Aisaia 23:13 - Godigo dwagi yai po buku

¹³ Te Babilon dabego tǫ suiąo, te bidi dabe me tede bidibeo. Magi baso meni. Te Asiria dabego augwaligo bulu dolai dao. Tama augwaligo bulu te bulu hasa dabego bulu gagalai dao. Te Asiria dabego te augwaligo hanu obo bobegelama, sai ela pai dao. Tama augwali te sai dabede dolaluyu, tama augwali dali hwį yai dao. Tama augwaligo te hanu dabego bomai obo dabe hųgiai dao. Tama te hanu dabe sese tama dolai dao.

Aisaia 23:13 Referans Kwoze

Godigo Sęba Tagala Palai Bidigo Po 7:4

Tama te po obaso, Abraham te Kaldia tǫ taga pelama, te Haran tǫba bidigi pali. Tede Abraham aga aya isali. Isilama, Godigo aga te Haran tǫdu tagala palama, e tǫba da megi Israel da bidibo tǫba asali.

Habakuk 1:6

Odao. Eno te Babilon dabe augwali bomai hani mu pedelemainu ilaibao. Te bidi dabe augwali te bidi dwai dabe dao, tama augwali hwįbo bomai bidi dabe dao. Megi augwali ami bidi dabe tigidali kantri dabeba pelama, augwali polo aiyaba elaluama, tama augwali tonalubao.

Daniel 4:30

Tama agai te tama po wali, “Iya, Babilon te genuai taun mu, tama te polalubo mu da. Te ena king bidi ede bidimainu eyu, te eno bomogo digi, eno te taun hodolali, te eno genuai bomo me genuai nogi te tigidali hani we bidiba ola mani dao,” kingo te po wai.

Esekiel 29:18

“Tǫde bidi, odao. King Nebukatnesar aga ami bidi dabe dali, augwaligo te taun Tair dali boi hwįbo sę te yali. Kingo aga ami bidi dabebolo sęgai hwįbo nai dabe tolomainu ilama, tama te tialigo augwali tobolu wane ilama, tama augwaligo nage wali dagala palio. Tiali goli, king aga ami dali augwali olodali bomai sę yali. Augwaligo te hwįbode augwaligo wiegi yai nai me siyu ebeo.

Aisaia 13:19

Genuai hanu Babilon te genuai mu elama, tama sawi mu elama, tama tigidali gasa hanu dabe aiyaba elaluali. Te Babilon bulu we bidi dabego augwa hanugo wiegi yai nogide mu gana pabo dao. Tiali goli, Godigo Babilon dolaibao, te agai Sodom de Gomora si dolali tiwai dolaibao.

Aisaia 10:7

“Tiali goli, Asiria tuni bidigo homu kolesaga, eno kolesaga dali side gasa me tali. Agai te gasa bulu hauwa me dolabo homu elalubao. Tama augwali sese silabo homu ebo.

Aisaia 10:5

“Ena Genuai Bidi, eno te po obao, te bulu tǫ kantri Asiria dolaibao. Megi da, te Asiria te wąbi tiwai nigilama, tama eno we bidigo ena sębę ilibo we bidi te elebao.

Godigo Nogi Ugwaba Sabo Tęąbi Po Wabo Buku Dabe 72:9

Te masigi kemi tǫ yai bulude bidalubo hani bage dabe, teda augwali te king dologode bidaibao. Tama aga boi bidi dabe te tǫba dolo pigulaibao.

Jopgo Po Asęani Elalubo Buku 1:17

Te bidigo po odubadi yaide, gasa sę bidi me sabolagaselama, te po wali, “Te Kaldia bidi hani sela aselama, te kibu kamel dabe wi sela peyu yaide, te sę bidi dabe ela muna silalio. Ena deli aselama, nagebolo e wagasobao,” wali.

Tuni Bidi Dabego Po Elalubo Buku Si 33:11

Tama tibaso Genuai Bidigo Asiria ofisa bidi dabe augwa ami bidi dabe dali tagala palama, tama augwaligo Juda dabe dali hwįnama, tama augwali aiyaba elaluali. Tama te Asiria dabego Manase pagabi elama, tama aga gunide huku munama, tama augwaligo aga sen gebelama, tama aga augwa page bulu Babilon buluba odasa pali.

