Aisaia 11:14 - Godigo dwagi yai po buku

¹⁴ Augwali si talua selama, tama augwaligo te giliga pabo badu buluba hwįgi peyu, te Filistia dabe dali hwį yaibao. Tama me, augwali sigo te giliga asobo badu we bidi dabego nai dabe hwįgi pelama, augwaligo nai dabe saibao. Te augwali sigo te bulu Idom we bidi, me Moap, me Amon we bidi dabe augwali sigo elaluaibao. Tama augwali sigo te bulu dabe tonaluaibao.

Aisaia 11:14 Referans Kwoze

Joel 3:19

“Te Isip dabego tǫ te wa pai bulu pedelaibao, te Idom dabego tǫ da, te olo bulu tiwai pedelama, bidi tede me bidigobeo. Magi baso meni, te hani sigo te Juda dabe dali hwįnama, tama te magi dwai sę isąwai we bidi olodali elali.

Daniel 11:41

Te ami dabe te Godigo aga we bidiba mawainu yali wiegi yai tǫba sabolaibao, tama augwaligo te genuai hani we bidi ela mueibao. Tiali goli, te amigo te bulu tǫ kantri Idom, me Moap, me te genuai bulu tǫ kantri Amon, te badu me sogobeo.

Jeremaia 49:28

Genuai Bidigo po te Kedar hanide me te wa pai tǫ pedai Hasorde elalubao. Te Babilon king Nebukatnesargo boi hwįnama, te hani dabe aiyaba elaluai. Hasia bolo God Genuai Bidigo te Kedargo boi bidi dabeba te po walali, “Dage hogodama, te Kedarba boi hwįgi pao. Te giliga pedalubo pedai badu te we bidi mu silao.

Aisaia 25:10

Genuai Bidigo Saion bulu du bugagia tonaluaibao. Tiali goli, agai te Moap dabe mu dolaibao. Agai te boi bidi dabego augwali dolama, mesegelama, agayagasomainu yaibao. Te kau kibu dabego nosai augwa diba agalama, ela bulubo tiwai yaibao.

Amos 9:12

Tama tilama, tama te Israel dabego boi hwįnama, te Idom tǫ kantri pedai badu elaluali tǫ tigidali ma sobadi, tama augwaligo te gasa tǫ kantri te eno augwaligo somainu dąį ilali kantri tǫ me ma sesa paibao.” Te Genuai Bidigo po dao, tama agai te aga wali po tiwai gilama yaibao.

Matyu 8:11

Eno dagebolo obao, te sia pedalobo badu me, te sia aiyaba dega sigi pabo badu me, te si badu te we bidi hauwa aselama, tama augwali te polobadu e tǫde bidali bidi te Abraham me Aisak me Jekop te bidi dabe dali deliba dualama, tama dagalude te Godigo we bidi tonalubo madi tomode bidiyu moni nai tueibao.

Sefanaia 2:5

Tega, dage Kenan tǫde bidibo Filistia dabe, nambisde bidibo Keret bage, dage me dolaibao! Genuai Bidigo dage po tų ela mawai dao. Tama agai dage dolama, tama bidi deli me bidigobeo.

Aisaia 60:14

Te polobadu nageba dwai sę eyu, te nage godolo homu isąwani hani dabe, te augwa tobolu basiasa nageba asaibao. Te augwa kidu sugunugulama, te nago sągą pąde augwa tobolu basigulama, te nageba genuai nogi mawaibao. Te augwa nage nogi te tiwai weyu, ‘Genuai Bidigo Taun da,’ te ‘Saion da,’ waibao, ‘te Israel Godigo Taun, aga te Wiegi Yai Doloba Pai Kolesaga Ebo God mu dao.’”

