Godigo Sęba Tagala Palai Bidigo Po 28:31 - Godigo dwagi yai po buku

³¹ Tama agai Godigo homugo we bidi tonalubo sę po te we bidibolo pusa mani. Tama agai te Genuai Bidi Jisas Kraisgo po pusa mayu, aga hale me ebe. Tama agai te po pusubadi, bidi mego ‘Nago te wabo po tagalao,’ te po wagasobe, bidi mego habu selebe.

Godigo Sęba Tagala Palai Bidigo Po 28:31 Referans Kwoze

Godigo Sęba Tagala Palai Bidigo Po 4:29

Genuai Bidi, augwaligo da elaibao po wai, te po nago odao. Da da, nago sę ebo bidi dabe da. Nago da bomo ilao, tama dago nago po pusubo wi egobeo.

Godigo Sęba Tagala Palai Bidigo Po 28:23

Tama augwaligo Polgo wabo po ma odomainu, dua yabo bodolu me muani. Tama we bidi hauwa mu Polgo bodolu mani digi asali. Pol agai te Godigo homugo we bidi tonalubo sę po augwalibolo pusali. Tama Pol agai Mosesgo polobadu asęani po dabe me, polobadu Godigo po sela bilali bagego asęani po dabe me, pusa mani, te po dali daganama pusali, te augwaligo Jisasde po mu daba homu emainu. Tama te po pusubo kigamu mu gagalama, pio muba sabolali.

Matyu 4:23

Te Jisas aga te moni tǫ Galili te tigidali sesege badu aga biligi pai. Agai aga ola mabo po te Juda dabego bomo yai po ola mabo be tomode te we bidibolo ola mawai. Tama ola mayu, agai augwalibolo te Godigo we bidi tonalubo sęde te gesi dwagi yai po pusali, tama te tigidali haniani gasi dabe me te tigidali dwai naigo te tigi dolai we bidi augwali tigi usu ma ilai dao.

Polgo Si Wali Pas Timotiba Asęani - 2TI 4:17

Tiali goli Genuai Bidi aga ena dali bidaluyu, tama enabolo bomo mani. Eno te Godigo po sese pusubo te usu mu emainu, tama te agai po odisąwai hani tigidali augwaligo odomainogo eyu, agai bomo enabolo mani. Tama augwali te bidi ela tubo dwai hasa laion tiwai bidiyu, tama augwaligo ena ela muidali weyu Godigo ena tau selama dwagi yai madiba muanio.

Filipai 1:14

Tama ena e kalabus bede bidibaso, dago ama dede meba hauwa augwaligo bomo te dago Genuai Bidide selama, tama wi ebo kolesaga tagaliyu bomo elama, te Godigo po pusubo sę megi bugagia ebao.

Godigo Sęba Tagala Palai Bidigo Po 20:25

Polgo te po me wali, “Mu tama dao, dagego te po odao. Tama eno homugo te po megi silibo dao. Tialima, ena polobadu dage tomode biliyu, dage tigidali we bidibolo eno ola mawai dao, God aga dago Genuai Tobolu Bidi, agai da tonaluaibao wali. Tama megi eno koneanio, dagego ena munu ma sugobeo.

Godigo Sęba Tagala Palai Bidigo Po 8:12

Tiali goli, Filipgo te Godigo we bidi tonalubo sęde dwagi yai po olama, te we bidibolo te Jisas Kraisde po me wali. Tama te po odama, te we bidi augwaligo te poba augwa homu tigidali munama, Filipgo augwali baptais mani, we dabe sibi me, bidi dabe me.

Godigo Sęba Tagala Palai Bidigo Po 4:31

Te augwaligo Godibolo po olama, silibo si, te sisinagasali bede tǫ mali yai. Godigo Dwagi Yai Mobo augwali kolesagaba asali, tama te sogo gagalama, Godigo po augwaligo pususu pai, wi ebe.

Godigo Sęba Tagala Palai Bidigo Po 5:42

Tama te Moni Lotu Be tempel tede me, te we bidigo bede me, augwaligo sesemane sogo te Dwagi Yai Po te we bidibolo pusa mayu ola mani, te Jisas da, Godigo sa muai bidi Krais dao po wai.

Polgo Si Wali Pas Timotiba Asęani - 2TI 2:9

Eno te gesi dwagi yai po pusubaso, tama tede naga te bidi augwaligo ena te gavmango bomo yai po bolali dwai bidi da homu elama, tama augwaligo haniani sęgę enabolo mani. Awe, augwaligo ena kalabusiba me muani. Tiali goli te Godigo po da, augwaligo te kalabusiba me mugobeo, te usu egobeo.

Godigo Sęba Tagala Palai Bidigo Po 23:11

Te sę augwaligo elama, te sogo hulide te Genuai Bidi Jisas aga Pol pageba aselama, dolaluali. Tama agai te po wali, “Pol, nago Jerusalem bidibolo eno po pusa mani. Tama nosali nago te pusali po tiwai naga te Rom be nanide me pusa mao. Tama tibaso, nago wi egio, nago homu dąų olama, bidao,” wali.

Dwagi Yai Gesi Po Lukgo Asęani 8:1

Te tiali magede, Jisasgo Godigo we bidi tonalubo dwagi yai po pupusu biligibu genuai be nani dabe dali, dwasianu be nani dabeba pali. Aga dali bilibo nogo si olama, sągą si peda sigisu tama bidi dabe aga dali pali.

Dwagi Yai Gesi Po Makgo Asęani 1:14

Te Jongo te gavman bidi Herotbolo “Dwai sę egio” po obaso, te Herot sębę eyu, tama agai Jon kalabusiba muani. Tama te sogo Jisas te Galili moni tǫ pedai tomoba pelama, tama Galili tǫde biliyu, agai Godigo gesi dwagi yai po pusa mena mena bilai, te po wai,

Godigo Sęba Tagala Palai Bidigo Po 1:3

Tama Jisas isilama, ma hodaluama, te bidi sese si sogo aga bidi dabebolo agai tigi waselai, hauwa sogo. Tama agai augwaligo gedude sę dabe hauwa yali, te augwaligo aga gesi ma bidibo mu konemainu yai. Tama augwali homu si ebe. Augwaligo aga gedugo suali. Agai Godigo we bidi tonalubo sę po augwalibolo pusa mani.

Godigo Sęba Tagala Palai Bidigo Po 28:30

Te kibu be si Rom bulude agai osogo abelai bede bidali. Tama aga te bidibo bede mone gego aga digi abeleduali. Tama aga pageba te we bidi hauwa asobaso, dwagi yai homu yali.