Aisaia 13:2 - Godigo dwagi yai po buku

² Genuai Bidigo e tama po wali, “Dagego te ni meni yai bulu dude te plak me dodolao. Tama te ami bidi dabego sulama, sisinagasomainao. Teba augwali polo asomainu i wao. Nogo tų elama, te Babilon hanugo sunumi magi yao. Tama augwali te hwįgi pomainu taga palao.

Aisaia 13:2 Referans Kwoze

Jeremaia 51:58

Ena Genuai Bidi, eno tigidali bomo elalubao, eno obao, te boi bidi dabe augwaligo te Babilon bagulali obo tai nidigi pali alulama, te deli me elalugobeo. Tama augwaligo te taun tomoba piduali genuai bobobage sunumi isigo ulaibao. E tiwai dao. Tigidali hani we bidigo odolali sę dene yali. Te augwaligo nigali nai tigidali te isigo daibao,” te po wai dao.

Aisaia 5:26

Genuai Bidigo te digibulu ami bidi dabe aga we bidi dolagasomainu i wabo sa muaibao. Awe, te digibulu mu bidibo bage asomainu eyu, agai ho bomonama waibao. Tama te ami bidi dabe bomona togwa asaibao.

Jeremaia 50:2

“Tigidali we bidi haniba pelama, te po pusao. Te ugwa plak ugwaba sao, te bidi dabego sulama, te po odagasomainao. Te po geme dualubo tagalao. Augwaliba te tama po wao, ‘Te boi bidi dabego Babilon salio. Bel, te Babilon dabego tibo god, aga hale dwai mu yaibao. Te god Marduk me te midigi dwai mu saibao. Te Babilon dabego dwai tibo god dabe te hale dwai mu elama, te midigi dwai mu saibao.’”

Jeremaia 51:25

“Babilon, nago bomo te genuai bulu du tiwai elalubao, nago te tigidali tǫ pedai badu dolobo sę yali. Tialima, mu tama, ena Genuai Bidigo, eno nageba boi bidi eyu, te eno nogo dili bomo selama, te nage tola selama, nage te tǫba sąnama, te isigo nage mu dela silaibao.

Aisaia 10:32

Megi da, te boi bidi dabe te hanu Nopba polo sabolali. Augwaligo te bulu du Saionba edaba tonagasali. Tama augwaligo nogo sugunani, te hanu Jerusalem dolabo polo no muanio olama, ola mobao.

Aisaia 18:3

Dage te tigidali tǫde bidibo we bidi, dagego odao. Te dagego bulu dude magi me dodolai yaibaso da, dagego bugagia suiąo. Tama bu wabo nai biugel po wai da wabo si da, dagego olo saganama, bugagia odiąo.

Aisaia 11:15

Genuai Bidigo tamu wę Retsi sula somainu yaibao. Tama agai bomai posolai wali pedalomainu yaibao. Tama te waligo te wę Yufretis sula selama, dwasianu emainu yaibao. Te wę te a naga olama, me badu nogo si wę gamiadu pomainu yaibao. Tama tibaso, we bidigo te wę nogebo usu yaibao. Tama tiali, te sogo te sunumi genuai bage mu yaibao, te we bidi dabe te Asiria tagalama, asela yabo. Te yaide te Genuai Bidigo te Israel dabe Isip tagalama, asomainu sunumi genuai yali tiwai yaibao.

Aisaia 11:12

Te Genuai Bidigo dąį me deli dodolaibao te tigidali tǫ pedai kantri we bidigo sumainogo. Tama agai te Israel me Juda we bidi dabe ma sisinaibao, te boi bidi dabe kalabus elama odasa pali we bidi dabe. Megi augwali tigidali tǫde bida bida pabo. Tiali goli, Genuai Bidigo augwali ma odasa asaibao.

Godigo Nogi Ugwaba Sabo Tęąbi Po Wabo Buku Dabe 60:4

Nago te wi pao po te nageba lotu wabo we bidiba pusai, te boi bidi dabego augwali dolidali weyu, augwali wi pomainogo yali.

Aisaia 19:16

Tama te sogo te bulu Isipgo te tama sęgę tolalubaso da, augwaligo suaibao. Te Tigidali Bomo Elalubo Genuai Bidigo augwali dolainu nogo dolalubo sueibao. Tama augwali te we dabe wi elama, noma sabo tiwai yaibao.

Aisaia 31:9

Te Asiria dabede genuai wi mu pedalaibao. Tama augwaligo bomai genuai hanu tulaluaibao. Tama te augwaligo ami ofisa dabego eno hwįbo plak ugwa walai subaso, augwali noma selama, augwaligo dili nagamea pelama, tama augwali wi paibao.” Te da te Godigo po dao. Te agai bomai isi te bulu du Saion te Jerusalem bulude elalubao.

Jeremaia 50:41

“Suao! Te ami dabego te not badu bidali tagalama, asainogo ebao. Augwali te bomai hani mu te king hauwa elalu, te digibulu mu bidibao. Megi da, augwaligo te boi hwįabo nai sisi ebo dao.

Jeremaia 51:12

Dage boi bidigo, dagego plak ugwa ugwanu sagulama, te boi bidi dabego hwįbo bomo eyu, te Babilon genuai obo alumainao. Te taunde tonaluabo ami bidi dabe muao, te augwaligo sę bugagia mu yao. Te ami dabe geme duala sigi pomainogo tagala palama, te augwaligo Babilonba hwįabo sisi yao po walao. Genuai Bidigo te Babilon we bidi dabeba dwai dene mabo sę umagia mu yaiba wali, te megi da, agai te sę yainogo ebao wali.