Aisaia 3:10 - Godigo dwagi yai po buku

¹⁰ Te dwagi yai doloba pai kolesaga ebo we bidibolo te dwagi yai homu yao po walao. Magi baso meni, augwali dwagi yai pe saibao, augwa yali dwagi yai sęde.

Aisaia 3:10 Referans Kwoze

Hibru 6:10

God aga te dolo osola subo konesiąbo bidi meni. Agai homugo dagego te yali tigidali sęde te homu me gegeda peyu, me tagalogobeo. Menio. Dagego duga homugo agade kone palobadi tama agade dwagi yai homu eyu, tama te tialigo te dage homu hodolama tama agai we bidi augwali te dagego tau sidu geduai dao. Tama te tiwai kolesaga dagego me ela pabo dao.

Kolesaga Koneai Bidigo Pusali Po Elalubo Buku 8:12

Me sogo te dwai sęgę sabo sę ebo bidi dabego te dwai sę hauwa yali, tiali goli augwali bobobage sogo sesabi elama, te tǫde bidu, te augwali polo me isibeo. Eno koneani, te bidi dabego te tama po waibao, “Te God dologoba bidigi pali bidi, te bugagia bidibo dao,” po wabo dao.

Malakai 3:18

Tama tiyu, te sogo te ena wali pabo doloba pai we bidiba eno ebo kolesaga ma suiyagameo, te eno dwai bidi dabeba ebo kolesaga, te augwaligo eno po sela sąbo dao, te bageba me eno ebo kolesaga suiyagameo,” wali.

Sefanaia 2:3

Dage we bidi hamaga isąnama Genuai Bidigo po sela sąsiama ebo we bidi, dage agaba asiąo. Dagego duga digi aiyaba elaluama, tama doloba pai kolesaga naga iyąo. Tialima, dagego te tama tiyu da, teda Genuai Bidigo sębę elama, tama te dwai pe te dwai we bidi dabebolo wei ponobo sogo dage da dologobeo.

Jeremaia 15:11

Tialima, Genuai Bidigo enabolo te tiwai po wali, “Haliga sęgę ebo tagalao. Te eno nage tau siyu, te nage bugagia bidaibao. Te eno boi bidi dabe nageba asomainu eyu, te nago augwali sęgę ebo sogo, me te dwai sogo, augwali gegebo sogo te nago augwali tau somainu hanalu wagasomainogo ilaibao,” wali.

Esekiel 9:4

tama agabolo te tama i walio, “Nage te Jerusalem taun pedai tigidaliba pelama, te augwa abagi dabego te taun tomode dwai kolesaga ebaso, te dwai haliga eyu, te moni homu ebo we bidi tigidalide nago te augwali gesabidide te dąį muna muna pao,” po walio.

Tigidali Nai Gagalama Nigali Side 18:25

Nago te wiegi yai bidi dabe augwali te dwai bidi dabe augwali dali elainu ebo. Te wiegi yai egobeo. Nago tama tiwai me elamuo. Tiyu, te wiegi yai bidi dabe te dwai bidi dabe augwali dali dolabuo. Te dwai mu dao. Nage da, te tigidali tǫ pedaide po tų odobo bidi dao. Nago te doloba pai kolesaga wali pomainogo egobewe?” Abrahamgo te po hanalu wali.

Ma Dobola Sali 1:20

Tama Godigo te we si dali dwagi yai sę yali. Augwali sigo God dali wi yai, tama agai te we augwali sigo me wai ame nomainogo yai. Tama Israel hani augwali hauwa mu pedaliyu, tama augwali bomo yai bidi hani pedelai.

Bomai Po 12:25

Tialima, dagego te hasa dabego kaneme tusiąma ebaso da, teda Genuai Bidigo dagego kolesaga godolo yaibao. Tama agai dagego sę dabe me agai wiegi yai pedalomainogo yaibao.