Aisaia 59:19

Genuai Bidi te genuai wę asobo tiwai eyu, te Genuai Bidigo ponobo sogo te dąų walali wę gisigilama, te wę asesa mu pomainu yaibao. Te tigidali tǫ asesa mu pomainu yaibao. Te tigidali tǫ habu we bidi dabe, te giliga pedalubo badu gagalasa pelama, te giliga degegi paboba usu nigi paibao, te augwaligo Genuai Bidigo bomo me genuai nogi koneama, te aga nogide wi elama, te augwali aga dologoba aselama, bidimainogo yaibao.

Aisaia 33:1

Dage te gasa bulu dabe dolobo hani, dage dolaibao. Te mu tama, dage me dolobe dao. Tiali goli, dagego gasa bulu dabe dolobo bodolu sia saibao. Tama duga digi duga dolaibao. Dagego te gasa hani dabe ili po walama, tama dagego te po mia selama, tama dagego augwali te boi bidi dabego nogoba mubo dao. Te mu tama, te gasa hanigo da dage me ili po me ola masiąbadi goli. Tiali goli, dagego te gasa bidi dabe ili po wabo sogo te sia saibao. Tama te gasa bidi dabego dage ili po olama, tama dage te boi bidi dabego nogoba muaibao.

Aisaia 16:14

Tiali goli, megi Genuai Bidigo po genina ma weyu, e tama obao, “Kibu be sela digi mu elalubao, te Moap dabe augwa wiegi yai nai dabe dali dolabo. Eno te sela kibu bego deli deli bubuga me polua bugagia mu nedebao. Tama te kibu be selago dei dolo mu tama eno te yaibao wali sę eno yaibao. Te we bidi hauwa mu megi te Moapde bidibao. Tiali goli, te bulu dolobo side, te bidi hani dwasianu naga te bulude bidaibao, tama augwali bomo mu meni yaibao,” wali.

Israel Hanigo Namba 24:17

Eno te nosali yabo sę dabe naga suali, te sę megi pedalugobeo. Tama eno te Israel dabe bidibo suali. Te bidi me deli te bomo dali genuai nogi yai bidi te Israel hani dabego tuni bidi pedalaibao. Tama agai te Moap tobolu bidi dabe dali bomona mu hwįaibao, tama augwaligo tobolu dili aluaibao, tama agai te Setgo hani wąį dabego tobolu dili dolama tagalaibao.

Aisaia 14:29

“Te Filistia bage, dage tigidaligo odiąo. Te dage elali wąbi dage polo toga pali dao. Tiali goli, dagego homugo dage bugagia bidaibao homu igimio. Te dwai gula mane me isibosi, te gasa dwai gula mego agai pesage sabo dao. Tama te gula manego gasa dwai gula mane mu me ame nabo dao. Aga te iba, eda bola bilibo bogo yai gula mane dao.

Aisaia 15:1

Te bulu Moap polo dolalio. Tama Genuai Bidigo te po mani. Te hulide boi bidi dabe aselama, te hanu Ar me hanu Kir dolagasali, tama megi da, Moap mu tama sese dolalio.

Aisaia 63:1

Te king bidi tiwai bugagia mu au elama, te taun Bosra te tǫ kantri Idom badu tagalama asobo bidi de dawe? Te aga genuai bomo dali wele sesa asobo bidi de dawe? Te aga gudali ugwa tonani te mama mu yalio. “Te ena, Genuai Bidi tama dao. Eno te we bidi dabe ma sabo bomo elalubao, tama eno te tiwai po obao, te eno doloba pai kolesagade, eno te augwaligo boi bidi dabe aiyaba elaluaibao,” wali.

Jeremaia 40:11

Te sogo te Juda dabe me badu te tǫ pedai Moap, me Amon, me Idom, me gasa tǫ kantri badu bidaluali. Augwaligo te tiwai po odali, te Babilon kingo te dwasianu hani we bidi te Juda tǫde bidimainogo elama, te kingo Gedalia dąį ilama, augwali tonaluao po wai.

Jeremaia 48:40

Genuai Bidigo te tiwai po wali, “Suao. Te boi bidi dabe umagia udayu, te Moap dolainogo ebao, te ba kemodagego te hasa bolo elainogo ebo tiwai yali, te tobolu nisi diligina pelama, te aga bogo nisi diligina pabo tiwai ebo dao.