Te Israel me Juda Hani Sigo Tuni Bidigo Po Elalubo Buku Si 20:12

Te Merodak Baladan, Baladango ogwa, aga te Babilon bulu king bidi. Agai te king Hesekia moni gasi yali po odali, tama tibaso, agai te pas me deli asęnama, tama me te agai te olo tau siyu maiabo nai me deli dodolama, tama agai te tagala palobo bidi dabebolo nogode munama tolali, tama augwaligo selasa pelama, te king Hesekiabolo magi pali.

Te Israel me Juda Hani Sigo Tuni Bidigo Po Elalubo Buku Si 17:24

Te Asiria king bidigo te taun Babilon we bidi dabe me, me te taun Kuta, tama me te taun Iva we bidi dabe me, tama me te taun Hamat we bidi me, me te taun Sefarvaim we bidi me agai selama, tama te augwali te Samaria bulu taun dabeba odasa pelama, tama te Israel hanigo bulu taunba augwali tatagalo pali. Tama te we bidi augwali te Israel hani we bidigo bulu tǫ selama, mu bidali.

Tigidali Nai Gagalama Nigali Side 11:31

Terago te aga ogwa Abram sali, tama Lot te aga wąį da, tama Sarai te aga wąį da. Lot te Harango ogwa, tama Sarai te Abramgo we da. Tama Tera dali, te hani bidi dabe dali, augwaligo te hanu Ur tagalama, te Kaldia pedai badu tedu peyu, tama te Kenan tǫ pedaiba bidigi pai. Augwali bidada pali, tama tomode te Kenan tǫba sabalisiąbadi, te Haran tǫ teba usu nama bidaluai.

Tigidali Nai Gagalama Nigali Side 11:28

tama Haran te aga bulude isali, te Ur te Kaldia pedai badu, te aga aya bidibadi dao.

Tigidali Nai Gagalama Nigali Side 11:9

Tama augwaligo te hanu nogi Babel poai, magi baso meni, te Yawego te tigidali hani bagego po hasegelali, tama augwali hani bugulama, tama augwali tigidali tǫ pedaiba tedali tedali tedala pela silai dao.

Tigidali Nai Gagalama Nigali Side 2:14

Te sela wali ąį nogi Taigris nogi yai. Te ąį pali, te Asiria moni tǫ te giliga pedalubo badu pabo. Te me si me si wali ąį augwaligo te nogi Yufretis nogi yai dao.

Aisaia 13:21

Te bulu te olo bulu gagalama, tama te bulu hasa dabe naga teba bidagasaibao. Te hulide bilibo ba dabe te bede dabe bidaibao. Te haniani dwai ba dabe me bidaibao. Tama bulu meme dabe te dolali hanude ugwaba samanuyu, edaba samanuyu, ela bilaibao.

Aisaia 18:6

Genuai Bidigo te gasa bulu bidi dabego te bulu dolagasomainu elama, tama te bulu ami bidi dabego tigi dabe te tǫde dabe olo munalua paibao. Tama giligade da, te ba kemodage dabego tuagasaibao, ma te kedau ebo sogo da, te bulu hasa dabego tuagasaibao, te tigi pulu dabe.

Aisaia 43:14

Genuai Bidi, aga te dage Israel Dabego te Wiegi Yai Doloba Pai Kolesaga Naga Mu Ebo God, te aga dage ugwaba sagoalu, te dage ma dobola sabo bidi, agai te po wali, “Te eno we bidi dabe dage tobade eno te ami bidi dabe te Babilonba hwįagasomainu tagala palaibao. Te Babilon dabe tigidali augwa te wiegi yai homu pemene ebo te sip dabe daiba holama, te augwa bidali bulu pesage tagalama, wi paibao.

Esekiel 23:23

Eno te gegunai gavman bidi dabe dali, te ami polalubo ofisa dabe dali te bulu tǫ kantri Babilonde, me Kaldia, me te Pekot hani dabe, me Soa, me Koa, me Asiria, te tama bulu bidi dabe selama, tama augwali te kibu hos dabede dugulama, te augwali eno odasa asaibao. Polobadu nago te bidi dabe te ogwa bidide bidibo suali, te gasa sawi yai mu bidibaso, te nago augwalide gedu yai dao.