Godigo Nogi Ugwaba Sabo Tęąbi Po Wabo Buku Dabe 58:11

Tama gasa bidi dabego te tama po waibao, “Mu dao, Godigo te doloba pai bidi dabeba wiegi yai sę wei pona mawai. Mu tama, God bidibao, tama agai te tigidali bage te doloba pai po tųgo dagalaibao,” waibao

Bugagia Bidibo Kolesagade Po Asęai Buku 12:14

Te nago po wabo me, nago sę ebo me, te wiegi yai eyu da, teda tego nage nai sobaso, te nage bugagia bidaibao.

Bugagia Bidibo Kolesagade Po Asęai Buku 13:21

Te dwai sęgęgo te dwai sę ebo bidi dabe deliba gesabidi ununaibao. Tiali goli, te doloba pai bidi dabego augwa te wiegi yai nai te augwa mone sabo tiwai ebo dao.

Bugagia Bidibo Kolesagade Po Asęai Buku 18:21

Te nago pogo bidi bugagia bidabo bomo elalubao. Me ma, nago pogo te bidi dolabo bomo me elalubao. Tama tiyu, nago wiegi yai po wabo kolesaga wei eyu da, te nage bugagia bidaibao.

Aisaia 54:17

Tiali goli, te hwįbo nai dabe me deligo nage me dologobeo. Te nage bomonama dolalu, te bidi dabego nageba haniani po kisilama wabo po te wei ponoyu, aiyaba elalueibao. Eno te kolesagade ena sę bidi dabe tigidali bugagia tonalu, te augwali doloba pai we bidi pedelaibao. Ena Genuai Bidi, eno te po wai dao.”

Jeremaia 7:23

Eno augwaliba te tiwai po me wali, ‘Dagego eno po wali asobaso da, te ena dagego God bidiyu, te dage eno hani we bidi bidaibao. Te eno dagebolo te wali pao po wabo kolesaga tigidali, te dagego wali piąo, tama te dage bugagia bidaibao.’

Jeremaia 21:14

Ena Genuai Bidi, eno po dolo obao, te eno dwai dene dageba mawaibao, te duga yali dwai kolesaga wei ponaibao. Te eno te Jerusalem taunde sia pedalumainu ilaibao, te moni bulu tomode isi dabo tiwai eyu, tama te isigo kingo be deyu, te Jerusalem tigidali be daibao,” te po wai dao.

Jeremaia 22:15

“King, nago te ni nami sida hauwa elalu, tama tego nage te wiegi yai king pedelaiba homu eba, agawe? Nago aya aga te nai me ąį tuyu, pemene yali. Tialima, agai doloba pai kolesaga te we bidi dabeba yalio. Tama tibaso, aga bidali wiegi yai yai dao.

Esekiel 18:20

Te sęgę sali bidi, te aga naga isaibao. Te ayago sęgę sai baso da, teda te ogwago mena dwai sę me isąwani, tama agai te ayago yali sęgę tolabo usu munu me egobeo. Te ogwago dwai sę ebaso da, teda ayago te magi dwai sę me isąbaso, te ogwago sęgę agai me tologobeo. Doloba pai bidigo te aga yali doloba pai kolesagade te wiegi yai mone sabo tiwai eyu, te dwai sę ebo bidigo te aga yali dwai kolesagade sęgę tolobo dao,” wali.

Maika 7:13

Tiali goli, te tǫ kantri dabe te olo masigi kemi tǫ pesage pedelaibao, magi baso meni, tede bidali we bidi dabego te dwai kolesaga hauwa yalio.

Bugagia Bidibo Kolesagade Po Asęai Buku 10:6

Godigo te doloba pai bidi dabeba te wiegi yai sę bugagia yaibao. Tiali goli, te dwai bidigo pogo te gasa bidi dolabo homu eyu, te aga dwai kolesaga te geme dualalubo dao.

Dwagi Yai Gesi Po Lukgo Asęani 19:19

Tama te genuai bidigo agabolo te po wai, ‘Nago me te be nani a naga te nago tonaluao.’”