo bilisąma, tama dago agai bomo yai po sela sąwai.

Aisaia 45:22

“Dage tigidali bulu tǫ habu we bidi dabe, dage enaba asiąo, te dage bugagia bidaibao, magi baso meni, enaduba deli ena God, te gasa god munu me bidibeo.

Aisaia 40:31

Tiali goli, te Genuai Bidiba konealubo homu dąų olama, te agai augwali tau sabo tonalubo we bidi dabe, augwali te bomo sesemane elalu bidaibao. Tama augwali bomonama eyu, te ba kemodage bola pabo tiwai yaibao. Te augwali udalama, te augwali homu hę me egobeo, te augwali bilidu, te bomo kimi me isigobeo.