Aisaia 27:11 - Godigo dwagi yai po buku

¹¹ Tama te ni nologo dabe sasia pabo si da, te ni nologo dabe mobia pelama, tǫba tulalubo si da, te we dabe sibigo isi nogainu gigila sagasobo dao. Te tobage dwai sogo pedalali. Magi baso meni. Te hanu we bidi augwali bidi po sela sąbo we bidi mu. Tama tibaso, God, te aga te God augwali deli we bidi hani pedalomainu ilai goli, agai augwali godolo elama, augwali me hobede me yai menio.

Aisaia 27:11 Referans Kwoze

Jeremaia 8:7

Te tobage genuai ba me dwasianu bago te augwa me badu me bidagasobo sogo koneama, te taga pabo sogo me konebo dao. Tiali goli, eno we bidi augwaligo te ena Genuai Bidi eno bomai po homugo konebeo,” wali.

Aisaia 44:24

“Ena Genuai Bidi, ena dage tudibadu pogwalu, te dage ma dobola sabo bidi, eno naga eno sisilama, dage dąį ilali, te ena hani da olama, te dage e tǫba pedalisiąbadi tama tiali. Eno te tiwai po dageba wainu ebao. Enaduba deligo naga eno te tigidali nai pedela silimainu ilali. Eno naga eno te dagalu me tǫ nigilama, te augwali bidabo pesageba munama, te megi elalubo dao.

Aisaia 43:7

Dage te eno nogi elalubo hani mu da, te ena digi eno dage nigali, te gasa hani dabego dage sulama, te enaba genuai nogi momainu ebo dao,” wali.

Aisaia 43:1

Dage Israel dabe, dage Jekopgo hani, Genuai Bidigo dage deli hani pedalumainu ilali, agai te tiwai po wai, “Dage wi igio, magi baso meni, eno dage ma sali dao. Eno dageba nogi menama, tama dage te ena da olama, sa muyu dąį ilai dao.

Aisaia 1:3

Te kau kibu dabego augwa aya konebo dao, me te donki kibu dabego augwa ayago nai mabo pesage konebo dao. Tiali goli, eno Israel we bidigo kolesaga menio. Te kau kibu de donki kibu sigo kolesagago augwaligo kolesaga edelalio,” wali.

Jems 2:13

Magi baso menio. Bidi me deligo gasa bidi homu dene eyu tau sisiąyu bidali, tama te sogo Godigo we bidi dagalobode, te gasa bidi homu dene esiąyu tau sisąyani te bidi aga Godigo homu dene eyu tau sogobeo. Te menio. Tiali goli, niwai bidi agai gasa bidi homu dene elama augwali tau sali te bidi, te usu da, Godigo te bidi tau siyu, tama te Godigo bidi dagalobode te tiwai bidi aga te po tų dali te sęgę me dene sogobeo. Te menio.

1 Tesalonaika 2:16

Tama boi bidi mu bidiyu, augwaligo dago sę yabo tų pania sabo sę ebo dao. Tama te Juda hani isiąwai we bidi Godigo augwali ma somainogo, dago Godigo po augwalibolo pusainogo ebadi, te Juda bage augwaligo da dali “Te po wagio,” wabo dao. Tama tiyu, augwaligo dwai sę yali te hauwa mu yai dao, te genagi naigo pągąwai tiwai. Tialima, God agai moni sębę ebo augwali pąba mu bidagasai elalubao.

Polgo Po Pas Rom Dabeba Asęani 1:31

Te augwaligo kolesaga me konebeo. Tama augwaligo gasa bidibolo te dąų wali po wai, tiali goli augwaligo te augwa po wali me pisąwai. Augwaligo te augwa deli kanemego ame nani bage augwali me godolo me egobeo. Augwaligo te gasa bidi dabe homu dene eyu tau me magobeo.

Dwagi Yai Gesi Po Jongo Asęani 15:6

Bidi me deli ena dali wadoloyu bidisiąyu da, te aga da te sasia pai ni nologo tiwai dao. Te augwaligo te tobage ni nologo sela sąbo dao. Tama sela sąnama, augwaligo te sasia pai nologo sisinama, tama augwaligo siaba sąnama, dabo dao.

