Aisaia 14:6 - Godigo dwagi yai po buku

⁶ Te tuni bidigo gasa we bidi dali odolali genuai sębę eyu, tama dwai sę elama, tama augwali dolai dao. Tama agai gasa bulu dabe dolobo sę me hodo me dolobeo. Agai te sę mu tagalobeo.

Aisaia 14:6 Referans Kwoze

Jems 2:13

Magi baso menio. Bidi me deligo gasa bidi homu dene eyu tau sisiąyu bidali, tama te sogo Godigo we bidi dagalobode, te gasa bidi homu dene esiąyu tau sisąyani te bidi aga Godigo homu dene eyu tau sogobeo. Te menio. Tiali goli, niwai bidi agai gasa bidi homu dene elama augwali tau sali te bidi, te usu da, Godigo te bidi tau siyu, tama te Godigo bidi dagalobode te tiwai bidi aga te po tų dali te sęgę me dene sogobeo. Te menio.

Jeremaia 50:31

“Babilon, nage te hagoma ebo tǫ kantri, ena te Tigidali Bomo Elalubo Genuai Bidi, eno po dolo nageba obao, eno nageba boi bidi ebao. Te eno nagebolo dwai dene menama, nage ela muyu ebo sogo, te pedelai dao.

Daniel 4:35

Agai suali, te tǫde bidi dabe te olo nai tiwai yali. Te dagalude ensel mobo bidi dabe, me tǫde bidi dabe, te aga dologode bidiyu, tama agai augwali tonalubao. Te agai magi sę me deli yainu ebo sogo, te niwai bidi me deligo te paligobeo. Tama te niwai bidi mego agaba te tama po me hanalu, “Nago magi yainu ebawe?” te po me wagobeo.’ Eno te po wai.”

Jeremaia 25:26

tama tetigidali not badu bidibo tǫ kantri king dabeba me mobadiyaibao, te augwali digibulu bidibo, ma te pąde bidibome, te tagalao. Eno te tigidali king te tigidali tǫ kantribamenama, te augwali tumainogo yaibao. Tama nosali, te Babilon kingo me tumainogo yaibao.

Jeremaia 25:9

Tama tialima, odao. Ena Genuai Bidi, eno te not badu bidibo Israel hani isąwai bage hani tigidali i waibao. Tama me, te eno ena sę bidi i waibao, te king Nebukatnesar, te Babilon bidi dao. Tama eno te hani dabe odasa aselama, te e Juda dabego tǫ dolama, te tǫ pąde bidalubo gasa we bidi hani dabe me dolaibao. Eno te not badu hani dabego augwali mu dola silimainogo elama, tama augwali sesemane sogo doludaibao. Te gasa hani we bidi dabego subo sogo da, te augwali dwai noma mu siyu, wi umabo mu yaibao.

Aisaia 33:1

Dage te gasa bulu dabe dolobo hani, dage dolaibao. Te mu tama, dage me dolobe dao. Tiali goli, dagego gasa bulu dabe dolobo bodolu sia saibao. Tama duga digi duga dolaibao. Dagego te gasa hani dabe ili po walama, tama dagego te po mia selama, tama dagego augwali te boi bidi dabego nogoba mubo dao. Te mu tama, te gasa hanigo da dage me ili po me ola masiąbadi goli. Tiali goli, dagego te gasa bidi dabe ili po wabo sogo te sia saibao. Tama te gasa bidi dabego dage ili po olama, tama dage te boi bidi dabego nogoba muaibao.

Aisaia 10:14

Te e tǫde kantri dabe tigidali te ba be tiwai dao. Tama augwaligo wiegi yai nai dabe eno sali, bidigo te ba ge sabo tiwai yalio. Awe, te ba kimi dabego augwa ge dabe tagalama, tama bidigo olo sabo tiwai gilama, eno te kantri dabe sisinani. Tama te ge tagalali ba kimigo te ge sabo bidibolo hwa wasiąwai tiwai eyu, te kantri dabego bomo elaluali bidi dabego enabolo tagala po me wabeo. Mu menio.’ Te tuni bidigo te po wali.”

