Aisaia 11:5 - Godigo dwagi yai po buku

⁵ Te tama doloba pai kolesagago tama aga we bidi tonaluaibao. Aga bomo elama bidiyu, aga sę bugagia yaibao.

Aisaia 11:5 Referans Kwoze

Efesus 6:14

Awe, dage e tama tiwai dola selama dolaluao. Dagego Godigo mu po te duga kugulu tiwai gudulama, tama bugagia dąų olama, tama te doloba pai wiegi yai kolesaga ebo te dagego duga hagawia sesela sabo nai tiwai abiao.

1 Jon 1:9

Tiali goli dago yali dwai sę dabe po dago te Godibolo pusuyu da, teda agai aga polobadu dąų wali po wali peyu, tama agai da dali te doloba pai kolesaga naga eyu yaibao. Agai dago dwai sę yali sela sąwaibao, tama dago yali dwai kolesaga tigidali agai sela sąnama tama da te meda isąwai we bidi ilaibao.

2 Korin 6:7

Dago mu po pusubo dao. Dago dena sę Godigo bomode ebo dao. Dago doloba pai kolesaga ebo dao, tama tebogo te wąbi hwįbo nai te dolo nogode me, pobase nogo me elalubo tiwai elama, tama tede dago wąbi hwįbo dao.

Aisaia 59:17

Agai te doloba pai kolesaga te kapa holobo ugwa mubo tiwai eyu, te aga hagawiade mesega sabo tiwai yali. Te aga te we bidi ma sabo bomo te hwįbo madi kapa tiwai muani. Te aga ugwa gudubo tiwai bomonama dąų ola selama, te dwai sę ebo bidi dabeba dene mawainu tiaibao. Te aga haliga sębę ebo te bobobage ugwa aiyaba tagalalubo tiwai yaibao.

Aisaia 25:1

O Genuai Bidi, nage eno God dao. Tama eno nago nogi ugwaba saio. Magi baso meni. Nago te bidigo isąwai bomai sę dabe mu ebo dao. Da tau sainogo, nago tigidali nai dabe mu usu nani, te polobadu digi nago yaibao po wali gilama.

Kraisgo Geme Dualali Sę Pedelabo Po Jonbolo Ola Mani 3:14

Te eno suali bidigo enabolo te po me ma wai, “Te megi nago te Laodisia bulude Godigo po odoyu bidibo we bidi tonalubo ensel mobo bidibolo e po asęna tolao: ena te mu po wabo page bidi mu, ena te Godide homu kęą pai bidi bidiyu, tama eno te Godigo po tigidali dolo mu te we bidibolo pusubo dao. Sesemane sogo eno mu po naga pusubo dao. Ena te Godigo nigali nai tigidali page mu dao. Eno e po nagebolo ola tolobao.

Kraisgo Geme Dualali Sę Pedelabo Po Jonbolo Ola Mani 1:13

Tama eno suali, te sole dabe munalubo tomode bidi me deli te bidi mu tiwai tede dolalubo suai. Tama te bidi aga bobage ugwago sągą halua sai bidi, tama te bidigo tigide eno suai, te kapa golgo nigali nai aga hagawia bagulai nai te eno suai.

1 Pita 4:1

Te bidi Krais aga tigide dene saligo da, teda dage bomo siyu bugagia bidimainogo eyu, dagego agai yali homu kolesaga tiwai gilama yao. Magi baso meni. Niwai bidi agai dwagi yai sę yali goli aga dene siyu da, te bidi agai te dwai sę ebo tagalai dao.

Hosea 2:20

“Eno te ena dąų wali po wali peyu, tama nage te eno we tiwai sesemane bidaibao. Tama nago te tiwai koneyu, ena tama te naga Genuai Bidi da homu yaibao,” wali.