Matyu 13:19

Te Godigo we bidi tonalubo kolesagade po wabo odobo digi te po page koneyu dąų wasiąwai bidi, te bidi te aga da te soabo tųba olo tudulaluali nai wai ge tiwai dao. Tama te Satan agaba aselama, tama polo te po Godigo aga homuba budali po te Satango te dagala sabo dao.

Matyu 13:15

Magi baso meni. E we bidi hanigo homu kolesaga te puna pai dao. Tama augwaligo ologo po odobo te hagela eyu, tama augwaligo augwa gedu palia sai. Tiyu augwaligo gedugo te magi nai me deli suidali weyu tiali, tama augwaligo ologo po odidali weyu tiali, tama augwaligo homude te po page ma koneama, tama augwali begesa enaba ma aselama, te eno augwali usu ma ilidali weyu augwaligo tama kolesaga yai dao,’ Aisaiago Godigo wali po augwalide tama asęai dao.

Matyu 3:10

Tama megi te sigi hwą ni pagede muai elalubao, te ni gelemainogo. Tama te nigo wiegi yai nai du walisiąbaso da, te tobage ni tigidali augwaligo gelama siaba sąwaibao.”

Hosea 4:6

Te we bidi dabego ena bugagia konesiąbaso, augwaligo ena wali me asobeo, tama teyu, te augwali dolaibao,” wai. “Dage pris dabego ena wali me asisąyu, tama dagego eno po sela sąwanio. Tama tiyu, te eno dage sela sąwaibao. Tama eno te dagego wai dabe me te eno pris pedalumainu me egobeo,” wai dao.

Esekiel 20:47

“Nago te buluba po walu, te Genuai Bidi, ena Godigo poba olo bugagia muao po walao. Eno po e tiwai, ‘Odao. Eno isi nogobao, te siago nago ni tigidali daibao, te sasia pai dabe, ma sasisąwai me, tagalao. Te mena nai me deligo te isi sula sawainu ebo usu egobeo. Te isi dabo te saut badu gagalama, te not badu pedaiba usu nigi pelama, te isigo tigidali we bidigo tigi posolo yaibao.

Esekiel 9:10

Tama tibaso, eno augwalide te homu dene elama tau sabo kolesaga eyu, te eno augwali me deli gogola sula me tagalogobeo. Menio. Te augwaligo gasa bidi dabe augwaliba yali dwai kolesaga tiwai te eno augwaliba me yaibao,” te po wai dao.

Jeremaia 4:22

Genuai Bidigo tama po wali, “Eno we bidigo homu kolesaga wiegi yai me elalubeo. Augwaligo ena me konebeo. Augwali te homu kolesaga konesiąwai wai puluba tiwai elalubao, te augwali umuna pai elalubao. Augwaligo te dwai sę ebo mu konea pai elaluali, tialima augwaligo te wiegi yai kolesaga ebo me konebeo,” wali.

Aisaia 44:2

Eno dage te deli hani we bidi pedalumainu ilali. Eno dage sisi ilama, dage dąį iliyu, te dage tǫde pedalisiąbadi, te sogo te dage ena hani da olama, dąį ilibo tiwai yali. Te eno dage negeyu, tonalua asali, te megi e sogoba usu nagasobao. Ena digi eno dage dąį ilama, tama dage eno doloba pai sę bidi bidibao. Tama tialima, ena Genuai Bidi, eno te po obao, dage wi me elamu dao.

Aisaia 9:17

Tigidali we bidi God tagalama, God dologode bidisąbo bidi polo gagawai dao. Augwaligo tigidali po dabe, kolesaga dabe mu dwai mu dao. Tama tibaso, Genuai Bidigo tigidali mu dolaibao. Agai te gesi bidi me bidimainu me sula tagalogobeo. Tama agai te we sibi me hobede me egobeo. Wilawe we dabe, me te tiana wai dabe, agai hobede me egobeo. Genuai Bidi agai te tama tiaibao. Tiali goli, tego agai sębę siligobeo. Menio. Agai nogo me balalubao.

Godigo Nogi Ugwaba Sabo Tęąbi Po Wabo Buku Dabe 106:40

Tialima, Genuai Bidigo aga we bidi dabeba te wado mu elama, tama agai augwali wei ma ebeo.

