Aisaia 24:18 - Godigo dwagi yai po buku

¹⁸ Tama bidigo te dwai sogo te asobao wabo po odama, wi pobaso da, aga te tǫ dedageba tulaluaibao. Tama aga te tǫ dedagede ma hola aselama, ma wi painu yali da, teda aga te sųgų sabo wade ma tola saibao. Te dagalude sunumi dabe dala pelama, tama te wę e tǫba gealuaibao. Tama tǫ pagede mali yaibao.

Aisaia 24:18 Referans Kwoze

Godigo Nogi Ugwaba Sabo Tęąbi Po Wabo Buku Dabe 18:7

Tialima, megi da, Genuai Bidigo wado po elalubao. Tama agai te tǫ mali mu ilali. Tama te bulu du page dabe te mumunu ela silali.

Tigidali Nai Gagalama Nigali Side 7:11

Te Noa te kibu be hauwa mu 600 bidama, tama te si wabo polua, dei 17 nogo si olama, sągągo a naga, me badu sągągo si tama side, te tǫ dologode te tigidali genuai wę dabe te sunumi dala pela silama, tama wę ugwaba pedelali. Tama dagalude me te tigidali dedage dala pelama, tama wę aiyaba gelalio.

Amos 5:19

Te si asobo, dage geda mugobeo. E tiwai yaibao. Te bidi me deli te dwai hasa laionde wi pabo tiwai elama, tama aga te laion hasa tagalama, wi pobadi, te gasa moni dwai hasa me nogi bea te aga deliba gesabidi si unulama, tama beago aga gąų kelainogo yali. Tama te bidi te hasa bea wi pelama, tama aga be tomoba wi peyu, sana pabo homu elama, bugagia bidaiba homu yai. Tama toma tumainogo, aga te be dagaba nogo tola sigi pabo tiwai yali, tiali goli, tegoba, te be dagade bidali dwai hasamanigo aga gąų kelai dao, tama te bidi isai dao.

Godigo Nogi Ugwaba Sabo Tęąbi Po Wabo Buku Dabe 18:15

Genuai Bidi, nago te dwai sę ebo bidi dabeba wado ebo sogo, te bomai waligo augwali degelibo tiwai ebao. Tama te tamu ąį dologode tigidali tǫ te bulu ulaba hania pedelali, tama te tǫ page me te hania pedelalio.

Jopgo Po Asęani Elalubo Buku 20:24

Agai boi bidi dabe teba tagala palaiba. Te augwa hwįbo ge hwą dali, ene te brasgo nigai dali, tama tagala palaibao. Tama te dwai bidi te boi bidigo hwą tolasa asobo sulama, wi pobaso da, teda te boi bidi dabego enesigi selama, ene te bras ula yaigo enaibao.

Te Israel me Juda Hani Sigo Tuni Bidigo Po Elalubo Buku Si 7:2

Tama te king tonaluyu tau sabo gavman ofisa bidi me deli aga te king dali asali. Te bidigo te Elisago wali po odali, awe, tama agai te po wei e tama ponani, “Tagalao. Tialima, Genuai Bidi God aga digi te dagalude elalubo moni bakstua tų dalama, te umabo nai daba gealugi sogo da, teda eno homugo dago e tiwai dwasianu monego dago nai abelebo me usu egi menigi da,” wali. Tama Elisago te gavman ofisa bidibolo te po wai, “Mu tama dao, tama nago te nai pedalobo suagameo, tiali goli nago te wit nai dabe munu me tugobeo,” Elisago te po wai.

Tigidali Nai Gagalama Nigali Side 19:24

Tama Yawego digi te posolo yai masigi, me te sia dali te Sodom de Gomora hanu siba te dagaludu aiyaba tula palali.

Kolesaga Koneai Bidigo Pusali Po Elalubo Buku 9:12

Te magi genuai sęgę daba pedelabo dago konebeo. Te dwai sęgęgo da polo tama mu deli sogo gegaibao, te hagane mubo nai wago te sųgų ma ba tola sabo tiwai ebo dao.

Aisaia 2:19

Tama te sogo Genuai Bidigo te tǫ mali iliyu, tama e tǫde nai dabe wi mu ilaibao. Tama te we bidi dabe me wi mu elama, tama masigi dudulaweba me, tǫ dudulaweba me, wi duala sigi paibao. Te augwaligo Genuai Bidi aga bomo dali, genuai ula dali, asobo augwaligo suidali weyu.