Jeremaia 49:22

Te boi bidi dabe umagia aselama, te Bosra taun dolainogo ebao, te ba kemodage ugwaba bola holama, te tobolu nisiba mage bula selama, aiyaba dulama, te aga bogo diligasa dulu, te hasa bolo elibo tiwai yaibao. Tama te sogo te Idom ami dabe wi elama, homu si yaibao, te we dabego wai ame nainogo tigi dene ebo tiwai yaibao,” wali.

Esekiel 25:14

Eno te Idom dabego dwai kolesaga wei ponabo homu yali, tibaso te eno ena we bidi augwali te Israel dabe, te augwali elali boi hwįgi pomainu tagala palaibao. Te kolesagade te Idom dabego eno haliga sębę genuai ebo koneaibao. Tialima, te Idom dabego te tiwai bugagia koneaibao, ena digi eno augwaligo dwai sę yali wei ponobao homu yaibao. Ena God Genuai Bidi eno te po wai dao.”

Habakuk 1:8

“Te Babilon bage augwaligo hos kibu dabe omagia polo udabo dao. Tama augwaligo meba tigidali bulu hasa dabe omagia udabo edelama, mu udabo dao. Tama te hos dabego dolama mu hwįyu ebo dao. Tama augwaligo hwįbo kolesagago te hulide bilibo te uni yowigo hwįbo kolesaga edelama mu ebo dao. Te hos kibu dabe augwali sasamano pelama, tama te hwįabo bidi dabe augwali te hosde dualama, tama augwali digibulu bulu mude hogodama, tama udulama, tama hwįainu pabo dao. Te bage augwali te ba kemodagego te hasa dabe ela tuainu te bogo si pobea selama, tǫba tulalubo tiwai elama omagia mu udawaibao,” wali.

Sefanaia 2:9

Mu tamao, ena Tigidali Bomo Elalubo Genuai Bidi ena bidalubao. Ena Israel dabego God, eno mu po weyu, te dąų obao. Te Moap dabe, me Amon dabe, augwali te taun Sodom de Gomora si dolali tiwai tama yaibao. Tama hae naga holama, tama augwaligo tǫ mesega saibao. Tama tamu sabo dedage dabe naga pedelama, tama te bulu dolama, te tama elaluaibao. Eno hani augwali me bidali da, te bidi dabe augwaligo augwali dali hwįnama, tama augwaligo nai dabe kegelama saibao, tama augwaligo tǫ me saibao,” te po wai.

Te Israel Tobolu Bidi Dabe 6:3

Tigidali sogo te Israel dabego nai dabe te gide bulama elalubadi, te Midian dabe me, te Amalek dabe dali me, te kemi tǫ bulude bidibo bidi dabe, te giliga pedalubo badu bidi dabe, te tama bidi hani aselama, tama augwaligo te Israel dabe dali boi hwįagasali.

Jeremaia 49:2

Ena Genuai Bidi, eno te po obao, mu tama eno bodolu muani sogo me deli elalubao, tama te sogo eno te boi bidi dabego te taun Raba teba hwįgi pomainogo tagala palaibao, te kantri Amongo genuai taun dao. Augwaligo te taun dolama, te olo pobele bage du holali tiwai elalueibao. Te boi bidi dabego te genuai taun pąde elalubo bulu dabe siago ulaibao. Tama nosali, te Israel dabego te Amon dabego sali tǫ ma saibao. Te Genuai Bidi, eno po dao.”

Sefanaia 2:7

Tama te dwasianu Juda hani augwali dolisąma yali, te bage augwaligo dagego tǫ saibao. Tama augwaligo sipsip kibu dabego tede nai tulama, tama te Juda dabe augwali te Askelon taun bede piyu yaibao. Tama God augwa Genuai Bidi, augwa Juda dabego Genuai Bidi augwali dali bidiyu, tama agai augwali augwa kantride bugagia bidimainu ilaibao.