Bomai Po 4:6

Dagego te bomai po dabe mu tama wali piąo. Tama te gasa bulu bidi dabego te tiwai sę ebo konemainao, te dagego wiegi yai kolesaga elaluyu, me wiegi yai homu kolesaga hauwa elaluyu ebo augwaligo koneaibao. Tialima, augwaligo dagego te bomai po elalubo po odobo sogo, augwaligo te po waibao, ‘Tegoba! Te we bidi augwaligo wiegi yai kolesaga, me wiegi yai homu kolesaga elalubao,’ po waibao. ‘Augwaligo da mu edelama, mu elalubao,’ waibao,” Mosesgo te po wai.

Polgo Po Pas Rom Dabeba Asęani 1:28

Augwaligo te God augwa homude dąų ola sabo hagela homu yaligo da, teda Godigo augwali te augwa dwai kolesaga page tolalubo bidigo kolesaga wali pomainogo sula tagalalio. Tama tibaso, augwaligo te bidigo isąwai doloba pisąwai haniani kolesaga yai.

Aisaia 5:13

Tama tibaso, Genuai Bidigo te po wali, “Mu tama, eno we bidi dabe dagego ena konebo hagela yali. Tama tibaso, boi bidi dabego dage gasa buluba me kalabus elama, odasa paibao. Te genuai bidi dabe nai menia saibao. Te olo we bidi dabe te ąį nogone eyu bidaibao. Tama augwali mu dolaibao.

Aisaia 18:5

Te mu tama, megi te bulu te ni wain bomona holama, tama dudili elama, tama telega pelama, te wain du tau yabo magą ebo tiwai dao. Tialigo Genuai Bidigo te bulu dolaibao, te bidigo sębę elama, te ni wain nologo te wain du tau isąbadi toga sabo tiwai yaibao, te nedu du sabo magą isąbadi toga sabo tiwai yaibao.

Jeremaia 11:16

Polobadu eno te po wali, dage Israel dabe te wiegi yai du walobo ni oliv me deli tiwai elalubao, wali. Tiali goli, megi da, eno dage dolaibao, te dagalude bomonama kulukulu weyu, te be sele eyu, te ni oliv doliyu, te siago dabo tiwai elama, te nologo togwa pabo tiwai yaibao.

Jeremaia 13:14

Tama te we bidi dabe eno dolama, te bidigo tǫgo nigali sospen sene manama elebaso, te tigidali alua paibao. Te tigidali we bidi dolaibao, te ida aya me, wai puluba dabe me, dolaibao. Eno olo mu tau sabo wiegi yai kolesaga eyu, hobede eyu, augwali gogoliyu, sula tagalama bidimainu me egobeo. Mu menio. Eno te augwali dolaibao.’ Ena Genuai Bidi, eno te po wai dao,” wali.

Jeremaia 16:5

“Magi baso meni. Ena Genuai Bidi, eno te tama po ma obao. Jeremaia, nage te we bidi dabe bidalubo digi pelama, te isali bidi dabede gela munu me wagi pigio. Te naga digi gela weyu, hobede yai balia me olamuo, magi baso meni, eno te we bidi bugagia bidimainu me iligobeo. Te eno wiegi yai haliga augwaliba me isąyu, te olo tau sabo wiegi yai homu kolesaga augwaliba me magobeo. Te Genuai Bidi eno po dao.

Jeremaia 25:37

Genuai Bidi te haliga sębę umagia elama, te sipsip dabe dua tegaluama bidibo te wiegi yai kala koliai pesage dolaibao wali.

Esekiel 19:12

Tiali goli, te bidi dabego wado po weyu, aga maga gudulama, te aga tǫba degelai. Te giliga asobo badu te posolai wali aselama, te agai wai dabe tigidali boga pai. Te bidi dabego te ni nologo tigidali tologolama, tama te ni nologo dabe sasia pali te augwaligo isiba ulai dao.

Hosea 4:14

Tiali goli, te eno augwaligo ebo dwai kolesaga wei me ponogobeo,” wali. “Magi baso meni, dage bidi dabe duga digi me te tibo godigo lotu beba te penani ebo we dabeba pabo dao. Tama dage augwali dali deliba sisinama, tama te tibo godiba ofa ebo dao. Tama eno po dolo dageba te tiwai wali, ‘Dage te we bidi te wiegi yai homu kolesaga elalusiąbo we bidi, te dage dolaibao.’ Eno te po wali.”