Hibru 2:17

Tama tibaso, te tigidali naide aga te tigidali we bidi tiwai mu pedalomainogo tiali. Magi basowe? Agai tama tialigo da, tama aga te God dali we bidi dali tomode dolalubo pris tobolu bidi bidabo te usu igibu tama Godigo sę tolaluaibao. Agai te we bidi homu dene eyu, tau sabo wiegi yai kolesaga eyu, tama aga te Godiba aga homugo kęą pai bidi bidai. Tama tiyu, agai te Godigo te tigidali we bidigo dwai sę yali sęgę sela sąwainogo eyu, te aga ofa ilali te usu yai dao. Tiali goli aga te we bidi tiwai mu pedaligi menigi da, teda te sę tigidali ebo aga usu menigi da.

Godigo Nogi Ugwaba Sabo Tęąbi Po Wabo Buku Dabe 93:1

Genuai Bidi king bidibao. Agai genuai nogi mu elalubao, tama genuai bomo me elalubo. Agai e tǫ te aga bidibo pesagede bomo elama, mu elalumainu yai dao.

Godigo Nogi Ugwaba Sabo Tęąbi Po Wabo Buku Dabe 109:19

Tama aga te pogo aga te ugwago mesege sabo tiwai elama, tama aga haliga te kukulu gudubo tiwai elalumainao.

Aisaia 9:7

Te tuni bidi te tuni bidi Devit hasegelama, bidaibao. Tama aga te Devitgo tuni bidi siade dualaluyu, te we bidi dabe tonaluaibao. Te agai gavmanigo bomo tigidali sogo genuai holudaibao. Tama hwįbo me menia pelama, bugagia tigidali sogo bidaibao. Magi baso meni. Te tuni bidi aga te tigidali sogo dwagi yai doloba pai kolesaga naga ebo dao. Tama agai te kolesagago aga te bomai tuni bidi bidaibao, te megi me, tigidali sogo nosali me. Genuai Bidi Tigidali Bomo Elalubo Bidigo homugo bomo mu elama, we bidi dabe dali wiegi yai sę yabo homu ebao. Tama tibaso, agai te sę dabe me elama, pedalaibao.

Aisaia 32:1

Odao, te tuni bidi me deli pedalaibao. Tama te tuni bidi dali, tigidali tǫ pedai kantrigo genuai bidi dabe dali, augwaligo wiegi yai doloba pai kolesaga naga elama, te we bidi dabe tonaluaibao.

Sekaraia 8:16

“Tama dagego e tobage kolesaga dabe iyąo. Dage tigidaligo te mu po naga gasa bidi dabe dali waiyąo. Tama dagego po te po tų kotde te mu po naga weyu, bugagia dodolobaso da, te po silaibao.

Godigo Nogi Ugwaba Sabo Tęąbi Po Wabo Buku Dabe 45:4

Nage te genuai nogi elalu, te polalubo king dao. Nage te hosde dugulasa, tama te hwįboba pelama, tama te hwįbo bage aiyaba elaluao. Nago hwįainu da, te bidi dabego nago po te aiyaba me elalugobeo. Tama nago hwįbo te bidi dabe dolasa bilimainu tau siyu hwįani. Te nago hwįbo te bomo yai pedelaibao, tama te dwai bidi dabe nagede wi mu emainu ebo dao.

Godigo Nogi Ugwaba Sabo Tęąbi Po Wabo Buku Dabe 89:9

Nago te bomai tamu ąį tonalubao. Te ąį dini hogodobo sogo, nago aiyaba elalubaso, tama memenege me eyu me egobeo.

Aisaia 9:6

Magi baso meni. Ogwa me ame neyu, daba polo sabolali. Te wai me deli Godigo dabolo mani. Aga dago tuni bidi bidaibao. Tama agai tama nogi dabe elaluaibao, te Dwagi Yai Kolesaga Mu Mabo Bidi dao, tama God Tigidali Bom o Elalubo Bidi, tama Tigidali Sogo Bida Bida Pidu Bidibo Aya, tama Bugagia Bidibo Page Sela Mayu, me Tabi Nagame Ilibo Tuni Bidi. Agai te tobage nogi dabe elaluaibao.