Aisaia 26:21 - Godigo dwagi yai po buku

²¹ Suao, Genuai Bidi aga bulu dagalu tagalama, e tǫba te asobao, te e tǫde we bidi dene mawainu, tama augwa yali dwai sę wei ponainu. Tama tǫgo te bidi dabego kaneme me geme dualogobeo, te gasa bidi dabego augwali ela wialali dabe. Menio. Agai te bidi dabego yali dwai kolesaga dabe sese tama haninaibao.

Aisaia 26:21 Referans Kwoze

Aisaia 18:4

Magi baso meni, Genuai Bidigo enabolo e tama po walali, “Ena Genuai Bidi, ena ena bulu dagalude bidiyu, tama eno we bidi dabego ebo kolesaga subo sogo da, ena haliga nagame elama, tama eno olo tama tonaluaibao. Eno homu polo hogodama, augwali polo dolabo homu ebo menio. Meni. Eno dua tonaluyu, tama te giliga nanama, tama masigi sanede bomona nanebo tiwai elama, tama te agai posolo ugwaba dua holobo ąǫ ebo dao. Tiali goli, isi mu dadala sabe. Tama me ma, ena te hulide te nai ininama, sabo magąde te tulubo u meni yai tulubage tulubo tiwai ebo dao.”

Aisaia 13:11

Genuai Bidigo te po wali, “E tǫ te we bidigo dwai sęgęgo pągąna pali. Tama tibaso, eno augwali dene mawaibao, te augwaligo dwai sę yali wei ponoyu yaibao. Te bidi dabe augwa digi augwa nogi ugwaba sabo bidi dabego nogieno aiyaba elaluaibao. Me, homu dene isiąyu, te augwaligo gasa bidi dabe aiyaba elalubo bidi dabe me.

Jopgo Po Asęani Elalubo Buku 16:18

“Tǫ, odao. Ena isibo sogo te eno kaneme tulalubo si da, nago te kaneme haluamo. Menio. Nago te kaneme pepeli dilide elalumainu sula tagalao. Tama agai God i olama, te sęgę dodolomai yaibao.

Kraisgo Geme Dualali Sę Pedelabo Po Jonbolo Ola Mani 16:6

Te dwai sę ebo bidi dabe augwaligo te nago po odobo we bidi augwali dali, te nago po pusubo bidi dabe dali ela muyu, tama augwaligo kaneme gea sąwai dao. Tama nago te dwai bidi dabe augwalibolo kaneme mayu, tama augwa te kaneme tumainao. Augwaligo augwa te dwai sę yalide dolo mu te dene sabo dao,” te po te ąį tonalubo ensel bidigo wai.

Dwagi Yai Gesi Po Lukgo Asęani 11:50

Tama tibaso, megi bidalubo bage te tigidali Godigo po pusa mabo bidi dabebolo polobadu bidali we bidigo yali sę wei siyu, dene saibao. Te Godigo e tǫ nigali sogo gagalasa asali, te megi e bidibo sogoba usu nagasu, te yali dwai sęgę te megi bidalubo we bidi dabede wei ponaibao.

Dwagi Yai Gesi Po Lukgo Asęani 11:40

Dage da, te mu umawai bage te yabao. Te nai dabe bulu badu nigali Godigo te nai dabe tomo badu me nigibe homu eba, agawe?

Esekiel 8:6

Godigo enabolo te tiwai po walio, “Tǫde bidio, nago te Israel we bidi augwaligo dwai kolesaga ebo suao. Te tebo kolesagade augwaligo ena te eno bede ela gudulama, te ena augwalide digibulu bidabo sę ilibao. Te nosali nago augwaligo te gasa dwai kolesaga mu ebo sueibao, te nago megi subo dwai kolesaga te aiyaba mu elalueibao,” te po wai dao.

Kraisgo Geme Dualali Sę Pedelabo Po Jonbolo Ola Mani 18:24

“Tama Godigo suali, te Babilon hanude bidibo we bidi augwaligo agai po ola mabo bidi dabe dali, te agai po wali pabo we bidi dali ela mubo sę yai. Tama tigidali tǫde augwaligo we bidi meba dali boi bidi eyu, augwali ela muyu, tama te dwai sę ebo page te bulu Babilonde naga elalubo dao. Tama tibaso, te hanu dola silai dao,” te moni bomo elalubo ensel mobo bidigo te po wai.

Jopgo Po Asęani Elalubo Buku 20:27

Dagalu aga digi te bidi dabego sęgę hanilaibao. Tama tǫgo me po tų ela mawaibao.

Aisaia 10:3

Te Godigo dagego dwai kolesaga wei ponabo sogo bodolu muani, te sogoba sabalobo si, dagego magi sę yaibawe? Te agai gasa bulu me te bomai wali tiwai aselama, dage dolomainu ebaso, dagego magi sę yaibawe? Dage te deba udalama, dage tau somainu yaibawe? Tama te nai dabe hauwa dagego sali, te nai dabe dagego menade mugi paibawe?

Aisaia 22:14

Tigidali Bomo Elalubo Genuai Bidi aga digi ena pageba mu aselama, eno olode te po mu tama walio, “Eno dagego te dwai sęgę gegeda sągobeo, te dage isiboba usu nigi paibao,” wali. Te da, te Godigo po dao, Tigidali Bomo Elalubo Genuai Bidigo po.

Aisaia 29:6

Tigidali Bomo Elalubo Genuai Bidi te bomai wali dali, tǫ mali dali asaibao. Tama te be kulu weyu, te genuai kulukulu dwai mu waibao. Tama agai te tigidali nai dabe ulabo isi dwai dali sesaibao.

Aisaia 65:6

“Suao. Ena Genuai Bidi, eno te dage dwai we bidi dabego ebo dwai sę tigidali te eno bukude asęani. Tede eno sagia sogobeo. Menio. Te eno dageba dwai dene mayu, te duga yali dwai sę tigidalide dolo mu wei ponaibao.

Aisaia 65:7

Te eno duga yali sęgo sęgę dali, te duga bulai wąį nǫų dabego yali sęgę dali tolomainu yaibao. Te duga bulai wąį nǫų dabe te lotu wabo pesage te bulu du bageba holama, tama augwa te wiegi yai hano denami ilibo ofa eyu, tama augwa te haniani dwai kolesaga ena gedude yali. Tama eno augwa yali dwai sę tigidali usu nama, dolo mu te wei ponaibao,” wali.

Aisaia 66:6

Te taun tomode genuai i weyu, te eno be tomode kulukulu wabo odao. Te eno i me kulukulu weyu ebao, te Genuai Bidi dao. Eno te ena boi bidi dabeba dwai dene mayu, te augwa yali dwai kolesaga wei ponaibao,” wali.