Bugagia Bidibo Kolesagade Po Asęai Buku 21:30

Te nago wiegi yai homu elalubo, me te wiegi yai kolesaga koneani me, te nago mena sę ebo kolesaga wiegi yai koneani elalubo, te tagalao, tego nage dwasianu tau sainu ebo usu me egobeo, te nago Genuai Bidiba boi bidi ebaso da, te tama tiaibao.

Jopgo Po Asęani Elalubo Buku 9:13

God agai boi bidi dali sębę ebo kolesaga sesemane sogo idu gebo dao, simanogobeo. Mu tama, te moni tamu ąįde bidibo bulu hwabidi gulamane dali, aga wali asali genuai hani dali si, te Godigo aiyaba elaluama, tama aga dologode elalubo dao.

Tuni Bidi Dabego Po Elalubo Buku Si 36:17

Tialima Genuai Bidigo te Babilon king aga ami bidi dabe dali augwaligo te Juda dabe dolomainu tagala palali. Te Babilon dabe augwaligo te Juda dabego gesi bidi te tigidali Jerusalemde ela siliyu, me te Genuai Bidi aga bede ela siliyu yali. Kingo Juda dabe hobede dwasianu me ebeo. Mu menio. Te Babilon dabe augwaligo te Juda dabe gesi bidi me gesi wegi sese tama, me monu dabe, me te mosi dabe mu yai bage pąde tama te isabo ąǫ yai bage te Genuai Bidigo te Juda dabe sese tama te Babilon kingo nogoba muani.

Te We Bidi Dabego Jerusalem Hagede Gela Wali 1:21

Te meba gasa we bidi hanigo eno ena te dene ebaso, gela wabo po odali. Tiali goli, ena dali hobede yabo bidi meni yai. Te eno boi bidi dabego nago enabolo te mani te genuai sęgę po odali. Tama augwaligo nago te yali sędę augwali wiegi yai homu pemene genuai mu ebao. Polobadu nago enabolo dwai dene maiabo bodolu muai dao. Tama te bodolu polo pedelalio. Tiali goli, megi da, eno homugo nago eno boi bidi dabeba me deli tiwai kolesaga me yao.

Habakuk 1:17

Te Babilon dabego augwa boi bidi dabe hobede dwasianu me ebo menio. Tiali goli, Genuai Bidi, nago augwaligo hwįnama, tama meba kantri dabe dolomainu sesemane sogo sula tagalaiba, agawe?

Bugagia Bidibo Kolesagade Po Asęai Buku 28:15

Te bulu tǫ kantri tonalubo bidi aga te dwai kolesaga ebo bidi, tama te bomo meni yai bidi dabe aiyaba elalubo bidi yai baso da, teda aga te laiongo bomonama te gaa weyu, te i wabo tiwai ebao, tama te boma pai bea hasa me deli te nai gegeyu bilibo tiwai ebo dao.

Jeremaia 48:17

Dage Moap pąde bidibo hani tigidali, te dage hani tigidaligo te aga genuai nogi koneai, dagego aga hobede elama, te tama po waiyąo, ‘Hobede mu dao, te bulu kantrigo bomo me genuai nogi elaluali, te tulaluali dao,’ po wao.”

Habakuk 2:5

Tama ena Habakuk eno e po obao, te dwai sę ebo bidi dabe augwali te bomai ąį tulama, te gęǫ page dolama mu eyu, tama augwaligo dwai sę mu gasa bidi dabebolo ebo dao. Te doado bage hauwa sabo homu godolo ebo bidi dabe, augwali te hagoma ebo bidi dabe weyu, augwali bugagia me bidigobeo. Augwaligo te doado bage hauwa sabo homu ebao, te isibo sogogo te we bidi hauwa sabo tiwai ebao. Tama augwaligo te bulu hauwa tǫ pedai kantri dabe dali boi hwįnama, te augwali aiyaba elaluama, te augwaligo bomo dologode bidimainu ebo dao.