Aisaia 2:21

Tama te sogo da, Genuai Bidigo te tǫ mali iliyu, tama tǫde wi mu yabo sę dabe yaibao. Tama te we bidi dabe me wi mu elama, te masigi ola beba me, bulu du dologode elalubo masigi dedageba dabe wi duala sigi paibao. Te augwaligo te Genuai Bidi aga ula dali, bomo dali, asobo augwaligo suidali weyu.

Aisaia 8:14

Ena te we bidigo geme duala sabo bomai pesage dao. Tiali goli, ena te Israel de Juda sigo we bidigo sunumide masigi tiwai bidibao. Tama augwali te masigide sągą dani tuą palama, tama tulaluama, tama augwali dolaibao. Tama te Jerusalem we bidide da, te ena te kę tiwai, augwali tola sabo bidibao. Tama augwali hauwa te kęde tola saibao,” wali.

Aisaia 13:13

Tama te sogo ena Tigidali Bomo Elalubo Genuai Bidi, ena te eno genuai posolai sębę dali mu asaibao. Tama eno dagalu dali, tǫ dali si mali ilaibao. Tama tǫ iba kila selama, tama aga pesage taga paibao.”

Aisaia 42:22

Tiali goli, megi dage Israel dwai mu bidibao. Te boi bidi dabego dage dolagaselama, te dagego doado bage wi sela palio. Te augwaligo dage me sela pelama, tama dage te be dabede, me tǫ dedage dabede kalabus elama, elaluali. Te dage augwaligo nogode ma dobola sabo bidi deli me meni yai elalubao.

Jeremaia 48:43

Ena Genuai Bidi, eno po dolo obao, te bidi wi ilibo nai dabe me, te genuai tǫ dedage me, hagani mubo wa dabe te elalubao, te Moap we bidi dabe dage dolabo nai dabe dao.

Jeremaia 48:44

Te bidi wi ilibo naide te bidi me deli wi pobaso da, teda aga te genuai dedageba tulalueibao. Te aga dedage tagalama, te buluba teda holobo si da, teda aga te hagani mubo wago tola saibao. Ena Genuai Bidigo te Moap dabe dage dolabo sogo bodolu te tama muai, tama tiyu, eno dage doalibao,” wali.

Te We Bidi Dabego Jerusalem Hagede Gela Wali 3:47

Te boi bidi dabego da elama, te da wi elama, me da tulalumainu yabo nai dabe ilalio. Tama da sese tama dolama, tagalainu yali.” Dago te tobage gedu haluasa po wainao.

Esekiel 11:8

Eno koneani, dage te boi bidi dabede, me te bainat hwąde dali wi ebao. Tialima, ena God Genuai Bidigo, eno po dolo dageba obao, eno te augwaligo dage elagasomainogo tagala palaibao,” wali.

Esekiel 12:13

“Tiali goli, eno ba bono gaga kekelama, tama king tego tola saibao. Tialima, eno aga te Babilon taunba sela paibao, tiali goli agai e bulu gesabidi me sugobeo. Aga te Babilonde bididubadi aga isibo sogoba usu naibao.

Esekiel 15:7

Eno augwaliba boi bidi elama, dwai dene mawaibao. Mu tama, te hasia siago augwali ulusiąwani, tiali goli megi gasa isi dabogo te augwali mu ulaibao. Te eno augwaliba dwai dene mena silama da, tialima nage dali, te Israel nage dali bidibo bage, te dagego te tiwai bugagia koneaibao, ena digi ena Genuai Bidi dao.

Godigo Nogi Ugwaba Sabo Tęąbi Po Wabo Buku Dabe 18:8

Te hano aga gunide pedelali. Tama aga pedauwalide dabo siago te doado bage hauwa ulali.

Amos 5:18

Dage tigidaligo homugo te Genuai Bidigo Bodolu Side asesa pedalumainao homu ebao. Tiali goli, dage hobede mu ebao. Mena wiegi yai sę mu dageba te side pedelaibawe? Dagego homugo te be posobo si da homu eba, agawe? Mu menio. Te be hulialubo side naga dao.